CHIIYO 10
Kuyanda Jehova Akumulumba Kupa Kuti Uyande Kubbabbatizigwa
“Ino ncinzi cindilesya kubbapatizyigwa?”—MIL. 8:36.
LWIIMBO 37 Kubelekela Jehova Camoyo Woonse
ZITAYIIGWE *
1-2. Kweendelana alugwalo lwa Milimo 8:27-31, 35-38, niinzi chakasungwaazya mwaalumi wakuEtopiya kuti abbabbatizigwe?
ULAYANDA na kubbabbatizigwa kuti ube sikwiiya waKristu? Kuyanda Jehova akumulumba zyakasungwaazya bantu biingi kuti basale kuchita oobo. Atubone chikozyano chawumwi mwaalumi wakali achuuno chaajulu mubweendelezi bwamwaami mukayintu wakuEtopiya.
2 Mwaalumi ooyu wakafwambaana kubbabbatizigwa akaambo kazintu nzyaakayiya muMagwalo. (Bala Milimo 8:27-31, 35-38.) Niinzi chakamusungwaazya? Wakali kubona Jwi lyaLeza kaliyandikana nkaambo wakali kubala bbuku lyaIsaya chiindi naakali kuyabweenda mungolo. Nkinkaako chiindi Filipi naakamupandulwida Magwalo, mwaalumi ooyu wakayanda kutondeezya kulumba nzyaakachitilwa aJesu. Pesi nkamboonzi naakayinkide kuJerusalemu? Nkaambo wakali watalika kuyanda Jehova. Tuzizi biyeni eezi? Nkaambo wakali kukkala kayinka kuJerusalemu kukukomba Jehova. Alubo wakasiya chikombelo chakulimbabo akutalika kuliswaanizya achisi chakali kukomba Leza wakasimpe. Kuyanda Jehova nkukwakamusungwaazya kubweza ntaamu yakubbabbatizigwa akuba sikwiiya waKristu.—Mt. 28:19.
3. Niinzi chikonzya kukachizya muntu kubbabbatizigwa? (Langa kabbokesi kati “ Moyo Wako Weendelana Amuseele Uuli?”)
3 Kuyanda Jehova kulakonzya kukusungwaazya kuti ubbabbatizigwe. Pesi kuli limwi bbazu, luyando lulakonzya kukukachizya kubbabbatizigwa. Biyeni? Atubone zikozyano zitobela. Kulakonzeka kuti uyandisya bamumpuli naakuti beenzinyokwe batakombi nkinkaako ulakonzya kuyoowa kuti balakonzya kukuzonda kuti wabbabbatizigwa. (Mt. 10:37) Amwi uyandisya zintu nzuzi kuti Jehova taziyandi pe pesi kulakuyumina kuzisiya. (Int. 97:10) Naakuti wakakomena kamuchita ziyanza zyabukombi bwakubeja. Alubo kulakonzeka kuti zintu eezyo zyakali kukunoneezya. Eezi zilakonzya kupa kuti kukuyumine kusiya ziyanza zitabotezyi Jehova. (1 Kor. 10:20, 21) Pesi weelede kulibuzya kuti: “Ngwani naakuti niinzi nchindiyandisya loko?”
MUNTU NGUYEELEDE KUYANDISYA
4. Niinzi chintu chipati chikonzya kupa kuti muntu abbabbatizigwe?
4 Kulakonzeka kuti ulaazintu zyiingi nzuyanda anzulumba. Amwi kutanatalika kwiiya Bbayibbele aBakamboni baJehova wakali kukuyandisya kubala Bbayibbele. Alubo wakali watalika kuyanda Jesu. Lino wakazibana aBakamboni baJehova nkinkaako uyandisya kuliswaanizya ambabo. Pesi kuyanda eezi takupi kuti weelele kulipeda kuli Jehova akubbabbatizigwa. Chintu chipati cheelede kupa kuti ubbabbatizigwe nkuyanda Jehova. Kuti wayanda Jehova kwiinda zintu zyoonse, taakwe chintu naakuti muntu uuyookukachizya kuti umubelekele. Ulabona kuti kuyanda Jehova kuyoopa kuti ubbabbatizigwe akuti ukkale kumubelekela.
5. Njiili mibuzyo njitutalange-lange?
5 Jesu wakaamba kuti tweelede kuyanda Jehova amyoyo yesu yoonse, abuumi bwesu boonse, amizeezo yesu yoonse, amanguzu eesu woonse. (Mk. 12:30) Niinzi chikonzya kukugwasya kuti uyande Jehova akumulemeka amoyo wako woonse? Kuyeeyesesya atala Jehova mbatuyanda kulakonzya kupa kuti andiswe tumuyande. (1 Joh. 4:19) Niinzi zimwi nzitukonzya kuchita kuti twatalika kuyanda Jehova? *
6. Kweendelana alugwalo lwa Baroma 1:20, niinzi chikonzya kugwasya muntu kuti ayiye atala aJehova?
6 Yiya atala aJehova kwiinda muzintu nzyaakalenga. (Bala Baroma 1:20; Ciy. 4:11) Yeeyesesya atala abusongo bwakwe buboneka muzintu nzyaakalenga. Yiya atala anzila mbotu mubili wako njulengedwe aayo. (Int. 139:14) Alubo yeeya atala anguzu Jehova nzyaakabikka muzuba mpawo uyeeye kuti ninyenyeezi iimwi akati kamabbiliyoni anyenyeezi. * (Is. 40:26) Kuti wachita oobo, uyoomulemeka loko Jehova. Kuziba kuti Jehova ulaabusongo amanguzu teenkuko pe akulikke kupa kuti tumvwanane anguwe. Kuti uyandisye Jehova weelede kuziba zyiingi atala anguwe.
7. Niinzi nzweelede kusyoma kuti uyande Jehova amoyo wako woonse?
7 Weelede kusyoma kuti Jehova ulaandaba anduwe. Kulakuyumina na kusyoma kuti Mulengi wajulu anyika ulikwizi akuti ulaandaba anduwe? Kuti kakuli boobu, utalubi kuti Jehova “tali kulamfwu kuli umwi aumwi wesu.” (Mil. 17:26-28) “Ulalingaula myoyo yoonse” akukusyomezya mbuli Davida mbaakasyomezya Solomoni kuti: “Ikuti wamuyandaula, uyookulekela kuti umujane.” (1 Mak. 28:9) Kaambo kapa kuti kulookwiiya Bbayibbele lino nkakuti Jehova ‘wakakukwelela kuli nguwe.’ (Jer. 31:3) Kuziba zintu zyoonse nzwaakachitilwa aJehova, kupa kuti umuyande loko.
8. Nga ulatondeezya biyeni kuti ulalumba akaambo kakuti Jehova ulakuyanda?
8 Imwi nzila mbuutondeezya kuti ulalumba akaambo kakuti Jehova ulakuyanda, nkwaambuula awe munkombyo. Kukkala kubuzya Jehova zikukataazya akumulumba atala azintu zibotu nzyakuchitila ziyoopa kuti umuyande loko. Alubo mulamvwanana loko kuti wabona mbasandula nkombyo zyako. (Int. 116:1) Uyoosyoma kuti Jehova ulakumvwisisisya. Pesi kuti uswene aafwiifwi aJehova weelede kuziba zintu nzyayanda anzyatayandi. Alubo weelede kuziba nzyayanda kuti uchite. Kuti ube aluzibo oolu weelede kubala Bbayibbele.
Nzila mpati yakuswena aafwiifwi aLeza akuziba zintu nzyayanda nkubala Bbayibbele (Langa fuka 9) *
9. Nga ulatondeezya biyeni kuti ulibona kaliyandikana Bbayibbele?
9 Yanda Jwi lyaLeza Bbayibbele. Bbayibbele ndilyo alilikke bbuku lilaakasimpe atala aJehova amakanze aakwe. Ulakonzya kutondeezya kuti ulibona kaliyandikana Bbayibbele kwiinda mukulibala buzuba abuzuba, kulibambila chiiyo nchimuyanda kuzooyiya akubelesya nzubala. (Int. 119:97, 99; Joh. 17:17) Ulaapulogilamu yakubala Bbayibbele na? Ulayitobelezya na kwiinda mukulibala buzuba abuzuba?
10. Niinzi chimwi chipa kuti Bbayibbele lisiyane aamwi mabbuku?
10 Chimwi chintu chipa kuti Bbayibbele lisiyane aamwi mabbuku nkuti lilaazintu zyakalembwa abantu bakabona Jesu. Ndilyo alilikke lipandulula simpe atala azintu nzyakakuchitila Jesu. Kuti wayiya zintu zyakaambwa azyakachitwa aJesu ziyoopa kuti ube mweenzinyina.
11. Niinzi chikonzya kukugwasya kuti uyande Jehova?
11 Kuyanda Jesu kupa kuti uyandisye Jehova. Nkamboonzi? Nkaambo Jesu utobelezya buntu bwaWisi munzila iimaninide. (Joh. 14:9) Nkinkaako kuti wayiya zyiingi atala aJesu ziyoopa kuti uzibe Jehova akumuyandisya. Yeeya atala aJesu mbaakali kubatondeezya luzyalo bantu bakali kulangililwa aansi akaambo kakuti bakali kufwaba, kuchiswa akuti teebakakwabilidwe pe. Alubo yeeya atala amalayilile aakwe ambukonzya kuzwidilila kuti waaswiilila.—Mt. 5:1-11; 7:24-27.
12. Kwiiya atala aJesu kupa kuti uchiteenzi?
12 Kuyeeyesesya atala achinunuzyo chaJesu chakapa kuti tukonzye kulekelelwa zibi zyesu kupa kuti tumuyande loko. (Mt. 20:28) Kuti wamvwisisisya kuti Jesu wakalipeda kukufwida ziyoopa kuti uyande kuchincha akukumbila Jehova kuti akulekelele. (Mil. 3:19, 20; 1 Joh. 1:9) Alubo kuti wayanda Jehova aJesu ziyoopa kuti uyande kuliswaanizya abantu babayanda.
13. Jehova ukupedeenzi?
13 Yanda mpuli yaJehova. Bamumpuli abeenzinyokwe balakonzya kutamvwisisisya kuti nkamboonzi nuyanda kulipeda kuli Jehova. Balakonzya kukukazya. Jehova uyookugwasya kwiinda mukukupa bakwesu abachizi kuti babe mpuli yako yamubukombi. Kuti wakkala kuliswaanizya ambabo bayookutondeezya luyando akukugwasya. (Mk. 10:29, 30; Heb. 10:24, 25) Mukuya kwachiindi bamumpuli yako balakonzya kuzootalika kukomba Jehova akupona kweendelana azyeelelo zyakwe.—1 Pet. 2:12.
14. Kweendelana alugwalo lwa 1 Johane 5:3, niinzi nzwaakabona atala amilawu yaJehova?
14 Yiya kulemeka akubelesya milawu yaJehova. Kulakonzeka kuti kutanaziba atala aJehova wakali kuchita nzuyanda pesi lino wabutobelezya milawu yaJehova. (Int. 1:1-3; bala 1 Johane 5:3.) Yeeya atala amalayilile ajanika muBbayibbele agwasya balumi, bakayintu, bazyali abana. (Ef. 5:22–6:4) Kubelesya malayilile aaya kwakamugwasya na mumpuli yanu? Alubo kubelesya malayilile aJehova ali atala akusala beenzinyokwe balikabotu kwakakugwasya na? Ulikubotelwa na? (Tus. 13:20; 1 Kor. 15:33) Kweelede kuti malayilile aaya akakugwasya.
15. Niinzi chikonzya kukugwasya kuti ubelesye malayilile ali muBbayibbele?
15 Chimwi chiindi kulakonzya kukuyumina kubelesya zintu nzulikwiiya muBbayibbele. Eezi nzizyo zipa kuti Jehova abelesye mbunga yakwe kuti itupe mabbuku apandulula Bbayibbele kuchitila kuti atugwasye kusiyanisya chibotu achibi. (Heb. 5:13, 14) Kuti waabala mabbuku aaya uyoojana malayilile agwasya alubo amvwisisika. Eezi ziyoopa kuti uyandisye mbunga yaJehova.
16. Jehova ubabambide biyeni bakombi bakwe?
16 Yanda mbunga yaJehova akubelekelaamwi anjiyo. Jehova ubambide bakombi bakwe kabali mbungano zisiyene-siyene mpawo wakabikka mwanaakwe Jesu kuba mutwe wazyo. (Ef. 1:22; 5:23) Jesu wakasala kabunga kaniini kamaKristu bananikidwe kuti keendelezye mulimu ngwayanda kuti uchitwe mazubaano. Jesu wakayita kabunga aaka kuti “muzike uusyomeka alimwi uucenjede,” alubo kabeleka changuzu kukusanina mubukombi akukugwasya kuti ukkale kusyomeka. (Mt. 24:45-47) Imwi nzila muzike uusyomekede njabelesya kuti akukwabilile nkuba achoonzyo chakuti kuli baalu bakweembela. (Is. 32:1, 2; Heb. 13:17; 1 Pet. 5:2, 3) Baalu balalipeda amoyo woonse kuti bakuumbulizye akukugwasya kuti uswene aafwiifwi aJehova. Pesi chimwi chintu nchibayanda loko, nkukugwasya kuti uyiisye bamwi atala aJehova.—Ef. 4:11-13.
17. Kweendelana alugwalo lwa Baroma 10:10, 13, 14, nkamboonzi nitweelede kuyiisya bamwi atala aJehova?
17 Gwasya bamwi kuti bayande Jehova. Jesu wakabuzya batobeli bakwe kuti bayiisye bamwi atala aJehova. (Mt. 28:19, 20) Ulakonzya kuswiilila mulawu ooyu nkaambo ulizi kuti tweelede kuuswiilila. Pesi kuyanda Jehova amoyo woonse kuyookupa kuti ulimvwe mbuli mwaapostolo Johane aPetro bakati: “Tatukonzyi kuleka kwaamba zintu nzyotwakabona akumvwa.” (Mil. 4:20) Takwe chintu chibotezya mbuli kugwasya muntu kuti ayande Jehova. Yeeya mbaakabotelwa mukambawusi Filipi chiindi naakagwasya mwaalumi wakuEtopiya kwiiya kasimpe kamuMagwalo akuti abbabbatizigwe! Kuti watobelezya chikozyano chaFilipi kwiinda mukuswiilila mulawu waJesu wakukambawuka, zitondeezya kuti uyanda kuba Kamboni waJehova. (Bala Baroma 10:10, 13, 14.) Kuti wachita zyoonse eezi, ulakonzya kulibuzya mbuli mwaalumi wakuEtopiya wakati: “Ino ncinzi cindilesya kubbapatizyigwa?”—Mil. 8:36.
18. Njiili mibuzyo njitutazoosandule muchiiyo chitobela?
18 Kuti wasala kubbabbatizigwa unooli wabweza ntaamu iiyandikana loko mubuumi bwako. Kubbabbatizigwa teentaamu yakusaana pe nkinkaako weelede kuziba kuti kuswaanizyaanzi. Niinzi nzweelede kuziba atala akubbabbatizigwa? Niinzi nzuyelede kuchita kutanabbabbatizigwa anwazoobbabbatizigwa? Mibuzyo eeyi izoosandulwa muchiiyo chitobela.
LWIIMBO 2 Jehova Ndezina Lyako
^ par 5 Bamwi bantu balamuyanda Jehova pesi tabakwe choonzyo chakuti baleelela na kuti babbabbatizigwe kuchitila kuti babe Bakamboni baJehova. Kuti kulibona oobo, chiiyo eechi chilakugwasya kubona nzweelede kuchita kuti ubbabbatizigwe.
^ par 5 Bantu balisiyene nkinkaako bamwi balakonzya kubelesya malayilile atobela munzila iisiyene ambaatobelana.
^ par 6 Kuti ujane zyiingi, langa kabbuku kategwa Was Life Created? akategwa The Origin of Life—Five Questions Worth Asking.
^ par 61 BUPANDULUZI BWACHIFANIKISYO: Muchizi ulikupa umwi musimbi ngwaaswaana kumusika kapepa kakubala
