Nkamboonzi mwaalumi uutegwa “Ndaba” naakaamba kuti lukono lwakwe lulanyonyooka kuti wakwata Rute? (Rut. 4:1, 6)

Muchiindi chakalembwa Bbayibbele, kuti mwaalumi wafwa katakwe mwana kwakali kubuka iimwi mibuzyo iili mbuli yakuti: Ngwani wakali kuyoopegwa lukono lwakwe? Zina lyakwe lyakali kuyooloba na? Mulawu waMozesi wakali kugwasya ma-Israyeli kuti bazibe nsandulo zyamibuzyo eeyi.

Nyika yasikufwa ayawumwi muntu wakali kuuzya nyika yakwe akaambo kakufwaba yakali kuchitwa biyeni? Mwananyina naakuti bbululu wakwe wakali kwiinununa nyika eeyo. Eezi zyakali kupa kuti nyika eeyo itabezegwi aabamwi bantu batali bamumpuli eeyo.—Lev. 25:23-28; My. 27:8-11.

Niinzi zyakali kuchitwa kuti zina lyasikufwa litafwidilili mumpuli? Bbululu wasikufwa nguwe wakali kunjilila mung’anda mbuli zyakachitwa kuli Rute. Bbululu wasikufwa wakali kukwata mwanakazi ooyo mukamufu kuchitila kuti bazyale mwana wakali kuyoobweza zina lyasikufwa alukono lwakwe. Mabambe aaya akali kutondeezya luyando kuli mukamufu ooyo.—Dt. 25:5-7; Mt. 22:23-28.

Atulange-lange zyakachitikila Nawomi. Nawomi wakalikwetwe aamwaalumi uutegwa Elimelekki. Elimelekki abana bakwe babili bachaalumi nibakafwa, Nawomi wakasyaala katakwe muntu wakali kumulanganya. (Rut. 1:1-5) Nawomi naakabweeda kuJuda, wakabuzya mukamwanaakwe kuti akakumbile Bbowazi kuti abe sikunununa nyika. Bbowazi wakali bbululu waafwiifwi wa-Elimelekki. (Rut. 2:1, 19, 20; 3:1-4) Bbowazi wakabona kuti kwakali uumwi bbululu wa-Elimelekki waafwiifwi loko waambidwe kuti “Ndaba” muBbayibbili. Nkinkaako, Bbowazi wakali kubonaanga bbululu ooyo nguwe uutabweze ntaamu yakuba sikunununa.—Rut. 3:9, 12, 13.

Kumasaangunino, “Ndaba” wakali kuyanda kuba sikunununa. (Rut. 4:1-4) Nikuba kuti wakalizi kuti wakeelede kubelesya mali nyingi kuti awule nyika eeyo, pesi wakalizi kuti Nawomi wakali wachembaala zyakuti taakali kukonzya pe kuti azyale mwana wakali kuyookona nyika ya-Elimelekki. Nkinkaako, Ndaba nguwe wakali kuyoobweza nyika eeyo kuti ibe lukono kwakwe. Mabambe aaya akali kugwasya nguwe.

Pesi Ndaba wakachincha mizeezo yakwe chiindi naakabona kuti Rute wakeelede kukwatwa aanguwe. Wakaamba kuti: “Mebo tandikonzyi kuunununa pe, nkaambo ambweni inga ndanyonyoona lukono lwangu.” (Rut. 4:5, 6) Nkamboonzi naakachincha mizeezo yakwe?

Kaansinga Ndaba naakuti umwi muntu wakakwata Rute mpawo bazyala mwana mulombe, mwana ooyo nguwe wakali kuyookona nyika ya-Elimelekki. Zyakali ‘kuyoolunyonyoona’ biyeni lukono lwaNdaba? Bbayibbili talyaambi pe pesi ntotu tumwi twaambo tukonzya kutugwasya.

• Kakusaanguna, mali yakali kubelesegwa kuula nyika yakali kubonekaanga yasaanisigwa nkaambo nyika ya-Elimelekki teeyakali kuyooba yaNdaba pe pesi yakali kuyooba yamwana waRute.

• Kachibili, wakali kuyooba aamulimu wakusanina akulangania Nawomi aRute.

• Kachitatu, kuti Rute aNdaba bazyala bamwi bana, bana aabo bakali kuyoowabana nyika abamwi bana mbaakalaabo Ndaba.

• Kachi4, kuti kakuli Ndaba taakalikwe bana pe, mwana wakali kuyoozyalwa aaRute wakali kuyooba aacheelelo chakukona nyika ya-Elimelekki ayaNdaba. Eezi zyakali kuyoowamba kuti nyika yaNdaba yakali kuyookonwa aamwana wakali kuzoobweza zina lya-Elimelekki. Nkinkaako, Ndaba taakayanda pe kugwasya Nawomi nkaambo wakali kuyoowela kuti ulasweekelwa lukono lwakwe. Wakazumina kuti Bbowazi abe nguwe sikunununa. Bbowazi wakazumina kuba sikunununa nkaambo wakali kuyanda kubusya “zina lyamufwu mulukono lwakwe.”—Rut. 4:10.

Kulakonzeka kuti Ndaba taakali kuyanda pe kuti zina lyakwe litalobi akuti taakali kuyanda pe kuti asweekelwe aalukono lwakwe. Wakali mutangazu. Nikuba kuti wakeezya kupa kuti zina lyakwe litalobi, pesi zina lyakwe talilembedwe pe muBbayibbili. Wakasweekelwa aachilongezyo chibotu loko nchaakajana Bbowazi chakuba mumulongo wazyalani mwakazwida Mesiya, Jesu Kkristu. Zilawusisya kuti Ndaba wakasweekelwa aamweenya mubotu loko wakugwasya muntu wakali kuyanda lugwasyo akaambo kakuba mutangazu.—Mt. 1:5; Lk. 3:23, 32.