Bamwi maKristu mazubaano babelesya nzila zisumpukide zyakusendelana mameseji chiindi nibaambuula abamumpuli zyabo naakuti abakombinyina. Pesi muKristu uusimide mubukombi weelede kubikkila maanu malayilile aakuti: “Muntu uucenjede abona mapenzi ulayuba, pele aabo batakwe maano balaunka nkukonya ooko, aboobo balapenga.”—Tus. 27:12.

Tuli aachoonzyo chakuti Jehova uyanda kutukwabilila. Nkinkaako, tatuyandi kuliswaanizya aabantu bapa kuti kube kutamvwanana mumbungano, bakagwisigwa abaabo basumpula njiisyo zyabasiluleyo. (Rom. 16:17; 1 Kor. 5:11; 2 Joh. 10, 11) Alubo kulakonzeka kuti bamwi balaliswaanizya ambungano pesi tabatobelezyi malayilile aamuBbayibbele. (2 Tim. 2:20, 21) Bantu bali boobu tulabachenjelela chiindi nitusala beenzuma. Pesi kulakonzya kutuyumina kubachenjelela chiindi nitubelesya nzila zyakusendelana mameseji.

Katutanasala kujoyina group, tweelede kusaanguna kuziba kuti mbaani bantu mbitutanoowambuulaabo. Bamwi maKristu teebakachenjelela pe munkani eeyi alubo bakanjila mumapenzi. Pesi ndipenzi lili likonzya kuba kuti mukwesu naakuti muchizi wajoyina mugroup mujanika bantu basika ku100 naakuti ku1 000? Penzi ndyakuti, tazichiti pe kuti azibe bantu boonse bali mugroup eelyo akuti basimide biyeni muzintu zyamubukombi. Intembauzyo 26:4 yaamba kuti: “Tandiyanzani abantu bampelenge, alimwi ndilabatantamuka basikuupaupa ameso.” Eezi zitondeezya kuti mbusongo kusendelana mameseji abantu mbituzi luzutu.

Nikuba kuti muKristu uli mugroup ilaabantu bache, weelede kuchenjelela chiindi nchibamaninsya kabali kusendelana mameseji azintu nzibaambuula. Eezi zyaamba kuti tatweelede kusandula kufumbwa meseji yasendwa aagroup alubo tweelede kuchenjelela chiindi nchitumanisya katulikusandula mameseji aayo. Pawulu wakabuzya Timotewo kuti achenjelele “basikuvwiya abasikunjililila twaambo tutabajatikizyi.” (1 Tim. 5:13) Nkuuba kuvwiya akunjilila twaambo tutali twesu mumafooni.

MuKristu uusimide mubukombi teelede kwaamba makani aansiswa naakuti atali kabotu atala abakombinyina. (Int. 15:3; Tus. 20:19) Alubo teelede kuswiilizya naakuti kwaamba makani apa kuti bamwi bayoowe naakuti makani ngatakwe choonzyo atala angawo. (Ef. 4:25) Chakulya chamubukombi amakani aachoonzyo aali atala azichitikila bakombima alajanika aajw.org amupulogilamu yaJW Broadcasting^®.

Bamwi maKristu balikubelesya nzila eezi zisumpukide zyakusendelana mameseji kuti bawuzizyanie akunjizya bamwi milimu. Tatweelede kuswaanizya zintu eezi azintu zyamubukombi. MuKristu ‘utayandisyi mali’ weelede kutantamuka kakole kakubonaanga kuzibana abakombinyina ninzila yakujana mali.—Heb. 13:5.

Zilikabotu na kuti tusendelane mameseji kuti tugwasye bakwesu abachizi bali mumapenzi? Nisimpe kuti tulakataazikana kuti twamvwa kuti bakombima bachitikilwa limwi penzi alubo nga twaba aachiyandisyo chakubagwasya. (Jak. 2:15, 16) Pesi kuti twasendelana mameseji kuti tugwasye bantu bachitikilwa mapenzi, tulakonzya kunyongania mabambe aanga achitwa amutabi naakuti mbungano aakugwasya bantu bakachitikilwa mapenzi. (1 Tim. 5:3, 4, 9, 10, 16) Kuti twachita oobo, nga twalipa kamulimu nkitutapedwe pe mumbunga yaJehova.

Toonse tuyanda kuchita zintu zipa kuti Leza alemekwe. (1 Kor. 10:31) Nkinkaako, chiindi nitubelesya nzila zisumpukide zyakusendelana mameseji tweelede kuchenjelela mapenzi aakonzya kuba.