1. Nkaakali kaambo kapa kuti tubotelwe?

KULABOTEZYA kubona bakombi baJehova mbubali kuvula. Mumunyaka wakiinda, twakaba azyiiyo zyaBbayibbele zyiinda ku10 000 000. Eezi zitondeezya kuti bakombi baJehova balikupa kuti mumuni wabo umunike. Alubo bantu biingi bakanjila Chiyubulusyo mumunyaka wakiinda. Bakayiya atala aLeza mbaakatutondeezya luyando kwiinda mukutupa chinunuzyo.—1 Joh. 4:9.

2, 3. (a) Niinzi chitatukachizyi kuba mbuuli “mimuni yakumunika ansi”? (b) Kweendelana amajwi akaambwa aJesu aali muli Matayo 5:14-16, tulalanga-langaanzi muchiiyo eechi?

² Munyika yoonse, bakombi baJehova baambuula milaka iisiyene-siyene. Kwaambuula milaka iisiyene-siyene takutukachizyi kukomba Taateesu Jehova katujisini. (Ciy. 7:9) Tulakonzya kuba mbuuli “mimuni yakumunika ansi” nikuba kuti twaambuula milaka iisiyene-siyene akuti tuzwa muzisi zisiyene-siyene.—Flp. 2:15.

³ Kuvula kwabantu mumbunga yaLeza, kukomba katujisini akukkala katulindide zipa kuti tulemeke Jehova. Muchiiyo  eechi, tulalanga-langa mbutukonzya kupa kuti Leza alemekwe munzila eezi zitatu.—Bala Matayo 5:14-16.

4, 5. (a) Nziizili zimwi zintu nzitukonzya kuchita kuti mumuni wesu umunike kutali kukambawuka akulikke? (b) Kubatondeezya luyando bantu kutugwasya biyeni? (Langa chifanikisyo chili kumatalikilo achiiyo.)

⁴ Chiiyo chitii, “Light in the Darkness” (“Mumuni Mumudima”), chakali muNgaziyakulinda yaChikuwa yamuJune 1, 1925 chakati: “Taakwe muntu uukonzya kusyomeka chakumaninina kuMwaami kunze kwakuti wabelesya mweenya woonse ngwajana kuti mumumi wakwe umunike.” Alubo chakayungizya kuti: “Kuti achite oobo, muntu weelede kubuzya bantu makani mabotu akupona kweendelana amumuni.” Imwi nzila mbutukonzya kupa kuti mumuni wesu umunike, nkukambawuka makani mabotu akugwasya bantu kuti babe basikwiiya. (Mt. 28:19, 20) Alubo tulakonzya kupa kuti Jehova alemekwe kwiinda mukulijata kwesu. Bantu mbitukambawukila abasimweenda nzila balakonzya kubona nzila njitulijataayo. Kumwemwetela akubajuzya chaluyando kulakonzya kubagwasya kuti bazibe mbutubede aLeza ngutukomba.

⁵ Jesu wakaambila basikwiiya bakwe kuti: “Ciindi ncomunjila mung’anda, amubajuzye bali mumo.” (Mt. 10:12) Kumasena Jesu abaapostolo nkubakali kukambawukila, bantu bakali achiyanza chakutambula beenzu mumaanda aabo. Mazubaano bantu biingi tababatambuli pe beenzu. Pesi kuba bantu baangunukide akubapandulwida kaambo kapa kuti tubaswaye kulakonzya kupa kuti mwiining’anda atakataazikani akuti ayande kutuswiilila. Tweelede kuba bantu bamwemwetela. Bakwesu abachizi bachita bukambawusi bwaantanganana basungwaazigwa kuchita oobo. Nitukambawuka katubelesya nzila eeyi, tuyoobona kuti bantu balaswiilila kuti katumwemwetela anitubajuzya kabotu. Kuchita oobu, kulakonzya kupa kuti babweze mabbuku eesu. Kubatondeezya luyando kulakonzya kupa kuti tuzuwe zyiingi ambabo.

6. Umwi mukwesu amukayintu wakwe bachembeede bakachita biyeni kuti bakonzye kukambawuka?

⁶ Umwi mukwesu amukayintu wakwe bachembeede bakuEngland bakkala kabachiswa-chiswa zyakuti kulabayumina kukambawuka kung’anda ang’anda. Bakachita bubambe bwakuti mumuni wabo umunike kubusena buli afwiifwi ankubakkala. Babikka mabbuku apandulula Bbayibbele aatebbulu chiindi bazyali nibaza kuzoobweza bana babo nibachayisya kuchikolo. Bazyali biingi bakaba achiyandisyo mpawo bakabweza mabbuku aategwa Questions Young People Ask—Answers That Work, Voliyumu 1 a2 atumwi tubbuku. Umwi muchizi payona wamumbungano yabo wakasala kukambawuka ambabo. Kusangalizya kwamuchizi ooyu ambubakali kutondeezya luyando bampuli eeyi, zyakapa kuti umwi muzyali ayande kwiiya Bbayibbele.

7. Kujana twabagwasya biyeni bantu bachijila kubusena nkutukkala?

⁷ Muminyaka yakiinda, kuli bantu biingi bakachijila kuli zimwi zisi. Kujana twabagwasya biyeni bantu bali boobu kuti bayiye atala aJehova amakanze aakwe? Chakusaanguna, tulakonzya kwiiya kujuzya mumilaka yaambuulwa abantu bachijila kubusena nkutukkala. JW Language app ilakonzya kutugwasya kuchita oobo. Alubo tulakonzya kwiiya majwi mache mumilaka yabo kuti babe achiyandisyo. Mpawo tulakonzya kubatondeezya webbusayiti yesu iitegwa jw.org kuti babone mavidiyo amabbuku ajanika mumilaka yabo.—Dt. 10:19.

8, 9. (a) Ngaali malayilile ngitujana kumiswaangano yaakati kamviki? (b) Bazyali beelede kuchitaanzi kuti bana babo bakonzye kusandula kumiswaangano?

 ⁸ Jehova ulatuyanda nkaambo wakatubambila Muswaangano waBuumi Amulimu kuti tukambawuke munzila iizwidilila. Malayilile ngitujana kumiswaangano eeyi, atugwasya kuti tukonzye kubweedulula kubantu mbitwakakambawukila akuti twiiyaabo Bbayibbele.

⁹ Bantu batuswaya kumiswaangano bakabona kuti nikuba bana balatola lubazu kumiswaangano yesu. Nibazyali amugwasye bana banu bachite kuti mumuni wabo umunike kwiinda mukubayiisya kuti kabasandula kababelesya majwi aabo. Nsandulo nzibapa, chimwi chiindi zilakonzya kugwasya bantu batuswaya kuti bayiye kasimpe.—1 Kor. 14:25.

10. Tweelede kuchitaanzi kuti kube kujatana mumpuli?

¹⁰ Imwi nzila mbutukonzya kuchita kuti mumuni wesu umunike nkuchita kuti tujatane mumpuli amumbungano. Imwi nzila iikonzya kugwasya bazyali kuti bachite oobo nkuba abubambe bwaKukomba Kwampuli mviki amviki. Bamwi beebela pulogilamu yaJW Broadcasting nibachita kukomba kwampuli. Nimwamana kweebela, mulakonzya kwaambuuzyania atala atwaambo tukonzya kumugwasya mubuumi bwanu. Muzyali nazulwida muchiiyo chakukomba kwampuli, weelede kubona kuti nzibayanda bana baniini zilisiyene anzibayanda bachikula. Bazyali beelede kubona kuti zyoonse nzibayiya zipa kuti boonse bamumpuli bagwasigwe.—Int. 148:12, 13.

11-13. Kujana twachita biyeni kuti toonse tukkale katujisini mumbungano akugwasya bamwi kuti mumuni wabo umunike?

¹¹ Kujana bachikula bachita biyeni kuti kube kujatana mumbungano akugwasya bamwi kuti mumumi wabo umunike? Nibachikula mweelede kuchitaanzi kuti mutondeezye kuti mulabayanda bachembeede? Mulakonzya kubuzya chabulemu zintu zyakabachitikila mukukomba Jehova. Kuchita oobo kuyoomusungwaazya moonse kuti muzumanane kuchita kuti mumuni wanu wakasimpe umunike. Alubo toonse tulakonzya kugwasya bantu batuswaya kuNg’anda yaBwaami kuti balimvwe kabaangunukide. Eezi ziyoopa kuti tukkale katujisini akuti batuswaya bachite kuti mumuni wabo umunike. Mulakonzya kujuzya beenzu chaluyando akubagwasya kuti bajane aakukkala.  Mulakonzya kubagwasya kuti baangunuke kwiinda mukubatondeezya bamwi bakwesu abachizi.

¹² Kuti wasalwa kuti uchitisye muswaangano wamulimu wakukambawuka, kuli zyiingi nzukonzya kuchita kuti ugwase bachembeede kuti batole lubazu mumulimu wakukambawuka. Balakonzya kubagwasya kuti bajane busena bwakukambawukila buli afwiifwi. Chimwi chiindi, balakonzya kusala kuti bayinke awumwi uuchikula kukukambawuka, kuti akonzye kubagwasya muzintu zimwi. Alubo mulakonzya kugwasya aabo bachiswa naakuti batakonzyi kuchita zyiingi. Kubabikkila maanu bamwi kuyoogwasya bachikula abachembeede, balaaluzibo lwiingi abalaaluzibo luche kuti bakambawuke makani mabotu chabusungu.—Lev. 19:32.

¹³ Sintembawuzyo wakati: “Ncobeni ncintu cibotu cibotezya, na babunyina bakala kabotu antoomwe.” (Bala Intembauzyo 133:1, 2.) MaIsrayeli kwakali kubagwasya kukkala aamwi abakombinyina bakali kuyanda Jehova. Kwakali mbuuli kuti mafuta mabotu aanunkulila aatilwa mumutwe. Tulakonzya kuchita zimwi zintu zipa kuti tukkale katujisini abakombima. Tulamulumba kuti kamuli kuchita oobo. Tulakonzya ‘kujula myoyo yesu’ kuti tuyungizye kuchita oobo chiindi achiindi.—2 Kor. 6:11-13.

14. Kujana twachita biyeni kuti mumuni wesu umunike kubusena nkutukkala?

¹⁴ Kujana twachita biyeni kuti mumuni wesu wakasimpe kamuBbayibbele umunike kubusena nkutukkala? Nzitwaambuula anzituchita zilakonzya kugwasya mbituyakilenaabo kuti bayande kwiiya kasimpe. Ulakonzya kulibuzya kuti: ‘Bantu mbindiyakilenaabo bandibona biyeni? Muunzi wangu ulasalala na? Ndilaachiyandisyo chakugwasya bamwi na?’ Chiindi nwaambuula abakombinyokwe, ulawubelesya na mweenya wakubuzya kuti kuba aluzyalo akulijata kabotu kwakabagwasya biyeni babbululu babo, basimayakilane, mbibabelekaabo abasichikolonyina? Kuchita oobo kuyookugwasya kuti umvwe zintu zibotu nzibaswaana bakombinyokwe.—Ef. 5:9.

15. Nkamboonzi nitweelede kukkala katulindide?

¹⁵ Kuti katuyanda kuti mumuni wesu ukkale kuumunika tweelede kuyeeya mazuba ngitulikupona. Jesu wakaambila basikwiiya bakwe kwaziindi zyiingi kuti: “Amulangile.” (Mt. 24:42; 25:13; 26:41) Kuyeeya kuti “mapenzi mapati” achili kule akuti azoosika katuli twafwa, kulakonzya kupa kuti tutasungwaali mumulimu wakukambawuka. (Mt. 24:21) Kuba amaboneno aali boobo, kuyoopa kuti mumuni wesu ucheye naakuti umane.

16, 17. Tweelede kuchitaanzi kuti tukkale katulindide?

¹⁶ Mbukunga zintu zilikwiindilila kubija, tweelede kukkala katulindide. Tulaachoonzyo chakuti Jehova uyoobweza ntaamu muchiindi cheelede. (Mt. 24:42-44) Pesi lino tweelede kuba amoyo mulamfu alubo katuli kulindila. Tweelede kubala Jwi lyaLeza buzuba abuzuba alubo tutaleki kukomba. (1 Pet. 4:7) Tulakonzya kutobelezya zikozyano zyabakombima bakatondeezya kulindila kumwi kabali kuchita kuti mumuni wabo umunike. Chimwi chikozyano makani aazyakuluula aajanika muNgaziyakulinda yaChikuwa yamuApril 15, 2012 apeji 18-21, aakali amutwe utii, “Seventy Years of Holding On to the Skirt of a Jew,” (“Kujatilila Chigogo ChamuJuda Kwamiyaka Iili 70”).

¹⁷ Atuchite zintu zisungwaazya alubo tusale beenzuma balikabotu. Kuchita oobo, kuyoopa kuti tubotelwe akuti tutaboni mbucheenda chiindi. (Ef. 5:16) Muminyaka iili 100 yakiinda, bakombima bakabeleka changuzu alubo bakachita zyiingi. Mazubaano  tulikuchita mulimu mupati nkaambo tulikugwasigwa aJehova. Tulikupa kuti mumuni wesu umunike kwiinda chiindi.

18, 19. Kujana baalu batugwasya biyeni kuti tukkale katulindide akuti tube basungu? Pa chikozyano.

¹⁸ Kuziba kuti tulakonzya kukomba Jehova nikuba kuti tatumaninide kusimya lusyomo lwesu. Tweelede kumulumba Jehova nkaambo wakatupa “zipego mubantu,” chaamba baalu bamumbungano. (Bala BaEfeso 4:8, 11, 12, NW.) Kuti baalu bamuswaya, mweelede kuswiilila akutambula malayilile ngibamupa.

¹⁹ Baalu babili kuEngland bakafoonenwa ayimwi mpuli yakali abuyumu-yumu mulukwatano. Mukayintu wakali kuyeeya kuti wakakwetwe amuntu uutasimide mubukombi. Mulumaakwe wakazumina kuti taakali kuyiisya mpuli yakwe akuti taakali kukonzya kuchita bubambe bwakukomba kwampuli. Baalu aaba bakagwasya mpuli eeyi kababelesya chikozyano chaJesu. Jesu wakali kubabikkila maanu basikwiiya bakwe akubagwasya. Baalu aaba bakasungwaazya mwaalumi ooyu kuti atobelezye chikozyano chaJesu. Alubo bakasungwaazya mukayintu wakwe kuti abe amoyo mulamfu. Alubo baalu bakabasungwaazya kwiinda mukubabuzya malayilile aabagwasya boonse kuti babe abubambe bwakukomba kwampuli abana babo babili. (Ef. 5:21-29) Mukuya kwachiindi baalu bakamulumba mwaalumi ooyu akaambo kakubeleka changuzu. Alubo bakamusungwaazya kuti azumanane akusyoma kuti muuya uusalala uyoomugwasya kuzulwida mpuli yakwe mubukombi. Baalu bakagwasya bamumpuli eeyi kuti bakonzye kuchita kuti mumuni wabo umunike.

20. Niinzi chichitika kuti twazumanana kuchita kuti mumuni wesu umunike?

²⁰ Sintembawuzyo wakayimba kuti: “Ulikkomene muntu woonse uuyoowa Jehova, ooyo weenda munzila zyakwe.” (Int. 128:1, NW) Tuyoobotelwa kuti twachita kuti mumuni wesu umunike kwiinda mukugwasya bamwi kuti bakombe Leza, mukulijata munzila iipa kuti tukkale katujisini akulindila. Bantu banoobona milimu yesu mibotu, ziyoopa kuti balemeke Taateesu Jehova.—Mt. 5:16.