1-2. Mbuubuli buyumu-yumu mbubaswaana maKkristu mazubaano bukozyenie aambwaakaswaana Loti?

 MAZUBAANO chiindi nitubona bantu batalijati munzila iilikabotu, nga twalimvwa mbuli mbaakalimvwa Loti. Bbayibbili lyaamba kuti “wakali kukataazikana loko atala amichito iitondwa yakali kuchitwa aabantu bataswiilili mulawu.” Loti wakalizi kuti Taateesu wakujulu ulakuzonda kutalijata kabotu. (2 Pet. 2:7, 8) Kuyoowa Leza akumuyanda kwakagwasya Loti kuti azonde kutalijata kabotu kwakali kuchitwa aabantu bakapona muchiindi nchaakapona. Andiswe tuzyungulukidwe aabantu batazilemeki pe zyeelelo zyaJehova zyakulijata. Nikuba oobo, iswe tulakonzya kulijata munzila iilikabotu kuti twayinkilila kunembo katuyanda Leza akumuyoowa.—Tus. 14:2.

² Jehova ututondeezya luyando kwiinda mukutusungwaazya akutugwasya kuti tutobelezye malayilile aakwe kabelesya bbuku lyaTusimpi. MaKkristu boonse, balakonzya kugwasigwa aamalayilile aabusongo aali mubbuku eeli.

3. Kweendelana a Tusimpi 17:3, nkaakali kamwi kaambo kapa kuti tukwabilile myoyo yesu? (Langa chifanikisyo.)

³ Kaambo kapati kayandikana katugwasya kuti tukwabilile myoyo yesu yakukozyanisya nkakuti Jehova ulayilanga-langa myoyo yesu. Eezi zyaamba kuti Jehova utuzi kabotu loko alubo ulizizi zintu zyoonse nikuba eezyo nzibatakonzyi kuziba bakombima alubo ulituzi mbutubede mukati kamoyo (Bala Tusimpi 17:3.) Jehova ulabotelwa kuti twakkala katuyeeya atala amalayilile aakwe aatugwasya kuti tuzoopone kukabe kutamani. (Joh. 4:14) Eezi zipa kuti tutapambanisigwi aakutalijata kusumpulwa aaSaatani abantu mbayendelezya. (1 Joh. 5:18, 19) Kuti twaswena aafwiifwi aJehova, tulayungizya kumuyanda akumulemeka.  Akaambo kakuti tatuyandi pe kuchita zintu zinyemya Taateesu, nikuba muzeezo wakuchita chibi tuusiki pe mumizeezo yesu. Chiindi nitwasunkwa kuti tuchite chintu chitali kabotu tulalibuzya kuti, ‘Zilachita na kuti ndibisizye Jehova achaali ime kandimuyanda oobu?’—1 Joh. 4:9, 10.

4. Kuyoowa Jehova kwakamukwabilila biyeni umwi muchizi kuti atachiti chibi chipati?

⁴ Umwi muchizi wakuCroatia uutegwa Marta wakasunkwa kuti achite bwaamu, wakalemba kuti: “Kwakali kundiyumina kusala zyakuchita chiindi nindakali kusikilwa mizeezo yabwaamu akuti ndizunde penzi lyakuchita chimwi chintu chitali kabotu. Pesi kuyoowa Jehova kwakandikwabilila.” b Kuyoowa Leza kwakamukwabilila biyeni muchizi ooyu? Marta wakaamba kuti wakayeeyesesya atala amapenzi aaba akaambo kakutasala munzila iilikabotu. Andiswe nzitweelede kuchita. Chintu chibi loko kwiinda zyoonse nkuchita zintu zinyemya Jehova alubo zipa kuti bukombi bwesu butachitambuliki pe kulinguwe.—Matl. 6:5, 6.

5. Twiiyaanzi kuzintu zyakachitikila Leo?

⁵ Chiindi nituyoowa Jehova, zitugwasya kuti tutantamuke kumvwanana aabantu bachita zintu zitali kabotu. Umwi mukwesu uutegwa Leo wakuCongo wakabona kuti makani aaya ngachoonzyo. Kakuli kwiinda minyaka iili 4 kabbabbatizidwe, wakasaanguna kumvwanana aabantu bakali kuchita zintu zitali kabotu. Wakali kulibuzya kuti mbukunga taakali kuchita zintu zibi nzibakali kuchita beenzinyina taakwe chibi nchaakali kuchita pe. Kakutanayinda chiindi chilamfu, beenzinyina aabo batali kabotu bakapa kuti asaangune kukolwa akuchita bwaamu. Kuzwa waawo, wakasaanguna kuyeeyesesya zintu bazyali bakwe Bakamboni nzibakamuyiisya alubo wakasaanguna kuyeeyesesya kubotelwa nkwaakalaako naakali kukomba Jehova. Nzyaakachita zyakamugwasya biyeni?  Wakachincha maponeno aakwe. Kagwasigwa aabaalu, wakaboola kuli Jehova. Kwaambuula oobu, lino mwaalu alubo ngupayona uuyandikana.

6. Nchiichili chikozyano chakukozyanisya nchituyanda kulanga-langa?

⁶ Atulange-lange lugwalo lwaTusimpi chaandaano 9, mulugwalo oolu kwaambidwe atala abusongo abufuba-fuba bukozyanisidwe aabanakazi babili. (Kozyanisya a Baroma 5:14; Bagalatiya 4:24.) Twanoolanga-langa lugwalo oolu, tatweelede kuluba pe kuti bantu beendelezegwa aaSaatani bakubona kakuli kabotu kuchita bwaamu akweebela ponogilafu. (Ef. 4:19) Nkinkaako, kulayandikana kuti tukkale katuyoowa Leza akutantamuka kuchita michito iitali kabotu. (Tus. 16:6) Toonse, kufumbwa kuti tuli baalumi naakuti tuli banakazi, tulagwasigwa amalayilile aali muchaandaano eechi. Banakazi aaba babili bakukozyanisya, bapandulwidwe kuti balikutamba bantu “batakwe luzyibo” chaamba aabo “batakwe maano.” Banakazi boonse aaba balikutamba kabati, ‘Amusike kung’anda yangu tuzoolye.’ (Tus. 9:1, 5, 6, 13, 16, 17) Pesi kuli musiyano mupati loko kumpindu nzibajana bantu bazumina kutambwa.

7. Kweendelana alugwalo lwa Tusimpi 9:13-18, niinzi zichitikila aabo bazumina kutambwa aamwanakazi mufuba-fuba? (Langa chifanikisyo.)

⁷ Atubale atala azyakaambwa ‘amukaintu mufuba-fuba.’ (Bala Tusimpi 9:13-18.) Mwanakazi ooyu ulaachibindi chakutamba bantu batakwe maanu kati, ‘Muboole tuzoolye.’ Nziizili mpindu zinga zyaba? Bbayibbili lyaamba kuti: “Aabo bakazundwa alufwu nkobali ooko.” Muzyaandaano zyakusaanguna zyaTusimpi, tuchenjezegwa atala ‘amukaintu muzangi’ alubo ‘amukaintu uutalilemeki.’ Bbayibbili litubuzya kuti: “Ŋanda yakwe idilikila kulufwu.” (Tus. 2:11-19) Lugwalo lwa Tusimpi 5:3-10 luli aamakani aanchenjezyo aali atala awumwi ‘mukaintu muzangi’ uuli aamawulu “aaselemukila kulufwu.”

8. Niinzi nzitweelede kulisalila kuchita?

⁸ Bantu batambwa ‘aamukaintu mufuba-fuba’ beelede kulisalila zyakuchita kuti balazumina na kutambwa aawe naakuti balakaka. Andiswe tulakonzya kuswaana chimwi chiimo chipa kuti tusale zyakuchita. Niinzi nzukonzya kuchita kuti umwi muntu weezya kukusunka kuti uchite bwaamu naakuti wabona zifanikisyo zyabantu batalijati kabotu?

9-10. Ntuutuli tumwi twaambo tupa kuti tutantamuke bwaamu?

⁹ Kuli twaambo tuyandikana tupa kuti tutantamuke kuchita bwaamu. ‘Mukaintu mufuba-fuba’ waamba kuti: “Maanzi aakubba alalweela.” Niinzi chitegwa “maanzi aakubba”? Bbayibbili likozyanisya koonana kuchitwa  aabantu bakwetene zili mumulawu amaanzi aakatalusya. (Tus. 5:15-18) Bachadide zili mumulawu mbabo bazumizigwa kuti boonane alubo balabotelwa akoonana nkubachita. Eezi zilisiyene ‘amaanzi aakubba.’ “Maanzi aakubba” alakonzya kwaamba kuchita bwaamu naakuti koonana kwabantu batachadide. Bantu aabo boonana chakusisikizya mbuuli mbachita muntu uubba. “Maanzi aakubba” abonekaanga alanona kuti bantu aabo kababonaanga taakwe muntu uuzizi pe kuti nzizyo nzibachita. Ooku nkulyeena. Jehova ulazibona zyoonse zichitika. Taakwe chintu chuusisya pe cheelene aakutatambulika kuli Jehova alubo taakwe ‘kulweela’ kuliwo pe kuti katutachikwe bweenzuma bulikabotu anguwe. (1 Kor. 6:9, 10) Pesi kulaamwi mapenzi aakonzya kuba.

¹⁰ Bwaamu bupa kuti muntu awubuke, alimvwe katagwasyi, aminte akuti myuunzi imwayike. Nkinkaako, mbusongo kukaka kuya ‘kung’anda’ yamwanakazi mufuba-fuba akulya chakulya chakwe. Bantu bazumina kutambwa aanguwe balafwa mubukombi alubo bantu biingi batalijati nga bajatwa malwazi aabajaya. (Tus. 7:23, 26) Tusimpi chaandaano 9:18 ijinsya aamajwi aakuti: “Beenzu bamukaintu ooyu bali kunsi kwini kwa Cuumbwe.” Pesi nkamboonzi bantu biingi nibazumina kunjila mumapenzi kwiinda mukuzumina kutambwa aamwanakazi ooyu?—Tus. 9:13-18.

11. Nkamboonzi kweebela ponogilafu nikutali kabotu pe?

¹¹ Kakole kacha bantu biingi nkweebela ponogilafu. Bamwi babonaanga kweebela ponogilafu teekubisya pe pesi kwaamba choonzyo, ponogilafu ilapambanisya, ilawubula alubo injila muganzi. Mapikicha aabantu batalijati kabotu taazimiki pe chakufwambaana mumizeezo yesu. Ponogilafu tayijayi chiyandisyo chakuchita zintu zitali kabotu pesi ipa kuti chiyandisyo eecho chibuke akuti muntu ayande kuchita zintu zitali kabotu. (Kol. 3:5; Jak. 1:14, 15) Bantu biingi beebela ponogilafu nga bazoochita bwaamu.

12. Kujana twazitantamuka biyeni zifanikisyo zipa kuti tube aachiyandisyo chakoonana?

¹² Niinzi maKkristu nzibeelede kuchita kuti mufooni naakuti mutebbuleti kwazwa chifanikisyo chabantu batalijati? Tweelede kufwambaana kugwisya chifanikisyo eecho. Kuyeeyesesya atala ambubuyandikana bweenzuma mbutulaabo aJehova kuyootugwasya kuti tufwambaane kubweza ntaamu. Zimwi zifanikisyo nga tazitondeezyi bantu batazweete pe pesi zibusya chiyandisyo chakoonana. Nkamboonzi nitweelede kuzitantamuka zifanikisyo eezyo? Tatuyandi pe kuti zipe kuti tuchite bumambi mumyoyo yesu. (Mt. 5:28, 29) Umwi mwaalu wakuThailand uutegwa David wakaamba kuti: “Nga ndalibuzya kuti, ‘Nikuba kuti zifanikisyo eezi tazitondeezyi bantu batazweete, Jehova ulabotelwa na kuti wandibona kandili kweeba zifanikisyo eezyo?’ Kuyeeyesesya kuli boobu, kundigwasya kuti ndisale munzila yabusongo.”

13. Niinzi chikonzya kutugwasya kuti tusale munzila yabusongo?

¹³ Kuyoowa kuchita zintu zinyemya Jehova kutugwasya kuti tusale munzila yabusongo. Kuyoowa Leza ‘matalikilo aabusongo.’ (Tus. 9:10) Eezi zikozyanisidwe munzila mbotu loko kumajwi aakusaanguna aali Tusimpi chaandaano 9, aawo mputubala atala amwanakazi wakukozyanisya waambidwe kuti ‘mbusongo bwini-bwini.’

14. Nkuukuli kutambwa kwaambidwe muli Tusimpi 9:1-6?

¹⁴ Bala Tusimpi 9:1-6. Mulugwalo oolu tubala atala akutamba nkwachita Jehova Mulengi wesu alubo Kasawu kabusongo bwachoonzyo. (Tus. 2:6; Rom. 16:27) Alubo tubala atala ang’anda mpati ilaamisemu iili 7. Eezi zitondeezya kuti Jehova mwaabi alubo ulabatambula aabo boonse bayanda busongo bwakwe.

15. Leza ututamba kuti tuchiteenzi?

 ¹⁵ Jehova Mwaabi alubo utupa zintu zyiingi zibotu. Buntu oobu bulitondeezedwe muchikozyano ‘chabusongo bwini-bwini’ bwiimininwa aamwanakazi muli Tusimpi chaandaano 9. Alubo chaandaano eechi chaamba kuti mwanakazi ooyu wakukozyanisya wakatamba bantu kuti baze kung’anda yakwe bakalye nyama, wayini alubo tebbulu lyakwe wakalibamba kabotu-kabotu. (Tus. 9:2) Alubo muvesi 4 a5 waambwa kuti: “[Waambila] yooyo uutakwe maano kuti: ‘Kamuboola muzoolye cinkwa cangu.’” Nkamboonzi nitweelede kwiinka kung’anda yamwanakazi ooyu akulya chakulya chinono nchaakajika? Jehova uyanda kuti bana bakwe babe basongo akuti balikwabilile. Tayandi pe kuti twiiye kuzwa kukulubizya kwesu mpawo tulisole akaambo kazintu eezyo. Eezi zipa kuti “baluleme [abayobwede] busongo bugwasya.” (Tus. 2:7) Kuyoowa Jehova kutugwasya kuti tuchite zintu zimubotezya. Tuswiilila malayilile aakwe aabusongo alubo tulabotelwa kuti twaabelesya mubuumi bwesu.—Jak. 1:25.

16. Kuyoowa Leza kwakamugwasya biyeni Alain kuti asale munzila yabusongo alubo nziizili mpindu zyakaba?

¹⁶ Atubone kuyoowa Leza mbukwakagwasya Alain kuti asale munzila yabusongo. Alain mwaalu alubo nguticha, wakaamba kuti, “Bantu biingi bachaalumi mbindibelekaabo beebela mavidiyo aaponogilafu alubo baamba kuti atuyiisya atala azyakoonana.” Pesi Alain taakazumina pe kweenwa. Wakaamba kuti: “Akaambo kakuti ndilamuyanda Jehova akuti ndilamuyoowa, ndakakaka kweebela mavidiyo aayo. Alubo ndakapandulwida mbindibelekaabo kuti nkamboonzi nindakakaka kweebela.” Nzyaakachita mukwesu ooyu wakabelesya malayilile ‘aabusongo bwini-bwini’ aakuti “amuzumanane kweenda munzila yamaano.” (Tus. 9:6) Bamwi mbabelekaabo Alain nibakabona kuti wakaka kweebela mavidiyo aayo, bakasala kwiiya Bbayibbili alubo balikunjila miswaangano yachiKkristu.

17-18. Nziizili zilongezyo nzibajana aabo bazumina kutambwa ‘aabusongo bwini-bwini’ alubo balangililaanzi muchiindi chili kunembo? (Langa chifanikisyo.)

¹⁷ Jehova wakabelesya chikozyano chabanakazi babili bakukozyanisya kuti atondeezye mbutukonzya kuzoojana kubotelwa kwachoonzyo muchiindi chili kunembo. Aabo bazumina kutambwa ‘aamukaintu mufuba-fuba’ balikunonenwa ‘aakulweela’ kwabwaamu kuchitwa chakusisikizya. Bantu aaba tabazizi pe zintu zizoobachitikila muchiindi chili kunembo. Mpindu yabo ili “kunsi kwini kwa Cuumbwe.”—Tus. 9:13, 17, 18.

¹⁸ Aabo bazumina kutambwa aamwanakazi wiimininwa ‘aabusongo bwini-bwini’ bazoobotelwa muchiindi chili kunembo. Bazoojana chakulya  chiingi chamubukombi chinono alubo chiyaka mubili. (Is. 65:13) Kabelesya mupolofita Isaya, Jehova wakaamba kuti: “Amundiswiililisye, eelyo mulalya cakulya cibotu, alimwi mulakkomana kapati akaambo kazyakulya zyamafwuta.” (Is. 55:1, 2) Tulikwiiya kuti tuyande zintu nzyayanda Jehova akuti tuzonde zintu nzyazonda. (Int. 97:10) Alubo tulabotelwa kutamba bamwi kuti bazoogwasigwe ‘aabusongo bwini-bwini.’ Kuli mbuli kuti tulikwiinka “atala aamasena aasumpukide aamunzi akwiita bantu kuti: ‘Kufwumbwa uutakwe luzyibo, aaboole okuno.’” Zilongezyo nzitujana iswe abaabo batuswiilila zilatugwasya lino amuchiindi chili kunembo. Alubo zipa kuti tuzumanane “kweenda munzila yamaano.”—Tus. 9:3, 4, 6

19. Kweendelana alugwalo lwa Mukambausi 12:13, 14, tweelede kukanza kuchitaanzi? (Langa kabbokesi katii, “ Mbutugwasigwa Aakuyoowa Leza.”)

¹⁹ Bala Mukambausi 12:13, 14. Kuyoowa Jehova akutugwasye kuti tukwabilile myoyo yesu, tulijate munzila iilikabotu alubo tukkale katusimide mubukombi kumazubaano aakumamanino. Alubo kuyoowa Jehova akupe kuti twiinkilile kunembo kutamba bantu biingi kuti bayanduule “busongo bwini-bwini” akuti bagwasigwe abusongo oobo.