JESU wakati batobeli bakwe bayoobotelwa kubeleka mulimu wakutebula muchiindi eechino chamamanino. (Mt. 9:37; 24:14) Atulange-lange mbaakazuzikizigwa munzila iigambya majwi aaya mudolopo lyaTranscarpathia kuUkraine. Mumadolopo aatatu aali mubusena oobu, kuli mbungano zili 50 abasikupupulula biinda ku5 400. * Kweendelana amweelwe wabantu bali mumadolopo aaya aatatu, akati kabantu bane uumwi, nguKamboni waJehova.

Bantu mbibakambawukila bali biyeni? Mukwesu Vasile wakati, “Bantu bakokuno balalilemeka Bbayibbele, bayandisya zintu zilikabotu, balijisini mumpuli alubo balagwasyania.” Mukwesu Vasile wakayungizya kuti, “Tabazitambuli pe zyoonse nzitusyoma. Pesi kuti wakatondeezya makani aazwa muBbayibbele, balaswiilila.”

Bakwesu abachizi baswaana buyumu-yumu mumulimu wakukambawuka mumasena aaya nkaambo basikupupulula mbiingi kweendelana amweelwe wabantu bali mumadolopo aaya. Muchikozyano, mumbungano imwi kuli basikupupulula bali 134 pesi bakambawukila myuunzi iili 50 luzutu. Basikupupulula bakambawuka biyeni mubusena buli boobu?

Bakwesu abachizi biingi balikulipeda kuti bakakambawukile kumasena aayanda basikupupulula biingi. Mukwesu Ionash uuli aaminyaka iili 90 wakati, “Mumbungano yesu sikupupulula uumwi, ukambawukila myuunzi iibili. Ndikambawukila oomuno, pesi mubili wangu kuuchisimide, ndakali kweenda musinzo uulampa makkilomita aali 160 kuti ndikakambawukile kubusena butanakambawukwa kubantu baambuula chiHungary.” Basikupupulula beelede kulipeda kuti bakabelekele kumasena amwi. Mukwesu Ionash wakaamba kuti: “Kuti ndikonzye kugada chitima, ndakali kubuka a4 kuseeni kandikambawuka kusika a6 goko chitima nichakali kubweeda kumuunzi. Ndakali kuchita oobo tubili naakuti tutatu mumviki.” Kuchita oobu kwakamugwasya na mukwesu ooyu? Ionash wakayungizya kuti, “Ndakali kubotelwa kukambawuka munzila eeyi. Ndakagwasya imwi mpuli iikkala kule kuti bayiye kasimpe.”

Zili antanganana kuti teeboonse pe mumbungano eezi bakonzya kuyookambawukila kumasena aali kule. Pesi basikupupulula boonse kuswaanizya abakakomena, baleezya kukambawukila muchilawu chabo. Akaambo kakuchita oobo, mu2017, mumadolopo aaya aatatu, mweelwe wabantu bakanjila chiyubulusyo wakeelene achisela chamweelwe wabantu bakkala mumo. Zili antanganana kuti kufumbwa nkutubede ‘mulimu waMwaami’ uchili mwiingi.​—1 Kor. 15:58.