1. Bazyali bayanda kuba achoonzyo chanzi bana babo kabatanabbabbatizigwa?

“NDAKATOLA myeezi myiingi kandibuzya Ndeende aBaama kuti ndiyanda kubbabbatizigwa alubo twakali kukkala katwaambuula atala anzizyo. Bakali kuyanda kundigwasya kuti ndimvwisisisye kuti kubbabbatizigwa nchintu chiyandikana. Mu31 December 1934, bwakasika buzuba mbunditalubi pe mubuumi bwangu.” Blossom Brandt mbaakazipandulula zyakachitika katanabbabbatizigwa. Bazyali bachiKristu abalabo balabagwasya bana babo kuti basale kabotu. Kunonoka kubbabbatizigwa kupa kuti bana babo batachiti kabotu muzintu zyabukombi. (Jak. 4:17) Pesi bazyali bayanda kuba achoonzyo chakuti bana babo bakalipeda na kuba maKristu kabatanabbabbatizigwa.

2. (a) Niinzi chipa kuti bamwi balangizi bamabazu bakataazikane? (b) Tuyoolanga-langaanzi muchiiyo eechi?

² Bamwi balangizi bamabazu balakataazikana nibabona bachikula bali aminyaka iili kuma20, bakakomenena  mumpuli yaBakamboni batanabbabbatizigwa. Chiindi chiingi, bachikula aaba baliinka kumiswaangano yambungano akukambawuka. Balibona kuti Mbakamboni baJehova. Nikuba boobo, balalengwaana kulipeda kuli Jehova akubbabbatizigwa. Niinzi chipa kuti batachiti oobo? Chimwi chiindi bazyali mbabo bapa kuti batabbabbatizigwi. Muchiiyo eechi, tuyoolanga-langa zintu zine zipa kuti bazyali batagwasyi bana babo kuti babbabbatizigwe.

3. Niinzi chakali kukataazya bazyali baBlossom?

³ Bazyali baBlossom waambwa mufuka lyakusaanguna bakali kukataazikana kuti mwanaabo wakeelela na kuti abweze ntaamu yakubbabbatizigwa. Kujana bazyali baziziba biyeni kuti mwanaabo wakeelela kulipeda kuli Jehova?

4. Lugwalo lwaMatayo 28:19, 20, kujana lwabagwasya biyeni bazyali chiindi nibayiisya bana babo?

⁴ Bala Matayo 28:19, 20. Mbuuli mbutwakiiya muchiiyo chakiinda, Bbayibbele talyaambi pe minyaka muntu njayelede kubaayo kuti ayelele kubbabbatizigwa. Nikuba boobo, bazyali beelede kuziba kuti kuyiisya kuswaanizyaanzi. Bbala lyachiGirikki lyakasandululwa kuti “mukabaiisye” lili muli Matayo 28:19 litondeezya kuyiisya kuli amakanze aakuti muntu abe sikwiiya. Sikwiiya weelede kusyoma njiisyo zyaJesu akuchita kweendelana azintu nzyalikwiiya. Nkinkaako, bazyali bachiKristu beelede kuyiisya bana babo kabali amakanze aakuti bazoobe basikwiiya baKristu babbabbatizidwe. Mwana uchili muniini loko tayeleli pe kubbabbatizigwa. Nikuba boobo, Bbayibbele litondeezya kuti bana balakonzya kumvwisisisya kasimpe kamuBbayibbele.

5, 6. (a) Nzilyaamba Bbayibbele atala aTimotewo, zitondeezyaanzi atala akubbabbatizigwa kwakwe? (b) Kujana bazyali babagwasya biyeni bana babo?

⁵ Timotewo wakamvwisisisya kasimpe kachikomena. Mwaapostolo Pawulu wakaamba kuti Timotewo wakiiya kasimpe kamuMagwalo kachili mwana muniini. Nikuba kuti Timotewo wakakomenena mumpuli yabantu bakali kusyoma zintu zisiyene, pesi banyina abanyinakulu bakali kumuyiisya kasimpe kamuMagwalo. Eezi zyakamugwasya kuti abe alusyomo lusimide. (2 Tim. 1:5; 3:14, 15) Naakali aminyaka iili kuma20, Timotewo wakali waba muKristu weelela kupegwa mikuli mumbungano.​—Inc. 16:1-3.

⁶ Bana balisiyene nkinkaako nzila njibakamvwisisisyaayo kasimpe ilisiyene. Bamwi balakonzya kukamvwisisisya kasimpe kabachili baniini akuba achiyandisyo chakuti babbabbatizigwe. Bamwi balakonzya kubbabbatizigwa kabali bakomena. Nkinkaako, bazyali tabeelede kusungilizya bana babo kuti babbabbatizigwe. Pesi, beelede kugwasya mwana umwi awumwi kuti ayinkilile kunembo muzintu zyamubukombi. Bazyali balabotelwa chiindi mwanaabo naachita kweendelana alugwalo lwaTusimpi 27:11. (Bala.) Nikuba boobo, tabeelede kulengwaana pe kuyiisya bana babo kuti bazoobe maKristu. Bazyali beelede kulibuzya kuti ‘Mwanaangu ulaaluzibo na atala aLeza zyakuti ulakonzya kulipeda kuli nguwe akubbabbatizigwa?’

7. Muntu weelede kuba aluzibo luli biyeni kuti ayelele kubbabbatizigwa? Pandulula.

⁷ Bazyali beelede kuyiisya bana babo kuti babe aluzibo lukonzya kubagwasya kuti bazoolipede kuli Jehova. Eezi tazyaambi kuti beelede kuziba zintu zyoonse zili muBbayibbele kuti beelele kubbabatizigwa. Kuti muntu wabbabbatizigwa, weelede kuzumanana kubala kuti abe aluzibo lwakasimpe. (Bala BaKolose 1:9, 10.) Nkinkaako, muntu weelede kuba aluzibo luli biyeni kuti ayelele kubbabbatizigwa?

8, 9. Twiiyaanzi kuzintu zyakachitika kumulindi wajele?

⁸ Zintu zyakachitwa ayimwi mpuli yamumwaanda wamunyaka wakusaanguna, zilakonzya kubagwasya bazyali mazubaano. (Inc. 16:25-33) Mu50 C.E., mulweendo lwachibili kali mumishinali, Pawulu wakaswaya mbungano yakuFilipi. Kabachili kuFilipi, Pawulu aSilasi bakasungwa akubikkwa mujele. Mubusiku oobo, kwakaba muzuzumo wanyika mpawo milyango yaJele yakajulika. Mulindi wajele wakabonaanga basungwa bakachija alubo wakayeeya kulidina mpawo Pawulu wakamukasya. Pawulu aSilasi bakakambawukila mulindi ampuli yakwe. Zintu nzibakiiya atala aJesu zyakapa kuti bachiteenzi? Bakabbabbatizigwa mpawaawo. Twiiyaanzi kulizyakachitika?

⁹ Mulindi ooyu ulakonzya kuti wakali silumamba wamaRoma chiindi. Taakwe nchaakazi pe atala aMagwalo. Kuti amvwisisisye kasimpe, wakeelede kuyiisigwa Bbayibbele akuti azibe mbukwaamba kuba mubelesi waLeza akuchita kweendelana anjiisyo zyaJesu. Zintu ziche nzyakayiya wakazisyoma alubo zyakapa kuti ayande kubbabbatizigwa. Naakabbabbatizigwa wakazumanana kubala Bbayibbele. Kamuli kuyeeya chikozyano eechi, kujana mwachita biyeni kuti mwaneenu wakamvwisisisya kasimpe alubo waziba mbukuyandikana kubbabbatizigwa? Mulakonzya kumubuzya kuti aambuule abaalu bamumbungano yanu kuti babone kuti mwaneenu wakeelela na kubbabbatizigwa. * Mbuuli bamwi, alakwe weelede kuzumanana kuyungizya luzibo lwakwe atala aJehova kwabuumi bwakwe boonse.​—Rom. 11:33, 34.

10, 11. (a) Bamwi bazyali basungwaazya bana babo kuti bachiteenzi? (b) Nziizili zintu bazyali nzibeelede kubikkila maanu?

¹⁰ Bazyali bamwi basungwaazya bana babo kuti banonoke kubbabbatizigwa kuti babe alwiiyo lwaajulu akuti bazoobeleke milimu iili aajulu mpawo nibatazoobbabbatizigwe. Muzeezo ooyu teemubi pe, pesi bazyali beelede kulibuzya kuti: “Nzibayanda kuchita bana babo zizoopa kuti bazoozwidilile chachoonzyo na? Zileendelana na aMagwalo? Jehova uyanda kuti bachiteenzi mubuumi bwabo?”​—Bala Mukambausi 12:1.

¹¹ Tweelede kuyeeya kuti zintu zichitwa munyika eeyi tazyeendelani pe akuyanda kwaJehova. (Jak. 4:7, 8; 1 Joh. 2:15-17; 5:19) Kuti mwaneenu waba abweenzinyina bulikabotu aJehova  ulakonzya kutantamuka kufumbwa zintu zisumpulwa anyika yeendelezegwa aSaatani. Kuti bazyali basungilizya bana babo kuti babikkile maanu kulwiiyo lwaajulu ziyoopa kuti basale munzila iitali kabotu. Kujana bazyali bayanda bana babo babasungwaazya kuti bazwidilile na munyika eeyi yeendelezegwa aSaatani? Kubotelwa akuzwidilila kwachoonzyo tulakujana kuti twabikka Jehova mubusena bwakusaanguna mubuumi bwesu.​—Bala Intembauzyo 1:2, 3.

12. Nkamboonzi bamwi bazyali nibaleka kusungwaazya bana babo kuti babbabbatizigwe?

¹² Umwi muchizi naakali kupandulula nchaakali kulekela kusungwaazya mwanaakwe kuti abbabbatizigwe. Wakati: “Ndakali kuyoowa kuti mwanaangu uzoogwisigwa mumbungano.” Mbuuli muchizi ooyu, bamwi bazyali bakaleka kusungwaazya bana babo kuti babbabbatizigwe kabayanda kuti bakomene. (Matl. 8:21; Tus. 22:15) Baamba kuti, ‘Mwanaangu kuti katanabbabbatizigwa tazoogwisigwi pe mumbungano.’ Nkamboonzi mizeezo eeyi nitali kabotu?​—Jak. 1:22.

13. Kuti muntu katanabbabbatizigwa, zyaamba kuti takonzyi na kuba amulandu kuli Jehova? Pandulula.

¹³ Bazyali biingi tabayandi kuti bana babo babbabbatizigwe mane do bakomena zyakuti balakonzya kulisalila abalikke. Nkulyeena kwaamba kuti mwana takwe mulandu pe kuli Jehova kuti katanabbabbatizigwa. Nkamboonzi? Nkaambo muntu wakabbabbatizigwa teenguwe luzutu uukonzya kuba amulandu kuli Jehova. Pesi mwana ulakonzya kuba amulandu kuli Leza kufumbwa kuti wakonzya kuziba chibotu achibi. (Bala Jakobo 4:17.) Muchiindi chakuti bazyali batasungwaazyi mwanaabo kuti atabbabbatizigwi, beelede kubeleka changuzu kuti babe chikozyano chilikabotu. Beelede kusungwaazya mwanaabo kuti ayande zyeelelo zyaJehova zisumpukide kuzwa kachili muniini. (Lk. 6:40) Kuchita oobu kuyoomukwabilila mwanaabo akupa kuti apone kweendelana azyeelelo zyaJehova.​—Is. 35:8.

14. Kujana baalu babagwasya biyeni bazyali balikugwasilizya bana babo kuti babbabbatizigwe?

¹⁴ Baalu balakonzya kugwasya bazyali kwiinda mukusungwaazya bana kuti babe azipeekezyo zyamubukombi. Umwi muchizi wakapayona kwaminyaka yiinda ku70, uchiyeeya majwi ngaakabuzigwa kali aminyaka iili 6, aMukwesu Charles T. Russell. Wakati: “Wakaambuula andime kwamaminiti aali 15 atala azipeekezyo zyangu.” Eezi zitondeezya kuti majwi asungwaazya taalubiki pe. (Tus. 25:11) Alubo baalu balakonzya kutamba bazyali abana babo kuti bagwasilizye nikuyakwa Ng’anda yaBwaami akupa bachikula milimu yeendelana aminyaka yabo.

15. Kujana bamwi mumbungano babasungwaazya biyeni bachikula?

¹⁵ Bamwi mumbungano balakonzya kugwasilizya kwiinda mukutondeezya kuti balabayanda bachikula. Eezi ziswaanizya kubalumbayizya nibachita kabotu muzintu zyabukombi. Balakonzya kubalumbayizya kuti basandula munzila iilikabotu naakuti nibali  azyakuchita kumiswaangano yambungano. Alubo balakonzya kubalumbayizya kuti bazunda limwi sunko, naakuti kukambawuka kuchikolo. Beelede kufwambaana kubalumba. Tweelede kutondeezya kuti tulababikkila maanu bachikula miswaangano yambungano kiitanasaanguna aniyamana. Kwiinda mukuchita oobu, tuyoogwasya bachikula kuti bazibe kuti bali “mumbungano impati.”​—Int. 35:18.

16, 17. (a) Nkamboonzi bachikula nibeelede kubbabbatizigwa? (b) Niinzi chipa kuti bazyali babotelwe? (Langa chifanikisyo chili kumatalikilo achiiyo.)

¹⁶ Bazyali bachiKristu bali achilongezyo chakukomezya bana babo “mulwiiyo lwa-Mwami amumilazyo yakwe.” (Ef. 6:4; Int. 127:3) Kusiyana abana bamaIsrayeli bakali kuzyalwa kabali maIsrayeli, mazubaano kuti mwana abe muKristu weelede kulipeda kuli Jehova. Kuyungizya waawo, kuyanda Jehova akumusyoma tatuzyalwi aazyo pe. Kuzwa mwana nazyalwa, bazyali beelede kuba amakanze akuti abe sikwiiya, bamugwasye kuti alipede kuli Jehova akubbabbatizigwa. Niinzi nzibeelede kubikkila maanu? Kulipeda, kubbabbatizigwa akukomba Jehova nkwachita umwi awumwi, kuyoomugwasya kuti akafutuke muchiindi chamapenzi mapati.​—Mt. 24:13.

¹⁷ Blossom Brandt naakali kuyanda kubbabbatizigwa, bazyali bakwe bakali kuyanda kuziba kuti walipeda na kubweza ntaamu eeyi iiyandikana. Nibakabona kuti wakali achoonzyo, bakamugwasilizya. Kakusyeede buzuba bumwi kuti abbabbatizigwe, wisi wakachita chimwi chintu chiyandikana. Blossom wakati: “Ndeende wakati toonse tufugame, mpawo wakakomba. Wakabuzya Jehova kuti wakaliboteledwe nkaambo ndakali ndalipeda kuli nguwe.” Nikwakiinda minyaka iili 60, eezi kazichitikide, Blossom wakati: “Nsizoozilubi pe zyakachitika mubuzuba oobo!” Nibazyali, mweelede kubotelwa nimubona bana banu kabalipeda kuli Jehova akubbabbatizigwa.