1. Kweendelana amajwi aali muli Bakolose 2:4, 8, Saatani weezya biyeni kubikka mizeezo yesu mubuzike?

SAATANI uyanda kuti tuleke kuyanda Jehova. Kuti azwidilile kuchita oobo, uleezya kuchincha nzila njituyeeyaayo akupa kuti mizeezo yesu ibe mubuzike akuti tuchite nzyayanda. Uleezya kutweena kwiinda mukubelesya zintu nzituyanda.—Bala Bakolose 2:4, 8.

2-3. (a) Nkamboonzi nitweelede kwiibikkila maanu nchenjezyo iili muli Bakolose 2:8? (b) Tulalanga-langaanzi muchiiyo eechi?

² Zilakonzeka na kuti Saatani atweene? Iiyi, zilakonzeka! Yeeya kuti nchenjezyo Pawulu njaakalemba iili muli Bakolose 2:8, taakayilembela bantu batakombi pe. Pesi wakayilembela maKristu bakananikidwe aamuuya uusalala. (Kol. 1:2, 5) MaKristu bamuchiindi eecho bakali mupenzi lyakweenwa, nikuba kulindiswe penzi eeli mpulili alubo ndipati. (1 Kor. 10:12) Nkamboonzi nilili pati? Nkaambo Saatani wakawaalwa aanyika alubo ulikweena bantu, kapati bakombi baLeza basyomeka. (Ciy. 12: 9, 12, 17) Kuyungizya waawo, tulikupona muchiindi aawo bantu babi abasilweeno ‘nibalikubija akubijila limwi.’—2 Tim. 3:1, 13.

³ Muchiiyo eechi, tulalanga-langa Saatani mbalikubelesya lweeno kuti apambanisye mizeezo yesu. Tulalanga-langa zintu zitatu ‘zyabuchenjezu’ naakuti “nzila zibi” nzyabelesya. (Ef. 6:11; makani aamunsi) Muchiiyo chitobela, tuyoobona mbutukonzya kulwana azintu zibi zyakaba mumizeezo yesu akaambo kanzila zyakwe zyalweeno. Pesi chakusaanguna,  atubone nzitwiiya kunzila Saatani njaakabeenaayo maIsrayeli nibakanjila muNyika Yachisyomezyo.

4-6. Kweendelana amajwi aali muli Deuteronomo 11:10-15, nkuukuli kuchincha maIsrayeli nkubakeelede kuchita atala anzila mpya zyakulima nibakali muNyika Yachisyomezyo?

⁴ Saatani wakeena maIsrayeli kuti bakombe zifanikisyo. Wakabeena biyeni? Wakalizi kuti bayanda chakulya, nkinkaako wakabelesya kakole aaka kubeena kuti bachite nzyayanda. MaIsrayeli nibakanjila muNyika Yachisyomezyo, bakeelede kuchincha nzila zyakulima. Nikabali muEgepita, maIsrayeli bakali kutiliila myuunda yabo kababelesya maanzi aamuMulonga waNayile. Pesi, muNyika Yachisyomezyo teekwakali mulonga mupati pe nkinkaako, kuti balime, bakeelede kulindila mvula kuti iwe agweeda naakuti lume lwakali kutetya zilyo zyabo. (Bala Deuteronomo 11:10-15; Is. 18:4, 5) Nkinkaako, maIsrayeli bakeelede kwiiya nzila mpya zyakulima. Teekwakali kuuba pe kuchita oobo nkaambo bantu bakali aaluzibo lwakulima bakali bafwa munkanda.

⁵ Jehova wakapandulwida bantu bakwe kuti zyiimo zyakali zyachincha. Mpawo wakayungizya nchenjezyo iitobela, yakali kubonekaanga tayiyendelani pe amakani aakulima kumasaangunino. Wakati: ‘Amuchenjele kuti myoyo yanu itakoongelezegwi, kuti mukaleye akutalika kukotamina baleza bambi akubakomba.’ (Dt. 11:16, 17) Nkamboonzi Jehova naakabapa nchenjezyo iili atala akukomba baleza bakubeja naakali kwaambuula atala anzila mpya zyakulima?

⁶ Jehova wakalizizi kuti maIsrayeli bakali kuyooyiya nzila zyakulima zyabantu bakali kukkala aafwiifwi ambabo, bakali kukomba  baleza bakubeja. Bantu aaba bakalizizi nzila zyakulima kwiinda maIsrayeli, mpawo bantu baLeza bakali kukonzya kwiiya nzila mpya kuli mbabo pesi bantu aaba bakali kukonzya kweena maIsrayeli. Bantu bakuKkenani bakali kukomba Bbaala alubo nzibakali kuchita zyakali kweendelana anzibasyoma. Bakali kusyoma kuti julu lyakali lyaBbaala akuti nguwe wakali kupa kuti mvula iwe. Jehova taakali kuyanda pe kuti bantu bakwe beenwe aanjiisyo eezi zyakubeja. Pesi kwaziindi zyiingi, maIsrayeli bakali kusala kukomba Bbaala. (My. 25: 3, 5; Bab. 2:13; 1 Bam. 18:18) Lino atubone Saatani mbaakoongelezya maIsrayeli kuti abache.

7. Lusyomo lwamaIsrayeli lwakasunkwa biyeni nibakanjila muNyika Yachisyomezyo?

⁷ Nzila yakusaanguna Saatani njaakabelesya, nchiyandisyo chakuti mvula iwe. Munyaka amunyaka, kwakali mvula nche muNyika Yachisyomezyo kuzwa kumamanino amweezi waApril kuyoosika muSeptember. Kuti maIsrayeli babotelwe akuti bajane zilyo zyiingi, bakali kusyoma mvula yakali kuwa muli baOctober. Saatani wakeena maIsrayeli kuti, kuti bazwidilile, bakeelede kutobela michito yabantu bakabazyungulukide bakali kukomba baleza bakubeja. Bantu aabo bakali kusyoma kuti, bakeelede kuchita tumwi tunsiya-nsiya kuti baleza babo bachite chimwi chintu akuti bawisye mvula. MaIsrayeli bakabula lusyomo muli Jehova, bakasyoma kuti, eeyi njiyo yakali nzila ayilikke yakuti kutabi nzala, nkinkaako, bakachita zintu zyabukombi bwakubeja kuti balemeke Bbaala.

8. Njiili nzila yachibili Saatani njaakabelesya? Pandulula.

⁸ Nzila yachibili Saatani njaakabelesya kweena maIsrayeli, nkutalijata kabotu. Bantu bakali kukomba baleza babo bakubeja, kwiinda mukutalijta kabotu mumakani aakoonana. Michito eeyi yakutalilemeka yakali kuswaanizya baalumi abanakazi bakali kuchita bwaamu kutempele. Bantu aaba bakali kuzumizya koonana kwabantu bakozyenie zizo ayimwi michito yakutalilemeka akwiibona kayili kabotu. (Dt. 23:17, 18; 1 Bam. 14:24) Bantu bakali kukomba baleza bakubeja, bakali kusyoma kuti michito eeyo, yakali kupa kuti baleza babo bape kuti bajane zilyo zyiingi. MaIsrayeli biingi bakeenwa amichito eeyi yakutalilemeka alubo eezi zyakapa kuti bakombe baleza bakubeja. Nisimpe, Saatani wakali wabacha.

9. Kweendelana amajwi aali muli Hosea 2:16, 17 Saatani wakachita biyeni kuti maIsrayeli balube Jehova?

⁹ Nzila yachitatu Saatani njaakabelesya, nkupa kuti maIsrayeli balube Jehova. Mumazuba aamupolofita Jeremiya, Jehova wakaamba kuti bapolofita bakubeja bakapa kuti bantu bakwe balube zina lyakwe ‘akaambo kaBbaala.’ (Jer. 23:27) Bantu baLeza bakaleka kubelesya zina lyaJehova mpawo bakasaanguna kubelesya lyaBbaala, lyaamba kuti “Mwini” naakuti “Simalelo.” Eezi zyakapa kuti maIsrayeli batakonzyi kusiyanisya Jehova aBbaala akupa kuti baswaanizye michito yabukombi bwaBbaala abukombi bwaJehova.—Bala Hosea 2:16, 17 amakani aamunsi.

10. Nziizili nzila Saatani nzyaliikubelesya mazubaano?

¹⁰ Mazubaano, Saatani uliikubelesya nzila zikozyenie anzyaakabelesya kumaIsrayeli. Weena bantu kabelesya chiyandisyo chakuba aazintu nzitulombozya, upa kuti bantu basumpule kutalijata akuti balube maboneno  aaJehova. Atusaangune kulanga-langa nzila yachitatu.

11. Saatani ulikuchitaanzi kuti bantu balube Jehova?

¹¹ Saatani uliikupa kuti bantu balube Jehova. Baapostolo baJesu nibakafwa, bantu balyaamba kuti maKristu bakasaanguna kuyiisya njiisyo zyakubeja. (Mil. 20:29, 30; 2 Tes. 2:3) Basiluleyo aaba bakasaanguna kupa kuti bantu balube Leza wakasimpe. Muchikozyano, bakaleka kubelesya zina lyaLeza mumaBbayibbele aabo akusala kubelesya mazina aali mbuuli aakuti “Mwaami.” Kwiinda mukugwisya zina lyaLeza akubikka liti “Mwaami,” bakapa kuti bantu bali achiyandisyo chakubala Bbayibbele kubayumine kubona musiyano uuliwo aakati kaJehova abamwi baleza baambidwe muMagwalo. (1 Kor. 8:5) Bakabelesya bbala lyakuti “Mwaami” kuli Jehova akuli Jesu, zyapa kuti bantu kubayumine kumvwisisisya kuti Jehova aMwanaakwe mbantu basiyene, bali amilimu iisiyene. (Joh. 17:3) Eezi zyakapa kuti kube njiisyo yaButatu, iitazwi muJwi lyaLeza. Njiisyo eeyi yapa kuti bantu biingi batasyomi kuti tulakonzya kusyoma Leza akumuziba. Ooku nkubeja kupati!—Mil. 17:27.

12. Bukombi bwakubeja bulikusumpulaanzi alubo eezi zyapa kuti kube mpinduunzi, mbuuli mbukulembedwe muli Baroma 1:28-31?

¹² Saatani uliikweena bantu kuti batalijati kabotu. Muchiindi chamaIsrayeli, Saatani wakabelesya bukombi bwakubeja kuti bantu batalijati kabotu. Nikuba mazubaano uliikubelesya nzila eeyi. Bukombi bwakubeja bulakuzumizya akukusumpula kutalijata kabotu. Eezi zyapa kuti bantu biingi balyaamba kuti bakomba Leza, bataatobeli pe malayilile aaya aali atala akulijata. Mulugwalo ndwaakalembela bantu bakuRoma, mwaapostolo Pawulu wakapandulula mpindu zyakaba akaambo kakuchita oobo. (Bala Baroma 1:28-31.) Zimwi zintu “ziteelede,” ziswaanizya michito yoonse yabwaamu, akoonana kwabantu bakozyenie zizo. (Rom. 1:24-27, 32; Ciy. 2:20) Kuswiilila njiisyo zyamuBbayibbele zili aantanganana kulayandikana kaka!

13. Njiili imwi nzila Saatani njabelesya?

¹³ Saatani uliikubelesya chiyandisyo chakuyanda kuba aazintu. Toonse tuyanda kuti tube aamilimu iitugwasya kuti tukonzye kulisanina ampuli zyesu. (1 Tim. 5:8) Chiindi chiingi, milimu eeyi twiijana kwiinda mukwiinka  kuchikolo akubala. Pesi tweelede kuchenjela. Muzisi zyiingi, bazyalwiiyo tabayiisyi basichikolo mbubakonzya kuchita milimu iisiyene-siyene luzutu pesi balabayiisya abusongo bwabantu. Basichikolo basungwaazigwa kuti batabi aachoonzyo kuti Leza mpali akuti batalilemeki pe Bbayibbele. Babuzigwa kuti bantu bachenjede basyoma kuti zintu zipona zyakalisandukila. (Rom. 1:21-23) Njiisyo zili boobo zikazyania ‘abusongo bwaLeza.’—1 Kor. 1:19-21; 3:18-20.

14. Busongo bwabantu busumpulaanzi?

¹⁴ Busongo bwabantu tabutobelezyi zyeelelo zyaJehova alubo bukazyania aanzizyo. Tabusungwaazyi michelo yamuuya uusalala uuzwa kuli Leza pesi busumpula “milimo yanyama.” (Gal. 5:19-23) Bupa kuti bantu balisumpule alubo eezi zyapa kuti babe “basikuliyanda.” (2 Tim. 3:2-4) Buntu oobu tabweendelani pe akulibombya, bakombi baLeza nkubasungwaazigwa kuti babe aankuko. (2 Sam. 22:28) Bamwi maKristu bakayinka kumayunivesiti bakasaanguna kuba amizeezo yanyika kutali yaLeza. Atulange-lange chikozyano chitondeezya zikonzya kuchitika kuti teetwachenjela.

15-16. Wayiyaanzi kuzwa kuzintu zyakachitikila umwi muchizi?

¹⁵ Umwi muchizi uuli aminyaka yinda ku15 kali mumulimu wachiindi choonse wakati: “Mbuuli Kamboni uubbabbatizidwe, ndakali ndabala akumvwa atala amapenzi aakonzya kuba akaambo kakwiinka kuyunivesiti pesi teendakaswiilila. Ndakayeeya kuti malayilile aaya taabeleki pe kulindime.” Ngaali mapenzi ngaakaswaana? Wakazumina kuti: “Kubala  mabbuku aakuchikolo kwakali kundimanina chiindi amanguzu, zyakuti teendakachili kukomba kuli Jehova mbuuli mbundakali kuchita chiindi, teendakachili kujana chiindi chakwaambuuzyania abamwi atala aBbayibbele alubo ndakali kumvwa bukandu kulibambila miswaangano yambungano. Chibotezya nchakuti, nindakabona kuti kubbila mulwiiyo lwaajulu kwakali kupa kuti nditabi abweenzuma buli kabotu aaJehova, ndakabona kuti ndeelede kuleka. Mpawo ndakaleka.”

¹⁶ Lwiiyo lwaajulu lwakapa kuti muchizi ooyu abe aamizeezo iili biyeni? Wakati: “Kundifwisya bweeme kuzumina kuti lwiiyo ndundakajana lwakapa kuti ndisaangune kulangisisya zibi nzibachita bamwi, kapati bakombima, akuti ndilangilile kuti bamwi bachite zyiingi kwiinda nzibakonzya akutaliswaanizya ambabo. Zyakanditolela chiindi chilamfu kuti ndileke kuba amizeezo iili boobu. Zyakachitika mubuumi bwangu, zyakandigwasya kubona mapenzi aakonzya kuba kuti teetwaswiilila nchenjezyo njitujana kuli Taateesu wakujulu kabelesya mbunga yakwe. Jehova wakalizizi nzindiyanda kwiinda mbundakazi. Kaansinga ndakamuswiilila!”

17. (a) Tweelede kukanza kuchitaanzi? (b) Tuyoolanga-langaanzi muchiiyo chitobela?

¹⁷ Kanza kuti utazumini koongelezegwa kuti uchegwe ‘abusongo bwabantu alweeno’ luli munyika yaSaatani. Utazumini kweenwa aanzila zyaSaatani zyabuchenjezu. (1 Kor. 3:18; 2 Kor. 2:11) Utazumini kuti Saatani ape kuti ulube Jehova akumukomba munzila njayanda. Pona kweendelana azyeelelo zyaJehova zyakulijata zisumpukide. Alubo, utazumini kuti Saatani akweene kuti uleke kuswiilila malayilile aaJehova. Pesi kujana wachita biyeni kuti wabona kuti wakaba amizeezo yanyika? Chiiyo chitobela chiyootutondeezya Jwi lyaLeza mbulikonzya kutugwasya kuti tuleke mizeezo amichito yoonse ‘miyumu nta.’—2 Kor. 10:4, 5.