1. Kweendelana alugwalo lwa Mukambausi 7:20, nkaakali kasimpe nkaakalemba Mwaami Solomoni?

 MWAAMI Solomoni wakalemba kuti: “Kunyina muntu mululami munyika uucita buyo zibotu lyoonse kakunyina kubisya.” (Muk. 7:20) Majwi aaya ngakasimpe. Toonse tulabisya. (1 Joh. 1:8) Nkinkaako, toonse tuyanda kulekelelwa aaLeza abantuma.

2. Umvwa biyeni kuti mweenzinyokwe wakulekelela?

² Amwi wayeeya chiindi nwaakabisizya mweenzinyokwe. Kuti ubambulule kutamvwanana, kweelede wakayinka kuti ukakumbile lulekelelo. Wakamvwa biyeni mweenzinyokwe naakakulekelela kazizwa aansi aamoyo? Kweelede wakalemutuzigwa akubotelwa.

3. Njiili mibuzyo njitutasandule muchiiyo eechi?

³ Toonse tuyanda kuba beenzinyina baJehova, pesi chimwi chiindi tulakonzya kwaamba naakuti kuchita zintu zimunyemya. Muchiiyo eechi, tulasandula mibuzyo yakuti: ‘Niinzi chipa kuti tube aachoonzyo chakuti Jehova ulilibambilide kutulekelela? Kulekelela kwaJehova kusiyene biyeni akulekelela nkutuchita? Alubo niinzi nzitweelede kuchita kuti Leza atulekelele?’

4. Niinzi chitondeezya kuti Jehova ulilibambilide kulekelela?

⁴ Jwi lyaLeza litusyomezya kuti Jehova ulilibambilide kulekelela. Jehova naakaliyubununa kuli Mozesi kuChilundu  chaSinayi kabelesya mungelo, wakaamba kuti: “Jehova, Jehova, Leza siluse alimwi silweetelelo, uutafwambaani kukalala alimwi uuzwide luyando lutamani akasimpe, uutondezya luyando lutamani kubantu bali zyuulu, uulekelela milandu, nsotoko alimwi azibi.” (Kul. 34:6, 7) Jehova nguLeza siluse alubo ulilibambilide kulekelela basizibi basanduka.—Neh. 9:17; Int. 86:15.

5. Kweendelana alugwalo lwa Intembauzyo 103:13, 14, kutuziba kabotu nkwachita Jehova kupa kuti achite biyeni?

⁵ Jehova ulizizi zintu zyoonse atala andiswe nkaambo nguwe wakatulenga. Taakwe kantu pe nkatazi atala abantu boonse bali aanyika. (Int. 139:15-17) Nkinkaako, ulakonzya kubona kutamaninina koonse nkutwakakona kuzwa kubazyali besu bakusaanguna. Alubo ulizizi zintu zyoonse nzitwakaswaana mubuumi zyakapa kuti tube mbutubede. Kutuziba kabotu nkwachita Jehova kupa kuti achite biyeni? Kupa kuti atufwide luzyalo.—Int. 78:39; bala Intembauzyo 103:13, 14.

6. Jehova wakatondeezya biyeni kuti ulayanda kutulekelela amoyo woonse?

⁶ Jehova wakatondeezya kuti ulayanda amoyo woonse kutulekelela. Ulizi kuti kubisya kwamuntu wakusaanguna Adamu kwakapa kuti toonse tube basizibi akuti tufwe. (Rom. 5:12) Taakwe umwi muntu wakali kukonzya kutwaangununa kuzwa kuchibi alufu. (Int. 49:7-9) Leza wesu siluyando wakatufwida luzyalo alubo wakachita chimwi chintu kuti twaangununwe. Wakachitaanzi? Lugwalo lwa Johane 3:16 lutondeezya kuti Jehova wakatuma Mwanaakwe simuzyalwaalikke kuti atufwide. (Mt. 20:28; Rom. 5:19) Jesu wakajayigwa akaambo kandiswe kuchitila kuti aangunune aabo bamusyoma. (Heb. 2:9) Kweelede kuti zyakamuchisa loko Jehova kubona Mwanaakwe kalikufubaazigwa akujayigwa chalunya. Kwaamba choonzyo, kaansinga Jehova taakali kuyanda pe kutulekelela, nikuli taakamuzumizya pe Mwanaakwe kuti ajayigwe.

7. Amba zikozyano zyabantu baambidwe muBbayibbele bakalekelelwa aaJehova.

⁷ MuBbayibbele muli zikozyano zyiingi zyabantu bakalekelelwa aaJehova amoyo woonse. (Ef. 4:32) Ngwani ngwaayeeya aakati kabantu aaba? Amwi wayeeya Mwaami  Manase. Mwaalumi ooyu mubi wakabisizya Jehova munzila yiindilide. Wakazulwida mubukombi bwakubeja. Wakajeya bana bakwe akubapayizya kuli baleza bakubeja. Alubo wakayungizya biya kubisya kwiinda mukubikka chibumbwa chaleza wakubeja mutempele lyaJehova lisalala. Bbayibbele kalyaambuula atala akubisya kwakwe, lyaamba kuti: “Wakacita zibi zinji mumeso aa Jehova akumunyemya.” (2 Mak. 33:2-7) Pesi chiindi Manase naakasanduka amoyo woonse, Jehova wakamulekelela alubo wakamubweedezya aachuuno chabwaami. (2 Mak. 33:12, 13) Alubo kulakonzeka kuti wayeeya Mwaami Davida ooyo wakachita zibi zipati kunembo lyaJehova ziswaanizya bumambe akujaya bantu. Pesi Davida naakasanduka amoyo woonse akuzumina zibi zyakwe, Jehova wakamulekelela. (2 Sam. 12:9, 10, 13, 14) Eezi zitondeezya kuti Jehova ulayanda amoyo woonse kutulekelela. Alubo nzila njatulekelelaayo ilisiyene ambubachita bantu boonse mbuli mbututabone lino.

8. Chiindi Jehova nasala kulekelela muntu, utondeezya biyeni kuti Mubetesi uulikabotu?

⁸ Jehova “Mubetesi wanyika yoonse.” (Matl. 18:25) Mubetesi uulikabotu, weelede kuba muntu uuwuzi kabotu mulawu. Mbubo mbabede Jehova nkaambo tali Mubetesi biyo pesi nguSikupa Mulawu. (Is. 33:22) Taakwe umwi muntu uuchizi kabotu chintu chibotu achibi kunze kwaJehova aalikke. Niinzi chimwi nchayelede kuchita mubetesi uulikabotu? Weelede kulanga-langa twaambo toonse tuswaanizidwe katanasaanguna kubeteka. Eezi nzizyo zipa kuti Jehova abe Mubetesi uulikabotu wiinda bantu boonse.

9. Niinzi nzyalanga-langa Jehova chiindi nasala kulekelela muntu?

⁹ Jehova ulisiyene abamwi babetesi boonse nkaambo nga ulizizi zintu zyoonse mukaambo koonse keetwa kulinguwe. (Matl. 18:20, 21; Int. 90:8) Tagoleli aakubona naakuti kumvwa nzibaamba bantu. Uzizi loko kuti niinzi zipa kuti tuchite zimwi zintu. Chimwi chiindi tuchita zimwi zintu akaambo kakuti twakakozya umwi muntu, nzila njitwakakomezegwaayo, nkutwakakomenena naakuti kuli zimwi zintu zilikutukataazya mumoyo amumizeezo. Alubo Jehova ulabona zili mumyoyo yabantu, waazi kabotu makanze ngalaawo umwi awumwi wesu azintu zipa kuti tuyande kuchita zimwi zintu. Taakwe chintu chikonzya kusiswa pe kunembo lyaJehova. (Heb. 4:13) Nkinkaako, chiindi Jehova nasala kulekelela umwi muntu, nga ulizizi zintu zyoonse ziswaanizidwe.

10. Nkamboonzi nitukonzya kwaamba kuti Jehova ubeteka munzila iiluleme chiindi choonse? (Deuteronomo 32:4)

¹⁰ Jehova ubeteka munzila iiluleme chiindi choonse. Tasaluuli pe. Chiindi nalekelela muntu, talangi kuti muntu ooyo ulangika biyeni kumeso, ulinotede na, ulaampuwo na naakuti ulaachipo chakuchita zimwi zintu. (1 Sam. 16:7; Jak. 2:1-4) Taakwe muntu uukonzya kumoongelezya naakuti kumupa chisinkamulomo kuti amulekelele. (2 Mak. 19:7) Tapi muntu chisubulo akaambo kakuti wanyema. (Kul. 34:7) Makani aaya apa kuti Jehova abe Mubetesi wiinda babetesi boonse nkaambo utuzi kabotu alubo ulizizi zyiimo zyesu.—Bala Deuteronomo 32:4.

11. Nkamboonzi kulekelela kwaJehova nikugambya?

¹¹ Balembi baMagwalo aachiHebbrayo bakabona kuti nzila Jehova njalekelelaayo ilagambya. Chimwi chiindi bakali kubelesya limwi  bbala lyachiHebbrayo lyaamba kulekelela. Limwi bbuku lyakazoowamba atala abbala eelyo kaliti “lyakali kubelesegwa kapati kulekelela basizibi nkwachita Leza kutali kulekelela kuchitwa aabantu.” Jehova nguwe alikke uuli aamanguzu aakulekelela sizibi uunga wasanduka chakumaninina. Niinzi chichitika kuti Jehova watulekelela?

12-13. (a) Niinzi zichitika kuti muntu walekelelwa aaJehova? (b) Kuti Jehova watulekelela, ulatuyeezya lubo na zibi zyesu? Pandulula.

¹² Kuti twazumina kulekelelwa aaJehova, tujana “ziindi zyakukatalukwa,” kuswaanizya aluumuno lwamumizeezo amoyo uutatupi mulandu. Kulekelelwa kuli boobu takuzwi kubantu pe pesi kuzwa kuli “Jehova lwakwe.” (Mil. 3:19) Kuti Jehova watulekelela, ngatwasaanguna lubo kumvwanana aanguwe mbuli kuti taakwe nitwakabisizye pe.

¹³ Kuti Jehova watulekelela, tatuyeezyi lubo zibi nzitwakachita naakuti kutusubula lubo akaambo kazibi eezyo. (Is. 43:25; Jer. 31:34) “Mbubonya kumapolelo aazuba mbokuli kulamfwu kapati kuzwa kumabbililo aazuba,” nkuko nkwabikka zibi zyesu Jehova. * (Int. 103:12) Kuti twayeeyesesya atala anzila Jehova njatulekelelaayo, ngatwamaninwa akubula lyakwaamba. (Int. 130:4) Pesi mbaani aabo Jehova mbalekelela?

14. Niinzi nzitwayiya zipa kuti Jehova asale kutulekelela?

¹⁴ Mbuli mbutwabona, chiindi Jehova nasala kutulekelela talangi kuti chibi chesu nchipati na naakuti nchiniini. Alubo mbuli mbutwayiya, kuli zimwi zintu Jehova nzyalanga kuti asale kutulekelela. Jehova utuzi kabotu nkaambo Mulengi wesu, nguSikutupa Mulawu alubo Mubetesi wesu. Niinzi nzyalanga Jehova kuti asale kutulekelela?

15. Kweendelana alugwalo lwa Luka 12:47, 48, niinzi nchalanga Jehova katanasala kutulekelela?

¹⁵ Chimwi chintu nchalanga Jehova katanalekelela sikubisya nchakuti sikubisya ooyo wakabisya kazi na. Jesu wakakabikka aantanganana kaambo aaka muli Luka 12:47, 48. (Bala.) Muntu uukanza kubisya aachaali alubo kazi kabotu kuti zintu nzyalikuchita nkubisizya Jehova, nga ulikuchita chibi chipati  loko. Muntu uuli boobo nga ulikulinjizya mupenzi lyakutalekelelwa. (Mk. 3:29; Joh. 9:41) Nikuba oobo, chimwi chiindi ngatwalibonena atulikke kuti nzitwachita nzibi. Kuti kakuli boobo, Jehova ulakonzya na kutulekelela? Eezi zitusisya kuli kamwi kaambo kapa kuti Jehova asale kutulekelela.

16. Kusanduka chaambaanzi alubo nkamboonzi nitweelede kusanduka kuti Jehova atulekelele?

¹⁶ Chimwi chintu nchalanga Jehova nchakuti sikubisya wasanduka na choonzyo. Ani kusanduka chaambaanzi? Chaamba “kuchincha mizeezo, buntu naakuti makanze.” Muntu wasanduka ulalisola akuusa loko akaambo kazintu zibi nzyaachita naakuti akaambo kakukachilwa kuchita zintu zibotu nzyaayelede kuchita. Muntu wasanduka ulawusa akaambo kazibi nzyaakachita kuswaanizya akutaba aabweenzinyina busimide aLeza bwakapa kuti abisye. Kuti kamuchiyeeyede, Mwaami Manase aMwaami Davida bakachita zibi zipati pesi Jehova wakabalekelela nkaambo bakasanduka amoyo woonse. (1 Bam. 14:8) Kuti Jehova atulekelele, weelede kubona bukamboni butondeezya kuti twasanduka chachoonzyo. Tatweelede kugolela aakulisola kupela pesi tweelede kuchita zintu zitondeezya kuti twasanduka. * Lino tubone kamwi kaambo kapa kuti Jehova asale kutulekelela.

17. Kuchincha nkuchita biyeni alubo nkamboonzi nikuyandikana kuti tuleke kwiindulula zibi nzitwakachita chiindi? (Isaya 55:7)

¹⁷ Kamwi kaambo kapa kuti Jehova asale kutulekelela nkakuti Jehova ulanga kuti sikubisya wachincha na. Muliimwi nzila, muntu weelede kuchincha maponeno aakwe mabi mpawo apone kweendelana ambayanda Jehova. (Bala Isaya 55:7.) Muntu ooyo weelede kuchincha mizeezo yakwe kuchitila kuti yeendelane amizeezo yaJehova. (Rom. 12:2; Ef. 4:23) Weelede kubeleka changuzu kuti achinche buumi butali kabotu mbwaakali kupona chiindi amizeezo mibi njaakalaayo. (Kol. 3:7-10) Kusyoma muchinunuzyo chaKristu nkuko kupa kuti Jehova akonzye  kutulekelela akuti atusalazye kuzibi zyesu. Jehova ubelesya chinunuzyo chiindi nabona kuti tulikubeleka changuzu kuti tuchinche maponeno eesu.—1 Joh. 1:7.

18. Niinzi nzitwayiya atala akulekelela kwaJehova?

¹⁸ Lino atwiindulule twaambo tupati ntutwayiya muchiiyo eechi. Jehova nguwe uulekelela kwiinda bantu boonse. Nkamboonzi nitwaamba oobo? Chakusaanguna, ulilibambilide kutulekelela. Chachibili, utuzi kabotu. Ulizi mbutubede alubo nguwe alikke uukonzya kuziba kuti twasanduka na chachoonzyo. Chachitatu, kuti Jehova watulekelela, ngakuli mbuli kuti wazizima zibi zyesu. Eezi zipa kuti moyo wesu utatupi mulandu akuti tube aabweenzinyina bulikabotu anguwe.

19. Nikuba kuti tatumaninide akuti tunookkala katubisya, niinzi chinga chilapa kuti tubotelwe?

¹⁹ Kufumbwa katuchili aachibi, tunooswini kubisya. Pesi tulakonzya kuumbulizigwa amajwi aajanika muli Insight on the Scriptures, Voliyumu 2, peji 771 aakuti: “Mbukunga Jehova ulizi kuti babelesi bakwe balakonzya kubisya akaambo kakuti tabamaninide pe, nkinkaako, tabeelede kukkala kabakataazikene azibi nzibakachita akaambo kakutamaninina. (In 103:8-14; 130:3) Kuti bapona kweendelana ambayanda Jehova amoyo woonse, balakonzya kubotelwa. (Flp 4:4-6; 1Jo 3:19-22).” Makani aaya alasungwaazya.

20. Tuzoolanga-langaanzi muchiiyo chitobela?

²⁰ Tulabotelwa kuziba kuti Jehova ulilibambilide kutulekelela kuti twasanduka chachoonzyo akusiya zibi zyesu. Pesi nga tulachitobelezya biyeni chikozyano chaJehova munkani yakulekelela? Kulekelela bamwi nkutuchita kweendelana biyeni akulekelela nkwachita Jehova alubo kusiyene biyeni? Nkamboonzi nikuyandikana kumvwisisisya musiyano ooyu? Mibuzyo eeyi iyoosandulwa muchiiyo chitobela.