Tweelede kuba aalusyomo kuchitila kuti tubotezye Jehova. Pesi Bbayibbili lyaamba kuti “teebantu boonse pe bali aalusyomo.” (2 Tes. 3:2) Mwaapostoli Pawulu naakaamba majwi aaya, wakali kwaamba ‘bantu bachisa bamwi abantu babi’ bakali kumupenzya. Pesi, majwi ngaakaamba atala alusyomo alabeleka kubantu boonse. Bamwi bantu tabazumini pe kuti kuli Mulengi wakalenga zintu zyoonse. (Rom. 1:20) Bamwi balakonzya kwaamba kuti basyoma muli chimwi chintu naakuti basyoma umwi muntu uulaanguzu. Pesi, lusyomo luli oobu teendulo pe lumubotezya Jehova.

Tweelede kuba aachoonzyo chakuti Jehova mpaali akuti ulabalongezya aabo bali aalusyomo lusimide mulinguwe. (Heb. 11:6) Lusyomo muchelo wamuuya uusalala. Kuti twakomba kuli Jehova katumukumbila muuya uusalala, ulatupa. (Lk. 11:​9, 10, 13) Chimwi chintu chiyandikana kuti tujane muuya uusalala, nkubala Bbayibbili lyakalembwa aabantu kabazulwidwa aamuuya uusalala. Kuzwa waawo, tulakonzya kuyeeyesesya atala azintu nzitubala akuzibelesya. Muuya uusalala ulakonzya kutugwasya mubuumi bwesu akutugwasya kuti tube aalusyomo lubotezya Jehova.