TOONSE tulasyoma kuti ‘kumazuba aano aamamanino’ Jehova uli kuzulwida akugwasya bakombi bakwe muzintu zyabukombi. (2 Tim. 3:1) Toonse tweelede kuswiilila Jehova. Chiimo chesu chikozyenie achamaIsrayeli nibakali mulweendo lwabo kuya kuNyika Yachisyomezyo. Bakeelede kutobelezya kulila kwamweembo.

Jehova wakabuzya Mozesi kuti afule myeembo yansiliva kuti ayibelesye “kwiita mbungano akwaambila mbungano kuti inyamuke.” (My. 10:2) Bapayizi bakali kulizya myeembo munzila zisiyene-siyene kuti babuzye bantu zyakuchita. (My. 10:3-8) Mazubaano bakombi baLeza bajana malayilile munzila zisiyene-siyene. Atulange-lange nzila zitatu zitondeezya mbutujana malayilile mpawo tuzikozyanisye akulila kwamweembo muchiindi chamaIsrayeli. Bakombi baLeza balatambwa kumiswaangano mipati, baalu balatambwa kuti bayiisigwe alubo malayilile alachincha chiindi achiindi.

Chiindi Jehova naakali kuyanda kuti “mbungano yoonse” ibungane kumulyango watente lyakuswaanganina ulikubuzwezuba, bapayizi bakali kulizya myeembo yoonse kayili iibili. (My. 10:3) Boonse bantu bakakkede kabazyungulukide tente lyakubunganina bakali kukumvwa kulila kwamyeembo. Bantu bakakkede afwiifwi atente bakali kufwambaana kusika. Pesi bakakkede kule bakali kutola chiindi chilamfu akubeleka changuzu kuti basike. Kufumbwa nkubakali kukkala, Jehova wakali kuyanda kuti babungane kuchitila kuti bagwasigwe.

Mazubaano tatuchibunganini aatente lyakubunganina pe pesi nga twatambwa kuti tubungane mbuli bakombi baLeza. Kubungana ooku kuswaanizya miswaangano yabbooma ayimwi miswaangano iiyandikana nkutujana malayilile aamwi makani ayandikana. Bakombi baLeza munyika yoonse balanoneezegwa amiswaangano eeyi. Bantu banga bazumina kutambwa ooku balabotelwa kubungana amwi kabali biingi. Bamwi beenda misinzo milamfu kwiinda bamwi. Nikuba boobo, bantu boonse banga bazumina kutambwa ooku nga babona kuti babelekela chiliwo.

Kutegwani abantu bakkala kule amasena achitilwa miswaangano mipati? Akaambo katekkinoloji, bantu bali boobo nga bagwasigwa alubo balimvwa mbuli kuti balaamwi abamwi. Muchikozyano, chiindi mutabi wakuBenin nwaakaswayidwe amwiiminini wakumawofesi mapati, bakachita mabambe akuti muswaangano ooyo ukonzye kubonwa abantu bakkala kuArlit dolopo lili muNiger kuSahara Desert. Bakwesu abachizi bali 5 abantu bali achiyandisyo bali 16 bakanjila muswaangano ooyu. Nikuba kuti bakali kule, bakalimvwa  mbuli kuti bakali aamwi abamwi bali 44 131. Umwi mukwesu wakalemba kuti: “Tulamulumba kuzwa aansi amyoyo yesu akaambo kamabambe ngimwakachita kuti tukonzye kunjila muswaangano ooyu. Zyakatondeezya kuti mulatuyanda kapati.”

Kuti mupayizi walizya mweembo umwi luzutu, “balikke basilutwe bazyuulu” mbibakeelede kuya kutente lyakukombela. (My. 10:4) Kuti bayinka, Mozesi wakali kuyoobayiisya akubapa malayilile. Eezi zyakali kupa kuti bakonzye kubazulwida kabotu bantu. Kaansinga wakali umwi wabasilutwe teewakali kunooyezya na amanguzu aako woonse kuti wiinke kuchitila kuti ukagwasigwe.

Mazubaano baalu ‘teebasilutwe’ pe alubo teebasimalelo bambelele nzibeembela pe. (1 Pet. 5:1-3) Pesi babeleka changuzu kuti beembele butanga. Eezi zipa kuti bazumine kutambwa chiindi nibayanda kuyiisigwa mbuli kuChikolo Chamulimu waBwaami. Muzikolo eezi baalu bayiisigwa mbubakonzya kwiibeleka kabotu milimu yamumbungano. Eezi zipa kuti mbungano yoonse isime mubukombi. Nikuba kuti takwe nwaakali wanjila chimwi chazikolo eezi, kulakonzeka kuti ulikugwasigwa abamwi bakazinjila.

Chimwi chiindi bapayizi bakali kulizya mweembo munzila ichincha-chincha. Ooku kwakali kwaambilizya kwakuti Jehova uyanda kuti mbungano yoonse inyampuke. (My. 10:5, 6) Chiindi mbungano niyakali kulonga, yakali kunyampuka munzila ibambikene pesi bakali kubeleka changuzu. Chimwi chiindi bamwi bakali kukanduka kunyampuka. Nkamboonzi?

Amwi bamwi bakali kukanduka akaambo kakuti kwakali kwaambilizigwa kabatanakkala chiindi chilamfu alubo kabatalibambilide pe. “Zimwi ziindi ikkumbi lyakali kwiima buyo kuzwa kumangolezya kusikila mafwumofwumo.” Alubo chimwi chiindi lyakali kwiimikila “mazuba obilo, mwezi naa mazuba manji.” (My. 9:21, 22) Mbungano yakanyampuka kwaziindi zyiingi biyeni? Myeelwe chaandaano 33 yaamba masena ali 40 maIsrayeli mubakakkala.

Chimwi chiindi bamwi bakali kukkala abusena bulikabotu. Kukkala mumasena ali boobu kwakali kubabotela nkaambo bakali “munkanda iilya mpati alimwi iiyoosya kapati.” (Dt. 1:19) Eezi zyakali kukonzya kupa kuti bayeeye kuti kulonga kulakonzya kupa kuti zintu ziyume loko.

Chiindi mbungano niyakali kulonga, imwi misyobo yakeelede kukkazika moyo kulindila kuti chisike chiindi chabo chakunyampuka. Boonse bakali kumvwa kulila kwamweembo pesi teebakali kunyampukila amwi pe. Kuti mweembo walila munzila ichincha-chincha, zyakali kwaamba kuti misyobo iyakilide kubuzwezuba yakeelede kunyampuka. Misyobo eeyi iswaanizya musyobo waJuda, Isakkara awaZebbuloni. (My. 2:3-7; 10:5, 6) Nibamana kunyampuka aaba, bapayizi bakali kulizya mweembo munzila ichincha-chincha kachibili kuchitila kuti misyobo iitatu yakayakilide kumusanza iinyampuke. Bapayizi bakali kuzumanana kulizya mweembo kusikila mbungano yoonse yamaninina kulonga.

Amwi kuli nwaakali wamvwa kutayandi kutobelezya malayilile chiindi nikwakaba kuchincha mumbunga. Amwi wakayeeya kuti kuli kuchincha-chincha kwiingi loko. Alubo amwi wakali kwaayanda amwi mabambe zyakuti teewakali kuyanda pe kuti achinchwe. Kufumbwa mbuzyakabede kulakonzeka kuti zyakakuyumina kuba amoyo mulamfu kuti uzibile kuchincha ooku. Nikuba boobo kuti twabeleka changuzu kuti tuchite kweendelana akuchincha ooko tuyoobona kuti Leza ulookutulongezya.

Muchiindi chaMozesi Jehova wakazulwida mamiliyoni abaalumi, banakazi abana bakali kuya kuNyika Yachisyomezyo. Kaansinga teebakagwasigwa anguwe takwe nibakali kunoofutuka pe. Mazubaano aakumamanino, Jehova ulookutuzulwida akutukwabilila mubukombi. Alubo ulookutugwasya kuti tube afwiifwi anguwe akuti lusyomo lwesu lusime. Nkinkaako toonse atube amakanze akusyomeka mbuli maIsrayeli mbubakali kuchita kuti myeembo yalila munzila zisiyene-siyene.