Zimwi zyaambwa mubupolofita bwaambidwe muchaati eeyi zyakachitika achiindi chimwi. Bupolofita oobu bulatugwasya munzila zisiyene-siyene kubona kuti tulikupona “kuciindi cakumamanino.”—Dan. 12:4.

• Magwalo Ciy. 11:7; 12:13, 17; 13:1-8, 12

  Bupolofita “Munyama” ulikweendelezya nyika kwaminyaka myiingi loko. Mumazuba aakumamanino, mutwe wachi 7 wakalichisa. Mukuya kwachiindi, mutwe ooyo wakapona alubo “nyika yoonse yakatobela munyama ooyo.” Saatani uyoobelesya munyama ooyo kuti alwane bananikidwe “basyeede.”

  Kuzuzikizigwa Kuzwa muchiindi chaZambangulwe, mfulumende zikazyania abweendelezi bwaJehova zyakatalika kuboneka. Nikwakayinda minyaka myiingi, Britain yakamana manguzu muchiindi chaNkondo Yakusaanguna Yanyika Yoonse. Yakazoosima lubo chiindi niyakajatana aAmerica. Mumazubaano aakumamanino, Saatani ulikubelesya mfulumende zyakwe kuti apenzye bakombi baLeza.

• Lugwalo Dan. 11:25-45

  Bupolofita Kutamvwanana kwamwaami wakunyika amwaami wakumusanza mumazuba aakumamanino.

  Kuzuzikizigwa Germany yakalwana aBritain a-America. Mu1945 Soviet Union abeenzinyina bakaba mwaami wakunyika. Mu1991 Soviet Union yakamana manguzu alubo mukuya kwachiindi Russia abeenzinyina bakaba mwaami wakunyika.

• Magwalo Is. 61:1; Malk. 3:1; Lk. 4:18

  Bupolofita Jehova wakatuma “mutumwa” ‘wakali kuyoobambila’ Bwaami bwaMesiya nzila. Mutumwa ooyu wakatumwa kuti aambile “babombe myoyo makani mabotu.”

  Kuzuzikizigwa Kuzwa kuma1870 kaziya kunembo, C. T. Russell abeenzinyina bakali kubeleka changuzu kupandulula kasimpe kali muBbayibbele. Kuma 1880, bakasaanguna kusungwaazya bakombi baLeza kuti bakambawuke. Bakagwisya zyiiyo zyakali amutwe uti “Wanted 1 000 Preachers” awuti “Anointed to Preach.”

• Lugwalo Mt. 13:24-30, 36-43

  Bupolofita Sinkondonyina wakabyala masokwe mumuunda wawiiti alubo masokwe aaya akapa kuti wiiti itaboneki kusikila muchiindi chakutebula, achiindi eechi, masokwe akasiyanisigwa awiiti.

  Kuzuzikizigwa Kuzwa kumamanino aakuma1800, maKristu achoonzyo akasaanguna kuboneka kuti alisiyene amaKristu aakubeja. Mumazuba aakumamanino, maKristu achoonzyo akatalika kubunganizigwa akusiyanisigwa amaKristu aakubeja.

• Lugwalo Dan. 2:31-33, 41-43

  Bupolofita Mawulu ansimbi abulongo aachibumbwa chipangidwe amisyobo yansimbi isiyene-siyene.

  Kuzuzikizigwa Bulongo bwiiminina bantu beendelezegwa aBritain aAmerica alubo bantu aaba bakazyania amfulumende eeyo. Bantu aaba, bapa kuti mfulumende eeyo ikachilwe kusima mbuli nsimbi.

• Magwalo Mt. 13:30; 24:14, 45; 28:19, 20

  Bupolofita “Wiiti” iyoobikwa “mubutala” alubo “ muzike uusyomeka alimwi uucenjede” wakasalwa kuti alanganie ‘babelesi bamung’anda yakwe.’ Mulimu wakukambawuka “makani mabotu aa Bwami” ulikuchitwa “munyika yoonse.”

  Kuzuzikizigwa Mu1919, muzike uusyomeka wakasalwa kuti azulwide bakombi baLeza. Kuzwa achiindi eecho kaziya kunembo, Basikwiiya Bbayibbele bakayinkilila kunembo amulimu wabo wakukambawuka. Mazubaano, Bakamboni baJehova balikukambawuka makani mabotu muzisi zyiinda ku200 alubo bapupulula mabbuku apandulula Bbayibbele mumilaka yiinda ku1 000.

• Magwalo Dan. 12:11; Ciy. 13:11, 14, 15

  Bupolofita Munyama uli aameja aabili wakabuzya bantu kuti “bapange cikozyanyo camunyama” alubo munyama ooyu upa “muya wabuumi kucikozyanyo camunyama.”

  Kuzuzikizigwa Bweendelezi bwaBritain a-America mbubo bwakapa kuti kupangwe League of Nations. Zimwi zisi zilakasumpula kabunga aaka. Alubo nikuba mwaami wakunyika wakaliswaanizya akabunga aaka, pesi wakazichita eezi kuzwa mu1926 kusika mu1933 luzutu. Bantu basyoma kuti United Nations ilakonzya kupa kuti kube luumuno mbuli mbubakali kusyoma League of Nations, pesi Bwaami bwaLeza mbubo abulikke bukonzya kupa kuti kube luumuno.

• Lugwalo Dan. 8:23, 24

  Bupolofita Mwaami uyoosya “uyoonyonyoona munzila iigambya”

  Kuzuzikizigwa Britain a-America zyakajeya bantu biingi loko alubo zyakanyonyoona zintu zyiingi. Muchikozyano, muchiindi chaNkondo Yabili Yanyika Yoonse, America yakanyonyoona zintu zyiingi niyakabbomba chisi chabasinkondonyina kayibelesya mabbomba anuclear aabili.

• Magwalo Dan. 11:31; Ciy. 17:3, 7-11

  Bupolofita ‘Munyama uusalala pyu’ uli ameja aali kkumi wakazwa mumugodi alubo ngumwaami wachi 8. Bbuku lyaDaniele lyaamba kuti mwaami ooyu ‘ncintu cisesemya cileta lunyonyooko.’

  Kuzuzikizigwa League of Nations yakamana manguzu muchiindi chaNkondo Yabili Yanyika Yoonse. Niyakamana nkondo eeyo, United Nations ‘yakabikkwa.’ Bantu bakayipa bulemu United Nations mbuli mbubakali kuchita League of Nations, pesi Bwaami bwaLeza mbubo bweelede kupegwa bulemu. United Nations iyoonyonyoona zikombelo zyakubeja.

• Magwalo 1 Tes. 5:3; Ciy. 17:16

  Bupolofita Zisi zizoowambilizya “luumuno akuliiba,” mpawo ‘meja aali kkumi’ alubo “amunyama” ziyoolwana “muvwuule” akumunyonyoona. Kuzwa waawo, zisi ziyoonyoonwa.

  Kuzuzikizigwa Zisi zizoowambilizya kuti kwaba luumuno akulyiiba, mpawo zisi zisumpula United Nations ziyoonyonyoona zikombelo zyakubeja. Ooku kuyooba kutalika kwamapenzi mapati. Mapenzi mapati ayoomana chiindi Jesu nayoonyonyoona nyika eeyi munkondo yaArmagedoni.

• Magwalo Ezk. 38:11, 14-17; Mt. 24:31

  Bupolofita Gogo uyoonjila muchisi chabantu baLeza. Mpawo bangelo “bayoobunganya basale.”

  Kuzuzikizigwa Mwaami wakunyika, azimwi mfulumende zili munyika bayooolwana bakombi baLeza. Kakuli kwayinda kayindi, maKristu bananikidwe banoochili aanyika bazootolwa kujulu.

• Magwalo Ezk. 38:18-23; Dan. 2:34, 35, 44, 45; Ciy. 6:2; 16:14, 16; 17:14; 19:20

  Bupolofita “Ooyo wakatantide” “bbiza lituba” uyoomanisya “kuzunda” kwiinda mukunyonyoona Gogo amasoja aakwe. “Munyama” uyoowalilwa “muzyiba lyamulilo” mpawo chibumbwa chiyoonyonyoonwa.

  Kuzuzikizigwa Jesu, Mwaami waBwaami bwaLeza uyoovuna bakombi baLeza. Kali abali 144 000 abangelo, Jesu uyoonyonyoona zisi zyoonse chaamba bweendelezi bwaSaatani.