Mumavesi aaya, kulembedwe buntu bwachiKristu buli 9: “Mucelo wamuuya ngooyu: luyando, lukkomano, luumuno, kukkazika moyo, luzyalo, bubotu, lusyomo, kubomba moyo, kulilesya.” Nkinkaako tatweelede kuyeeya kuti muuya uusalala ukonzya kutugwasya kuti tube abuntu buli 9 luzutu.

Bona zyakalembwa amwaapostolo Pawulu mumavesi aali musule, wakati: “Lino milimo yanyama . . . njeeyi: bwaamu, busofwaazi, bukkale busesemya, kukomba mituni, kusyoma mizimo, businkondo, kuzwangana, munyono, kunyema, kukazyanya, kwaandaana, tukamu twabukombi tuzandukide, kunyonokela, bucakolwa, mapobwe aateendelezyeki, alimwi azintu zimbi zili boobu.” (Gal. 5:19-21) Kulakonzeka kuti Pawulu wakaamba zimwi zintu ziswaanizidwe ‘mumilimo yanyama’ zili mbuli eezyo zyaambidwe muli Bakolose 3:5. Munzila iifenene naakamaninsya kwaamba buntu bubotu buli 9, muvesi 23 wakaamba kuti: “Kunyina mulawo uukasya zintu eezyi pe.” Alubo muchiGrikki bbala lyakuti zintu eezi lilakonzya kusandululwa kuti “zintu zili mbuli zeezi.” Nkinkaako Pawulu taakabwaamba pe buntu boonse bubotu mbutukonzya kuba aabo kwiinda mukugwasigwa amuuya uusalala.

Tulakonzya kuzimvwisisisya eezi kuti twakozyanisya zyakaambwa aPawulu naakali kulembela mbungano yakuEfeso, wakati: “Micelo yamumuni misyobo yoonse yabubotu, bululami alimwi akasimpe.” (Ef. 5:8, 9) “Bubotu,” bululami akasimpe nchipanzi ‘camicelo yamumuni,’ alubo buntu oobu buliswaanizidwe ‘mumucelo wamuuya.’

Munzila iikozyenie, Pawulu wakabuzya Timotewo kuti: “Koyandaulisya bululami, kubelekela Leza cakulyaaba, lusyomo, luyando, kuliyumya alimwi akubomba moyo,” buntu oobu buli 6 mbubotu. (1 Tim. 6:11) Pesi mubuntu oobu buli 6, lusyomo, luyando akubomba moyo, mbubo abulikke buswaanisidwe ‘mumucelo wamuuya.’ Timotewo wakeelede kugwasigwa amuuya uusalala kuti abe abuntu oobu, bululami, kubelekela Leza cakulyaaba akuliyumya.—Kozyanisya a Bakolose 3:12; 2 Petro 1:5-7.

Nkinkaako lugwalo lwa Bagalatiya 5:22, 23 talwaambi buntu bubotu boonse muKristu mbayelede kubaabo. Muuya uusalala ulakonzya kutugwasya kuti tube abuntu oobu buli 9 bwaambwa kuti “mucelo wamuuya.” Pesi kuli bumwi buntu bubotu mbutukonzya kuba aabo kuti tusime mubukombi “akusama buntu bupya ibwakalengwa kweelana akuyanda kwa Leza mubululami bwini-bwini alimwi amukusyomeka.”—Ef. 4:24.