1. Kweendelana alugwalo lwa Matayo 24:9, nkamboonzi nituteelede kugamba kuti nyika kayituzonda?

ZILI mulindiswe kuti tuyande bamwi akuti tuyande kuti bamwi batuyande. Nkinkaako, kuti umwi muntu wasaanguna kutuzonda zilatuchisa alubo nga twayoowa. Muchikozyano, muchizi uutegwa Georgina uukkala kuEurope wakaamba kuti: “Nindakali aaminyaka iili 14, baama bakasaanguna kundizonda akaambo kakuti ndakali kukomba Jehova. Eezi zyakandichisa alubo ndakayeeya kuti tandili muntu uulikabotu pe.” * Mukwesu uutegwa Danylo wakaamba kuti: “Masoja nibakanduuma, kunditukila akundiyoosezya kuti bakali kuzoondichisa akaambo kakuba Kamboni waJehova, ndakayoowa alubo ndakalimvwa kanditagwasyi pe.” Kuzondwa akaambo kakuba Kamboni waJehova kulachisa pesi takutugambyi pe nkaambo Jesu wakaamba kale kuti bantu bayootuzonda.—Bala Matayo 24:9.

2-3. Nkamboonzi nyika nituzonda?

² Nkamboonzi nyika nituzonda? Nkaambo ‘tatuli banyika’ mbuli Jesu. (Joh. 15:17-19) Nikuba boobo, tulabalemeka balupati-pati bamfulumende. Pesi tatubapi bulemu bweelela Leza luzutu alubo tatutoli lubazu mutwaambo twanyika, kusalutila fuleegi akwiimba lwiimbo lwanyika. Tukomba Jehova luzutu. Tusumpula bweendelezi bwaLeza nikuba kuti Saatani “alunyungu” lwakwe balabukazya. (Matl. 3:1-5, 15) Tukambawuka atala akuti Bwaami bwaLeza mbubo abulikke buyoomaninsya mapenzi aabantu akuti buyoonyonyoona aabo batazumini kweendelezegwa ambubo. (Dan. 2:44; Ciy. 19:19-21) Makani aaya alababotezya  bantu bachita zintu ziluleme pesi bantu bachita zintu zibi taababotezyi pe.—Int. 37:10, 11.

³ Alubo bantu balatuzonda akaambo kakuti tupona kweendelana amilawu yaJehova iiluleme. Zintu Jehova nzyaamba kuti tazili kabotu bantu bali munyika teembubazibona pe. Muchikozyano, bantu biingi mazubaano bachita bwaamu munzila yiindilide nikuba kuti eezi nzizyo zyakapa kuti Leza anyonyoone bantu bakuSodoma akuGomora. (Jud. 7) Akaambo kakuti tuswiilila milawu yaJehova ilaatala akulijata, bantu biingi balatuseka alubo batwaamba kuti tulipa kaleza-leza.—1 Pet. 4:3, 4.

4. Amba buntu butugwasya kuti tulisimye nituzondwa.

⁴ Niinzi chikonzya kutugwasya kuti tulisimye chiindi nituzondwa anitutukilwa? Tweelede kuba aalusyomo lwakuti Jehova uyootugwasya. Mbuli ntobo, lusyomo lwesu lulakonzya “kuzima mivwi yoonse iiyaka mulilo iifwuswa amubi.” (Ef. 6:16) Alubo tweelede kuba aaluyando. Nkamboonzi? Nkaambo luyando “talunyemi-nyemi.” Lulajatila zintu zyoonse alubo lulalisimya muzintu zyoonse. (1 Kor. 13:4-7, 13) Lino atulange-lange kuti kuyanda Jehova, kuyanda bakombima akuyanda basinkondoma kutugwasya biyeni kuti tulisimye chiindi nituzondwa.

5. Kuyanda Jehova kwakamugwasya biyeni Jesu?

⁵ Mubusiku bwakwe bwamamanino katanajayigwa, Jesu wakabuzya batobeli bakwe basyomeka kuti: “Ndilamuyanda Taata, [nkinkaako] ndilacita mbubonya Taata mbwaakandilailila kuti ndicite.” (Joh. 14:31) Kuyanda Jehova kwakagwasya Jesu kuti alisimye kumapenzi ngaakazooswaana. Andiswe kuyanda Jehova kulatugwasya kuti tulisimye kumapenzi.

6. Kweendelana alugwalo lwa Baroma 5:3-5, bakombi baJehova balimvwa biyeni chiindi nibalikuzondwa?

⁶ Kuyanda Jehova kwakagwasya bakombi baJehova kuti balisimye chiindi nibakali kupenzegwa. Muchikozyano, chiindi baapostolo nibakabuzigwa ankuta mpati yamaJuda kuti baleke kukambawuka, kuyanda Jehova kwakapa kuti ‘bamvwide Leza mbwali mweendelezi kutali bantu.’ (Mil. 5:29; 1 Joh. 5:3) Nikuba mazubaano, kuyanda Jehova kulikugwasya bakwesu abachizi kuti bazumanane kusyomeka kuli Jehova nikuba kuti balikupenzegwa amfulumende. Nkinkaako, kuzondwa aanyika takutumani manguzu pe pesi kupa kuti tubotelwe.—Mil. 5:41; bala Baroma 5:3-5.

7. Tweelede kubabona biyeni bamumpuli nikuba kuti batukazya?

⁷ Nchintu chiyumu loko kupenzegwa abamumpuli. Bamwi bamumpuli balakonzya kuyeeya kuti tulikweenwa kuti batubona katuli kwiiya Bbayibbele. Bamwi balakonzya kuyeeya kuti twapambanika boongo. (Kozyanisya a Marko 3:21.) Alubo balakonzya kusaanguna kutatujata kabotu. Eezi tazyeelede kutugambya pe nkaambo Jesu wakaamba kuti: “Basinkondo bamuntu bayooba bantu bamuŋanda yakwe mwini.” (Mt. 10:36) Kufumbwa mbubatubona bamumpuli yesu, iswe tatweelede kubazonda pe. Kuyanda Jehova kuyoopa kuti tubayande nikuba kuti balatukazya. (Mt. 22:37-39) Nikuba boobo, tatukoosotoka milawu yaLeza naakuti kuleka kuswiilila milawu yakwe katuyanda kubotezya bantu.

8-9. Niinzi chakagwasya umwi muchizi kuti alisimye chiindi naakali kukazigwa?

⁸ Georgina waambwa kumasaangunino wakakonzya kulisimya nikuba kuti wakapenzegwa loko abayina. Georgina wakaamba kuti: “Ime abaama twakasaanguna kwiiya Bbayibbele aBakamboni baJehova. Pesi nikwakayinda myeezi iili 6 kandiyanda kusaanguna kunjila miswaangano baama bakasaanguna kundikazya. Ndakabona kuti bakali kweenwa aabasiluleyo alubo bakali kubelesya njiisyo zyabo chiindi nibakali kundikazya. Bakali kunditukila, kundidonsa  masusu, kundidina akusowa mabbuku aangu. Pesi nindakasisya minyaka iili 15 ndakabbabbatizigwa. Baama bakeezya kundilesya kubelekela Jehova kwiinda mukunditola kundawu yakali kukkala bachikula batamvwi pe. Bamwi bachikula aabo bakali kuchita zintu zitali kabotu ziswaanizya kubelesya madrugs abugwebenga. Takwe chintu chichisa mbuli kukazigwa amuntu weelede kukuyanda akukubikkila maanu.”

⁹ Niinzi chakagwasya Georgina kuti alisimye? Wakati: “Buzuba baama nibakasaanguna kundipenzya ndakali ndamaninsya kubala Bbayibbele lyoonse. Ndakali aachoonzyo chakuti ndakali ndajana kasimpe alubo ndakali ndaba abweenzinyina busimide aJehova. Ndakali kukkala kandikomba kulinguwe alubo wakali kuzisandula nkombyo zyangu. Aachiindi nchicheecho, umwi muchizi wakanditamba kung’anda yakwe kuti tuzoobale Bbayibbele akuyanduulisisya. Alubo ndakali kusungwaazigwa abakwesu abachizi kumiswaangano. Bakali kundijata mbuli mwanaabo. Ndakabona kuti Jehova ulaamanguzu kwiinda aabo batukazya kazitakwe ndaba kuti mbaani.”

10. Tweelede kuba aachoonzyo chanzi chiindi nitukazigwa?

¹⁰ Mwaapostolo Pawulu wakalemba kuti taakwe chintu chikonzya “kutwaandaanya kuluyando lwa Leza luli muli Kristo Jesu Mwami wesu.” (Rom. 8:38, 39) Nikuba kuti twakazigwa lino tulizi kuti nkwachiindi chifwiifwi biyo alubo Jehova unooli andiswe kuti atuumbulizye akuti atusimye. Mbuli zyakachitika kuli Georgina, Jehova ulatugwasya kabelesya bakombima.

11. Luyando ndwaakali kwaamba Jesu muli Johane 15:12, 13 lwakabagwasya biyeni basikwiiya bakwe? Amba chikozyano.

¹¹ Mubusiku Jesu katanafwa, wakalayilila basikwiiya bakwe kuti bayandane. (Bala Johane 15:12, 13.) Wakalizi kuti luyando lwakali kuyoogwasya basikwiiya bakwe kuti bajatane akuti balisimye nibazondwa. Eezi nzizyo zyakachitika kumbungano yakuTesalonikka. Kuzwa niyakasaanguna, maKristu bakumbungano eeyi bakali kupenzegwa. Nikuba boobo, bakakkala kabasyomeka alubo kabatondeezyania luyando. (1 Tes. 1:3, 6, 7) Pawulu wakabasungwaazya kuti bazumanane kutondeezyania luyando “kwiinda waawo.” (1 Tes. 4:9, 10) Luyando lwakapa kuti maKristu aaba bawumbulizye bakakataazikene akugwasya bakatalikwe nguzu. (1 Tes. 5:14) MaKristu aaba bakatobela malayilile Pawulu ngaakabalembela. Eezi nzizyo zyakazoopa kuti mulugwalo  lwakwe lwabili abalembele kuti: ‘Luyando umwi aumwi wanu ndwajisi kumweenzinyina luyaabuvwula.’ (2 Tes. 1:3-5) Kuyandana kwakabagwasya kuti balisimye kubuyumu-yumu mbubakali kuswaana achiindi nibakali kupenzegwa.

12. Bakwesu abachizi bakuliimwi nyika bakatondeezyania biyeni luyando chiindi nikwakali nkondo?

¹² Lino atubone zyakachitika kumukwesu waambidwe kumasaangunino uutegwa Danylo amwanakazi wakwe. Chiindi nikwakabuka nkondo kudolopo nkubakali kukkala bakazumanana kunjila miswaangano, kukambawuka akwaabilana chakulya nchibakalaacho abakwesu abachizi. Limwi zuba Danylo wakazoobona masoja basika kung’anda yakwe. Danylo wakati: “Masoja aaba bakandisungilizya kuti ndileke kuba Kamboni waJehova. Nindakakaka bakanduuma loko. Bakatalika kudubula ntobolo kujulu kabayanda kundiyoosezya. Kabatanayenda, bakandibuzya kuti, ‘Tuzooboola tuzoowone amwanakazi wako kuyanda kutayandi.’ Chakufwambaana, bakwesu bakatuchitila mabambe aakuti tukagade chitima kuti tuye kulilimwi dolopo nkutwakali kuyookkala. Tandizoolulubi luyando ndubakatutondeezya bakwesu. Nitwakakusika kudolopo eelyo bakwesu bankuko bakatupa chakulya alubo bakatugwasya kuti tujane mulimu ang’anda yakukkala. Mukuya kwachiindi, andiswe twakazookonzya kugwasya bakombima bakali kuchija akaambo kankondo.” Zyakachitika eezi zitondeezya kuti kuyandana kutugwasya kuti tulisimye chiindi nituzondwa.

13. Muuya uusalala utugwasya biyeni kuti tulisimye chiindi bantu nibatuzonda?

¹³ Jesu wakabuzya batobeli bakwe kuti bayande basinkondonyina. (Mt. 5:44) Nkuuba na kuchita oobo? Peepe! Pesi kulakonzeka kuti twagwasigwa amuuya uusalala. Muchelo wamuuya uusalala uswaanizya luyando, moyo mulamfu, luzyalo, kubomba moyo akulinyona. (Gal. 5:22, 23) Buntu oobu butugwasya kuti tulisimye nituzondwa. Bantu biingi bakali kutukazya bakachincha akaambo kakuti umwi wamumpuli naakuti simayakilane wakatondeezya buntu oobu. Bantu biingi bakali kutukazya bakaba bakombima. Kuti kakukuyumina kuyanda muntu ukuzonda akaambo kakuti ukomba Jehova, komba kuli Jehova kuti akupe muuya uusalala. (Lk. 11:13) Alubo baachoonzyo chakuti nzila zyaJehova zilagwasya chiindi choonse.—Tus. 3:5-7.

14-15. Lugwalo lwa Baroma 12:17-21, lwakamugwasya biyeni muchizi Yasmeen kuti atondeezye mulumaakwe luyando nikuba kuti wakali kumukazya?

 ¹⁴ Lino atulange-lange zyakachitikila muchizi Yasmeen chiindi naakaba Kamboni waJehova. Mulumaakwe wakayeeya kuti wakali weenwa alubo wakeezya kumukasya kukomba Leza. Mulumaakwe wakali kumutukila alubo wakabuzya babbululu bakwe, mupati wachikombelo amung’anza kuti bamuyoosezye akuti bamubuzye kuti wakali kuyanda kulijayila muunzi. Alubo mulumaakwe wakatukila bakwesu abachizi nikwakali kuchitwa miswaangano yambungano. Yasmeen wakali kukkala kalila akaambo kakuti taakali kujatwa kabotu.

¹⁵ Chiindi Yasmeen naakali kumiswaangano bakwesu abachizi bakali kumusungwaazya akumusimya. Baalu bakamusungwaazya kuti abelesye malayilile aajanika mulugwalo lwa Baroma 12:17-21. (Bala.) Yasmeen wakaamba kuti: “Teekwakali kuuba kuti ndichite oobo pesi ndakakumbila Jehova kuti andigwasye alubo ndakabeleka changuzu kuti ndibelesye malayilile aali muBbayibbele. Chiindi mulumaangu naakali kubikka doti aachaali mukkichini ndakali kukkilina. Naakali kunditukila ndakali kumusandula kabotu. Alubo naakali kuchiswa ndakali kumujata kabotu.”

16-17. Wayiyaanzi kuzwa kuchikozyano chamuchizi Yasmeen?

¹⁶ Yasmeen wakajana mpindu mbotu akaambo kakutondeezya mulumaakwe luyando. Wakati: “Mulumaangu wakatalika kundisyoma akaambo kakuti wakalizi kuti ndaambuula choonzyo chiindi choonse. Lino mulumaangu ulandiswiilila chiindi nitwaambuula atala ankani zyamuBbayibbele alubo tachichiti pe nzyaakali kuchita chiindi. Wabundisungwaazya kuti ndiinke kumiswaangano. Buumi bwesu bwakachincha loko alubo twakaba aaluumuno. Ndisyoma kuti limwi zuba mulumaangu uzootambula kasimpe akuti tuzoobelekele Jehova katulaamwi.”

¹⁷ Chikozyano chaYasmeen chitondeezya kuti luyando “lulajatila zintu zyoonse, . . . lulalangila zintu zyoonse, lulaliyumya muzintu zyoonse.” (1 Kor. 13:4, 7) Kuzondwa kulachisa pesi luyando lulakonzya kupa kuti bantu batuzonda bachinche akuti batalike kukomba Jehova. Kuyanda bantu batukazya kupa kuti Jehova abotelwe. Pesi tulakonzya kubotelwa nikuba kuti bantu batukazya bazumanana kutuzonda. Biyeni?

18. Nkamboonzi nitweelede kubotelwa chiindi nituzondwa?

¹⁸ Jesu wakaamba kuti: “Mulikkomene nywebo  kufwumbwa leelyo bantu nobamusula.” (Lk. 6:22) Tatulisalili pe kuti bantu batuzonde alubo takutunoneezyi pe kuzondwa akaambo kalusyomo lwesu. Nkamboonzi nitweelede kubotelwa chiindi nituzondwa? Atubone twaambo tutatu. Chakusaanguna, kuti twalisimya chiindi nituzondwa tulapa kuti Jehova abotelwe. (1 Pet. 4:13, 14) Chachibili, tulaba aalusyomo lusimide. (1 Pet. 1:7) Alubo chachitatu, tuzoojana buumi butamani.—Rom. 2:6, 7.

19. Nkamboonzi baapostolo nibakabotelwa chiindi nibakazwa aakuwumwa?

¹⁹ Kakutanayinda chiindi Jesu kali wabweeda kujulu, baapostolo bakakujana kubotelwa nkwaakali kwaamba. Baapostolo nibakawumwa akulayililwa kuti baleke kukambawuka bakabotelwa. Nkamboonzi? “Nkaambo bakajanwa kuti baleelela kusampaulwa akaambo kazina [lyaJesu].” (Mil. 5:40-42) Kuyanda Jesu kwakapa kuti batayoowi basinkondonyina. Bakazitondeezya eezi kwiinda mukukambawuka makani mabotu “cakutaleka.” Bakwesu abachizi biingi mazubaano balikuzumanana kubelekela Jehova nikuba kuti balapenzegwa. Balizi kuti Jehova tazooyilubi pe milimu yabo aluyando ndubakatondeezya akaambo kazina lyakwe.—Heb. 6:10.

20. Tuyoolanga-langaanzi muchiiyo chitobela?

²⁰ Kuti nyika eeyi yeendelezegwa aaSaatani kayichiliwo, bantu bayoozumanana kutuzonda. (Joh. 15:19) Pesi tatweelede kuyoowa pe. Mbuli mbututazoobone muchiiyo chitobela, Jehova ‘uyoobayumya akubakwabilila’ bakombi bakwe basyomeka. (2 Tes. 3:3) Nkinkaako, atuzumanane kuyanda Jehova, bakombima abasinkondoma. Kuti twachita oobo, tunoojisini, tunoosimide mubukombi, tuyoopa kuti Jehova alemekwe alubo tuyootondeezya kuti luyando lulatugwasya kuti tulisimye nikuba nituzondwa.