1. Ngaali mapenzi ngibakonzya kuswaananaawo bakombi baJehova?

KULI penzi ndulikuswaanana aalyo na? Kulakonzeka kuti kuli mukwesu naakuti muchizi wakatakujata kabotu. (Jak. 3:2) Amwi bantu mbubelekaabo naakuti mbuyiyaabo kuchikolo balakuseka akaambo kakuti ukomba Jehova. (1 Pet. 4:3, 4) Alubo kulakonzeka kuti bamumpuli balakukasya kunjila miswaangano naakuti kubuzya bamwi atala azintu nzusyoma. (Mt. 10:35, 36) Zyiimo zili boobu zilakonzya kupa kuti kukuyumine kwiinkilila kunembo kukomba Jehova. Pesi ba aachoonzyo chakuti kufumbwa penzi nduswaana, Jehova uyookugwasya kuti usale kabotu akukupa manguzu aakuti ukonzye kulisimya kupenzi eelyo.

2. Kweendelana alugwalo lwa Baroma 15:4, kubala Bbayibbele kutugwasya biyeni?

² Jehova wakazulwida bamwi balembi baBbayibbele kuti balembe atala abamwi bantu bakalisimya kumapenzi ngibakaswaananaawo. Nkamboonzi? Kuchitila kuti twiiye kuzwa kulimbabo. Eezi nzizyo zyakapa kuti Jehova azulwide mwaapostolo Pawulu kulemba majwi ali muli Baroma 15:4. (Bala.) Kubala atala azikozyano eezi kulatuumbulizya alubo kupa kuti tube aabulangilizi. Nkinkaako, kuti tugwasigwe azikozyano eezi tweelede kuchita zyiingi kutali kubala Bbayibbele luzutu. Tweelede kuzumizya Jwi lyaLeza kuti litubumbe. Niinzi nzitweelede kuchita chiindi nitubala Bbayibbele kuti tujane zyiiyo zitugwasya kuti tulisimye kumapenzi ngituswaananaawo? Tulakonzya kubelesya zintu zili 4: (1) Kukomba, (2) Kulibikka muchiimo chamuntu ngutulikubala atala anguwe (3) Kuyeeyesesya (4) Akubelesya zintu nzitwiiya. Lino atubone kuti nga tulazichita biyeni zintu eezi zili 4. * Kuzwa  waawo, tulabona mbutukonzya kubelesya zintu eezi nitwanoolanga-langa zyakachitika kubuumi bwaMwaami Davida akumwaapostolo Pawulu.

3. Niinzi nzweelede kuchita kutanasaanguna kubala Bbayibbele alubo nkamboonzi?

³ (1) Komba. Kutanasaanguna kubala Bbayibbele, komba kuli Jehova kumukumbila kuti akugwasye kuti umvwisisisye zintu nzuyanda kubala. Muchikozyano, kuti kuli kuyanduula malayilile akonzya kukugwasya kuti ulisimye kupenzi ndwaswaananaalyo, komba kuli Jehova kuti akugwasye kuti ujane malayilile aayo muJwi lyakwe.—Flp. 4:6, 7; Jak. 1:5.

4. Niinzi chikonzya kukugwasya kuti umvwisisisye zintu nzulikubala muBbayibbele?

⁴ (2) Libikke muchiimo chamuntu ngulikubala atala anguwe. Jehova wakatulenga munzila yakuti katukonzya kulibikka muchiimo chawumwi muntu. Chiindi nulikubala atala alumwi lwaano lwamuBbayibbele, yezya kulibikka muchiimo chamuntu ooyo kuchitila kuti umvwisisisye zintu nzulikubala. Yezya kubona zintu nzyaakali kubona alubo ulimvwe mbuli mbaakali kulimvwa.

5. Kuyeeyesesya kuswaanizyaanzi alubo njiili mibuzyo njweelede kulibuzya chiindi nulikuyeeyesesya?

⁵ (3) Yeeyesesya. Kuyeeyesesya kuswaanizya kuyeeya atala azintu nzulikubala akubona mbukonzya kuzibelesya mubuumi bwako. Alubo kuyeeyesesya kukugwasya kuti ubone kunjililana kuliwo aakati kazintu nzwaakabala chiindi anzulikubala lino. Kuti wachita oobo, ulamvwisisisya nkani njulikubala. Kubala Bbayibbele kutayeeyesesyi kuli mbuli kubunganisya zintu zyakuyasya mpawo kutazibelesyi pe. Pesi kuyeeyesesya kuli mbuli kubelesya zintu eezyo kuti uyake ng’anda. Chiindi nulikuyeeyesesya ulakonzya kulibuzya mibuzyo mbuli yakuti: ‘Muntu ngundilikubala atala anguwe, wakachitaanzi kuti azunde mapenzi ngakaswaananaawo? Jehova wakamugwasya biyeni? Kujana ndazibelesya biyeni zintu nzindilikubala kuchitila kuti ndilisimye kumapenzi ngindiswaananaawo?’

6. Nkamboonzi nitweelede kubelesya zintu nzitwabala?

⁶ (4) Belesya zintu nzulikwiiya. Jesu wakaamba kuti, kuti katutabelesyi nzitwiiya mubuumi bwesu tuli mbuli mwaalumi wakayaka ng’anda yakwe mumuseele wamumulonga. Mwaalumi ooyu wakabeleka changuzu pesi wakali kubelekela mahhala. Nkamboonzi? Nkaambo mvula mpati iili aaguwo niyakawa, ng’anda eeyo yakadilika. (Mt. 7:24-27) Munzila iikozyenie, kuti twakomba, twalibikka muchiimo chamuntu ngutilikubala atala anguwe akuyeeyesesya pesi katutabelesyi zintu nzituli kwiiya, ngatuli kubelekela mahhala. Alubo kuti twaswaanana aamapenzi kulatuyumina kulisimya nkaambo lusyomo lwesu nga talusimide pe. Pesi kuti twabala akubelesya nzitwabala mubuumi bwesu, tulasala kabotu, tulaba aaluumuno alubo tulaba aalusyomo lusimide. (Is. 48:17, 18) Lino atubone zyiiyo nzitujana kuzwa kuli zyakachitika kuMwaami Davida katubelesya zintu zili 4 nzitwayiya.

7. Nduululi lwaano lwamuBbayibbele ndututalange-lange?

⁷ Kuli nwakatajatwa kabotu na amweenzinyokwe naakuti awumwi wamumpuli? Kuti kakuli boobo, chikozyano chitobela chilakonzya kukugwasya. Atulange-lange nzyaakachita Mwaami Davida chiindi mwanaakwe Abbisalomu naakamupapila akuyanda kumubwezela bwaami.—2 Sam. 15:5-14, 31; 18:6-14.

8. Niinzi nzweelede kuchita kuti Jehova akugwasye?

⁸ (1) Komba. Kutanabala atala alwaano lwaMwaami Davida, buzya Jehova mbulimvwa atala akutajatwa kabotu nkwaakachitwa awumwi muntu. (Int. 6:6-9) Utamusisili pe Jehova mbulikulimvwa. Alubo mukumbile kuti akugwasye kubona malayilile atakugwasye kuti ukonzye kulisimya kupenzi ndulaalyo.

9. Niinzi zyakachitika kuli Davida aAbbisalomu?

 ⁹ (2) Libikke muchiimo chamuntu ngulikubala atala anguwe. Chiindi nulikubala atala alwaano oolu, yezya kubona mbaakalimvwa Mwaami Davida. Kwaminyaka miingi, Abbisalomu wakeezya kweena bantu kuti bamuyande. (2 Sam. 15:7) Naakabona kuti bantu biingi bakali baba kubbazu lyakwe, wakatuma bamwi baalumi kuti bakabuzye maIsrayeli kuti balibambile kuzoomubikka kuba mwaami. Alubo wakeena Ahitofeli mweenzinyina waDavida wakali sikumulaya kuchitila kuti abe kubbazu lyakwe. Abbisalomu wakalibikka kuba mwaami alubo wakeezya kuti ajaye Davida. Kulakonzeka kuti aachiindi eecho Davida wakali kuchiswa loko. (Int. 41:1-9) Davida naakaziba kuti Abbisalomu wakali kuyanda kumujaya, wakachija muJerusalemu. Nikwakayinda chiindi, masoja aaAbbisalomu akazoolwana aamasoja aDavida. Masoja aaAbbisalomu akazundwa alubo Abbisalomu wakajayigwa.

10. Mwaami Davida wakali kukonzya kuchitaanzi?

¹⁰ Yeeyela mbaakali kulimvwa Davida chiindi zintu zyoonse eezi nizyakali kuchitika kuli nguwe. Davida wakali kumuyanda Abbisalomu alubo wakali kumusyoma Ahitofeli pesi boonse bakamupapila. Bakamuchitila zintu zitali kabotu mane kusika achiimo chakuti bayande kumujaya. Davida wakali kukonzya kuleka kusyoma bamwi bakali basyaala kubbazu lyakwe, kayeeyela kuti amwi ambabo bakali baba kubbazu lyaAbbisalomu. Davida wakali kukonzya kuchija aalikke mbukunga nguwe wakali kuyanda kujayigwa. Alubo wakali kukonzya kumana manguzu. Pesi Davida teenzyakachita pe. Wakalizunda penzi ndyaakaswaananaalyo. Niinzi chakamugwasya kuti azunde penzi eelyo?

11. Davida wakachitaanzi naakali mupenzi?

¹¹ (3) Yeeyesesya. Twiiyaanzi kuzwa kuli zyakachitika kuli Davida? Libuzye kuti: “Davida wakachitaanzi kuti azunde penzi eelyo?” Davida taakayoowa pe naakuti kusala katayeeyede pe pesi wakakumbila Jehova kuti amugwasye. Alubo wakakumbila beenzinyina kuti bamugwasye. Davida wakabweza ntaamu chakufwambaana kweendelana ambaakali wasala. Nikuba kuti Davida wakalikataazikene, taakaleka pe kusyoma beenzinyina mbaakalaabo nikuba kubanyemena. Wakazumanana kusyoma Jehova abeenzinyina.

12. Jehova wakamugwasya biyeni Davida?

¹² Jehova wakamugwasya biyeni Davida? Kuti twayanduulisisya, tuyoobona kuti Jehova wakapa Davida manguzu aakuti alisimye kupenzi eeli. (Int. 3:1-8; ntalisyo) Jehova wakazilongezya nzyaakasala Davida. Alubo wakagwasya masoja aaDavida kuti bazunde basinkondonyina.

13. Kujana wachitobelezya biyeni chikozyano chaDavida kuti umwi muntu wakubisizya? (Matayo 18:15-17)

¹³ (4) Belesya zintu nzwayiya. Libuzye kuti: ‘Kujana ndachitobelezya biyeni chikozyano chaDavida?’ Weelede kubweza ntaamu chakufwambaana kuti umwi wakubisizya. Ulakonzya kubelesya malayilile Jesu ngaakaamba aajanika muli Matayo chaandaano 18 nikuba kuti nzyaakubisizya muntu teezipati loko pe. (Bala Matayo 18:15-17.) Pesi toyelede kusala zyakuchita kunyemede pe. Weelede kukomba kuli Jehova kuti akugwasye kuti ubatame akuti ukonzye kulwana penzi eelyo. Utaleki pe kusyoma beenzinyokwe alubo uzumine kugwasigwa ambabo. (Tus. 17:17) Kwiinda zyoonse, weelede kubelesya malayilile aazwa kuli Jehova aali muJwi lyakwe.—Tus. 3:5, 6.

14. Muzyiimo zili biyeni mukonzya kugwasigwa alugwalo lwa 2 Timoteyo 1:12-16 a 4:6-11, 17-22?

¹⁴ Ulikukazigwa abampuli na? Ukkala kunyika bakombi baJehova nkubali kukasigwa kuti bachite milimu yabukombi na? Kuti kakuli boobo, ulakonzya kugwasigwa amagwalo Pawulu  ngaakalemba naakali mujele. Magwalo aaya aswaanizya 2 Timoteyo 1:12-16 a 4:6-11, 17-22. *

15. Weelede kukombelaanzi?

¹⁵ (1) Komba. Kutanabala magwalo aaya, buzya Jehova atala apenzi lyako ambulimvwa. Utamusisili pe. Alubo mukumbile kuti akugwasye kuti ujane malayilile akagwasya Pawulu chiindi naakali kuswaanana aamapenzi. Malayilile aayo alakugwasya kubona nzweelede kuchita chiindi nwaaswaanana aapenzi.

16. Niinzi zyakachitika kuli Pawulu?

¹⁶ (2) Libikke muchiimo chamuntu ngulikubala atala anguwe. Libikke muchiimo chaPawulu. Yeeyela Pawulu kali mujele kuRoma. Waba aachiindi kali mujele pesi aachiindi eechi waziba kuti uyanda kujayigwa. Bamwi beenzinyina bamusansa alubo wasyaala kakataazikene.—2 Tim. 1:15.

17. Pawulu wakali kukonzya kuchitaanzi?

¹⁷ Pawulu wakali kukonzya kuyeeya kuti kaansinga taakaba muKristu nikuli taakasungwa pe. Wakali kukonzya kunyemena bantu bakali kukkala kuAsiya bakali bamusansa. Alubo wakali kukonzya kuleka kusyoma beenzinyina. Pesi Pawulu teembakachita pe. Niinzi chakagwasya Pawulu kuti azumanane kusyoma beenzinyina akuti abe aabulangilizi?

18. Pawulu wakachitaanzi kuti azunde penzi ndyaakali aalyo?

¹⁸ (3) Yeeyesesya. Libuzye kuti, “Pawulu wakachitaanzi kuti azunde mapenzi ngaakaswaananaawo?” Nikuba kuti Pawulu wakalizi kuti wakali kuzoojayigwa, pesi wakazumanana kuchita zintu zyakali kupa kuti Jehova alemekwe. Pawulu wakali kukkala kayeeya nzila zyakusungwaazya bamwi. Alubo wakali kusyoma Jehova kwiinda mukukomba kulinguwe chiindi choonse. (2 Tim. 1:3) Pawulu wakabalumba beenzinyina bakali kumugwasya muzintu zisiyene-siyene kutali kuti abikkile maanu kubantu bakali bamusansa. Pawulu wakazumanana kubala Jwi lyaLeza. (2 Tim. 3:16, 17; 4:13) Kwiinda zyoonse, Pawulu wakali aachoonzyo chakuti Jehova aJesu balamuyanda. Alubo wakali aachoonzyo chakuti bakali kuyoomulongezya akaambo kamilimu njaakali kuchita.

19. Jehova wakamugwasya biyeni Pawulu?

¹⁹ Jehova wakali wamuchenjezya Pawulu kuti wakali kuyoopenzegwa akaambo kakuba muKristu. (Mil. 21:11-13) Jehova wakamugwasya biyeni Pawulu? Wakazisandula nkombyo zyakwe alubo wakamupa manguzu. (2 Tim. 4:17) Pawulu wakabuzigwa kuti wakali kuyoojana bulumbu akaambo kakubeleka changuzu nkwaakachita. Alubo Jehova wakapa kuti beenzinyina bamugwasye muzintu zisiyene-siyene.

20. Kweendelana alugwalo lwa Baroma 8:38, 39, kujana twachitobelezya biyeni chikozyano chaPawulu?

²⁰ (4) Belesya zintu nzwayiya. Libuzye kuti, ‘Kujana ndachitobelezya biyeni chikozyano chaPawulu?’ Mbuli Pawulu, tweelede kukkala katuzi kuti tuyoopenzegwa akaambo kalusyomo lwesu. (Mk. 10:29, 30) Kuti tukkale katusyomeka chiindi nituli mumapenzi, tweelede kukomba kuli Jehova akukkala katubala Bbayibbele. Alubo tweelede kuziba kuti, chintu chiyandikana nchitweelede kuchita nkupa kuti Jehova alemekwe. Tweelede kuba aachoonzyo chakuti Jehova takatulekelezyi pe alubo taakwe chintu chitakamukachizye kuti atuyande.—Bala Baroma 8:38, 39; Heb. 13:5, 6.

21. Nziizili zikozyano zyakagwasya Aya aHector kuti bazunde buyumu-yumu mbubakalaabo?

²¹ Zikozyano zyabantu balembedwe muBbayibbele zilatugwasya kuti tulisimye kufumbwa chiimo nchitwaswaanana aacho. Muchikozyano, payona wakuJapan uutegwa Aya wakaamba kuti lwaano lwaJona lwakamugwasya kuti  azunde penzi lyakuyoowa kukambawuka aantanganana. Hector wakuIndonesia uli aabazyali batakombi Jehova wakagwasigwa achikozyano chaRute kuti ayiye atala aJehova akuti asale kumubelekela.

22. Niinzi nzweelede kuchita kuti ujane zyiiyo kuzwa muzisobano zyakubalwa kwaBbayibbele amuchipanzi chitii “Amwiiye Lusyomo Lwabo”?

²² Nkuukuli nkukonzya kujana zikozyano zyamuBbayibbele zikonzya kukusimya? Ulakonzya kuzijana mumavidiyo, muzisobano zyakubalwa kwaBbayibbele amuzyiiyo zijanika muchipanzi chijanika aajw.org chilembedwe kuti “Amwiiye Lusyomo Lwabo.” * Kutanayebela, kuswiilizya naakuti kubala zintu eezi, kumbila Jehova kuti akugwasye kuti ujane zyiiyo nzukonzya kubelesya mubuumi bwako. Libikke muchiimo chamuntu ngulikubala atala anguwe. Yeeyesesya atala abuyumu-yumu mbubakaswaana bakombi baJehova bachiindi akuti Jehova wakabagwasya biyeni kuti babuzunde. Mpawo ubelesye zyiiyo nzwaajana mubuumi bwako. Lumba Jehova akaambo kakukugwasya nkwalikuchita lino. Alubo ulakonzya kutondeezya kuti ulalumba kwiinda mukubeleka changuzu kuti ugwasye bamwi akubasungwaazya.

23. Kweendelana alugwalo lwa Isaya 41:10, 13, Jehova utusyomezyaanzi?

²³ Buumi mbutupona munyika eeyi yeendelezegwa aaSaatani, bulakonzya kutuyumina alubo chimwi chiindi nga twamaninwa. (2 Tim. 3:1) Tatweelede kukataazikana naakuti kuyoowa. Jehova ulaabona mapenzi ngituli kuswaananaawo. Kuti twasikilwa aapenzi, Jehova utusyomezya kuti uyootugwasya. (Bala Isaya 41:10, 13.) Tuli aachoonzyo chakuti Jehova ulatugwasya akuti Magwalo alakonzya kutusimya nituli mubuyumu-yumu.