1. Bamwi bakombi baJehova basyomeka nga balibuzya mubuzyo uuli?

 ZILATUBOTEZYA kuziba kuti Jehova ulabayanda bakombi bakwe. Bbayibbili lyaamba kuti: “Jehova ulabakkomanina bantu bakwe.” (Int. 149:4) Nikuba oobo, bamwi nga bamana manguzu zyakuti nga balibuzya kuti, ‘Zintu nzindichita zilamubotezya na Jehova?’ Bakombi baJehova bachiindi chimwi chiindi, bakali kulimvwa munzila eeyi ambabo.—1 Sam. 1:​6-10; Job. 29:​2, 4; Int. 51:11.

2. Mbaani babotezya Jehova?

² Bbayibbili litondeezya aantanganana kuti bantu batamaninide balakonzya kubotezya Jehova. Biyeni? Beelede kuba aalusyomo muli Jesu Kkristu akubbabbatizigwa. (Joh. 3:16) Kuti twachita oobo, nga tulikutondeezya aantanganana kuti twasanduka kuzibi zyesu akuti twakasyomezya Leza kuti tunoochita kuyanda kwakwe. (Mil. 2:38; 3:19) Jehova ulabotelwa chiindi nitubweza ntaamu eezi kuti tukkale katuli aabweenzuma busimide anguwe. Kuti twayinkilila kunembo katupona kweendelana akulipeda kwesu, Jehova ulabotelwa alubo tulaba beenzinyina.—Int. 25:14.

3. Tulalanga-langaanzi muchiiyo eechi?

³ Nkamboonzi bamwi nibabonaanga tabachiti zintu zibotezya Jehova pe? Jehova utondeezya biyeni kuti ulatuyanda? Niinzi nzyayelede kuchita muKkristu kuti abe aachoonzyo chakuti ulatambulika kuli Jehova?

NKAMBOONZI BAMWI NIBABONAANGA TABAMUBOTEZYI PE JEHOVA?

4-5. Nikuba kuti chimwi chiindi nga twalimvwa katutagwasyi pe, pesi tulakonzya kuba aachoonzyo chanzi?

⁴ Biingi besu kuzwa katuchili baniini, twakali kulimvwa katutagwasyi pe. (Int. 88:15) Mukwesu uutegwa Adrián wakaamba  kuti: “Chiindi choonse, ndakali kulimvwa kanditagwasyi pe. Kuzwa kandichili mulombe, ndakali kukombela kuti ime abamumpuli yangu tuzookkale muParadayizi, pesi chimwi chiindi ndakali kulimvwa kuti tandeeleli pe kukkala munyika yaParadayizi.” Tony taakakomenena mumpuli yaBakamboni pe, wakaamba kuti: “Bazyali bangu taakwe mpubakandibuzya pe kuti balandiyanda naakuti ndibapa mantukwe. Eezi zyakapa kuti ndilimvwe kanditagwasyi pe.”

⁵ Kuti chimwi chiindi twalimvwa kuti tatugwasyi pe, atuyeeye kuti Jehova nguwe wakatukwelela kulinguwe. (Joh. 6:44) Jehova ubona buntu bubotu buli mulindiswe mbututakonzyi pe kubona alubo ulizizi zili mumyoyo yesu. (1 Sam. 16:7; 2 Mak. 6:30) Nkinkaako, tulakonzya kusyoma Jehova chiindi natubuzya kuti tulayandikana kulinguwe.—1 Joh. 3:​19, 20.

6. Mwaapostoli Pawulu wakali kulimvwa biyeni azibi nzyaakachita?

⁶ Katutanayiya Bbayibbili, bamwi besu bakali kuchita zintu zipa kuti balipe mulandu. (1 Pet. 4:3) Nikuba maKkristu basyomeka babeleka changuzu kuti balwane chiyandisyo chakuchita zintu zitali kabotu. Nga zyakuchitikila na anduwe eezi? Kuti kakuli oobo, utakataazikani pe nkaambo bamwi bakombi baJehova basyomeka bakali kulimvwa munzila eeyi. Muchikozyano, mwaapostoli Pawulu wakoomba chiindi naakali kuyeeya zintu zibi nzyaakachita. (Rom. 7:24) Pawulu wakali wasanduka kuzibi zyakwe alubo wakali wabbabbatizigwa. Pesi wakalyaamba kuti “ime ndendime muniini loko kuli bamwi baapostoli” alubo wakaamba kuti “ime ndiliindilide” kuba sizibi.—1 Kor. 15:9; 1 Tim. 1:15.

7. Niinzi nzitweelede kukkala katuyeeya atala azibi nzitwakachita chiindi?

⁷ Taateesu wakujulu Jehova utusyomezya kuti ulatulekelela kuti twasanduka. (Int. 86:5) Nkinkaako, kuti twawusa chachoonzyo akaambo kazibi nzitwakachita, tulakonzya kusyoma kuti nzyaakaamba Jehova nzyachoonzyo akuti wakatulekelela.—Kol. 2:13.

8-9. Niinzi chikonzya kutugwasya kuti tugwisye muzeezo wakuti Jehova tabotelwi pe azintu nzitumuchitila?

⁸ Toonse tuyanda kuchita zyiingi mukubelekela Jehova. Nikuba oobo, bamwi balakonzya kubonaanga tabazoofwi bakonzya pe kuchita zintu zibotezya Jehova. Muchizi Amanda wakaamba kuti: “Nga ndeezyanisya zintu nzindipa Jehova azintu zyiingi nzindinga ndalombozya kupa Jehova. Nkinkaako, chimwi chiindi nga ndayanda kuchita zyiingi zyiinda nzindikonzya. Chiindi nindikachilwa kuchita zintu eezyo, nga ndabonaanga Jehova taabotelwa pe mbuli mbundinga ndachita andime.”

⁹ Niinzi chikonzya kutugwasya kuti tugwisye muzeezo wakuti Jehova tabotelwi pe azintu nzitumuchitila? Tweelede kuyeeya kuti Jehova teemuyumu pe, ulamvwisisisya. Talangilili kuti tuchite zintu nzitutakonzyi pe. Uzibona kaziyandikana nzituchita kuti kakuli twabeleka changuzu kuti tumuchitile zintu eezyo. Yeeyesesya atala azikozyano zili muBbayibbili zyabantu bakabelekela Jehova amoyo woonse. Ulakonzya kuyeeyesesya atala aPawulu. Pawulu wakabelekela Jehova kwaminyaka myiingi, wakali kweenda misinzo milamfu kajula mbungano. Pesi zyiimo nizyakachincha, taakachili kukonzya pe kuchita zyiingi mumulimu wakukambawuka mbuli mbaakali kuchita chiindi. Eezyi zyaamba kuti taakachili kutambulika na kuli Leza? Teembuzyaamba pe. Wakayinkilila kunembo kupa Jehova zintu nzyaakali kukonzya kuchita alubo Jehova wakamulongezya. (Mil. 28:​30, 31) Andiswe zintu nzitupa Jehova zilakonzya kuchincha chimwi chiindi akaambo kazyiimo. Pesi chintu chiyandikana loko kuli Jehova, makanze aapa kuti tuchite zintu eezyo. Kwalino, atubone zimwi nzila Jehova mwatondeezya kuti ulatuyanda.

 JEHOVA UTONDEEZYA BIYENI KUTI ULATUYANDA?

10. Jehova waambuula biyeni andiswe? (Johane 16:27)

¹⁰ Wakatupa Bbayibbili. Jehova uyanduula nzila yakutondeezya kuti bantu bakwe ulabayanda akuti balatambulika kulinguwe. Magwalo aamba kuti kwaziindi zibili, Jehova wakabuzya Jesu kuti Mwanaakwe uuyandwa, uumubotezya. (Mt. 3:17; 17:5) Ulayanda na kumvwa Jehova kakubuzya kuti ulamubotezya? Jehova taambuuli aandiswe pe amulomo mpande pesi ubelesya Bbayibbili kuti aambuule aandiswe. Tulamumvwa Jehova kali kwaambuula aandiswe kuti twabala majwi aaJesu ngaakali kubuzya basikwiiya bakwe aali muMabbuku Aamakani Mabotu. (Bala Johane 16:27.) Jesu wakatobelezya buntu bwaWisi munzila iimaninide. Nkinkaako, chiindi nitubala atala aJesu mbaakabuzya batobeli bakwe basyomeka batamaninide kuti ulabayanda, tulakonzya kuyeeyela Jehova kalikutubuzya majwi aayo andiswe.—Joh. 15:​9, 15.

11. Kuti twaswaana mapenzi, zyaamba kuti nga tatuchitambuliki na kuli Jehova? (Jakkobo 1:12)

¹¹ Jehova utupa nzituyanda. Jehova ulaachiyandisyo chakutugwasya, mbuli kutupa nzituyanda zyakuponaazyo. Chimwi chiindi Jehova ulakonzya kuzumizya kuti tuswaane mapenzi mbuli mbaakachita kumwaalumi uululeme Jobu. (Job. 1:​8-11) Kuti twaswaana mapenzi, tazyaambi kuti nga tatuchitambuliki pe kuli Leza. Pesi mapenzi atupa mweenya wakutondeezya mbutumuyanda Leza akutondeezya kuti tulamusyoma. (Jakkobo 1:12.) Chiindi nituswaana mapenzi, tulakonzya kubona Jehova mbatuyanda ambatugwasya kuti tulisimye.

12. Twiiyaanzi kuzwa kuzintu zyakachitikila Mukwesu Dmitrii?

¹² Atubone chikozyano chamukwesu waku-Asia uutegwa Dmitrii. Wakamaninwa mulimu alubo wakakkala kwamyeezi katanajana uumbi mulimu. Nkinkaako, wakasala kuti achite zyiingi mumulimu wakukambawuka katondeezya kuti usyoma Jehova. Wakayinkilila kunembo kuyanduula mulimu pesi taakwe naakawujana pe. Kuzwa waawo, wakachiswa loko zyakuti taakachili kubuka pe aabulo. Mukwesu ooyu wakali mutwe wampuli alubo wakasaanguna kubonaanga Jehova taakachili kumuyanda pe. Bumwi buzuba mansiku, mwanaakwe musimbi wakapulinta pepa lyakali aamajwi aali muli Isaya 30:15 aakuti: “Mulaba anguzu kufwumbwa buyo kuti mubatame akuba alusyomo.” Mwanaakwe wakabikka pepa eelyo kumutwe aawisi  mpawo wakamubuzya kuti, “Taata, kuti walimvwa kukataazikene, ulakonzya kuyeeya lugwalo oolu.” Mukwesu Dmitrii wakabona kuti majwi aaya nga choonzyo, alubo tulamulumba Jehova akaambo kakuti mpuli yamukwesu ooyu yakachili kujana chakulya, zyakuzwaata andawu yakukkala. Mukwesu Dmitrii wakaamba kuti, “Nzindakeelede kuchita, nkukkala kandibeteme akwiinkilila kunembo kusyoma Leza.” Kuti kuli muchiimo chikozyenie, anduwe ulakonzya kusyoma Jehova kuti ulakulangania akukugwasya kuti ulisimye.

13. Mbaani Jehova mbabelesya kuti atondeezye kuti ulatuyanda alubo uzichita biyeni?

¹³ Ubelesya bakombima. Jehova ubelesya bakwesu abachizi kuti atondeezye kuti ulatuyanda. Muchikozyano, ulakonzya kupa kuti bamwi batusungwaazye chiindi nituyanda kusungwaazigwa. Umwi muchizi waku-Asia wakabona kazili kuchitika kulinguwe chiindi naakakataazikene. Muchizi ooyu, wakamaninwa mulimu alubo wakali kuchiswa bulwazi bubi. Mulumaakwe wakachita chibi chipati mpawo wakagwisigwa mumbungano. Muchizi ooyu wakaamba kuti, “Teendakalizi pe kuti nkamboonzi nindakali kuswaana zintu zili oobu. Ndakali kubonaanga ndakali ndabisizya Jehova akuti teendakachili kutambulika pe kulinguwe.” Muchizi ooyu wakakombelezya Jehova kuti amutondeezye kuti uchimuyanda. Jehova wakatondeezya biyeni kuti wakachili kumuyanda muchizi ooyu? Muchizi ooyu wakaamba kuti, “Baalu bakandiswaya mpawo bakandisungwaazya akundibuzya kuti Jehova ulandiyanda.” Muchizi ooyu wakazookumbila lubo kuli Jehova kuti amugwasye. Wakaamba kuti, “Mubuzuba mbuboobo, ndakatambula lugwalo lwakazwa kubakwesu abachizi bamumbungano yesu. Nindakali kubala majwi aabo aawumbulizya, ndakabona kuti Jehova wakali wandimvwa.” Nisimpe, Jehova utondeezya kuti ulatuyanda  kwiinda mukubelesya bakombima kuti batusungwaazye.—Int. 10:17.

14. Njiili imwi nzila iitondeezya kuti Jehova ulatuyanda?

¹⁴ Jehova utondeezya kuti ulatuyanda kwiinda mukupa kuti bakombima batupe lulayo kuti kakuyandikana kuchita oobo. Muchikozyano, Jehova wakabelesya mwaapostoli Pawulu kuti alembele maKkristu bakusaanguna magwalo aali 14. Magwalo aayo taakali kweenguluka pe kuzintu nzibakeelede kubambulula alubo akali kutondeezya kuti ulabayanda. Nkamboonzi Jehova naakazulwida Pawulu kuti abape lulayo luli oobo bakombinyina? Jehova nguNdeende uulikabotu, alubo ulabalaya bana bakwe ‘mbakkomanina.’ (Tus. 3:​11, 12) Nkinkaako, kuti twapegwa lulayo luzwa muBbayibbili, tweelede kulubona kabuli bukamboni bwakuti Jehova ulatuyanda kutali kuti tatuchitambuliki pe kulinguwe. (Heb. 12:6) Atubone zimwi zitondeezya kuti Jehova ulatuyanda.

BUMWI BUKAMBONI BUTONDEEZYA KUTI JEHOVA ULATUYANDA

15. Mbaani Jehova mbapa muuya uusalala alubo eezi zipa kuti tube aachoonzyo chanzi?

¹⁵ Jehova upa aabo mbayanda muuya uusalala. (Mt. 12:18) Tulakonzya kulibuzya kuti, ‘Ndilatondeezya na kuti ndili aamuchelo wamuuya uusalala?’ Ulikwiinkilia kunembo na kutondeezya moyo mulamfu kwiinda chiindi nwaakasaanguna kuziba Jehova? Kuti wayinkilila kunembo kutondeezya muchelo wamuuya uusalala, kulakuubila kubona kuti ulikuchita zintu zibotezya Jehova.—Langa kabbokesi kati, “ Michelo Yamuuya . . . ”

16. Mbaani Jehova mbabelesya kuti bakambawuke makani mabotu alubo eezi zipa kuti umvwe biyeni? (1 Batesalonikka 2:4)

¹⁶ Jehova ulabotelwa kubelesya aabo mbayanda kuti baambilizye makani mabotu. (Bala 1 Batesalonikka 2:4.) Bona muchizi uutegwa Jocelyn mbaakagwasigwa akubuzya bamwi makani mabotu. Bumwi buzuba, Jocelyn wakabuka kakataazikene. Wakaamba kuti, “Ndakalibuzya kuti taakwe nchindikonzya kumupa pe Jehova, pesi ndakali kupayona alubo mubuzuba oobo ndakeelede kuya kukumbawuka. Nkinkaako, ndakakomba mpawo ndakayinka kukumbawuka. Mubuzuba mbuboobo kuseeni, Jocelyn wakabonana aaMary mpawo Mary wakazumina kwiiya Bbayibbili. Nikwakayinda myeezi, Mary wakaamba kuti wakali kukomba kuli Leza kakumbila kuti amugwasye chiindi Jocelyn naakakonkomona aamulyango wakwe. Naakayeeya atala azeezi zyakachitika, Jocelyn wakaamba kuti, “Ndakamvwa mbuli kuti Jehova  wakali kundibuzya kuti, ‘Ndilakuyanda.’” Nikuba oobo, teebantu boonse pe bazumina kukambawukilwa. Pesi tulakonzya kuba aachoonzyo chakuti Jehova ulabotelwa chiindi nitweezya kubuzya bamwi makani mabotu.

17. Twiiyaanzi kumajwi akaambwa aaVicky aali atala achinunuzyo? (Intembauzyo 5:12)

¹⁷ Jehova upa kuti chinunuuzyo chibeleke kuli aabo bamubotezya. (1 Tim. 2:​5, 6) Niinzi nzitukonzya kuchita kuti katubonaanga Jehova tachituyandi pe nikuba katusyoma muchinunuzyo alubo katuli twakabbabbatizigwa? Chiindi choonse, tweelede kuyeeya kuti tatweelede kusyoma maboneno eesu pe pesi tweelede kusyoma Jehova. Jehova ubabona kabaluleme bantu bali aalusyomo muchinunuzyo alubo ubasyomezya kuti unoobagwasya. (Bala Intembauzyo 5:12; Rom. 3:26) Kuyeeyesesya atala achinunuzyo kwakagwasya Vicky. Limwi zuba, naakazwa aakuyeeyesesya atala achinunuzyo, wakaamba kuti: “Jehova wakali kunditondeezya moyo mulamfu kwachiindi chilamfu loko. . . Kwakali mbuli kuti ndakali kubuzya Jehova kuti: ‘Tazichiti pe kuti uyande muntu uuli mbuli ndime. Chinunuzyo chaMwanaako tachikonzyi pe kuvumba zibi zyangu zyoonse.’” Kuyeeyesesya atala achipo chachinunuzyo kwakagwasya Vicky kuti abone kuti Jehova ulamuyanda. Andiswe kuti twayeeyesesya atala achinunuzyo, tulabona kuti Jehova ulatuyanda akuti tulatambulika kulinguwe.

18. Tulakonzya kuba aachoonzyo chanzi kuti twayinkilila kunembo kuyanda Taateesu wakujulu siluyando?

¹⁸ Nikuba kuti tweezya kuti tubelesye zintu zyoonse nzitwayiya, pesi chimwi chiindi tulakonzya kulimvwa katumanide manguzu akubonaanga tatuchitambuliki pe kuli Jehova. Kuti eezi zyachitika, utalubi kuti Jehova ulabayanda “aabo bayinkilila kunembo kumuyanda.” (Jak. 1:12) Nkinkaako, yinkilila kunembo kuswena aafwiifwi aJehova alubo weezye kubona nzila Jehova nzyaatondeezya kuti ulakuyanda. Kkala kuyeeya kuti Jehova “tali kule pe kuli umwi awumwi wesu.”—Mil. 17:27.