1-2. Niinzi nzyayelede kuchita muntu katanabbabbatizigwa?

 KWAMINYAKA iili 5 yayinda, bantu bayinda kumiliyoni bakabbabbatizigwa akuba Bakamboni baJehova. Biingi babo bali mbuli sikwiiya Timoti, bakayiisigwa kasimpe “kuzwa kubwana.” (2 Tim. 3:​14, 15) Bamwi bakayiya atala aJehova kabali bakomena mpawo bamwi kabali bachembaala. Kwaminyaka yayinda, umwi mwanakazi wakayiya Bbayibbili aBakamboni baJehova mpawo wakabbabbatizigwa kali aaminyaka iili 97.

² Kuti kakuli ulikwiiya Bbayibbili naakuti ulikukomezegwa aabazyali bakomba Jehova, ulikuyeeya kubbabbatizigwa na? Kuti kakuli oobo, wakalibikkila chipeekezyo chilikabotu. Pesi kutanabbabbatizigwa, weelede kulipeda kuli Jehova. Chiiyo eechi chilapandulula kuti kulipeda chaambaanzi. Alubo chilakugwasya kubona kuti taakwe kaambo pe kakukachizya kuti ulipede kuli Jehova akubbabbatizigwa, kuti kuli walibambila kuchita oobo.

KULIPEDA CHAAMBAANZI?

3. Amba zikozyano zyamuBbayibbili zyabantu bakalipeda kuli Jehova.

³ MuBbayibbili, muntu wakalipeda kuli Jehova nga wakasalwa kuti achite mulimu uuyandikana. Ma-Israyeli bakali chisi chakasalidwe aaJehova. Pesi bamwi ma-Israyeli bakalipeda kuli Jehova kuti bachite mulimu uuyandikana loko. Muchikozyano, Aroni wakali kuzwaata ‘citondezyo cisalala cakulyaaba,’ nkukwaamba mpande yangolida iing’ayima yakali aangowani yakwe. Mpande yangolida yakali kutondeezya kuti Aroni wakasalwa kuti achite mulimu uuyandikana wakuba mupayizi mupati wama-Israyeli. (Lev. 8:9) MaNaziri ambabo bakalipeda kuli Jehova munzila iiyandikana. Bbala lyakuti “mu Naziri” lizwa kubbala lyachiHebberu lyakuti nazirʹ, nkukwaamba kuti “Waandanizyidwe” naakuti “Waabidwe.” MaNaziri bakeelede  kuswiilila milawu njibakabikkilidwe yakali muMulawu waMozesi.—My. 6:​2-8.

4. (a) Kuti walipeda kuli Jehova, nguuli mulimu ngweelede kuchita? (b) Majwi aakuti “aleke kupona mbuli mbayanda” aambaanzi? (Langa chifanikisyo.)

⁴ Kuti walipeda kuli Jehova, nga wasala kuba sikwiiya waJesu Kkristu alubo kuchita kuyanda kwaLeza nga waabukubona kakuyandikana loko mubuumi bwako. Kulipeda kwachiKkristu kuli Jehova kuswaanizyaanzi? Jesu wakaamba kuti: “Kuti muntu kayanda kunditobela, aleke kupona mbuli mbayanda.” (Mt. 16:24) Mabala aachiGrikki akasandululwa kuti “aleke kupona mbuli mbayanda” alakonzya kusandululwa kuti “tachiliponeni pe.” Mbuli mukombi waJehova wakalipeda, weelede kuleka kuchita zintu zikazyania akuyanda kwaJehova. (2 Kor. 5:​14, 15) Eezi ziswaanizya kutantamuka “milimu yanyama,” mbuli kuchita bwaamu. (Gal. 5:​19-21; 1 Kor. 6:18) Kuswiilila milawu eeyi kupa kuti buumi bwako bukuyumine na? Peepe, kuti kuyanda Jehova akuti kuli aachoonzyo chakuti milawu yakwe ilakugwasya, buumi tabukuyumini pe. (Int. 119:97; Is. 48:​17, 18) Umwi mukwesu uutegwa Nicholas wakaamba kuti: “Ulakonzya kubona milawu yaJehova mbuli jele likukachizya kuti uchite zintu nzuyanda naakuti feensi yabalavu iikukwabilila kuti balavu batakulyi.”

5. (a) Ulipeda biyeni kuli Jehova? (b) Kulipeda kuli Jehova kusiyene biyeni akubbabbatizigwa? (Langa chifanikisyo.)

⁵ Ulipeda biyeni kuli Jehova? Ulakomba kulinguwe kumusyomezya kuti unookomba nguwe alikke akuti ulabikka kuyanda kwakwe mubusena bwakusaanguna. Nga ulikusyomezya Jehova kuti ulayinkilila kunembo kuumuyanda “amoyo wako woonse, abuumi bwako boonse, amizeezo yako yoonse, amanguzu aako woonse.” (Mk. 12:30) Kulipeda kuli Jehova ukuchita kuli aawukke, mpawo kubbabbatizigwa kuchitwa kakuli bantu. Chiindi nubbabbatizigwa, nga ulikutondeezya bantu kuti wakalipeda kuli Jehova. Kulipeda nchikonke  chisalala alubo Jehova uyanda kuti upone kweendelana achikonke eecho.—Muk. 5:​4, 5.

NKAMBOONZI NWEELEDE KULIPEDA KULI JEHOVA?

6. Niinzi zipa kuti muntu alipede kuli Jehova?

⁶ Kaambo kapati kapa kuti ulipede kuli Jehova nkakuti ulamuyanda. Nga wamuyanda Jehova akaambo kakuti nga wakajana “luzibo lwachoonzyo” alubo nga ‘wakamvwisisisya zintu zyamuuya,’ nkukwaamba zintu nzunga wayiya atala aJehova zipa kuti umuyande loko. (Kol. 1:9) Kwiiya Bbayibbili kwakapa kuti ube aachoonzyo chakuti (1) Jehova mpaali choonzyo, (2) Bbayibbili ndiJwi lyakwe akuti (3) Jehova ubelesya mbunga yakwe kuti achite kuyanda kwakwe.

7. Niinzi nzitweelede kuchita katutanalipeda kuli Jehova?

⁷ Aabo balipeda kuli Jehova, beelede kuziba njiisyo zyakusaanguna zili muJwi lyaLeza alubo bapone kweendelana amilawu yakwe. Bachita zyoonse nzibakonzya kuti babuzye bamwi atala azintu nzibakayiya. (Mt. 28:​19, 20) Luyando lwabo aJehova ngaluli kuyungizya kusima alubo nga bali aachiyandisyo chakukomba Jehova alikke. Nzizyo nzulikuchita na anduwe? Kuti waba aaluyando luli oobu, nga tuchiboni kulipeda akubbabbatizigwa mbuli chintu nchuchita kuti ubotezye muntu ukuyiisya Bbayibbili naakuti bazyali bako naakuti uzibone mbuli zintu nzweelede kuchita akaambo kakuti beenzinyokwe nzizyo nzibakachita.

8. Kulumba kukugwasya biyeni kuti usale kulipeda kuli Jehova? (Intembauzyo 116:​12-14)

⁸ Kuti wayeeya atala azintu zyoonse Jehova nzyakakuchitila, nga waba aachiyandisyo chakuti umulumbe akuti ulipede kulinguwe. (Bala Intembauzyo 116:​12-14.) Bbayibbili lyaamba kuti Jehova uutupa “zipo zyoonse  zibotu azipo zyoonse zimaninide.” (Jak. 1:17) Chimwi chipo chipati chili aakati kazipo eezyo nchinunuzyo chaMwanaakwe, Jesu. Yeeya atala azeezi. Chinunuzyo chakapa kuti ukonzye kumvwanana aaJehova. Alubo Jehova wakapa kuti ube aabulangilizi bwakuzoopona kukabe kutamani. (1 Joh. 4:​9, 10, 19) Kulipeda kuli Jehova njiimwi nzila iiyandikana njukonzya kutondeezyaayo kuti ulamulumba Jehova akaambo kakukuyanda munzila mpati iili oobu akuti ulamulumba akaambo kazilongezyo zyoonse nzyaakakupa. (Dt. 16:17; 2 Kor. 5:15) Zimwi nzitukonzya kuchita kuti tutondeezye kuti tulalumba zijanika muchiiyo 46, aakaambo 4 kuswaanizya akavidiyo kamaminiti aatatu kati, Kupa Leza Zipo, mubbuku lyaMbukonzya Kubotelwa Mubuumi Kukabe Kutamani!

WALIBAMBILA NA KULIPEDA AKUBBABBATIZIGWA?

9. Nkamboonzi muntu nateelede kulimvwa kamanikizidwe biya kuti alipede kuli Jehova?

⁹ Ulakonzya kubonaanga tunalibambila pe kuti ulipede akubbabbatizigwa. Amwi kuchili zintu nzweelede kuchincha mubuumi bwako kuti upone kweendelana amilawu yaJehova naakuti amwi uchiyanda chiindi chakuti usimye lusyomo lwako. (Kol. 2:​6, 7) Teeboonse pe bantu bayiya Bbayibbili bafwambaana kukomena mubukombi alubo teeboonse pe bachiniini banga balibambila kuti balipede akubbabbatizigwa kabali aaminyaka iifenene. Yezya kulilanga-langa ubone mpuyelede kubambulula alubo utalyeezyanisyi aabamwi pe.—Gal. 6:​4, 5.

10. Niinzi nzukonzya kuchita kuti wabonaanga tunalibambila pe kulipeda kuli Jehova akubbabbatizigwa? (Langa kabbokesi katii, “ Kuli Aabo Balikukomezegwa Mukasimpe.”)

¹⁰ Kuti wabona kuti tunalibambila pe kuti ulipede kuli Jehova, kkala kuli aachipeekezyo eecho. Komba kuli Jehova kumukumbila kuti akugwasye kuchincha zintu nzweelede kuchincha mubuumi bwako. (Flp. 2:13; 3:16) Ulakonzya kuba aachoonzyo chakuti Jehova ulaziswiilila nkombyo zyako akuti ulakugwasya.—1 Joh. 5:14.

NKAMBOONZI BAMWI NIBANGA BAZOOLEKA KULIPEDA AKUBBABBATIZIGWA?

11. Jehova utugwasya biyeni kuti tukkale katusyomeka kulinguwe?

¹¹ Bamwi banga balibambila kulipeda akubbabbatizigwa ngabazooleka. Balakonzya kwaamba kuti: ‘Ani kuti ndazoochita chibi chipati mpawo ndigusigwe mumbungano?’ Kuti kuli uumwi wabo, baachoonzyo kuti Jehova ulakupa nzuyanda kuti ‘weende bweelede mbuli muntu uumukomba, umubotezye munzila iizwide.’ (Kol. 1:10) Alubo Jehova ulakupa manguzu aakuti uchite zintu zilikabotu. Wakazitondeezya kale eezi kuti ulakonzya kuzichita nkaambo wakagwasya bakombi bakwe biingi kuti bachite zintu zilikabotu. (1 Kor. 10:13) Eezi nzizyo zipa kuti kube bantu bache bagwisigwa mumbungano yachiKkristu. Jehova ulabagwasya bakombi bakwe kuti bakkale kabasyomeka kulinguwe.

12. Niinzi nzitukonzya kuchita kuti tutachiti chibi chipati?

¹² Akaambo kakuti tuli aachibi, muntu ulasunkwa kuti achite zintu zitali kabotu. (Jak. 1:14) Nikuba oobo, weelede kusala zyakuchita kuti wasunkwa. Kasimpe nkakuti nduwe nuusala buumi mbuyanda kupona. Pesi bamwi bantu nga baamba kuti tatukonzyi pe kulilesya kuchita zimwi zintu. Aaya manwa, muntu woonse ulakonzya kulilesya kuti atachiti zintu zitali kabotu. Nkinkaako, kuti wasunkwa kuchita zitali kabotu, ulakonzya kusala kutazichita zintu eezyo. Alubo kuli zimwi zintu zikonzya kukugwasya kuti utachiti chibi  chipati. Muchikozyano, ulakonzya kukomba kuli Jehova buzuba abuzuba. Kkala kuli aapulogilamu yakubala Jwi lyaLeza akuyanduulisisya. Njila miswaangano yambungano. Buzya bamwi atala azintu nzusyoma. Kuchita zintu eezi chiindi choonse kukugwasya kuti ujane manguzu aakuti upone kweendelana akulipeda nkwaakachita. Alubo utalubi kuti Jehova ulakugwasya kuti uchite oobo.—Gal. 5:16.

13. Nchiichili chikozyano chibotu nchaakatusiila Josefa?

¹³ Kulakonzya kukuubila kuti upone kweendelana akulipeda nkwaakachita kuti wasala kakuchili chiindi nzutazoochite nwaazooswana sunko. Bbayibbili litubuzya atala abantu biingi bakachita oobo nikuba kuti ambabo bakali aachibi. Muchikozyano, kwaziindi zyiingi, mwanakazi waPotifara wakeezya koongelezya Josefa. Pesi Josefa wakalizizi zintu nzyakeelede kuchita. Bbayibbili lyaamba kuti Josefa “wakakaka” alubo wakaamba kuti: “Ino inga ndacitila nzi cibi cipati cili boobu akubisizya Leza?” (Matl. 39:​8-10) Zilaantanganana kuti Josefa wakalizizi zintu nzyaakeelede kuchita nikuba mwanakazi waPotifara katanayeezya kumusunka. Eezi zyakapa kuti kumuubile Josefa kusala zyakuchita chiindi naakazooswana sunko.

14. Niinzi nzitukonzya kuchita kuti tutantamuke masunko?

¹⁴ Niinzi nzukonzya kuchita kuti utobelezye chikozyano chaJosefa? Ulakonzya kusala nzutazoochite lino kuti wazooswana sunko. Yiya kufwambaana kutantamuka zintu nzyazonda Jehova alubo utayeeyi atala anzizyo. (Int. 97:10; 119:165) Kuti wachita oobo, tuzoochiti chibi pe kuti wasunkwa nkaambo nga uzizi kale zintu nzweelede kuchita.

15. Muntu utondeezya biyeni kuti uyanduula Jehova amoyo woonse? (Mahebberu 11:6)

¹⁵ Kulakonzeka kuti ulizi kuti wakajana kasimpe akuti uyanda kubelekela Jehova amoyo woonse, pesi, amwi kuchili chimwi chintu chili kukukachizya kuti ulipede akuti ubbabbatizigwe. Ulakonzya kuyeeyesesya atala achikozyano chaMwaami Davida. Ulakonzya kukombelezya Jehova kumubuzya kuti: “O Leza, kondilanga-langa, uuzyibe moyo wangu. Kondilingula, wiizyibe mizeezo iindilibilisya. Kobona naa mukati kangu kuli nzila iili yoonse mbyaabi, alimwi kondeenzya munzila iiliko lyoonse mane kukabe kutamani.” (Int. 139:​23, 24) Jehova ulongezya aabo “bamuyanduula amoyo woonse.” Kubeleka changuzu  nkuchita kuti ulipede akuti ubbabbatizigwe kutondeezya Jehova kuti ulikumuyanduula amoyo woonse.—Bala Mahebberu 11:6.

KKALA KUSWENA AAFWIIFWI AJEHOVA

16-17. Jehova ubakwela biyeni aabo bakomezegwa aabazyali bali mukasimpe? (Johane 6:44)

¹⁶ Jesu wakaamba kuti basikwiiya bakwe bakwelwa aaJehova. (Bala Johane 6:44.) Yeeya atala ambaayandikana majwi aaya akuti aambaanzi kulinduwe. Jehova ubona chintu chibotu muli umwi awumwi chipa kuti amukwelele kulinguwe. Ubona muntu ooyo mbuli ‘lubono lwakwe luyandisi’ naakuti “icintu cakwe ciyandisi.” (Dt. 7:6; makani aamunsi.) Mbubo mbaakubona anduwe Jehova.

¹⁷ Kulakonzeka kuti uli uumwi wabachikula balikukomezegwa aabazyali bakomba Jehova. Amwi ubonaanga ukomba Jehova akaambo kuti bazyali bako nzizyo nzibalikuchita kutali kuti Jehova nguwe wakakukwelela kulinguwe. Kufumbwa zyakachitika, Bbayibbili lyaamba kuti: “Amuswene aafwiifwi aLeza, anguwe ulaswena aafwiifwi andinywe.” (Jak. 4:8; 1 Mak. 28:9) Kuti wabweza ntaamu yakuti uswene aafwiifwi aJehova, anguwe Jehova ulaswena aafwiifwi anduwe. Jehova takukweleli kulinguwe kuli aabamwi kamuli kabunga, pesi ukwela muntu umwi awumwi kuswaanizya ayooyo ulikukomenena mukasimpe. Kuti muntu ooyo wabweza ntaamu yakuti aswene aafwiifwi aJehova, anguwe Jehova ulaswena aafwiifwi anguwe mbuli mbukwaambidwe muli Jakkobo 4:8—Kozyanisya aa 2 Batesalonikka 2:13.

18. Tuzooyiya atalaanzi muchiiyo chitobela? (Intembauzyo 40:8)

¹⁸ Kuti walipeda kuli Jehova akubbabbatizigwa, nga watondeezya kuti uli aamaboneno ngakalaawo Jesu. Jesu wakalipeda kuchita kufumbwa Wisi nzyaakali kuyanda kuti achite. (Bala Intembauzyo 40:8; Heb. 10:7) Muchiiyo chitobela, tuzooyiya atala azintu zikonzya kukugwasya kuti wiinkilile kunembo kukomba Jehova kusyomeka chiindi nwaabbabbatizigwa.