CHIIYO 14
“Bantu Boonse Bazooziba Kuti Muli Basikwiiya Bangu”
“Bantu boonse bazooziba kuti muli basikwiiya bangu, kuti kamuli aaluyando aakati kanu.”—JOH. 13:35.
LWIIMBO 106 Amube Aluyando
ZITAYIIGWE a
Bantu biingi batali Bakamboni nga bayeeyaanzi chiindi nibabona luyando luli aakati kabantu baJehova? (Langa fuka 1)
1. Niinzi chinga chabasika aamoyo bantu biingi banga basika kumiswaangano yesu? (Langa chifanikisyo.)
AMUYEEYELE mbubakonzya kulimvwa bantu bakwetene chiindi nibasika kuNg’anda yaBwaami kakusaanguna. Balabotelwa loko chiindi nibabona muntu woonse kali kubatambula munzila yaluyando anibabona bantu boonse kabali kutondeezyania luyando. Nibali munzila kabali kubweeda kung’anda kayili yamana miswaangano, mwanakazi ulakonzya kubuzya mulumi kuti: “Bantu aaba balisiyene abamwi bantu, sunu ndabotelwa loko.”
2. Niinzi chakapa kuti bamwi baleke kukomba Jehova?
2 Luyando luli aakati kabakombi baLeza lulagambya. Eezi tazyaambi kuti Bakamboni baJehova balimaninide pe. (1 Joh. 1:8) Chiindi nitubaziba kabotu bakwesu abachizi bali mumbungano mpimpawo mputubona kutamaninina kwabo. (Rom. 3:23) Zilawusisya kuziba kuti bamwi bakaleka kukomba Jehova akaambo kakutamaninina kwabakombinyina.
3. Niinzi chitugwasya kuziba batobeli baKkristu bachoonzyo? (Johane 13:34, 35)
3 Atululange lubo lugwalo lulikuzulwida chiiyo eechi. (Bala Johane 13:34, 35.) Niinzi chakali kuzoopa kuti bantu bazibe kuti tuli batobeli baKkristu bachoonzyo? Bbayibbili lyakaamba kuti luyando ndulo lwakali kuzoopa kuti bantu bazibe kuti tuli maKkristu bachoonzyo kutali kuti tuli maKkristu bamaninide. Jesu taakaamba kuti: ‘Inywe muzooziba kuti muli basikwiiya bangu,’ pesi wakaamba kuti, “Bantu boonse bazooziba kuti muli basikwiiya bangu.” Majwi aaya atondeezya kuti luyando ndulo lwakali kuzoogwasya batobeli baKkristu kuswaanizya abamwi bantu balikunze aambungano kuti babazibe batobeli baKkristu bachoonzyo.
4. Njiili mibuzyo njibakonzya kubaayo bamwi atala amaKkristu bachoonzyo?
4 Bamwi batali Bakamboni baJehova nga balibuzya kuti: ‘Luyando lutugwasya biyeni kubona batobeli baKkristu bachoonzyo? Jesu wakabatondeezya biyeni luyando baapostoli bakwe? Kujana twamutobelezya biyeni Jesu mazubaano?’ Kulayandikana kuti Bakamboni boonse bayeeyesesye atala amibuzyo eeyi. Kuchita oobo, kulatugwasya kuti tuyungizye mukubatondeezya luyando bamwi, kapati chiindi nibachita zintu zitunyemya.—Ef. 5:2.
NKAMBOONZI BATOBELI BAKKRISTU BACHOONZYO NIBEELEDE KUZIBIKANA AALUYANDO?
5. Aambaanzi majwi aaJesu aali muli Johane 15:12, 13?
5 Jesu wakatondeezya kuti luyando ndubakali kuzoobaalo basikwiiya bakwe lwakali kuzoosiyana aluyando ndubalaalo bantu munyika. (Bala Johane 15:12, 13.) Jesu naakali kulayilila batobeli bakwe wakati: “[Amuyandane] mbuli mbundakamuyanda.” Majwi aaya aambaanzi? Mbuli mbaakazoopandulula Jesu, majwi aaya aamba kuyanda bamwi kwiinda mbutuliyanda, zyakuti muKkristu nga walipeda kufwida mukombinyina kuti kakuyandikana kuti achite oobo. b
6. Jwi lyaLeza litondeezya biyeni kuti luyando nchintu chiyandikana loko?
6 Jwi lyaLeza litondeezya kuti luyando nchintu chiyandikana loko. Muchikozyano, bantu biingi bayandisya mavesi aaya aakuti: “Leza nduyando.” (1 Joh. 4:8) “Weelede kuyanda simayakilane wako mbuli mbuliyanda.” (Mt. 22:39) “Luyando luvumba zibi zyiingi.” (1 Pet. 4:8) “Luyando talumani pe.” (1 Kor. 13:8) Mavesi aaya aamwi atondeezya kuti kulayandikana kuba aabuntu oobu bubotu loko.
7. Nkamboonzi Saatani natakonzyi kupa kuti bantu bajatane akuti babe aaluyando lwachoonzyo?
7 Bantu biingi nga balibuzya kuti: ‘Niinzi chinga chilandigwasya kuti ndizibe chikombelo chakasimpe nkaambo zikombelo zyoonse zyaamba kuti ziyiisya kasimpe, kakuli chimwi achimwi chili aanjiisyo yacho atala aLeza?’ Saatani wakapa kuti kubayumine bantu kuziba chikombelo chachoonzyo kwiinda mukupa kuti kube zikombelo zyiingi zyakubeja. Nikuba oobo, takonzyi pe kupanga chikombelo chanyika yoonse chili aabantu bayandana. Jehova aalikke nguwe uukonzya kuchita oobo. Alino mbukubede nkaambo luyando lwachoonzyo lusawuka kaluzwa kuli Jehova. Aabo balaamuuya wakwe achilongezyo chakwe mbabo balaaluyando lwachoonzyo aakati kabo. (1 Joh. 4:7) Eezi tazitugambyi pe nkaambo Jesu wakaamba kuti batobeli bakwe mbabo aabalikke bakali kuzooba aaluyando lwachoonzyo aakati kabo.
8-9. Luyando ndubakabona bamwi aakati kaBakamboni baJehova lwakapa kuti bachite biyeni?
8 Mbuli mbaakaamba Jesu, bantu biingi bali kubabona batobeli baKkristu bachoonzyo akaambo kaluyando ndubalaalo aakati kabo. Muchikozyano, umwi mukwesu uutegwa Ian, wakaamba zyakachitika kulinguwe chiindi naakasaanguna kunjila muswaangano mupati mubbuwa lyazisobano lyakali aafwiifwi amuunzi wakwe. Ian wakali waya kukweebela zisobano mubbuwa ndileelyo myeezi miche yakali yayinda kakutanachitwa muswaangano. Wakaamba kuti: “Bantu bakali aamuswaangano, bakasiyene kule loko abantu mbindakalaabo katuli kweebela zisobano. Bakamboni bakali aamoyo mubotu, bakazweete kabotu alubo bana babo bakalizikitide.” Alubo wakaamba kuti, “Chintu chakandisika aamoyo nkubona kukkutisikana aluumuno ndubakalaalo bantu bakali aamuswaangano ooyo. Eezi nziizintu nzindakali kuyanda mubuumi. Taakwe nkani njindichiyeeyede pe, kulijata kwaBakamboni nkundakabona tandizookulubi pe.” c Kulijata ooko kuba akaambo kaluyando lwachoonzyo ndubatondeezyania bakwesu abachizi. Akaambo kakuti tulabayanda bakwesu abachizi, tweelede kubalemeka akubajata kabotu.
9 Umwi mukwesu uutegwa John wakalimvwa munzila iikozyenie chiindi naakasaanguna kunjila miswaangano yambungano. Wakaamba kuti: “Luyando lwakali aakati kabo lwakandisika aamoyo. Kwakali mbuli kuti ndili aakati kangilozi. Luyando oolu lwakapa kuti ndibone kuti ndakali ndajana kasimpe.” d Zikozyano eezi azimwi zitondeezya kuti bantu baJehova maKkristu bachoonzyo.
10. Ndiilili loko nitweelede kutondeezya kuti tulabayanda bakombima? (Langa makani aamunsi.)
10 Mbuli mbutwabona kumatalikilo, aakati kesu taakwe uutabisyi pe. Zimwi ziindi bakwesu naakuti bachizi balakonzya kwaamba naakuti kuchita zimwi zintu zitunyemya. e (Jak. 3:2) Muziindi zili boobo, nzitwaambuula anzituchita zyeelede kutondeezya kuti tulabayanda chachoonzyo bakombima. Chikozyano chaJesu kujana chatugwasya biyeni kunkani eeyi?—Joh. 13:15.
JESU MBAAKATONDEEZYA KUTI ULABAYANDA BASIKWIIYA BAKWE
Jesu wakali kubayanda basikwiiya bakwe nikuba kuti chimwi chiindi bakali kutondeezya buntu butali kabotu (Langa fuka 11-13)
11. Mbuubuli buntu butali kabotu mbubakatondeezya Jakkobo aJohane? (Langa chifanikisyo.)
11 Jesu taakali kulangilila kuti basikwiiya bakwe babe bantu bamaninide pe. Pesi wakabagwasya kuti babambulule buntu bwabo butali kabotu pe kuchitila kuti batambulike kuli Jehova. Aali chimwi chiindi, basikwiiya bakwe babili, Jakkobo aJohane bakabuzya banyina kuti bakabakumbilile zyuuno zilaajulu muBwaami kuli Jesu. (Mt. 20:20, 21) Nzibakachita baalumi aaba, zyakatondeezya kuti bakali kulisumpula akuti bakali kuyanda kubonenenwa.—Tus. 16:18.
12. Jakkobo aJohane mbabo abalikke na bakatondeezya buntu butali kabotu? Pandulula.
12 Jakkobo aJohane teembabo abalikke bakatondeezya buntu butali kabotu aachiindi eecho. Bbayibbili lyaamba kuti: “Bamwi bali kkumi nibakamvwa makani aaya, bakabanyemena loko basikwiiya babili.” (Mt. 20:24) Basikwiiya aabo bakakazyania loko aJakkobo aJohane. Amwi bamwi bakali kwaamba kuti: ‘Inywe ndindinywe nimuyandikana loko na kwiinda ndiswe chapa kuti mukumbile zyuuno muBwaami? Ndinywe amulikke na mwakabeleka changuzu aJesu kuti mweelele kupegwa zyuuno eezyo?’ Kufumbwa kuti bakaambaanzi naakuti bakayeeyaanzi, nzibakachita aachiindi eecho, zyakapa kuti balube kutondeezyania luyando akufwidilana luzyalo.
13. Jesu wakachitaanzi akaambo kakutamaninina kwabasikwiiya bakwe? (Matayo 20:25-28)
13 Jesu wakachitaanzi? Taakanyema pe. Taakaamba kuti uyanda kuyanduula bamwi bantu balibombya alubo bayandana kwiinda mbabo kuti babe baapostoli bakwe. Pesi Jesu wakabatondeezya moyo mulamfu kwiinda mukwaambuula aambabo nkaambo wakalizi kuti basikwiiya bakwe bakali bantu bayanda kuchita zintu zilikabotu. (Bala Matayo 20:25-28.) Jesu wakali kubajata munzila iilikabotu basikwiiya bakwe nikuba kuti chiindi achiindi bakali kukazyania atala akuti ngwani wakali mupati kwiinda boonse aakati kabo.—Mk. 9:34; Lk. 22:24.
14. Basikwiiya baJesu bakakomenena muzyiimo zili biyeni?
14 Kweelede kuti Jesu wakali kuyeeya kuti zyakali kupa kuti bachite oobo nindawu mubakakomenena basikwiiya bakwe. (Joh. 2:24, 25) Basikwiiya bakwe bakakomenena muchilawu oomo beendelezi bazikombelo mubakali kuyandisya zyuuno. (Mt. 23:6) Bapati bachikombelo chamaJuda bakali kulipa kaleza-leza. f (Lk. 18:9-12) Jesu wakalizi kuti zyiimo zili boobu zyakali kukonzya kupambanisya basikwiiya bakwe. (Tus. 19:11) Jesu wakalizi kuti basikwiiya bakwe tabamaninide pe, nkinkaako, wakali kubatondeezya moyo mulamfu chiindi nibakali kupambanisya. Jesu wakalizi kuti basikwiiya bakwe bayanda kuchita zibotu, nkinkaako wakaba aamoyo mulamfu ambabo akubagwasya kuti batalisumpuli pesi kuti bayandane.
KUJANA TWAMUTOBELEZYA BIYENI JESU?
15. Twiiyaanzi kunkani yaJakkobo aJohane?
15 Kuli zyiiyo nzitukonzya kwiiya kuzwa kuli Jakkobo aJohane. Kukumbila kuti bapegwe zyuuno muBwaami nkubakachita teekwakali kabotu pe. Alubo nzibakachita bamwi baapostoli teezyakali kabotu pe nkaambo zyakapambanisya luumuno lwabo. Pesi Jesu wakabajata munzila iilikabotu boonse kabali 12. Twiiyaanzi kumakani aaya? Tatweelede kugolela aakubona kubisya kwabamwi pesi tweelede kulilanga-langa kuti tuchita biyeni kuti bamwi batubisizya. Niinzi zitugwasya kuti tuchite oobo? Kuti mukombima watunyemya, tweelede kulibuzya kuti: ‘Nkamboonzi nzyaachita nizyandinyemya loko? Nzyaachita zyayubununa buntu butali kabotu mbundeelede kubelekela na? Muntu ooyo wandinyemya, zilikumweendela biyeni mubuumi? Kuti kakuli kaambo kapa kuti ndimunyemene, kuli bubi na kuti ndamulekelela akumutondeezya luyando?’ Kuti twaba aaluyando aakati kesu, nga tuli kutondeezya kuti tuli basikwiiya baJesu bachoonzyo.
16. Amba chimwi chintu nchitwiiya kuzwa kuli Jesu.
16 Nzyaakachita Jesu zituyiisya kuti tweelede kweezya kubamvwisisisya bakombima. (Tus. 20:5) Nisimpe kuti Jesu wakali kubona zili mumyoyo yabantu. Pesi iswe tatukonzyi pe. Nikuba oobo, tulakonzya kubatondeezya moyo mulamfu bakwesu abachizi kuti batunyemya. (Ef. 4:1, 2; 1 Pet. 3:8) Nkuuba kuchita oobo, kuti tweezya kubaziba kabotu bakombima. Atubone chikozyano.
17. Kulipa chiindi chakubaziba kabotu bamwi, kwakamugwasya biyeni umwi mulangizi wabbazu?
17 Kuli zimwi zintu zyakachitikila umwi mulangizi wabbazu wakaswayide imwi mbungano iili mu-Africa. Zintu zyakachitwa aawumwi mukwesu mumbungano eeyo, zyakapa kuti mulangizi wabbazu ooyo abonaanga mukwesu ooyo taakalikwe luyando pe. Nizyakachitika eezi wakachita biyeni mulangizi wabbazu? Wakaamba kuti: “Kwiinda kuti ndilitantamune kumukwesu ooyo, ndakasala kuti ndimuzibe kabotu.” Mulangizi wabbazu naakajana chiindi chakuba aamukwesu ooyo, wakaziba buumi mbwaakapona kachili muniini, akuti buumi oobo bwakali kumupambanisya biyeni. Wakayungizya kuti: “Nindakaziba buyumu-yumu mbwaakazunda mukwesu ooyu kuti akonzye kumvwanana aabamwi, ndakamulombozya. Kuzwa mubuzuba oobo, twakaba beenzuma.” Kuti twalipa chiindi chakubaziba kabotu bakwesu abachizi, kuyootuubila kuti tubatondeezye luyando.
18. Njiili mibuzyo njitukonzya kulibuzya kuti mukombima watubisizya? (Tusimpi 26:20)
18 Chimwi chiindi kulayandikana kuti twaambuule amukombima watubisizya. Kuti kakuli oobo, tweelede kusaanguna kulibuzya kuti: ‘Ndili atwaambo tukkwene na?’ (Tus. 18:13) ‘Wabisya achaali na?’ (Muk. 7:20) ‘Ndakalizichitide na andime eezi?’ (Muk. 7:21, 22) ‘Kuti ndamwiinkila mukombima, ndiyoopa kuti kaambo kakomene na?’ (Bala Tusimpi 26:20.) Kuti twayeeyesesya atala amibuzyo eeyi, luyando lulakonzya kupa kuti tusale kuzisiya biyo.
19. Wakanza kuchitaanzi?
19 Bakamboni baJehova boonse bali kutondeezya kuti mbaasikwiiya baJesu bachoonzyo kwiinda mukutondeezyania luyando. Umwi awumwi wesu utondeezya kuti ngusikwiiya waJesu wachoonzyo kuti wayanda bakombinyina kazitakwe ndaba akutamaninina kwabo. Kuti twabatondeezya luyando bamwi, bamwi balakonzya kubona kuti chikombelo chesu nchakasimpe alubo balakonzya kuliswaanizya aandiswe mukukomba Jehova, Leza waluyando. Nkinkaako, atwiinkilile kunembo kuba aaluyando lutondeezya kuti tuli maKkristu bakasimpe.
LWIMBO 17 “Ndilayanda”
a Bantu biingi nga bakaza mukasimpe akaambo kaluyando lwachoonzyo ndubakabona aakati kesu. Pesi akaambo kakuti tatumaninide, chimwi chiindi kulakonzya kutuyumina kutondeezya bamwi luyando. Lino atulange-lange kuti nkamboonzi luyando niluyandikana akuti nga tulamutobelezya biyeni Jesu kuti bamwi batubisizya.
b Langa bbuku liti, “Come Be My Follower,” chaand. 17, fuka 10-11.
c Langa chiiyo chiti, “At Last, My Life Has a Purpose,” muNgaziyakulinda, yaChikuwa yamuNovember 1, 2012, pp. 13-14.
d Langa chiiyo chiti, “My Life Seemed Good,” muNgaziyakulinda yaChikuwa, yamuMay 1, 2012, pp. 18-19.
e Zintu eezyo zitunyemya teezibi zipati pe, zilisiyene azyaambidwe muli 1 Bakkorinte 6:9, 10, nkaambo zibi zili boobu zyeelede kulangwa-langwa aabaalu.
f Umwi muyiisi wachiJuda wakaamba kuti: “Bantu baluleme mbuli Abrahamu munyika, basika ku30. Kuti bantu aabo kabali 30, nkukwaamba kuti ime amwanaangu mulombe tuli aakati kabo. Kuti kabali 10, ime amwanaangu mulombe tuli aakati kabo. Kuti kabali 5, ime amwanaangu mulombe tuli aakati kabo, alubo kuti kabali babili kupela, Ndime amwanaangu mulombe. Kuti kakuli uumwi, Ndime.”
