1. Niinzi nzitweelede kuchita kuti tukafutuke mubuzuba bwaJehova?

 CHIINDI Bbayibbili nilyaambuula atala ‘abuzuba bwaJehova,’ lyaamba chiindi Jehova nanyonyoona basinkondonyina achiindi nafutula bakombi bakwe. Chiindi Jehova wakazibeteka zisi. (Is. 13:1, 6; Ezk. 13:5; Zef. 1:8) Muchiindi chilikunembo, “buzuba bwaJehova” buzoosaanguna aakunyonyoona kwaBbabbiloni Mupati mpawo kuzoosike nkondo y-Armagedoni. Kuti tuzoofutuke ‘mubuzuba’ oobu tweelede kulibambila lino. Jesu wakayiisya kuti tulibambile mapenzi mapati alubo wakatusungwaazya kuti “tukkale katulibambilide.”—Mt. 24:21; Lk. 12:40.

2. Lugwalo lwa 1 Batesalonikka lutugwasya biyeni chiindi nitulindila buzuba bwaJehova?

² Mulugwalo lwakusaanguna Pawulu ndwaakalembela maKkristu bakuTesalonikka wakabelesya zikozyano kuti abagwasye kuti bakkale kabalibambilide buzuba bwaJehova bwalubeta. Pawulu wakalizi kuti buzuba bwaJehova teebwakali kuzoosika pe mpawaawo-mpawaawo. (2 Tes. 2:1-3) Pesi wakasungwaazya bakombinyina kuti balibambile kusika kwabuzuba oobo mbuli kuti bwaba aafwiifwi alubo andiswe tulakonzya kubelesya malayilile aaya. Lino atulange-lange bupanduluzi bwazintu zitobela: (1) mbubwakali kuzoosika buzuba bwaJehova, (2) mbaani batazonyonyoonwe mubuzuba oobo ambutukonzya kulibambila kuti tukafutulwe.

3. Nkamboonzi buzuba bwaJehova nibutegwa buzoosika mbuuli mubbi? (Langa chifanikisyo.)

³ “Mbuuli mbasika mubbi mansiku.” (1 Tes. 5:2) Eechi nchikozyano chakusaanguna nchaakabelesya Pawulu naakali kupandulula mbubuzoosika buzuba bwaJehova. Bantu babba bachita  zintu zyabo chakufwambaana alubo basika mansiku kabatazi pe bantu mbibabbida. Buzuba bwaJehova buzoosika kakutayeeyelwi pe alubo bantu biingi kabalyiibide. Nikuba maKkristu bazoogamba nibazoobona zintu zizoochitika. Pesi kusiyana abasizibi, tatukanyonyoonwi pe.

4. Nkamboonzi buzuba bwaJehova nibukozyenie akumyongwa kwamwanakazi uuyanda kutumbuka?

⁴ “Mbuuli kumyongwa kwamwanakazi uulaada.” (1 Tes. 5:3) Mwanakazi uuyanda kutumbuka takonzyi pe kuziba kuti ndiilili loko natazootumbuke. Pesi nga ulizi kuti uzootumbuka. Kuti chasika chiindi chakuti atumbuke zilachitika chakufwambaana, umvwa kuchisa alubo taakwe muntu uukonzya kuchiimikizya pe chiindi eecho. Munzila iikozyenie, tatuzi pe buzuba, a-awa buzuba bwaJehova nibuzoosika. Pesi tulaachoonzyo chakuti buzoosika akuti Leza uzoobeteka basizibi chakufwambaana alubo taakwe uzoomukachizya pe kuchita oobo.

5. Mapenzi mapati akozyenie biyeni achiindi chakuseeni-seeni?

⁵ Mbuuli kuseeni-seeni. Pawulu wakachibelesya lubo chikozyano chabantu babba mansiku. Pesi aachiindi eechi wakali kukozyanisya buzuba bwaJehova achiindi chakuseeni-seeni nikuchisiya-siya. (1 Tes. 5:4) Bantu babba nibasika mansiku balakonzya kubba zintu zyiingi zyakuti kulakonzya kucha kabachibba alubo bantu biingi balakonzya kubabona akaambo kakuti kunooli kwaba kubuchedo. Munzila iikozyenie, mapenzi mapati azoobajana bantu aabo bali mbuli babbi kabakkede mumudima kwiinda mukuchita zintu zitabotezyi Leza. Kusiyana ambabo, tulakonzya kulibambila kwiinda mukutachita zintu zitabotezyi Jehova akukakatila “zintu zyoonse zibotu, ziluleme azyakasimpe.” (Ef. 5:8-12) Pawulu wakazoobelesya zimwi zikozyano zibili chiindi naakali kwaambuula atala abaabo batazonyonyoonwe.

6. Niinzi zitondeezya kuti bantu baliikoona mubukombi? (1 Batesalonikka 5:6, 7)

⁶ “Aabo boona.” (Bala 1 Batesalonikka 5: 6, 7.) Pawulu wakakozyanisya aabo batazoonyonyoonwe mubuzuba bwaJehova abantu balikoona. Tabazizi pe zintu zilikuchitika munyika akuti chiindi chilikuchijaana. Nkinkaako, tabakonzyi pe kubweza ntaamu akaambo kakuti tabazizi pe zintu ziyandikana zilikuchitika. Bantu biingi mazubaano balikoona mubukombi. (Rom. 11:8) Tabasyomi pe kuti tuliikupona kumazuba aakumamanino akuti mapenzi mapati abaafwiifwi. Zimwi zintu zilikuchitika munyika zilikupa kuti bantu biingi bayande kwiiya Bbayibbili. Pesi, biingi mpimpawo mpubalikoona kutali kuti bakkale kabalangide. Nikuba bamwi basyoma kuti buzuba bwaJehova buzoosika, babonaanga buchili kule loko. (2 Pet. 3:3, 4) Pesi majwi ngaakalemba mwaapostoli Pawulu aali atala akukkala katulangide twaabona kaayandikana loko buzuba-abuzuba.

7. Bantu batazoonyonyoonwe mubuzuba bwaJehova bakozyenie biyeni abantu bakoledwe?

⁷ “Aabo bakolwa.” Pawulu wakakozyanisya bantu batazoonyonyoonwe abachankolwa. Bachankolwa tabafwambaani pe kubweza ntaamu kuti kwachitika chimwi chintu alubo basala munzila yabufuba-fuba. Munzila iikozyenie, basizibi tababwezi ntaamu pe kuti Leza watuchenjezya. Basala zintu zipa kuti bazoonyonyoonwe. Pesi maKkristu basungwaazigwa kuti bakkale kabayeeya kabotu. (1 Tes. 5:6) Umwi sikulanga-langa makani aamuBbayibbili wakaamba kuti, “muntu uuyeeya kabotu ukkala kabeteme, tayoowi pe alubo usala munzila iilikabotu muzintu zyoonse nzyachita.” Nkamboonzi nitweelede kukkala katubeteme? Kutugwasya kuti tutaliswaanizyi pe muzintu zyapolitikisi azimwi zintu zisumpulwa aabantu munyika. Bakombi baJehova banoosungilizigwa kuti batole lubazu muzintu eezi chiindi buzuba bwaJehova nibunooya buswena aafwiifwi, pesi tatweelede kukataazikana loko kuti tunoozichita biyeni. Muuya uusalala ulatugwasya kuti tukkale katubeteme, katuyeeya kabotu akuti tusale munzila ilikabotu.—Lk. 12:11, 12.

8. Mbuubuli buntu bwaambidwe muli 1 Batesalonikka 5:8 butugwasya kuti tukkale katulangide akuti katuyeeya kabotu? (Langa chifanikisyo.)

⁸ “Tuzwaate chigogo chakukwabilila kaango. . . angowani.” Pawulu wakakozyanisya maKkristu bachoonzyo amasooja aakkala kaalangide alubo kaazweete zigogo zyankondo. (Bala 1 Batesalonikka 5:8.) Musooja ulangililwa kuti akkale kalibambilide kulwana nkondo kufumbwa chiindi niyavutuka. Nzizyo nzitweelede kuchita andiswe. Tweelede kukkala katulibambilide kusika kwabuzuba bwaJehova kwiinda mukuzwaata chigogo chakukwabilila kaango chalusyomo, luyando angowani yabulangilizi bwalufutuko. Buntu oobu buyootugwasya loko muchiindi chilikunembo.

9. Lusyomo lutukwabilila biyeni?

⁹ Chigogo chakukwabilila kaango chikwabilila moyo wamusooja. Lusyomo aluyando lukwabilila moyo wesu wakukozyanisya. Buntu oobu butugwasya kuti tukkale katukomba Jehova alubo katutobela Jesu. Lusyomo lutupa kuba aachoonzyo chakuti uzootupa bulumbu akaambo kakuti tumuyanduula aamoyo wesu woonse. (Heb. 11:6) Alubo, lusyomo lupa kuti tukkale katusyomeka kuMuzulwidi wesu Jesu nikuba chiindi nituli mubuyumu-yumu. Tulakonzya kusimya lusyomo lwesu kwiinda mukubala atala azikozyano zyabakombi baJehova bamazubaano, bakkala kabasyomeka nibapenzegwa naakuti nibaba aapenzi lyakubula  mali. Alubo tulakonzya kutantamuka kakole kakuyandisya bunoti kwiinda mukutobelezya aabo bakapona buumi buuba akusaanguna kubikka Bwaami bwaLeza mubusena bwakusaanguna mubuumi bwabo. b

10. Kuyanda Jehova abantu mbitukambawukila kutugwasya biyeni kuti tulisimye?

¹⁰ Luyando lulayandikana kuti tukkale katulangide alubo katuyeeya kabotu. (Mt. 22:37-39) Kuyanda Jehova kutugwasya kuti tulisimye kufumbwa buyumu-yumu mbutukonzya kuswaana chiindi nituchita mulimu wakukambawuka. (2 Tim. 1:7, 8) Akaambo kakuti tulabayanda aabo mbitukambawukila, tatuleki pe kubakambawukila nikuba kubakambawukila katubelesya mafooni akubalembela magwalo. Tuli aabulangilizi bwakuti limwi zuba bazoochincha akusaanguna kuchita zintu zilikabotu.—Ezk. 18:27, 28.

11. Kuyanda bakwesu abachizi kutugwasya biyeni? (1 Batesalonikka 5:11)

¹¹ Tweelede kuyanda bakwesu abachizi. Tutondeezya kuti tulabayanda kwiinda mukwiinkilila kunembo ‘kusungwaazyania akuyakana.’ (Bala 1 Batesalonikka 5:11.) Mbuuli masooja mbaabelekelaamwi, andiswe tulasungwaazyania. Musooja ulakonzya kuchisa mweenzinyina chiindi nkondo niyavutuka loko pesi nga tazichiti aachaali pe. Munzila iikozyenie, akaambo kakuti tatumaninide pe andiswe tulakonzya kuchita zintu zichisa bakwesu abachizi pesi eezi nga tatuzichiti aachaali alubo kuti batubisizya tatubabweedezyi pe. (1 Tes. 5:13, 15) Tutondeezya luyando kwiinda mukulemeka bakwesu bazulwida mumbungano. (1 Tes. 5:12) Pawulu naakalemba lugwalo oolu, mbungano yakuTesalonikka teeyakayinakkwanisya pe munyaka kayijulidwe. Bakwesu bakali kuzulwida bakali aaluzibo luche alubo kulakonzeka kuti kuli zintu nzibakatali kuchita kabotu. Nikuba oobo, bamumbungano bakeelede kubalemeka. Mbukunga mapenzi mapati abaafwiifwi, kuyandikana loko lino kuti tuswiilile malayilile ngibatupa baalu. Kulakonzeka kuti kunooli kuyumu kuti tujane malayilile kuzwa kumawofesi mapati akumawofesi aamutabi, pesi kuyanda baalu akubalemeka  kuyootugwasya loko muchiindi eecho. Kufumbwa zitakachitike, atukkale katuyeeya kabotu, tutalangisisyi zintu zibi nzibachita baalu, pesi atubikkile maanu kukaambo kayandikana kakuti Jehova, kabelesya Kkristu ulikuzulwida baalumi aaba basyomeka.

12. Bulangilizi buyikwabilila biyeni mizeezo yesu?

¹² Mbuuli ngowani mbuyikwabilila mutwe wamusooja, bulangilizi bwalufutuko bukwabilila mizeezo yesu. Kuba aabulangilizi kutugwasya kubona kuti zintu zili munyika tazigwasyi pe. (Flp. 3:8) Alubo bulangizi butugwasya kuti tukkale katubeteme. Eezi nzizyo zyakachitikila Wallace aLaurinda bali mumulimu wachiindi choonse kababelekela ku-Africa. Mumviki zitatu, boonse bakafwidwa aabazyali. Akaambo kakuti kwakali kkorona teebakakonzya pe kubweeda kulimbabo kuti bakabe aamwi ampuli zyabo muchiindi eechi chiyumu. Wallace wakaamba kuti: “Bulangilizi bwabubuke bundigwasya kuti ndibayeeye kutali kuyeeya nzibakaswaana kumazubaano akumamanino, pesi nga ndayeeya mbubatanoobede kumazuba akusaanguna aamunyika mpya. Bulangilizi oobu bundigwasya kuti ndibatame chiindi nindibayeeya loko.”

13. Niinzi nzitweelede kuchita kuti tube aamuuya uusalala?

¹³ “Mutazimi mulilo wamuuya.” (1 Tes. 5:19) Pawulu wakakozyanisya muuya uusalala amulilo uuli mulindiswe. Kuti katuli aamuuya uusalala tulapya akaambo kabusungu, tulaba aachiyandisyo chakuchita zintu zilikabotu alubo tulaba aamanguzu akubelekela Jehova. (Rom. 12:11) Niinzi nzitweelede kuchita kuti tujane muuya uusalala? Tweelede kuukombela, tubale Jwi lyaLeza, alubo tuswiilile malayilile ngitupegwa aambunga. Kuchita oobo, kutugwasya kuti tube “amichelo yamuuya.”—Gal. 5:22, 23.

14. Niinzi nzituteelede kuchita kuti tukkale katujana muuya uusalala? (Langa chifanikisyo.)

¹⁴ Chiindi Leza natupa muuya wakwe uusalala tweelede kuchenjelela kuti “tutazimi mulilo wamuuya.” Leza ubapa muuya uusalala aabo bakkala kabayeeya zintu zilikabotu alubo balijata munzila iilikabotu. Pesi aabo bayeeya akuchita zintu zitali kabotu tabapi pe muuya uusalala.  (1 Tes. 4:7, 8) Kuti tukkale katujana muuya uusalala tatweelede “kubunyansya pe bupolofita.” (1 Tes. 5:20) Bupolofita bwaambidwe mulugwalo oolu, chaamba mulumbe uuzwa kuli Leza kabelesya muuya wakwe uusalala alubo mulumbe ooyu uli atala abuzuba bwaJehova akuti tutalyiibi pe nkaambo chiindi chayinka. Tatweelede kuyeeya kuti Amagedoni ichili kule akuti izoosika katuli twafwa. Pesi, tweelede kukkala katuyeeya kuti yaba aafwiifwi kwiinda mukukkala katulijata munzila iilikabotu alubo “katujisikini amichito yakulipeda kuli Leza” buzuba-abuzuba.—2 Pet. 3:11, 12.

15. Niinzi nzitweelede kuchita kuti tuteenwi aamakani aakubeja aazwa kumadimoni? (1 Batesalonikka 5:21)

¹⁵ Lino-lino basinkondonyina baLeza bayoowambilizya kuti: “Luumuno akulyiiba!” (1 Tes. 5:3) Majwi aaya aazwa kumadimoni ayoozula munyika yoonse, alubo bantu biingi bayoowasyoma. (Chi. 16:13, 14) Aniswe ke? Tatukeenwi pe kuti “twaba achoonzyo azintu zyoonse.”(Bala 1 Batesalonikka 5:21.) Bbala lyachiGrikki lyakasandululwa kuti “amube achoonzyo” lyakali kubelesegwa aabantu bakali kulanga-langa nsimbi zyakapangidwe aangolida naakuti nsiliva. Kuti babone kuti nsimbi eezyo zyakapangidwe aangolida ansiliva chachoonzyo na. Munzila iikozyenie, andiswe tweelede kuyeeyesesya kuti nzitwamvwa anzitulikubala nzyachoonzyo na. Eezi nzizyo nzibakeelede kuchita maKkristu bakuTesalonikka, alubo kuyandikana loko kuti andiswe tuchite oobo mbukunga mapenzi mapati abaafwiifwi. Kwiinda kuti tuzumine zintu zyoonse nzibaamba bantu, tweelede kusaanguna kuyeeya kuti nzitulikubala anzitwamvwa zileendelana na azyaambwa aaBbayibbili ambunga yaJehova. Kuti twachita oobo, tatukeenwi pe amakani aakubeja aazwa kumadimoni.—Tus. 14:15; 1 Tim. 4:1.

16. Tulangililaanzi muchiindi chilikunembo, alubo eezi zipa kuti tuchiteenzi?

¹⁶ Tulizi kuti bakombi baJehova bayoofutuka muchiindi chamapenzi mapati. Pesi tatuzi pe ziyoochitikila umwi awumwi wesu muchiindi chilikunembo. (Jak. 4:14) Nikuba kuti tuyoozubuka muchiindi chamapenzi mapati naakuti tuyoofwa, pesi tuyoojana buumi butamani kuti twakkala katusyomeka. MaKkristu bananikidwe banooli aamwi aKkristu kujulu. Bazimwi mbelele banooli aanyika muparadayizi. Toonse atubikkile maanu kubulangilizi mbutulaabo alubo tukkale katulibambilide kusika kwabuzuba bwaJehova!