1-2. Nkamboonzi aamwi Magwalo nitunga twazoowabona kaayandikana loko kuti zyiimo zyachincha mubuumi bwesu?

 MUBUZUBA bwamuchado, mwaalumi amwanakazi banga balikuchada balaswiilisisya chiindi mwaalu napa nkani yamuBbayibbele yaambuula atala alukwatano. Malayilile ngibanga balikwiiya nga teemapya pe kulimbabo. Pesi kuzwa mubuzuba oobo, baabona kaayandikana loko. Nkamboonzi? Nkaambo bayoowabelesya kabali babili mbukunga ngabanjila mulukwatano.

² Eezi nzizyo zichitika kumaKristu chiindi nibaba aabana. Kwaminyaka myiingi, ngabamvwa nkani zyiingi zyaambuula atala akukomezya bana. Pesi ngabazoowabona kayandikana loko malayilile aayo chiindi nibaba aabana. Nga baba aamulimu mupati ngubeelede kuchita. Kuti zyiimo zyesu zyachincha, amwi Magwalo ngatwazoowabona kaayandikana loko. Eezi nzizyo zipa kuti bakombi baJehova babale Magwalo akwaayeeyesesya “mazuba oonse” aabuumi bwabo mbuli mbubakali kuchita baami bachiIsrayeli.—Dt. 17:19.

3. Tulalanga-langaanzi muchiiyo eechi?

³ Nibazyali, muli aamulimu mupati wakuyiisya bana banu atala aJehova. Pesi kuli zimwi nzimweelede kuchita. Mweelede kugwasya bana banu kuti bamuyande loko Jehova. Niinzi nzimweelede kuchita kuti mugwasye bana banu kuti bayande Jehova? Muchiiyo eechi, tulalanga-langa malayilile aali 4 aakonzya kugwasya bazyali. (2 Tim. 3:16) Alubo tulabona kuti bamwi bazyali bakagwasigwa biyeni akubelesya malayilile aayo.

4. Ngaali aamwi malayilile aakonzya kugwasya bazyali kuti bagwasye bana babo kuti bayande Jehova amoyo woonse? (Jakobo 1:5)

⁴ 1: Kumbila kugwasigwa aaJehova. Kumbila Jehova kuti akupe busongo kuchitila kuti ugwasye mwanaako kuti amuyande. (Bala Jakobo 1:5.) Jehova nguwe uukonzya kukupa malayilile aagwasya kwiinda bantu boonse. Nkamboonzi nitwaamba oobo? Atubone twaambo tubili. Kakusaanguna, Jehova ulaaluzibo lwiingi atala akuba muzyali. (Int. 36:9) Alubo kachibili, malayilile ngatupa alagwasya chiindi choonse.—Is. 48:17.

5. (a) Mbunga yaJehova ilikubagwasya biyeni bazyali? (b) Mbuli mbukutondeezedwe muvidiyo, wayiyaanzi kuzwa kunzila Mukwesu aMuchizi Amorim mbubakakomezya bana babo?

⁵ Jehova ubelesya Jwi lyakwe ambunga yakwe kuti ape bazyali malayilile miingi aakonzya kubagwasya kuti bagwasye bana babo kuti bamuyande. (Mt. 24:45) Muchikozyano, ulakonzya kujana malayilile aagwasya kuzyiiyo ziti, “Lugwasyo Kumukwasyi” zyakali kujanika muSinsimuka! kwaminyaka myiingi pesi lino zyabujanika aawebbusayiti yesu. Alubo kuli mavidiyo miingi aawebbusayiti yesu yajw.org aakonzya kugwasya bazyali kuti babelesye malayilile aaJehova chiindi nibakomezya bana babo. *—Tus. 2:4-6.

6. Umwi mukwesu amwanakazi wakwe baabona biyeni malayilile aazwa kumbunga yaJehova?

⁶ Bazyali biingi balamulumba Jehova akaambo kalugwasyo ndwabapa kabelesya mbunga yakwe. Umwi mwaalumi uutegwa Joe wakaamba kuti: “Kukomezya bana batatu mukasimpe teekuuba pe. Ime amwanakazi wangu chiindi choonse nga twakomba kuli Jehova katumukumbila kuti atugwasye. Alubo kuti kwazwa chimwi chiiyo naakuti vidiyo ngatwazibona mbuli zipo zyazwa aachiindi cheelede kuti zitugwasye muchiimo nchitunga tulibede. Muzintu zyoonse nzituchita tukkala katukumbila Jehova kuti atuzulwide.” Joe amwanakazi wakwe bakabona kuti zyiiyo amavidiyo aayo agwasya bana babo kuti baswene aafwiifwi aJehova.

7. Nkamboonzi bazyali nibeelede kubeleka changuzu kuti babe chikozyano chibotu kubana babo? (Baroma 2:21)

⁷ 2: Bachikozyano chilikabotu. Bana  balazibona nzibachita bazyali babo alubo chiindi chiingi ngabazootobelezya mbabo. Nikuba boobo, bazyali balalubizya akaambo kakuti bali aachibi. (Rom. 3:23) Pesi baleezya amanguzu aabo woonse kuti babe zikozyano zibotu kubana babo. (Bala Baroma 2:21.) Umwi mwaalumi kalikwaambuula atala abana bakwe, wakaamba kuti: “Bana besu bali mbuli chinkwa chinywida kuti chanikwa mumaanzi.” Alubo wakayungizya kuti: “Kuti twachita zintu ziteendelani anzitubayiisya, balatubuzya.” Nkinkaako, kuti bana besu bayande Jehova, iswe tubazyali tweelede kuchita zintu zitondeezya kuti tulamuyanda Jehova amoyo woonse alubo bana besu beelede kuzibona.

8-9. Wayiyaanzi kuzwa kuli zyakaambwa aAndrew aEmma?

⁸ Kuli nzila zyiingi bazyali nzibakonzya kubelesya kuti bayiisye bana babo kuti bayande Jehova. Mvwa zimwi zyakaambwa aamulombe ulaaminyaka iili 17 uutegwa Andrew. Wakati: “Bazyali bangu bakkala kabatuyiisya atala ambukuyandikana kukomba kuli Jehova. Buzuba abuzuba mansiku, ndeende ulakomba andime nikuba kuti nga ndakomba kale kandili andilikke. Alubo bazyali bangu bakkala kabatuyeezya kuti, tulakonzya kukomba kuli Jehova kwaziindi zyiingi kufumbwa mputwayandila. Lino kwabuunduubila kukomba kuli Jehova alubo zipa kuti ndimubone mbuli Taata ulaaluyando.” Nibazyali, amukkale kamuyeeya kuti kuyanda Jehova nkumuchita kulakonzya kupa kuti bana banu ambabo bamuyande Jehova.

⁹ Atubone chikozyano chaEmma. Wisi naakachija mpuli yabo, bayina bakasyaala kabali aazikwelete zyiingi. Emma wakaamba kuti: “Kwaziindi zyiingi baama kwakali kubayumina kujana mali pesi bakali kukkala kabaambuula atala akuti Jehova ulabalangania bakombi bakwe akuti ulabapa ziyandikana. Nzila njibakali kuponaayo baama yakali kutondeezya kuti bakali kwaasyoma majwi aaya. Bakali kupona kweendelana anzibakali kukambawuka.” Twiiyaanzi? Bazyali balakonzya kuba zikozyano zibotu kubana babo nikuba muziindi ziyumu.—Gal. 6:9.

10. Njiili myeenya njibakali kujana maIsrayeli kuti bayiisye bana babo atala aJehova? (Deuteronomo 6:6, 7)

¹⁰ 3: Waambuula aabana bako chiindi choonse. Jehova wakalayilide maIsrayeli kuti bakkale kabayiisya bana babo chiindi choonse. (Bala Deuteronomo 6:6, 7) Bazyali bakali kujana mweenya myiingi yakuti baambuule abana babo akuti babayiisye atala aJehova. Muchikozyano, mwana mulombe wakali kujana chiindi chakubelekaamwi awisi kabali kubyala mumuunda akutebula. Mpawo mwana musimbi wakali kubelekaamwi abayina kukusuma, kuluka akuchita imwi milimu yaang’anda. Bazyali nibakali kubelekaamwi abana babo bakali kujana mweenya wakwaambuula ambabo nkani ziyandikana loko. Muchikozyano, bakali kukonzya kwaambuula atala abubotu bwaJehova akulanga-langa mbakali kubagwasya mumpuli yabo.

11. Nguuli mweenya bazyali ngubakonzya kubelesya kuti bajane chiindi chakwaambuula aabana babo?

¹¹ Mazubaano zintu zyachincha. Munyika zyiingi, bazyali tabali kukonzya pe kujana chiindi chiingi chakwaambuula abana babo. Kulakonzeka kuti bazyali ngabali kumulimu mpawo bana ngabali kuchikolo. Nkinkaako, bazyali beelede kuyanduula chiindi chakuti baambuule aabana babo. (Ef. 5:15, 16; Flp. 1:10) Balakonzya kujana mweenya wakuti baambuule abana babo chiindi nibali kuchita kukomba kwampuli. Umwi uuchikula uutegwa Alexander wakaamba kuti: “Ndeende ukkala  kachita mabambe aakuti tuchite kukomba kwampuli alubo tazumizyi chintu chili choonse kuti chitunyonganie. Nitwamana kwiiya nga twasaanguna kwaambuula.”

12. Niinzi nzyakonzya kuchita mutwe wampuli chiindi nalikuchitisya kukomba kwampuli?

¹² Kuti kuli mutwe wampuli, niinzi nzukonzya kuchita kuti kukomba kwampuli kubanoneezye bana bako? Ulakonzya kusala kwiiya abana bako bbuku pya litegwa Mbukonzya Kubotelwa Mubuumi Kukabe Kutamani! Bbuku eeli lilakonzya kukugwasya kuti kukuubile kwaambuula abana bako. Kulakonzeka kuti uyanda kuti bana bako baangunuke kwaambuula atala azintu zibakataazya nkinkaako, utabelesyi chiindi eecho kuti ubabuzye zintu nzibeelede kuchita anzibateelede kuchita. Alubo toyelede kunyema pe kuti bana bako baamba zintu ziteendelani azili muBbayibbele pesi weelede kubalumba akaambo kakuti baamba mbubalimvwa. Alubo weelede kubasungwaazya kuti bakkale kabachita oobo. Kuti waziba mbubalimvwa bana bako, kulakonzya kukuubila kuti ubagwasye.

13. Njiili imwi myeenya njibakonzya kubelesya bazyali kuti bayiisye bana babo atala aJehova?

¹³ Nibazyali, amuyanduule myeenya yakuti mugwasye bana banu kuti baswene aafwiifwi aJehova. Tamweelede kulindila chiindi chakwiiya Bbayibbele luzutu kuti mwaambuule abana banu atala aLeza siluyando. Atubone zichitwa amuzyali uutegwa Lisa. Wakaamba kuti: “Twakagwasya bana besu kuti babone kuti zintu zyoonse zili aanyika zyakalengwa aJehova. Muchikozyano, kuti munkala wachita zintu zisesya bana besu nga twababuzya kuti Jehova nguLeza uubotelwa alubo wakatulenga munzila yakuti katubotelwa.”

14. Nkamboonzi nikuyandikana kuti bazyali bagwasye bana babo kuti basale beenzinyina balikabotu? (Tusimpi 13:20)

¹⁴ 4: Gwasya bana bako kuti basale beenzinyina balikabotu. Jwi lyaLeza litondeezya kuti beenzuma balakonzya kutusungwaazya kuti tuchite zintu zibotu naakuti zibi. (Bala Tusimpi 13:20.) Nibazyali, mulibazi na beenzinyina babana banu? Mwakali mwababona na alubo nga mwajana chiindi chakuba ambabo na? Niinzi nzimukonzya kuchita  kuti mugwasye bana banu kuti bamvwanane aabantu bayanda Jehova? (1 Kor. 15:33) Mulakonzya kugwasya bana banu kuti basale beenzinyina balikabotu kwiinda mukutamba maKristu basimide mubukombi kuti muzoobe ambabo kung’anda yanu.—Int. 119:63.

15. Niinzi nzibakonzya kuchita bazyali kuti bagwasye bana babo kuti bajane beenzinyina balikabotu?

¹⁵ Mukwesu uutegwa Tony wakaamba nzibakachita amwanakazi wakwe kuti bagwasye bana babo kuti basale beenzinyina balikabotu. Wakaamba kuti: “Kwaminyaka myiingi, ime amwanakazi wangu twakali kutamba bakwesu abachizi basiyene-siyene, balaaminyaka iisiyene-siyene abali aamaponeno aasiyene-siyene. Twakali kulyaamwi alubo twakali kuchitaamwi kukomba kwampuli. Eezi zyakapa kuti tubazibe kabotu aabo bayanda Jehova alubo bayanda kumubelekela. Alubo twakali kutamba balangizi bamabazu, mamishinali abamwi. Bana besu bakayiya zyiingi kuzwa kuzintu zyakabachitikila, kukulipeda kwabo akubeleka changuzu nkubakali kuchita. Eezi zyakagwasya bana besu kuti baswene aafwiifwi aJehova.” Nibazyali, amugwasye bana banu kuti bajane beenzinyina balikabotu.

16. Niinzi nzweelede kuchita kuti mwanaako waamba kuti tachiyandi pe kubelekela Jehova?

¹⁶ Niinzi nzweelede kuchita kuti wabeleka changuzu kuti uyiisye mwanaako pesi wasala kusiya Jehova? Toyelede kuyeeya kuti wakakachilwa kumuyiisya mbuli muzyali. Muntu woonse ulaalwaangunuko lwakulisalila kuti uyanda kubelekela Jehova na naakuti pe. Kuti mwaanaako wasala kusiya Jehova, utamani manguzu pe naakuti kuyeeya kuti tazoobooli pe. Yeeya atala achikozyano chamwana mulombe wakasweekede. (Lk. 15:11-19, 22-24) Mulombe ooyo wakachita zintu zibi loko pesi kumamanino wakazooboola. Bamwi balakonzya kuyeeya kuti eechi nchikozyano biyo, tazichitiki pe mubuumi. Pesi teembubo pe. Eezi nzizyo biya zyakachitika kumukwesu wachiniini uutegwa Elie.

17. Chikozyano chaElie chakusungwaazya biyeni?

¹⁷ Elie kalikwaambuula atala abazyali bakwe, wakaamba kuti: “Bakali kuchita zyoonse  nzibakonzya kuti bandigwasye kuti ndiyande Jehova aJwi lyakwe Bbayibbele. Kandili aaminyaka iili 15 ndakasaanguna kupapila.” Elie wakasaanguna kwaandila tusulwe tubili alubo wakali kubikka zigwilinti kumatwi chiindi bazyali bakwe nibakali kumugwasya. Naakazwa aang’anda wakasaanguna kupona buumi bwakutalijata. Nikuba boobo, wakali kwaambuuzyania atala aBbayibbele awumwi mweenzinyina. Elie wakaamba kuti: “Kujana chiindi chiingi chakuti twaambuule amweenzuma atala aJehova kwakapa kuti ndisaangune lubo kuyeeya atala aJehova. Mbichaani-mbichaani kasimpe kamuBbayibbele nkibakandiyiisya bazyali bangu kakasaanguna kukomena lubo mumoyo wangu.” Mukuya kwachiindi, Elie wakazoobweeda mukasimpe. * Yeeyela kuti bazyali bakwe bakabotelwa biyeni akaambo kuti bakayiisya mwanaabo kuti ayande Jehova kuzwa kachili muniini.—2 Tim. 3:14, 15.

18. Kubeleka changuzu nkubachita bazyali kuti bayiisye bana babo kuti bayande Jehova kupa kuti uchiteenzi?

¹⁸ Nibazyali, muli aachilongezyo chipati loko chakukomezya bana banu kuti bayande Jehova. (Int. 78:4-6) Mulimu ooyu teemuuba pe. Tumulumba loko akaambo kakubeleka changuzu nkumuchita kuti mugwasye bana banu. Kuti mwazumanana kuchita zyoonse nzimukonzya kuti mugwasye bana banu kuti bayande Jehova akuti bamuswiilile, Taateesu wakujulu siluyando ulabotelwa loko.—Ef. 6:4.