1. Kweendelana alugwalo lwa 1 Petro 5:2, nchiichili chilongezyo nchibalaacho baalu?

 BAALU bachiKkristu bakasalwa aaJehova kuti beembele mbelele zyakwe. Baalumi aaba balipedelede bachibona kachili chilongezyo kugwasya bakwesu abachizi alubo babeleka changuzu kuti ‘babeembele kabotu.’ (Jer. 23:4; bala 1 Petro 5:2.) Nchilongezyo chipati loko kuba aabaalu mumbungano.

2. Mbuubuli buyumu-yumu mbubakonzya kuswaana baalu?

² Chiindi baalu nibachita mulimu wabo wakulangania mbungano, baswaanana aabuyumu-yumu busiyene-siyene. Baalu beelede kubeleka changuzu kuti bakonzye kulangania mbungano. Umwi mwaalu uutegwa Tony waku-United States wakaamba kuti, ndakeelede kulibombya kuti ndikonzye kuzumina kuchita mulimu ngundakali kukonzya kuzuzikizya. Wakaamba kuti: “Niyakasaanguna kkorona ndakazumina kuchita milimu myiingi iiswaanizya kupanga pulogilamu yamiswaangano yambungano ayamiswaangano yakukambawuka. Muchiindi chifwiifwi, ndakasaanguna kujampisya kubala Bbayibbili, kuyanduulisisya akukomba.” Mwaalu wakuKosovo uutegwa Ilir wakaswaana penzi lisiyene chiindi naakali kubbazu kwakali kuchitika nkondo. Kwakali kumuyumina kuti aswiilile malayilile aakali kuzwa kumbunga. Wakaamba kuti: “Bakwesu bakuwofesi yamutabi bakandikumbila kuti ndikagwasye bakwesu abachizi bakali kumasena aayoosya loko akaambo kakulwana. Ndakayoowa loko. Malayilile ngindakapegwa akali kubonekaanga taabeleki pe.” Tim uubeleka kali mishinali ku-Asia wakali kukachilwa kuzuzikizya zintu nzyaakeelede kuchita abuzuba. Wakaamba kuti: “Chimwi chiindi ndakali kulimvwa kandili ndazukila akukatala zyakuti taakwe chimwi  chintu nchindakali kukonzya kuchita.” Niinzi chikonzya kugwasya baalu bali aabuyumu-yumu buli boobu?

3. Toonse tugwasigwa biyeni achikozyano chaMubetesi Gidiyoni?

³ Baalu balakonzya kwiiya kuzwa kuchikozyano chaMubetesi Gidiyoni. (Heb. 6:12; 11:3) Wakali kukwabilila akweembela bakombi baLeza. (Bab. 2:16; 1 Mak. 17:6) Mbuli Gidiyoni, baalu bakasalwa kuti bagwasye bakombi baLeza muchiindi chamapenzi. (Mil. 20:28; 2 Tim. 3:1) Tulakonzya kwiiya zyiingi kuzwa kukulibombya kwaGidiyoni akuswiilila. Kulisimya kwakwe kwakasunkwa chiindi naakali kuchita milimu yakwe. Nikuba kuti tuli baalu naakuti pe, tweelede kutondeezya kuti tulabalumba baalu. Tulakonzya kugwasilizya bakwesu aaba babeleka changuzu mumbungano.—Heb. 13:17.

4. Gidiyoni wakatondeezya biyeni kuti ulalibombya?

⁴ Gidiyoni wakali kulibombya. b Ngilozi yaJehova yakabuzya Gidiyoni kuti wakali wasalwa kuti afutule ma-Israyeli kuzwa kubantu bakuMidiyani bakali aanguzu loko. Mwaalumi ooyu uulibombya wakasandula kuti: “Ciinga cangu nceciniini kapati akati kaziinga zya Manase alimwi mebo ndendime musyoonto kapati muŋanda yabataata.” (Bab. 6:15) Wakalibona kateeleli pe kuti achite mulimu ooyo, pesi Jehova wakalizi kuti ulawukonzya. Kwiinda mukugwasigwa aaJehova, Gidiyoni wakazwidilila kuchita mulimu wakwe.

5. Ndiilili baalu nikukonzya kubayumina kulibombya?

⁵ Baalu batondeezya kuti balalibombya kuzintu zyoonse nzibachita. (Mik. 6:8; Mil. 20:18, 19) Tabalisumpuli pe akaambo kazintu nzibakonzya kuchita azintu nzibakazwidilila kuchita alubo tabalipi mulandu pe akaambo kazintu nzibakachilwa kuchita. Nikuba oobo, kuli zintu zikonzya kubasunka. Muchikozyano, mwaalu ulakonzya kuzumina milimu myiingi loko zyakuti ngawazookachilwa kwiizuzikizya. Naakuti ulakonzya kusolwa abamwi kuti teewawuchita kabotu umwi mulimu, chimwi chiindi ulakonzya kulumbayizigwa kuti wazwidilila kuchita imwi mulimu. Niinzi nzibakonzya kwiiya baalu kuzwa kuli Gidiyoni muzyiimo zili boobu?

6. Niinzi nzibakonzya kwiiya baalu kukulibombya kwaGidiyoni? (Langa chifanikisyo.)

⁶ Kumbila kugwasigwa. Muntu uulibombya ulizizi zintu nzyatakonzyi kuchita. Gidiyoni wakatondeezya kuti ulalibombya kwiinda mukukumbila kugwasigwa abamwi. (Bab. 6:27, 35; 7:24) Baalu basongo mbubachita ambabo. Tony  waambwa kumasaangunino wakaamba kuti: “Akaambo kanzila njindakakomezegwaayo, ndakali kuzumina milimu myiingi njindakatali kukonzya kuchita. Mukukomba kwampuli ndakasala kuti twaambuuzyanie atala ankani yakulibombya mpawo ndakakumbila mwanakazaangu kuti andibuzye mbaakali kundibona. Alubo ndakalanga kavidiyo kajanika aajw.org katii, Train, Trust, and Empower Others, as Jesus Does.” Tony wakapa bamwi milimu njaakatali kukonzya kuchita. Njiili mpindu yakaba? Tony wakaamba kuti: “Milimu yoonse mumbungano yakatalika kuchitwa alubo ndakajana chiindi chiingi chakubala, kuyeeyesesya akukomba.”

7. Kujana baalu bachitobelezya biyeni chikozyano chaGidiyoni chiindi nibabuzigwa majwi aatali kabotu? (Jakkobo 3:13)

⁷ Sandula munzila iilikabotu umwi naakubuzya majwi aachisa. Limwi penzi ndibakonzya kuswaana baalu, nkubuzigwa majwi aachisa. Chikozyano chaGidiyoni chilakonzya kubagwasya baalu. Nikuba kuti Gidiyoni taakamaninide pe, wakabasandula munzila iilikabotu bamusyobo wa-Efrayimu nibakamunyemya. (Bab. 8:1-3) Gidiyoni taakwe naakabasandula kanyemede pe. Wakatondeezya kuti ulalibombya kwiinda mukuswiilila bbazu lyabo. Alubo nzila njaakabasandulaayo yakapa kuti babatame. Baalu bali aabusongo balakonzya kutobelezya chikozyano chaGidiyoni kwiinda mukuswiilila akubasandula kabotu aabo babanyemya. (Bala Jakkobo 3:13.) Kuti bachita oobo, bapa kuti mumbungano kube luumuno.

8. Niinzi nzibeelede kuchita baalu chiindi nibalumbayizigwa? Amba chikozyano.

⁸ Pa kuti Jehova alumbayizigwe. Chiindi Gidiyoni naakazunda maMidiyani wakapa kuti Jehova alumbayizigwe. (Bab. 8:22, 23) Kujana baalu bachitobelezya biyeni chikozyano chaGidiyoni? Beelede kupa kuti Jehova alumbayizigwe kuzintu nzibazwidilila kuchita. (1 Kor. 4:6, 7) Muchikozyano, kuti mwaalu walumbayizigwa anzila njayiisyaayo, ulakonzya kwaamba kuti nzyaalikuyiisya zizwa muJwi lyaLeza naakuti Jehova ulatuyiisya kabelesya mbunga yakwe. Baalu beelede kulilanga-langa kuti babone kuti nzila njibayiisyaayo njakulisumpula na naakuti ipa kuti Jehova atembawulwe. Lino atulange-lange zyakachitikila mwaalu uutegwa Timothy. Naakasaanguna kubeleka kali mwaalu, wakali kukuyanda kupa nkani yabantu boonse. Wakaamba kuti: “Ndakali kutalisya nkani yangu antalisyo njumu azikozyano ziyumu zitamvwisisiki pe. Eezi zyakapa kuti bantu balumbayizye ndime alubo teebakali kubona pe kuti nzindakali kwaambuula zyakali kuzwa muBbayibbili akuti bakeelede kulumbayizya Jehova.” Mukuya kwachiindi, Timothy wakachincha nzila njaakali kuyiisyaayo kuchitila kuti bantu batamulumbayizyi zyiindilide. (Tus. 27:21) Nziizili mpindu zyakaba? Wakaamba kuti: “Bantu basiyene-siyene nga bandibuzya mbuzibagwasya nkani zyangu kuti balisimye chiindi nibaswaana buyumu-yumu ambuzilikupa kuti baswene aafwiifwi aJehova. Nzibaamba atala ankani nzindilikupa lino, ambuzilikubagwasya zipa kuti ndibotelwe loko kwiinda chiindi nibakali kundilumba luzutu kakutakwe nibakali kugwasikana anzindakali kuyiisya.”

9. Nkamboonzi nikwakali kuyumu kuti Gidiyoni aswiilile akuti atondeezye chibindi? (Langa chifanikisyo.)

⁹ Gidiyoni naakasalwa kuti abe mubetesi, wakeelede kuswiilila akuba aachibindi. Wakapegwa mulimu muyumu wakuti anyonyoone chipayililo chawisi chakukombela Bbaala. (Bab. 6:25, 26) Chiindi naakabungania masoja aakwe, kwaziindi zibili Jehova wakabuzya Gidiyoni kuti achesye namba yamasoja aakwe. (Bab. 7:2-7) Kumamanino, Gidiyoni wakazoobuzigwa kuti alwane basinkondonyina aakati kamansiku.—Bab. 7:9-11.

10. Nkamboonzi baalu nikukonzya kubayumina kuswiilila?

 ¹⁰ Baalu beelede ‘kulibambila kuswiilila.’ (Jak. 3:17) Mwaalu uuswiilila utobelezya malayilile aazwa muMagwalo amalayilile aazwa kumbunga. Kuti wachita oobo, nga ulikugwasya bamwi kuti bachite mbubo ambabo. Nikuba oobo, kuswiilila ooko kulakonzya kusunkwa. Muchikozyano, kulakonzya kumuyumina kuswiilila kuti wapegwa malayilile miingi akuti achincha-chincha. Chimwi chiindi ulakonzya kubonaanga malayilile aayo taabeleki pe. Alubo ulakonzya kukumbilwa kuti achite mulimu uukonzya kupa kuti asungwe. Baalu nga balachitobelezya biyeni chikozyano chaGidiyoni muzyiimo zili boobu?

11. Niinzi chikonzya kugwasya baalu kuti baswiilile?

¹¹ Swiilila malayilile mpawo waabelesye. Leza wakabuzya Gidiyoni mbaakeelede kunyonyoona chipayililo chawisi, nkwaakeelede kuyakila chipayililo chaJehova amunyama ngwaakeelede kupayizya. Gidiyoni taakayeeya tubili pe, wakachita mbuli mbaakamulayilila Jehova. Mazubaano, baalu batambula malayilile kuzwa kumbunga yaJehova kwiinda mumagwalo, zizibisyo amalayilile aali atala akulikwabilila ambutukonzya kukkala katuli aabweenzuma busimide aJehova. Tulabalumba baalu nkaambo batobela malayilile aazwa kumbunga. Boonse bali mumbungano balagwasikana.—Int. 119:112.

12. Lugwalo lwa Mahebberu 13:17 lubagwasya biyeni baalu chiindi nikwaba kuchincha kupya mumbunga?

¹² Tweelede kuchincha. Tutalubi kuti Jehova wakabuzya Gidiyoni kuti asyaale aamasoja mache loko. (Bab. 7:8) Kulakonzeka kuti Gidiyoni wakali kulibuzya kuti, ‘Nkamboonzi nindeelede kusyaala aamasoja mache aali boobu? Ndiyoozwidilila na?’ Nikuba oobo, Gidiyoni wakaswiilila Jehova. Mazubaano, baalu balakonzya kutobelezya chikozyano chaGidiyoni kwiinda mukuswiilila chiindi nikwaba kuchincha. (Bala Mahebberu 13:17.) Muchikozyano, mu2014 kuli kuchincha kwakachitwa aabamuKabunga Keendelezya kuli atala amali iibelesegwa kuyaka Maanda aaBwaami aMasena Aakuchitila Miswaangano Mipati. (2 Kor. 8:12-14) Chiindi, mbunga yakali kukweletesya mbungano mali kuti zikonzye kuyaka Maanda aaBwaami aMasena Aakuchitila Miswaangano mipati. Alubo mbungano zyakali kwiibbadala mali eeyo. Pesi lino mbunga ibelesya mali iisangwa aambungano zili munyika yoonse kuti kuyakwe maanda aayo, nikuba kuti mbungano zilikuyakilwa tazikwe mali pe. José naakamvwa atala akuchincha ooku wakali kubonaanga tazizoozwidilili pe. Wakali kulibuzya kuti: ‘Bazookachilwa nikuba kuyaka Ng’anda yaBwaami iimwi luzutu. Teembuzyeelede kweendelezegwa pe zintu eezi.’ Niinzi zyakagwasya José kuti aswiilile malayilile aayo? Wakaamba kuti: “Lugwalo lwa Tusimpi 3:5, 6 lwakandigwasya kuti ndisyome Jehova. Alubo kuchincha ooku kwakandigwasya loko. Tulikuyaka Maanda aaBwaami miingi loko alubo ndakayiya nzila zisiyene-siyene zyakusanga zikonzya kupa kuti bakwesu bayakilwe Maanda aaBwaami.”

13. (a) Gidiyoni wakali aachoonzyo chanzi? (b)  Kujana baalu bachitobelezya biyeni chikozyano chaGidiyoni? (Langa chifanikisyo.)

 ¹³ Chita kuyanda kwaJehova kuli aachibindi. Gidiyoni wakaswiilila Jehova nikuba kuti wakali kuyoowa akuti nzyaakali kuyanda kusala zyakali kukonzya kumunjizya mumapenzi. (Bab. 9:17) Gidiyoni wakaba aachoonzyo chakuti Jehova wakali kuyoomugwasya kuti akwabilile bakombi bakwe nkaambo wakali wamusyomezya kuti uyoomugwasya takamulekelezyi pe. Baalu bakkala mumanyika mulimu wesu muukasigwa balikutobelezya chikozyano chaGidiyoni. Bali aachibindi kwiinda mukuzulwida kumiswaangano amumulimu wakukambawuka nikuba kuti balayoosezegwa, kubuzigwa-buzigwa, kumaninwa milimu naakuti kupenzegwa. c Muchiindi chamapenzi mapati, baalu beelede kuyootondeezya chibindi kwiinda mukuswiilila malayilile ngibayoopegwa nikuba kuti kuchita oobo kulakonzya kuyoobanjizya mumapenzi. Amwi malayilile aayo anooli atala akukambawuka mulumbe uuli mbuli chivulamabwe amalayilile ngitutakapegwe kuti tukafutuke chiindi Gogo wakuMagogi nayootulwana.—Ezk. 38:18; Chi. 16:21.

14. Nkamboonzi nikwakali kukonzya kumuyumina Gidiyoni kuti alisimye?

¹⁴ Gidiyoni wakeelede kubeleka changuzu chiindi naakali mubetesi. MaMidiyani nibakachija kunkondo mansiku, Gidiyoni wakabaandila kuzwa kuKkuti lyaJezreyeli kusikila kuMulonga waJordani. Alubo kuyeeyelwa kuti mulonga ooyu wakajalidwe aamasamu. (Bab. 7:22) Gidiyoni taakajinkila aaMulonga waJordani pe, nikuba kuti wakalikatede kalaamwi amasoja aakwe bali 300 bakazubuka. Alubo wakayinkilila kunembo kubaandila basinkondonyina. Wakazoobeenzya maMidiyani mpawo wakabazunda.—Bab. 8:4-12.

15. Ndiilili mwaalu nikukonzya kumuyumina kuti alisimye?

¹⁵ Chimwi chiindi mwaalu ulakonzya kulimvwa kakatede zyakuti takonzyi kulangania mbungano ampuli yakwe. Muchiimo chili boobu, kujana wagwasigwa biyeni achikozyano chaGidiyoni?

16-17. Niinzi chakagwasya Gidiyoni kuti alisimye alubo baalu beelede kuba aachoonzyo chanzi? (Isaya 40:28-31) (Langa chifanikisyo.)

 ¹⁶ Syoma Jehova kuti ulakupa manguzu. Gidiyoni wakasyoma Jehova kuti ulamupa manguzu alubo taakwe naakamulekelezya pe. (Bab. 6:14, 34) Chiindi Gidiyoni amasoja aakwe nibakali kwaandila baami babili bamaMidiyani amawulu, kuyeeyelwa kuti baami aabo bakagadide aankamela. (Bab. 8:12, 21) Leza wakagwasya ma-Israyeli aaba kuti babeenzye baami aabo, alubo bakabazunda. Baalu ambabo beelede kusyoma Jehova nkaambo “takatali pe nokuba kuwizuka.” Uyoobapa manguzu chiindi nibayandikana kugwasigwa.—Bala Isaya 40:28-31.

¹⁷ Atubone zyakachitikila umwi mukwesu uutegwa Matthew uuli muKkomiti yaHospital Liaison. Niinzi chimugwasya kuti alisimye? Matthew wakati: “Lugwalo lwa Bafilipi 4:13 lulikuzuzikizigwa kulindime. Chiindi chiingi nga ndilikatede zyakuti nga tandichikwe manguzu pe aakwiinkilila kunembo kuti ndikonzye kugwasya bakwesu. Nga ndakomba kazizwa aansi aamoyo kandikombelezya Jehova kuti andipe manguzu aakuti ndigwasye bakombima. Muziindi eezi, chiindi nindinga ndazwa aakukomba nga ndalimvwa kandili ndaba aamanguzu aakuti ndilisimye kugwasya bakombima.” Mbuli Gidiyoni, baalu babeleka changuzu kuti bagwasye bakombinyina. Nikuba kuti chimwi chiindi nga nkuyumu kuchita oobo. Pesi baalu beelede kulibombya kuti tabakonzyi pe kuchita zintu zyoonse, kuli zimwi nzibatakonzyi kuchita. Alubo beelede kusyoma Jehova kuti ulazisandula nkombyo zyabo akuti ulabapa manguzu aakuti balisimye.—Int. 116:1; Flp. 2:13.

18. Baalu kujana bachitobelezya biyeni chikozyano chaGidiyoni?

¹⁸ Kuli zyiiyo zyiingi loko nzibakonzya kwiiya baalu kuzwa kuchikozyano chaGidiyoni. Baalu beelede kutondeezya kuti balalibombya kwiinda mukuzumina milimu njibazi kuti balakonzya kwiichita. Alubo beelede kuziba mbubeelede kusandula chiindi umwi naawamba majwi aatali kabotu naakuti nibalumbayizigwa. Beelede kuswiilila akutondeezya kuti bali aachibindi, kapati mbukunga mamanino aanyika abaafwiifwi. Beelede kusyoma kuti Jehova ulakonzya kubasimya kufumbwa buyumu-yumu mbubakonzya kuswaana. Tulabalumba beembezi aaba akaambo kakubeleka changuzu alubo tweelede “kulemeka bantu bali boobu.”—Flp. 2:29.