1, 2. (a) Batusungwaazya biyeni basikupupulula bazumanana kukambawukila muchilawu bantu mubataswiilili? (Langa chifanikisyo chili kumatalikilo achiiyo.) (b) Jesu wakatyeni atala akukambawukila “mucisi cakwabo”? (Langa makani aamunsi.)

SERGIO A-OLINDA, mapayona bakwetene bali aminyaka yiinda ku80, bakkala kuUnited States. Bali apenzi lyamawulu, zipa kuti kweenda kubakataazye. Nikuba boobo, buzuba abuzuba a7 kuseeni tabaleki pe kwiinka kubusena kujanika bantu biingi mudolopo nikuba kuti baba aminyaka myiingi kabachita oobo. Ngabiinka afwiifwi achilindilo chamabbaasi kuti bape basimweenda nzila mabbuku aapandulula zyamuBbayibbele. Nikuba kuti bantu biingi tabaswiilili pesi ngabalikkede kabalikumwemwetela kubantu biinda. Sikati ngababweeda kung’anda kayabutombayila. Nibwacha a7 kuseeni, ngababweeda lubo. Mapayona aaba balisungweete kukambawuka atala aBwaami mazuba aali 6 mumviki, munyaka amunyaka.

² Bakwesu abachizi biingi munyika yoonse, bachita mbuuli mbubachita baSergio a-Olinda kwiinda mukukambawuka makani  mabotu nikuba muzilawu bantu mubataswiilili. Kuti kuli muchiimo chili boobo, tulakulumba akulisimya nkuchita. * Kulisimya nkuchita kulabasungwaazya bamwi nikuba kuti baba aminyaka myiingi kabali kukomba Jehova. Balangizi bamabazu basiyene-siyene bakaamba kuti: “Kubeleka abakwesu abachizi balisimya muzyiimo zili boobu, kulandisungwaazya.” Umwi wakati: “Kulisimya kwabo kupa kuti ndizumanane akuti nditayoowi nindili mumulimu wakukambawuka.” Alubo umwi wakati: “Nzibachita zindisika amoyo.”

3. Njiili mibuzyo iitatu njitutalange-lange alubo nkamboonzi?

³ Kuti tukonzye kuzumanana kubeleka mulimu wakukambawuka ngutwakapegwa aJesu, atulange-lange mibuzyo iitatu. Nkamboonzi chimwi chiindi nitukonzya kumana manguzu? Kujana twachita biyeni kuti tuzyale michelo? Niinzi chiyootugwasya kuti tuzyale michelo chakulisimya?

4. (a) Pawulu wakalimvwa biyeni maJuda nibakamukazya? (b) Nkamboonzi Pawulu naakalimvwa oobu?

⁴ Chikozyano chaPawulu chilakonzya kukugwasya kuti kumana manguzu akaambo kakukambawukila muchilawu bantu mubataswiilili. Pawulu wakakambawuka kwaminyaka iili 30 alubo wakagwasya bantu biingi kuti babe basikwiiya baKristu. (Inc. 14:21; 2 Kor. 3:2, 3) Nikuba boobo, taakazwidilila pe kuti agwasye maJuda biingi kuti babe bakombi baLeza. Biingi babo bakali kumukazya akumupenzya. (Inc. 14:19; 17:1, 4, 5, 13) Pawulu wakalimvwa biyeni maJuda nibakamukazya? Wakati: “Ndaamba cakusinizya muli-Kristo, . . . ndili abuusu bupati, alimwi ndaciswa lyoonse cakutaleka mumoyo wangu.” (Rom. 9:1-3) Nkamboonzi Pawulu naakalimvwa oobu? Nkaambo wakali kuubikkila maanu mulimu wakukambawuka. Alubo wakali kukambawukila maJuda nkaambo wakali kubayanda amoyo woonse. Nkinkaako, zyakamuchisa nibakakaka kutambula luzyalo lwaLeza.

5. (a) Niinzi chipa kuti tukambawukile basimayakilane? (b) Nkamboonzi chimwi chiindi nitukonzya kumana manguzu?

⁵ Andiswe tukambawukila bantu nkaambo tulabayanda. (Mt. 22:39; 1 Kor. 11:1) Alubo tulizizi zilongezyo nzibayoojana bantu basala kukomba Jehova. Chiindi nituyeeya atala abantu bali muchilawu chesu, chimwi chiindi ngatwalibuzya kuti: ‘Nikuli twakonzya kubagwasya bantu aaba kuti babone bubotu mbubali kusweekelwa!’ Nkinkaako, tulabagwasya kuti bazibe kasimpe atala aJehova amakanze ngalaawo atala abantu. Kuli mbuuli kuti tubabuzya kuti: ‘Twamweetela chipo chibotu loko. Twakumbila muchitambule.’ Nkinkaako, bantu nibakaka kutambula mulumbe wesu ‘tulachiswa chakutaleka mumyoyo.’ Kulimvwa munzila eeyi takwaambi kuti tatukwe lusyomo pesi kutondeezya kuti tubikkila maanu kumulimu wakukambawuka. Nikuba kuti tuswaana zyiimo zili boobu pesi tulalisimya. Muchizi Elena waba aminyaka yiinda ku25 kapayona, wakaamba mbutulimvwa toonse naakati: “Mulimu wakukambawuka muyumu. Pesi taakwe umwi mulimu mubotu ngundikonzya kuchita.”

6. Nguuli mubuzyo ngututalange-lange alubo tuyoowulanga-langa biyeni?

⁶ Niinzi chipa kuti tube achoonzyo chakuti kufumbwa nkutukambawukila, mulimu wesu uyoozwidilila? Kuti tukonzye  kusandula mubuzyo ooyu uuyandikana, atulange-lange zikozyano zyaJesu zibili zitondeezya kaambo nchitweelede ‘kuzyala michelo.’ (Mt. 13:23) Chikozyano chakusaanguna chili atala amusaansa.

7. (a) Ngwani wiiminina ‘mwini muunda,’ “cisiko” ‘amitabi’? (b) Nguuli mubuzyo ngututasandule?

⁷ Bala Johane 15:1-5, 8. Jesu wakabuzya basikwiiya bakwe kuti: “Taata ulalemezegwa, mwazyala micelo minjiminji, ncomunooli basikwiiya bangu.” Jesu wakapandulula kuti Jehova “ngomukamwini muunda,” we ‘nchisiko’ mpawo basikwiiya bakwe “mitabi.” * Nguuli muchelo batobeli baKristu ngubeelede kubaawo? Muchikozyano eechi, Jesu taakaamba muchelo uuli antanganana, pesi wakatondeezya chintu chiyandikana chikonzya kutugwasya kumvwisisisya nzyaakali kwaamba.

8. (a) Muchikozyano eechi, nkamboonzi kuzyala michelo nikutaambi kuba abasikwiiya bapya? (b) Jehova utupa milimu iili biyeni?

⁸ Jesu naakali kwaamba atala aWisi wakati: “Mitabi yoonse yangu iitazyali micelo wiitema.” Majwi aaya atondeezya kuti Jehova uyanda kuti bakombi bakwe kabazyala michelo. (Mt. 13:23; 21:43) Nikuba boobo, muchikozyano eechi, michelo njibeelede kubaayo maKristu tiiwambi kuba abasikwiiya bapya. (Mt. 28:19) Kaansinga chikozyano eechi mbuchaamba, nikuli Bakamboni bakambawukila muzilawu bantu mubataswiilili nibali mbuuli mitabi iitazyali. Kuba amaboneno aali boobu takuli kabotu pe. Nkamboonzi? Nkaambo tatukonzyi kusinikizya bantu kuti babe basikwiiya. Jehova ulatuyanda nkinkaako tatupi milimu njitutakonzyi kuchita pesi utupa milimu njitukonzya kuchita.​—Dt. 30:11-14.

9. (a) Nguuli mulimu uupa kuti tuzyale michelo? (b) Nchiichili chikozyano nchitutalange-lange alubo nkamboonzi?

⁹ Nguuli muchelo ngutweelede kubaawo? Muchelo ooyu wiiminina mulimu ngutukonzya kuchita. Nguuli mulimu uupa kuti ‘tuzyale michelo’? Nkukambawuka makani mabotu aali atala aBwaami bwaLeza. * (Mt. 24:14) Chikozyano chaJesu chasikubyala chilakasalazya kaambo aaka. Atulange-lange chikozyano chachibili.

10. (a)  Muchikozyano eechi, mbuto amuseele zyiimininaanzi? (b) Nguuli muchelo uuzyalwa aawiiti?

¹⁰ Bala Luka 8:5-8, 11-15. Muchikozyano chasikubyala, mbuto “ninkani ya-Leza,” naakuti mulumbe waBwaami. Museele wiiminina moyo wamuntu. Mbuto yakawida museele bbotu yakamena mpawo yakakomena akutumbuka ngala zyawiiti. Mpawo zyakazyala “mwaanda.” Nguuli muchelo uuzyalwa aawiiti? Kuzyalwa tukuba tuniini na? Peepe, kuzyalwa nseke mpya. Muchikozyano eechi, mbuto iimwi yakazyala nseke zili “mwaanda.” Chikozyano eechi cheendelana biyeni amulimu wakukambawuka?

11. (a) Chikozyano chasikubyala cheendelana biyeni amulimu wakukambawuka? (b) Twiizyala biyeni mbuto mpya yaBwaami?

¹¹ Bazyali besu naakuti bamwi Bakamboni nibakatuyiisya atala aBwaami bwaLeza, kwakali mbuuli kuti bakabyala mbuto museele bbotu. Bakabotelwa nitwakatambula mbuto yaBwaami mumyoyo yesu. Twakaba mbuuli seele bbotu lyaambidwe muchikozyano chaJesu nkaambo twakazumina kwiiya akukakatila kuzintu nzitwakiiya. Nkinkaako, mbuto yaBwaami yakamena, mpawo yakomena akuba angala mbuuli  wiiti, mukuya kwachiindi yakazyala michelo. Mbukunga mbuto yawiiti izyala nseke mpya kutali tukuba tuniini, mbukubede akulindiswe, tulikuzyala michelo, kutali basikwiiya bapya pesi mbuto mpya yaBwaami. * Twiizyala biyeni mbuto mpya yaBwaami? Chiindi nitukambawuka atala aBwaami, kuli mbuuli kuti tulikumwaya mbuto yakabyalwa mumyoyo yesu. (Lk. 6:45; 8:1) Chikozyano eechi chituyiisya kuti tuyoozyala ‘michelo chakuliyumya’ kuti twazumanana kukambawuka atala aBwaami.

12. (a) Nchiichili chiiyo nchitukonzya kwiiya kuchikozyano chaJesu chamusaansa asikubyala? (b) Chiiyo eechi chimugwasya biyeni umwi awumwi wesu?

¹² Twiiyaanzi muchikozyano chaJesu chamusaansa asikubyala? Zikozyano eezi zitugwasya kubona kuti kuzyala michelo takuyeeme mukuswiilila kwabantu pesi kuyeeme mukusyomeka kwesu. Pawulu wakatondeezya kuti makani aaya ngachoonzyo naakati: ‘Umwi awumwi ulavola bulumbu bwakwe mwini mbuuli mulimu wakwe ngwaakamana.’ (1 Kor. 3:8) Tuyoojana zilongezyo akaambo kamulimu ngutuchita kutali zintu nzitujana. Muchizi Matilda uuli aminyaka iili 20 kapayona wakati: “Kulandibotezya kuziba kuti Jehova ulazilongezya nzituchita.”

13, 14. Kweendelana alugwalo lwaBaRoma 10:1, 2, niinzi chakapa kuti Pawulu azumanane kukambawuka nikuba kuti maJuda teebakali kuswiilila?

¹³ Niinzi chiyootugwasya kuti tuzyale michelo chakulisimya? Mbuuli mbutwayiya, Pawulu wakakataazikana maJuda nibakakaka kuswiilila mulumbe waBwaami. Nikuba boobo, taakaleka pe kubakambawukila. Amubone majwi ngaakabuzya maKristu bakuRoma atala  amaJuda. Wakati: “Ciyandwa camumoyo wangu acintu ncimbakumbilila kuli-Leza nceeci, nkuti bafutuke. Ndazumina kuti bali abusungu kumakani aa-Leza, pele busungu mbubajisi teensi bwaluzibo.” (Rom. 10:1, 2) Niinzi chakapa kuti Pawulu azumanane kukambawuka?

¹⁴ Chakusaanguna, Pawulu wakaamba kaambo kakali kupa kuti azumanane kukambawukila maJuda. Wakachita oobo nkaambo mbuwakali ‘kuyanda moyo wakwe.’ Eezi zitondeezya kuti wakali achiyandisyo chakuti maJuda bazoofutuke. (Rom. 11:13, 14) Chabili, Pawulu ‘wakabakumbilila kuli Leza.’ Wakakomba kakumbila kuli Leza kuti agwasye bamwi maJuda kuti baswiilile mulumbe waBwaami. Chatatu, Pawulu wakayungizya kuti: “Bali abusungu kumakani aa-Leza.” Wakabona bubotu mbubakali aabo maJuda. Pawulu wakalizi kuti maJuda bakali basungu mukuchita zintu zyabo, bakali kuyooba basikwiiya baKristu basungu mbuuli nguwe.

15. Kujana twachitobelezya biyeni chikozyano chaPawulu? Pa zikozyano.

¹⁵ Kujana twachitobelezya biyeni chikozyano chaPawulu? Chakusaanguna, tweelede kutondeezya luyando kubantu ‘balibambilide buumi butamani.’ Chabili, tweelede kukomba kuli Jehova kuti agwasye bantu bali amyoyo iibombede kuti batambule kasimpe. (Inc. 13:48; 16:14) Muchizi Silvana uuli aminyaka iili 30 kapayona wakati: “Kanditanayinka mumulimu wakukambawuka ngandakomba kuli Jehova kuti andigwasye kuti ndibe amaboneno aalikabotu abantu bamuchilawu chesu.” Alubo tulakomba kuli Leza katukumbila kuti bangelo batuzulwide kubantu bali amyoyo iibombede. (Mt. 10:11-13; Ciy. 14:6) Mukwesu Robert uuli aminyaka iili 30 kapayona wakati: “Kubelekaamwi abangelo bazi zyiimo zyabantu mbitukambawukila, kulabotezya.” Chatatu, tuleezya kubona bubotu buli mubantu. Umwi mwaalu uuli aminyaka yiinda ku50 kabbabbatizidwe wakati: “Ndileezya kubona nikaba kantu kaniini katondeezya chiyandisyo nchalaacho muntu, mbuuli kumwemwetela, mbalibonia kubusyu naakuti mibuzyo itondeezya kuti uyanda kuziba zyiingi.” Tulakonzya kuzyala michelo chakulisimya mbuuli Pawulu.

16, 17. (a) Nziizili zyiiyo nzitujana mulugwalo lwaMukambausi 11:6? (b) Pa chikozyano chitondeezya mbubawubona bamwi bantu mulimu wesu wakubyala mbuto.

¹⁶ Chimwi chiindi, bantu mbitukambawukila tabawuswiilili mulumbe waBwaami pesi mulimu wakubyala mbuto yakasimpe tatweelede kuulangilaansi. (Bala Mukambausi 11:6.) Nikuba kuti bantu biingi tabatuswiilili pesi nzituchita balazibona. Balabona kuti tuzwaata kabotu, tulijata kabotu akuti tulasangalizya. Kuti babona mbutulijata, ngababona kuti nzibatuyeeyela teenzizyo pe. Sergio a-Olinda, baambwa kumatalikilo aachiiyo eechi bakazibona kuti eezi zilachitika.

¹⁷ Sergio wakati: “Aali chimwi chiindi, twakachiswa zyakuti teetwakakonzya kwiinka kubusena nkutukambawukila. Nitwakabweeda nkutukambawukila, bantu bakali kwiinda bakatubuzya kuti, ‘Ani mwakali kuli? Twakali mubulide.’” Olinda wakayungizya kuti: “Madilayiva bamabbaasi bakali kutubbabbayisya alubo bamwi bakali kutubuzya kuti, ‘Mulikuchita mulimu mubotu!’ Bamwi bakatukumbila mamagazini.” Mapayona aaba babili bakagamba chiindi umwi mwaalumi naakabapa maluba akubalumba akaambo kamulimu ngubachita.

18. Nkamboonzi nukanzide kuzumanana ‘kuzyala michelo chakulisimya’?

¹⁸ Kuti ‘teetwalesya maanza eesu’ kubyala mbuto yaBwaami, tuyoopa “citondeezyo kumisyobo yoonse.” (Mt. 24:14) Kwiinda zyoonse, tuyoobotelwa nkaambo tunoozi kuti twachita zintu zibotezya Jehova nkaambo uyanda bantu ‘bazyala michelo chakulisimya.’