1. Niinzi chitugwasya kuti tukkale katukomba Jehova nikuba kuti tuswaana mapenzi?

 BBAYIBBILI lyaamba mazuba ngituli kupona kuti ‘nziindi ziyumu, zikataazya kupona mulinzizyo.’ (2 Tim. 3:1) Bakombi baJehova baswaana mapenzi ngibaswaana bantu boonse munyika eeyi mbi. Alubo tulapenzegwa akaambo kakuti tukomba Jehova. Niinzi chitugwasya kuti tukkale katukomba Jehova nikuba kuti tuswaana mapenzi aaya? Kamwi kaambo kapati nkakuti twakalibonena mbaakatugwasya Jehova akuti tulizi kuti ‘nguLeza muumi.’—Jer. 10:10; 2 Tim. 1:12.

2. Niinzi nzituzi atala aJehova zikonzya kutugwasya kuti tulisimye kuti twaswaana mapenzi?

² Jehova ulaabona mapenzi woonse ngituswaana alubo ulayanda kutugwasya chiindi choonse. (2 Mak. 16:9; Int. 23:4) Kuti twayeeya kuti Jehova ulaandaba andiswe akuti ulilibambilide kutugwasya chiindi choonse, tulalisimya kumasunko woonse ngituswaana. Atubone Mwaami Davida mbaakazichita.

3. Davida wakali kwaambaanzi chiindi naakati “Jehova muumi”?

³ Davida wakalimuzi Jehova alubo wakali kusyoma mulinguwe. Chiindi Sawulu abamwi nibakali kuyanda kujeya Davida, Davida wakakomba kuli Jehova kakumbila kuti amugwasye. (Int. 18:6) Leza naakasandula nkombyo yakwe akumuvuna, Davida wakaamba kuti: “Jehova muumi!” (Int. 18:46) Davida wakali kwaambaanzi? Limwi bbuku lipandulula Bbayibbili lyakaamba kuti Davida wakali kusimya kaambo kakuti Jehova nguLeza muumi uukkala kagwasya bakombi bakwe. Nkinkaako,  kuzwa kuzintu zyakamuchitikila, Davida wakabona kuti Leza muumi alubo eezi zyakamugwasya kuti ayinkilile kunembo kukomba Jehova akumutembawula.—Int. 18:​28, 29, 49.

4. Kuziba kuti Jehova nguLeza muumi kutugwasya biyeni?

⁴ Kuba aachoonzyo chakuti Jehova nguLeza muumi kutugwasya kuti tumukombe katuli aabusungu. Kuchita oobo kutugwasya kuti tulisimye kumasunko akuti twiinkilile kunembo kubelekela Leza. Alubo kutugwasya kuti tukkale katuli aafwiifwi aJehova.

LEZA MUUMI ULAKUSIMYA

5. Niinzi chipa kuti tube aachibindi chiindi nitwaswaana masunko? (Bafilipi 4:13)

⁵ Tulakonzya kulisimya kumasunko woonse kazitakwe ndaba kuti mapati naakuti maniini kuti twayeeya kuti Jehova muumi akuti ulatugwasya chiindi choonse. Ulatugwasya kupenzi nditukonzya kuswaana nkaambo taakwe penzi limuyumina pe Leza wesu. Jehova nguLeza Singuzuzyoonse alubo ulakonzya kutupa manguzu aakuti tulisimye. (Bala Bafilipi 4: 13.) Eezi zitugwasya kuti tulipede kulangana aakufumbwa penzi litusikila. Chiindi nitubona Jehova katugwasya kumasunko maniini, tulaba aachoonzyo chakuti ulatugwasya nitwaswaana masunko mapati.

6. Niinzi zyakachitika chiindi Davida naakachili mulombe zyakapa kuti ayungizye kusyoma Jehova?

⁶ Atubone zyiimo zibili zyakapa kuti Davida ayungizye kusyoma Jehova. Chiindi naakachili muniini kayembela mbelele zyawisi, bbeya wakasika wajata mbelele mpawo aali chimwi chiindi mulavu anguwo wakaluma iimwi. Muzyiimo zyoonse eezi zibili, Davida wakatondeezya chibindi kwiinda mukwaandila banyama aaba alubo wakazivuna mbelele eezyo. Naakazunda, taakwe naakalidunda kaamba kuti wazunda aalikke. Wakalizi kuti Jehova nguwe wakamugwasya. (1 Sam. 17:​34-37) Davida taakwe naakaziluba pe zintu eezi. Kuyeeyesesya atala azintu eezi, kwakamugwasya kuti asyome kuti Leza muumi wakali kuzoomusimya muchiindi chilikunembo.

7. Kuba aamaboneno aalikabotu kwakamugwasya biyeni Davida kuti alwane Goliyati?

⁷ Mukuya kwachiindi, Davida kali waamba kusisya minyaka iili 20, wakayinka kukkeempu yamasooja aama-Israyeli. Naakasika, wakajana kuti masoja aama-Israyeli akali kuyoowa bbabbani lyakuFilisiti litegwa Goliyati. Goliyati wakali ‘kusampaula basikalumamba bana Israyeli.’ (1 Sam. 17:​10, 11) Masooja akali kuyoowa nkaambo akali kulanga mbaakali mupati Goliyati alubo azintu nzyaakali kwaambuula. (1 Sam. 17:​24, 25) Nikuba oobo, Davida wakabwene zintu zisiyene. Davida wakalizi kuti chiindi Goliyati naakali kusampawula masooja aama-Israyeli, wakali kusampawula “Leza muumi.” (1 Sam. 17:26) Wakali kuyeeya atala aJehova. Davida wakali aachoonzyo chakuti Leza ooyo wakamugwasya naakali kweembela mbelele, wakali kuzoomugwasya lubo muchiimo eechi. Akaambo kakaambo aaka, Davida wakazoolwana Goliyati mpawo wakazunda.—1 Sam. 17:​45-51.

8. Niinzi zikonzya kutugwasya kuti tube aachoonzyo chakuti Jehova ulatugwasya nitwaswaana masunko? (Langa chifanikisyo.)

⁸ Andiswe tulakonzya kuzwidilila kumasunko ngituswaana kuti twayeeya kuti Leza muumi ulilibambilide kutugwasya. (Int. 118:6) Tulakonzya kusimya lusyomo lwesu lwakuti Jehova ulatugwasya kuti twayeeya mbaakatugwasya chiindi. Bala zikozyano zyamuBbayibbili zikugwasya kubona Jehova mbaakafutula bakombi bakwe. (Is. 37:​17, 33-37) Alubo bala malipoti naakuti yebela mavidiyo aajanika aajw.org aatondeezya Jehova mbalikugwasya bakwesu abachizi  mazubaano. Mukuyungizya, yeeya atala aziindi Jehova naakakugwasya. Ulakonzya kubonaanga Jehova taakwe chintu chigambya pe nchaakakuchitila mbuli kukuvuna kumulavu naakuti kuli bbeya. Choonzyo nchakuti Jehova wakakuchitila zintu zyiingi loko mubuumi bwako. Wakakukwela kuti ube mweenzinyina. (Joh. 6:44) Lino uli mukasimpe akaambo kakuti Jehova nguwe uulikukugwasya. Nkinkaako, mukumbile Jehova akugwasye kuti uyeeye ziindi naakasandula nkombyo zyako, naakakupa zintu nzwaakali kuyanda aachiindi cheelede naakuti naakakugwasya nwaakali muchiindi chiyumu. Kuyeeyesesya atala azintu eezi kulakugwasya kuti uyungizye kusyoma Jehova kuti unooyinkilila kunembo kukugwasya.

9. Tweelede kwaabona biyeni masunko ngituswaana? (Tusimpi 27:11)

⁹ Kuziba kuti Jehova nguLeza muumi kutugwasya kuti tube aamaboneno aalikabotu atala amasunko ngituswaana. Biyeni? Chiindi nitwaswaana masunko, tweelede kubikkila maanu kunkani iiyandikana. Dyabbulosi wakaamba kuti chiindi nitwaswaana mapenzi, tulaleka kukomba Jehova. Nkinkaako, zintu nzituchita nitwaswaana masunko nzizyo zitondeezya kuti tulamuyanda na Jehova amoyo woonse. (Job. 1:​10, 11; bala Tusimpi 27:11.) Kuti twakkala katusyomeka kuli Jehova nikuba kuti twaswaana masunko, tulatondeezya kuti Dyabbulosi mubeji. Ulikukazigwa aamfulumende na, ulikuswaana penzi lyamali na, bantu tabali kukuswiilila na mumulimu wakukambawuka naakuti ulikuswaana aamwi mapenzi? Kuti kakuli oobo, yeeya kuti chiimo nchubede chikupa mweenya wakuti ubotezye moyo waJehova. Alubo utalubi kuti Jehova tazumizyi kuti uswaane mapenzi ngazi kuti tukonzyi pe kulisimya kulingawo. (1 Kor. 10:13) Ulakupa manguzu aakuti ulisimye.

LEZA MUUMI ULAKULONGEZYA

10. Leza muumi ubachitilaanzi aabo bamukomba?

¹⁰ Jehova ulabalongezya chiindi choonse aabo bamukomba. (Heb. 11:6) Utupa luumuno  akutugwasya kuti tukkutisikane lino alubo uzootupa buumi butamani. Tulakonzya kumusyoma Jehova amoyo woonse kuti ulaachiyandisyo amanguzu aakutulongezya. Eezi zipa kuti twiinkilile kunembo katumukomba mbuli mbubakachita bakombi bakwe bachiindi. Nzizyo nzyaakachita Timoti.—Heb. 6:​10-12.

11. Niinzi chakapa kuti Timoti abeleke changuzu mumbungano? (1 Timoti 4:10)

¹¹ Bala 1 Timoti 4:10. Timoti wakali aalusyomo lusimide lwakuti Leza muumi ulamulongezya. Eezi nzizyo zyakapa kuti abeleke changuzu mumulimu waJehova akuti agwasye bakombinyina. Niinzi nzyaakachita? Mwaapostoli Pawulu wakasungwaazya Timoti kuti ayinkilile kunembo kuba muyiisi uuli aaluzibo mumulimu wakukambawuka amumbungano. Timoti wakeelede kuba chikozyano chilikabotu kubakombinyina, bapati abaniini. Alubo wakapegwa iimwi milimu miyumu iiswaanizya kupa bakombinyina lulayo. (1 Tim. 4:​11-16; 2 Tim. 4:​1-5) Nikuba kuti aali chimwi chiindi, bamwi teebakali kuzibona pe nzyaakali kuchita Timoti naakuti kumulumba, Jehova wakali kuzibona alubo wakamulongezya.—Rom. 2:​6, 7.

12. Nkamboonzi baalu nibakkala kababeleka changuzu mumbungano? (Langa chifanikisyo.)

¹² Mazubaano, baalu balizi kuti Jehova ulazibona nzibachita akuti ulabalumba. Aajulu aamulimu wakweembela, kuyiisya akukambawuka, baalu biingi balagwasilizya kukuyaka mayake aambunga akugwasya bakombima banga baswaana mapenzi. Bamwi baalu bali muTubunga Tuswaya Bachiswa (PVG) naakuti mumaKkomiti Aakwaambuuzyania aaBasilisi (HLC). Baalu balizi kuti mbungano njiya Jehova, teeyabantu pe. Nkinkaako, babeleka changuzu mumilimu njibachita alubo bali aachoonzyo chakuti Leza ulabalongezya muzintu zyoonse nzibachita.—Kol. 3:​23, 24.

13. Jehova umvwa biyeni chiindi nitubeleka changuzu mumulimu wakwe?

 ¹³ Teebantu boonse pe bakonzya kuba baalu. Pesi toonse tulakonzya kupa Jehova chimwi chintu. Leza wesu ulabotelwa chiindi nitweezya kuchita zyoonse nzitukonzya kuti tumubelekele. Ulatubona nitupa zipo kuti tugwasilizye mumulimu wamunyika yoonse nikuba kuti nga teezyiingi pe. Ulabotelwa natubona katutambika kuti tusandule kumiswaangano nikuba kuti nga tuli aabweeme, alubo ulabotelwa nitulekelela aabo batubisizya. Nikuba kuti ubonaanga zintu nzulikumuchitila Jehova nziche, pesi syoma kuti Jehova uzibona kaziyandikana nzizyeezyo nzulikuchita. Ulakuyanda akaambo kazintu eezyo alubo ulakulongezya.—Lk. 21:​1-4.

KKALA KULI AAFWIIFWI ALEZA MUUMI

14. Kukkala katuli aafwiifwi aJehova kutugwasya biyeni kuti tukkale katusyomeka? (Langa chifanikisyo.)

¹⁴ Kuti katuli aabweenzuma buli aafwiifwi aJehova, kulatuubila kuti tukkale katusyomeka kulinguwe. Eezi nzizyo zyakachitika kuli Josefa. Josefa wakakaka kuchita bwaamu nkaambo wakalizi kuti yakali nkani mpati kuli Jehova akuti taakali kuyanda pe kumunyemya. (Matl. 39:9) Kuti tukonzye kuba aabweenzuma buli aafwiifwi aJehova, kulayandikana kuti tukombe kulinguwe, tubale Jwi lyakwe alubo tuyanduulisisye. Kuti twachita oobo, bweenzuma bwesu anguwe bulayungizya kusima. Mbuli Josefa, kuti katuli aabweenzuma buli aafwiifwi aJehova, tatuzoochiti kufumbwa chintu chimunyemya.—Jak. 4:8.

15. Zintu zyakachitwa aama-Israyeli nibakali munkanda zituyiisyaanzi? (Bala Mahebberu 3:12)

¹⁵ Aabo baluba kuti Jehova nguLeza muumi, nkuuba kuti batasyomeki pe kulinguwe. Atubone zyakachitika kuma-Israyeli chiindi nibakali munkanda. Bakalizi kuti Jehova mpali, pesi bakasaanguna kuzumbuuzya kuti ulakonzya na kubagwasya kuti bajane nzibakali kuyanda. Bakabuzya kuti: “Jehova mpali na aakati kesu?” (Kul. 17:​2, 7) Akaambo kazeezi, bakapapila Leza. Tatuyandi pe kutobelezya  chikozyano chabo chitali kabotu.—Bala Mahebberu 3:12.

16. Niinzi zikonzya kusunka lusyomo lwesu?

¹⁶ Bantu bali munyika balikupa kuti kutuyumine kukkala katuli aafwiifwi aJehova. Biingi balakaka kuti Leza mpali. Chiindi chiingi, aabo bataswiilili zintu nzyayanda Leza kuti tuchite babonekaanga balikuzwidilila mubuumi. Kuti twazibona eezi kazili kuchitika, lusyomo lwesu lulakonzya kusunkwa. Nikuba kuti tulasyoma kuti Leza mpali, tulakonzya kubonaanga Leza takonzyi pe kutugwasya. Aali chimwi chiindi, zyakamuchitikila eezi anguwe mulembi wa Intembauzyo 73. Wakabona bantu bakatali kuswiilila milawu yaLeza kabazwidilila mubuumi. Eezi zyakapa kuti asaangune kuzumbuuzya kuti kubelekela Leza kulagwasya na.—Int. 73:11-13.

17. Niinzi zikonzya kutugwasya kuti tukkale katuli aafwiifwi aJehova?

¹⁷ Niinzi zyakagwasya sintembawuzyo kuti achinche maboneno aakwe? Wakayeeyesesya atala azintu zyakali kuzoochitikila aabo bakali kuluba Jehova. (Int. 73:​18, 19, 27) Alubo wakayeeyesesya atala ambubagwasigwa aabo basyoma Leza. (Int. 73:24) Andiswe tulakonzya kuyeeyesesya atala azilongezyo Jehova nzyaakatupa. Atuyeeyele kusiyana kwabuumi mbutwayinoopona kaansinga tatukombi Jehova. Kuti twayeeya kuti nkamboonzi nikuli kabotu kuti tubelekele Jehova, zilatugwasya kuti tukkale katusyomeka kulinguwe. Andiswe tulakonzya kwaamba majwi ngakaamba sintembawuzyo aakuti: “Mebo, cilandibotela kuswena kuli Leza.”—Int. 73:28.

18. Nkamboonzi nituteelede kuyoowa zintu zitazoochitike kunembo?

¹⁸ Tulakonzya kulisimya kufumbwa masunko ngitukonzya kuswaana mazubaano aakumamanino nkaambo ‘tubelekela Leza wakasimpe uupona.’ (1 Tes. 1:9) Leza wesu ulandaaba andiswe alubo ulatugwasya chiindi choonse. Wakagwasya bakombi bakwe bachiindi alubo ulikutugwasya andiswe mazubaano. Lino-lino, tuzooswaana mapenzi mapati aanyika. Pesi, tatunooli aatulikke pe. (Is. 41:10) Toonse atukanze kuti “tutayoowi mpawo twaambe kuti: ‘Jehova nguwe uundigwasya.’”—Heb. 13:​5, 6.