Kwaamba masimpe, mazubaano taakwe muntu uuzi mbaakabede Pawulu. Zifanikisyo zili mumabbuku eesu nzyakukozyanisya luzutu pesi tazyaambi kuti mbumbubo mbubakabede bantu aabo.

Nikuba boobo, kuli zimwi zintu zitondeezya mbaakabede Pawulu. Muchikozyano, magazini iitegwa Zion’s Watch Tower yamuMarch 1 1902, yakapandulula mbaakabede Pawulu. Yakati: “Wakali amubili muniini, wakali aampanza, wakali aamanteeka, wakalisimide, wakali ankoye nyingi alubo wakali ampemo ndamfu . . . Bupanduluzi oobu twakabujana mubbuku litegwa ‘Acts of Paul and Thecla’ . . . lyakalembwa kuma150 A. D., bbuku eeli lipandulula Pawulu munzila iimvwisisika.’”

Oxford Dictionary lyaChristian Church (lyakadindwa mu1997) kalipandulula mbuzyakali kulembwa zintu chiindi, lyakati: “Zilakonzeka kuti bbuku lya‘Acts’ lili azintu zyakasimpe atala atunsiya-nsiya twachiindi.” Bbuku lyaActs of Paul and Thecla lyakali kulemekwa mumwaanda wamunyaka wakusaanguna eezi zilitondeezedwe mumabbuku aachiGirikki aali 80 aamwi mabbuku ayimwi milaka. Nkinkaako, zifanikisyo nzitubelesya zileendelana abupanduluzi buli mumabbuku aatwaano twachiindi aatondeezya mbaakabede mwaapostolo Pawulu.

Kuli zintu zyiingi ziyandikana kwiinda kuziba mbaakabede Pawulu. Nikuba kuti Pawulu wakali kukambawuka, pesi bamwi bantu bakali kumusampawula kabati: “Naaboneka kumeso, ulikompeme buyo, alimwi kwaamba kwakwe nkusampusi.” (2 Kor. 10:10) Tatweelede kuluba kuti Jesu wakapa kuti Pawulu abe muKristu munzila iigambya. Alubo tweelede kuyeeyesesya atala azintu nzyaakachita Pawulu ‘naakasalwa kuti atole zina lyaKristu kuli bamasi.’ (Inc. 9:3-5, 15; 22:6-8) Atuyeeyesesye zyiiyo nzitujana mumabbuku aamuBbayibbele akalembwa aPawulu naakali kuzulwidwa amuuya uusalala waJehova.

Pawulu taakali kulidunda pe azintu nzyaakali kuchita katanaba muKristu alubo taakwe naakalemba atala ambaakabede. (Inc. 26:4, 5; Flp. 3:4-6) Pesi wakaamba kuti: “Ime ndi muniini wabo baapostolo boonse, nseeledwe izina lyaapostolo.” (1 Kor. 15:9) Alubo wakazoolemba kuti: “Ime ndi muniini kwiinda bacece boonse babasalali, nekubaboobo ndime ndakapegwa olu luzyalo, kuti nkakambauke akati kabamasi buvubi butaambiki bwa-Kristo.” (Ef. 3:8) Majwi aaya atondeezya zintu ziyandikana kwiinda kuziba mbaakabede Pawulu.