1-2. Niinzi chikonzya kupa kuti bukombi bwesu butambulike kuli Leza?

 UYEEYAANZI kuti wamvwa bbala lyakuti “bukombi”? Amwi uyeeya atala amukwesu uufugeme kumbali aabulo bwakwe kalikubuzya Jehova zyoonse zili aansi aamoyo wakwe naakuti uyeeya atala amwaalumi amwanakazi wakwe balikubotelwa kwiiya Bbayibbele kabalaamwi abana babo.

² Bantu boonse aaba balikuchita zintu zyabukombi. Pesi mubuzyo uusyaala ngwakuti, ‘Jehova ulabutambula na bukombi bwabo?’ Ulakonzya kubutambula kuti bachita zintu nzyayanda akutondeezya kuti balamuyanda akumulemeka. Tulamuyanda Jehova amoyo woonse. Tulizi kuti uleelela kuti tumukombe alubo tuyanda kuchita zyoonse nzitukonzya kuti tumukombe munzila njayanda.

3. Tulalanga-langaanzi muchiiyo eechi?

³ Muchiiyo eechi, tulabona kuti bakombi baJehova bachiindi bakali kumukomba biyeni munzila njayanda. Alubo tulabona zintu zili 8 Jehova nzyayanda kuti tuchite chiindi nitumukomba. Twanoolanga-langa zintu eezi, yezya kulilanga-langa alubo ubambulule kuti kakuyandikana kuchitila kuti bukombi bwako butambulike kuli Jehova. Alubo tulabona twaambo tutugwasya kubona kuti kukomba Jehova munzila njayanda mbukupa kuti tubotelwe.

4. Bakombi baJehova bachiindi bakatondeezya biyeni kuti bakali kumulemeka Jehova akumuyanda?

⁴ Bakombi baJehova bachiindi basyomeka bali mbuli Abbelo, Nowa, Abrahamu aJobu bakatondeezya kuti bakali kumulemeka  akumuyanda Jehova kwiinda mukumuswiilila, kumusyoma akupa zipayizyo kulinguwe. Bbayibbele talitubuzyi pe zyoonse nzibakeelede kuchita kuti bakombe Leza pesi chiliwo nchakuti bakachita zyoonse nzibakonzya kuti bamukombe munzila njayanda alubo wakabutambula bukombi bwabo. Mukuya kwachiindi, Jehova wakabelesya Mozesi kuti ape maIsrayeli milawu yakali kubagwasya kuti bazibe nzibakeelede kuchita kuti bukombi bwabo butambulike kulinguwe.

5. Jehova uyanda kuti bakombi bakwe bamukombe biyeni? Pandulula.

⁵ Jesu naakafwa akubusigwa, Jehova taakachili kuyanda kuti bantu batobelezye Mulawu waMozesi. (Rom. 10:4) Pesi kwakali kwabuyandikana kuti maKristu batobelezye “mulawo wa Kristo.” (Gal. 6:2) Bakali kuyoowuswiilila biyeni mulawu waKristu? Kwiinda mukutobelezya chikozyano chaJesu akuswiilila zintu nzyaakayiisya, kutali kujata mulawu ooyo amutwe naakuti kutobelezya tumilawu tusiyene-siyene. Nikuba mazubaano, maKristu babeleka changuzu kuti batobelezye chikozyano chaKristu kuchitila kuti babotezye Jehova akuti ‘bakatalusigwe.’—Mt. 11:29.

6. Chiiyo eechi chilakugwasya kuti uchiteenzi?

⁶ Twanoolanga-langa chintu chimwi achimwi nchitweelede kuchita chiindi nitukomba Jehova ulakonzya kulibuzya kuti, ‘Ndilikuchita biyeni munkani eeyi? Kuli mpundeelede kubambulula na?’ Kulakonzeka kuti ulikukkutisikana azintu nzulikuchita lino mumulimu waJehova pesi ulakonzya kukomba kuli Jehova kumukumbila kuti akugwasye kuti uchite zyiingi.

7. Jehova uzibona biyeni nkombyo zyesu zizwa aansi aamoyo?

⁷ Kukomba kuli Jehova. Magwalo akozyanisya nkombyo zyesu zizwa aansi amoyo atununkilizyo twakali kuumpwa mutente lyakukombela amutempele. (Int. 141:2) Tununkilizyo twakali kugwisya bweema bununkilila bwakali kubotezya Jehova. Munzila iikozyenie, nkombyo zyesu zizwa aansi amoyo zilamubotezya Jehova nikuba kuti twabelesya majwi mawuba chiindi nituli kukomba kulinguwe. (Tus. 15:8; Dt. 33:10) Jehova ulabotelwa kumvwa katulikumubuzya kuti tulamuyanda akuti tulamulumba. Alubo uyanda kuti tumubuzye zintu zitukataazya, nzituyanda anzituyanda kuzoochita. Kutanakomba kuli Jehova, yeeyesesya atala amajwi nguyanda kumubuzya. Kuti wachita oobo, ulakomba nkombyo zili mbuli ‘tununkilizyo’ kuli Taateesu wakujulu.

8. Nguuli mulimu uutupa mweenya wakutembawula Jehova?

⁸ Kutembawula Jehova. (Int. 34:1) Tumutembawula biyeni Jehova? Tulamutembawula kwiinda mukubuzya bamwi atala abuntu bwakwe bubotu azintu nzyaakachita. Pesi kuti tube bantu batembawula Jehova tweelede kuba bantu balumba. Kuti twajana chiindi chiingi chakuyeeyesesya atala abubotu bwaJehova azintu zibotu nzyaakatuchitila tulaba aazintu zyiingi zipa kuti tumutembawule. Mulimu wakukambawuka utupa mweenya ‘wakutuulila Leza cipaizyo cantembauzyo, nkokuti, micelo yamilomo yesu.’ (Heb. 13:15) Twabona kuti tweelede kusaanguna kuyeeyesesya katutanakomba, munzila iikozyenie kulayandikana kuti tuyeeyesesye katutanabuzya bamwi makani aali muBbayibbele. Tuyanda kupa Jehova “cipaizyo cantembauzyo” chibotu loko. Nkinkaako, tuyanda kwaambuula munzila iibasika aamoyo bantu chiindi nitubabuzya kasimpe kali muBbayibbele.

9. Tugwasigwa biyeni akunjila miswaangano? Amba chikozyano chitondeezya mbukwakakugwasya kunjila miswaangano.

 ⁹ Kunjila miswaangano. Jehova wakalayilila maIsrayeli kuti: “Ziindi zyotatwe mumwaka, baalumi boonse bali akati kanu beelede kulibonya kubusyu bwa Jehova Leza wanu mubusena oobo mbwayoosala.” (Dt. 16:16) Malsrayeli bakeelede kusiya myuunzi yabo amyuunda yabo kakutakwe bantu balinda. Jehova wakabasyomezya kuti: “Kunyina uyoonyomenena nyika yanu mwanakuunka kuyoolibonya kuli Jehova Leza wanu.” (Kul. 34:24) MaIsrayeli bakali kwiinka kumapobwe aaya aakali kuchitwa munyaka amunyaka akaambo kakuti bakali kumusyoma Jehova. Bakali kugwasigwa loko chiindi nibakali kusekelela mapobwe aaya nkaambo bakali kwiiya zyiingi atala aMulawu waLeza, bakali kujana chiindi chiingi chakuyeeyesesya atala abubotu bwakwe alubo bakali kujana chiindi chakusungwaazyania abakombinyina. (Dt. 16:15) Andiswe tujana zilongezyo zili boobu kuti twalipeda kunjila miswaangano. Alubo Jehova ulabotelwa kuti twalibambila nsandulo mfwiifwi iibasika aamoyo bamwi chiindi nituya kumiswaangano.

10. Niinzi zitondeezya kuti kwiimba kulayandikana mubukombi bwesu?

¹⁰ Kwiimba. (Int. 28:7) MaIsrayeli bakali kukubona kakuyandikana kwiimba mubukombi bwabo. Mwaami Davida wakasala maLevi bali 288 kuti kabayimba mutempele. (1 Mak. 25:1, 6-8) Mazubaano, tutondeezya kuti tulamuyanda Jehova kwiinda mukwiimba nyimbo zyakumutembawula. Takuyandikani kuti tube bantu bakwizi kwiimba kuchitila kuti tukonzye kwiimbila Jehova. Muchikozyano, “toonse tulalubizya ziindi zinji” nitwaambuula pesi tatuleki pe kwaambuula chiindi nituli kumiswaangano naakuti nituli mumulimu wakukambawuka. (Jak. 3:2) Munzila iikozyenie, tutaleki pe kwiimbila Jehova nyimbo zyakumutembawula nikuba katubonaanga tatukonzyi pe kwiimba kabotu.

11. Kweendelana alugwalo lwa Intembauzyo 48:13, nkamboonzi nitweelede kujana chiindi chakwiiya Bbayibbele katuli mpuli?

¹¹ Kwiiya Jwi lyaLeza akuyiisya bana atala aLeza. Buzuba bwaSabata bwakali kupa maIsrayeli mweenya wakuti balyookezye kumilimu njibakali kuchita buzuba abuzuba kuchitila kuti basimye bweenzinyina bwabo aJehova. (Kul. 31:16, 17) Aabo bakali kusyomeka bakali kuyiisya bana babo atala aJehova azintu zibotu nzyaakabachitila. Andiswe tweelede kujana chiindi chakubala Jwi lyaLeza akuyanduulisisya. Kuchita oobo kulatugwasya kuti tuswene aafwiifwi aLeza alubo eechi nchipanzi chabukombi bwesu. (Int. 73:28) Chiindi nitulikwiiya Bbayibbele katuli mpuli ngatulikugwasya bana besu kuti babe abweenzinyina buli aafwiifwi aTaateesu uulikujulu siluyando.—Bala Intembauzyo 48:13.

12. Twiiyaanzi kunzila Jehova njaakawubonaayo mulimu wabaabo bakapanga zibelesyo zyamutente lyakukombela?

¹² Kuyaka akubambulula masena aakukombela. Bbayibbele lyaamba kuti mulimu wakuyaka tente lyakukombela akupanga zibelesyo zyamumo wakali ‘mulimu uusalala.’ (Kul. 36:1, 4) Nikuba mazubaano Jehova uubona kuusalala mulimu wakuyaka Maanda aaBwaami amayake aambunga. Bamwi bakwesu abachizi bamaninsya chiindi chiingi kabali kuchita mulimu ooyu. Tulabalumba bakwesu aaba akaambo kamulimu ooyu uusumpula Bwaami. Alubo batola lubazu mumulimu wakukambawuka. Chimwi chiindi bakwesu aaba ngabayanda kuba mapayona nkinkaako, baalu beelede kubazumizya kuti bapayone kuti  babafila mafoomu aakuba mapayona. Alubo toonse tulakonzya kutola lubazu mumulimu wakusalazya mayake aaya kazitakwe ndaba kuti tuli aaluzibo lwakuyaka na naakuti pe.

13. Tweelede kuzibona biyeni zipo nzitupa zigwasilizya mulimu waBwaami?

¹³ Kusanga kuti tugwasilizye mulimu waBwaami. Jehova wakalayilila maIsrayeli kuti teebakeelede kuza chinkwamaanza chiindi nibakali kusekelela mapobwe. (Dt. 16:16) Umwi awumwi wakeelede kupa kweendelana azyiimo zyakwe. Kupa ooko kwakali kutondeezya kuti balamulumba Jehova akaambo kazintu zyabukombi nzyaakali kubachitila. Andiswe tulakonzya kutondeezya kuti tulamulumba Jehova akaambo kazintu zyabukombi nzyatupa kwiinda mukusanga mali iigwasilizya mumbungano amumulimu uuchitwa munyika yoonse kweendelana azyiimo zyesu. Mwaapostolo Pawulu wakalemba kuti: “Ikuti kusaanguna muntu kalibambilide, eeco ncapa cilatambulika ikapati kuti wacipa kweelana anzyajisi ikutali kweelana anzyatajisi.” (2 Kor. 8:4, 12) Jehova ulabotelwa azipo zizwa aansi aamoyo nzitupa nikuba kuti nga teezyiingi pe.—Mk. 12:42-44; 2 Kor. 9:7.

14. Kweendelana alugwalo lwa Tusimpi 19:17, Jehova uzibona biyeni zintu nzituchita kuti tugwasye bakombima?

¹⁴ Kugwasya bakombima bayanda lugwasyo. Jehova wakasyomezya maIsrayeli kuti wakali kuyoobalongezya kuti bagwasya bantu bafwaba. (Dt. 15:7, 10) Chiindi choonse nitugwasya bakombima bayanda lugwasyo nga kuli mbuli kuti tulikupa Jehova chipo. (Bala Tusimpi 19:17.) Muchikozyano, chiindi maKristu bakuFilipi nibakapa Pawulu chipo naakali mujele, Pawulu wakaamba kuti chipo eecho chakali “cipaizyo cizuminwa, alimwi cimukkomanisya Leza.” (Flp. 4:18) Langa-langa mumbungano yanu ubone kuti kuli muntu ngukonzya kugwasya na. Jehova ulabotelwa kuti twabelesya chiindi chesu, manguzu eesu, luzibo lwesu azintu nzitulaazyo kuti tugwasye bamwi. Alubo ubona milimu eeyi kayili milimu yabukombi.—Jak. 1:27.

15. Nkamboonzi kukomba Jehova nikutali kuyumu nikuba kuti kuyanda chiindi amanguzu?

¹⁵ Kukomba Jehova kuyanda chiindi akuti tubeleke changuzu. Pesi teekuyumu pe. (1 Joh. 5:3) Nkamboonzi? Nkaambo tukomba Jehova akaambo kakuti tulamuyanda. Muchikozyano, atuteedi mwana uyanda kudilowa pikicha kuti ape wisi. Ulakonzya kutola chiindi chilamfu kalikudilowa pikicha eeyo. Pesi akaambo kakuti ulamuyanda wisi, talisoli pe aachiindi nchaamaninsya kalikuyidilowa. Alubo ulamupa wisi chipo eecho kali kubotelwa. Munzila iikozyenie, andiswe tulabotelwa kubelesya chiindi chesu amanguzu eesu kuti tubelekele Jehova akaambo kakuti tulamuyanda.

16. Kweendelana alugwalo lwa Bahebrayo 6:10, Jehova ulimvwa biyeni atala amilimu njitumuchitila?

¹⁶ Bazyali balaaluyando tabalangilili kuti bana babo babape zipo zikozyenie. Balizi kuti bana babo balisiyene akuti nzibakonzya kuchita zilisiyene. Mbukubede aTaateesu uulikujulu, ulizi kuti nzitukonzya kuchita zilisiyene. Amwi zyiimo zyako zilakuzumizya kuti uchite zyiingi kwiinda bamwi naakuti tukonzyi pe kuchita zyiingi mbuli bamwi akaambo kakuchembaala, kuchiswa-chiswa akuti ulaazyiingi zyakuchita mumpuli. Kuti kakuli boobo, utamani manguzu pe. (Gal. 6:4) Jehova tayilubi pe milimu yako mibotu njuchita mumulimu wakwe. Chiyandikana nkuti uchite zyoonse nzukonzya akuti uzichite kuli aamakanze aalikabotu. Kuti wachita oobo, Jehova ulabotelwa. (Bala Bahebrayo 6:10.) Jehova  ulizizi nzuyanda kuchita alubo uyanda kuti ubotelwe akuti ukkutisikane azintu nzukonzya kuchita mumulimu wakwe.

17. (a) Niinzi nzitweelede kuchita kuti kakutuyumina kuchita zimwi zintu zyabukombi? (b) Wakagwasigwa biyeni aachimwi chazintu zitondeezedwe mukabbokesi kalembedwe kuti “ Zintu Zikonzya Kupa Kuti Ubotelwe”?

¹⁷ Niinzi nzweelede kuchita kuti kakukuyumina kuchita zimwi zintu nzitwayiya muchiiyo eechi mbuli kwiiya Bbayibbele kuli awulikke naakuti kukambawuka aantanganana? Kuti twakkala katuchita zintu eezi zilapa kuti kumamanino tubotelwe kuzichita alubo tulabona kuti kuzichita kulagwasya. Zilikozyenie amuntu uliku-ekisesayiza naakuti ulikwiiya kubelesya chimwi chibelesyo mbuli bbanjo. Kuti katazichiti buzuba abuzuba, ulakonzya kutazwidilila. Pesi kuti azwidilile weelede kuzichita buzuba abuzuba alubo weelede kuyungizya chiindi nchazichita. Kuti twabona kuti tulikuzwidilila akaambo kakubeleka changuzu nkutulikuchita tulakonzya kubotelwa alubo tulaba aachiyandisyo chakuzichita alubo kuzichita ngakwaabutunoneezya. Eezi nzizyo nzitweelede kuchita kuti tuzwidilile kuchita milimu yesu yabukombi.

18. Niinzi nzitweelede kuchita alubo tuyoojanaanzi kuti twachita oobo?

¹⁸ Chintu chiyandikana loko nchitukonzya kuchita, nkukomba Jehova amoyo woonse. Kuti twachita oobo, tulabotelwa akukkutisikana mubuumi alubo tulaba abulangilizi bwakukomba Jehova kukabe kutamani. (Tus. 10:22) Lino tulikubotelwa akaambo kakuti tulizi kuti Jehova ulabagwasya bakombi bakwe chiindi nibali mumapenzi. (Is. 41:9, 10) Nisimpe, tweelede kubotelwa akaambo kakukomba Taateesu siluyando ooyo weelela “ikutambula bulemu alulemeko” kuzwa kuzintu zyoonse nzyaakalenga.—Ciy. 4:11.