1. Bantu boonse beelede kusala kuchitaanzi?

 MAZUBAANO, umwi awumwi weelede kulisalila kuti uyanda kuzulwidwa aaJehova Leza na, Mweendelezi wanyika yoonse naakuti uyanda kweendelezegwa asinkondonyina waLeza, Saatani Dyabbulosi. Taakwe waamba kuti ulajanika koonse. Kufumbwa umwi awumwi nzyaasala, nzizyo ziyootondeezya kuti ulakujana buumi butamani na naakuti pe. (Mt. 25:31-33, 46) Alubo muchiindi ‘chamapenzi mapati,’ bantu bayoobikkwa makki iitondeezya kuti bayoofutuka na naakuti bayoonyonyoonwa.—Ciy. 7:14; 14:9-11; Ezk. 9:4, 6.

2. (a) Lugwalo lwa Bahebrayo 10:35-39, lutusungwaazya kuti tuchiteenzi? (b) Bbuku lyaCiyubunuzyo ngalilatugwasya biyeni?

² Bala Bahebrayo 10:35-39. Kuti kuli wakasala kuzulwidwa aaJehova, wakasala kabotu. Alubo kulakonzeka kuti ulaachiyandisyo chakugwasya bamwi kuti basale munzila iikozyenie. Kuti uchite oobo, ulakonzya kubelesya makani aajanika mubbuku lyaCiyubunuzyo kuti ubagwasye. Bbuku eeli litubuzya zitakachitike kubantu bakazya Jehova alubo litubuzya nzibayoojana aabo bazumanana kusyomeka kubweendelezi bwaLeza. Nkinkaako, kulayandikana kuti tulange-lange makani aaya aayandikana. Kuchita oobo kulatusimya alubo kutugwasya kuti tuzumanane kubelekela Jehova. Kuyungizya waawo, tulakonzya kubelesya zintu nzitwakayiya kuti tugwasye bamwi kuchitila kuti basale kabotu akuti bazumanane kubelekela Jehova.

3. Tulalanga-langaanzi muchiiyo eechi?

³ Muchiiyo eechi, tulasandula mibuzyo yakuti: Niinzi  nzibabambilidwe aabo basala kusumpula bweendelezi bwaLeza? Niinzi zitakachitikile aabo basala kusumpula munyama uusalala pyu waambidwe mubbuku lyaCiyubunuzyo?

4. Mbaani mbaakabona mwaapostolo Johane kabali aJesu kujulu?

⁴ Muchilengaano, mwaapostolo Johane wakabona tubunga tubili twabantu basumpula bweendelezi bwaJehova alubo bayoojana buumi butamani. Kabunga kakusaanguna kali aabantu bali 144 000. (Ciy. 7:4) Bantu aaba basalwa kuzwa munyika kuti bakapange mfulumende kabalaamwi aaJesu kujulu alubo bazooyendelezya nyika yoonse. (Ciy. 5:9, 10; 14:3, 4) Muchilengaano, Johane wakababona kabayimvwi aJesu aaChilundu chaZiyoni kujulu.—Ciy. 14:1.

5. Niinzi ziyoochitikila maKristu bananikidwe bachili aanyika?

⁵ Kuzwa muchiindi chabaapostolo, bantu biingi balikusalwa kuti babe aakati kabali 144000. (Lk. 12:32; Rom. 8:17) Johane wakabuzigwa kuti maKristu bananikidwe bache biyo bachinoopona aanyika kumazuba aakumamanino. Mapenzi mapati kaatanatalika, “basyeede” bayoobikkwa “ciganto” chitondeezya kuti Jehova wabatambula. (Ciy. 7:2, 3; 12:17) Muchiindi chamapenzi mapati, maKristu bananikidwe basyeede bayootolwa kujulu kuti bakaswaanane aabamwi bali mu144 000 bakafwa kabasyomeka. Kabali nkukooko, bayooyendelezya aamwi aJesu muBwaami bwaLeza.—Mt. 24:31; Ciy. 5:9, 10.

6-7. (a) Nkaakali kamwi kabunga Johane nkaakazoobona, alubo twiiyaanzi atala akabunga aaka? (b) Nkamboonzi maKristu bananikidwe basyeede aanyika ‘abankamu mpati’ nibeelede kubotelwa atala amakani aali muli Ciyubunuzyo chaandaano 7?

⁶ Johane naakazwa kubona kabunga kabantu bayoopona kujulu, wakazoobona “nkamu mpati.” Bantu aaba mbiingi kusiyana abali mukabunga kakusaanguna. (Ciy. 7:9, 10) Twiiyaanzi atala akabunga aaka? Johane wakaamba kuti: “Aaba mbambabo bazwa mumapenzi mapati, alimwi bawasya zisani zyabo zilamfwu akuzitubya mubulowa bwa Mwanaambelele.” (Ciy. 7:14) Bankamu mpati nibayoofutuka mumapenzi mapati, bayoopona aanyika alubo bayoojana zilongezyo zyiingi.—Int. 37:9-11, 27-29; Tus. 2:21, 22; Ciy. 7:16, 17.

⁷ Nikuba kuti tuli aabulangilizi bwakuyoopona kujulu naakuti aanyika, tulalibona na katuli mubupolofita oobu buyoozuzikizigwa bwaambidwe muli Ciyubunuzyo chaandaano 7? Tweelede kulibona katuli mumo. Chinooli chiindi chibotezya loko kutubunga ootu tubili twabakombi baLeza. Tuyoobotelwa loko akaambo kakuti twakasala kweendelezegwa aaJehova. Niinzi zimwi zyaambwa mubbuku lyaCiyubunuzyo ziyoochitika muchiindi chamapenzi mapati?—Mt. 24:21.

8. Mapenzi mapati ayootalika biyeni, alubo niinzi zitakachitike kubantu biingi?

⁸ Mbuli mbutwakayiya muchiiyo chayinda, mfulumende zyanyika ziyoobukila Bbabbiloni Mupati, mbunga yabukombi bwakubeja. (Ciy. 17:16, 17) Aaya ayooba matalikilo aamapenzi mapati. Aachiindi eechi chiyumu, bantu biingi bayoosala kukomba Jehova na? Peepe. Bbuku lyaCiyubunuzyo chaandaano 6 litondeezya kuti aachiindi eecho bantu batakombi Jehova bayoochijila kubeendelezi banyika akuli basikuuzizyania kuti bakakwabililwe. Beendelezi aaba banyika abasikuuzizyania bakozyanisigwa azilundu. Mbukunga bantu aabo tabakasali kusumpula Bwaami bwaLeza,  Jehova uyoobabona kuti mbaasinkondonyina.—Lk. 11:23; Ciy. 6:15-17.

9. Bakombi baJehova basyomeka bayooboneka biyeni muchiindi chamapenzi mapati alubo niinzi zitakabachitikile?

⁹ Bakombi baJehova basyomeka bayooboneka muchiindi eechi chiyumu chamapenzi mapati. Mbabo abalikke banooli bakombi baJehova Leza aanyika alubo bayookaka kuzulwidwa ‘amunyama.’ (Ciy. 13:14-17) Akaambo kakuti bakombi baJehova bayookkala kabasyomeka, basinkondonyina baLeza bayoonyema. Akaambo kazeezi, nkamu yazisi iyoojatana kuti ilwane bakombi baLeza munyika yoonse. Bbayibbele lyaamba kuti nkamu yazisi eeyi iiyoobalwana nguGogo wakuMagogo.—Ezk. 38:14-16.

10. Mbuli mbukwaambidwe mulugwalo lwa Ciyubunuzyo 19:19-21, Jehova uyoochitaanzi bakombi bakwe nibayoolwanwa?

¹⁰ Jehova uyoochitaanzi bakombi bakwe nibayoolwanwa? Wakaamba kuti: “Bukali bwangu bupati buyoovwutuka.” (Ezk. 38:18, 21-23) Bbuku lyaCiyubunuzyo chaandaano 19 litubuzya zimwi ziyoochitika. Jehova uyootuma Jesu kuti akakwabilile bakombi bakwe akunyonyoona basinkondonyina. Jesu uyoobelekaamwi ‘ampi zyabasikalumamba bakujulu,’ naakuti bangelo basyomeka abali 144 000. (Ciy. 17:14; 19:11-15) Niyaakumana nkondo eeyi, bantu amfulumende zyoonse zikazyania aJehova zinooli zyanyonyoonwa chakumaninina.—Bala Ciyubunuzyo 19:19-21.

11. Niinzi chintu chiyandikana chiyoochitika chaambidwe mubbuku lyaCiyubunuzyo?

¹¹ Yeeyela mbubayoobotelwa bakombi baLeza basyomeka chiindi basinkondonyina nibazoonyonyoonwa chakumaninina. Kuyooba kukondwa kupati aanyika. Nikuba kuti kujulu kuyooba kukondwa kupati chiindi Bbabbiloni mupati natazoonyonyoonwe, pesi kuyoochitika chimwi chintu chiyandikana loko chiyoopa kuti kukabe kukondwa kupati. (Ciy. 19:1-3) Niinzi eecho? Bbuku lyaCiyubunuzyo lyaamba kuti, kuyooba muchado naakuti ‘bwiinga bwa Mwanaambelele.’—Ciy. 19:6-9.

12. Mbuli mbukwaambidwe muli Ciyubunuzyo 21:1, 2, muchado waMwanaambelele uzoochitika lili?

¹² Mbukunga bali 144 000 boonse banooli baba kujulu nkondo yaArmagedoni kayitanasaanguna pe, zyaamba kuti chinooli chiindi chakuti muchado waMwanaambelele uchitike na? Peepe. Ani mpo uzoochitika lili? (Bala Ciyubunuzyo 21:1, 2.) Muchado waMwanaambelele uzoochitika nkondo yaArmagedoni kayili yamana alubo basinkondonyina baLeza boonse kabali banyonyoonwa.—Int. 45:3, 4, 13-17.

13. Niinzi chiyoochitika aamuchado waMwanaambelele?

¹³ Niinzi chiyoochitika aamuchado waMwanaambelele? Mbuli muchado mbujatanizya mwaalumi amwanakazi, munzila iikozyenie muchado ooyu wakukozyanisya ujatanizya Mwaami Jesu Kristu anabwiinga wakwe, chaamba bali 144 000. Kujatanizigwa ooku kuyoopa kuti kube mfulumende mpya iiyooyendelezya nyika kwaminyaka iili 1 000.—Ciy. 20:6.

14-15. Kweendelana a Ciyubunuzyo chaandaano 21, bali 144 000 bakozyanisigwa aanzi? (Langa chifanikisyo chili achivumbyo.)

¹⁴ Bbuku lyaCiyubunuzyo chaandaano 21 likozyanisya bali 144 000 amuunzi mubotu loko uutegwa “Jerusalemu Mupya.” (Ciy. 21:2, 9) Muunzi ooyu ulaamabwe aantalisyo aali 12, amabwe aayo kwakalembedwe mazina aali 12 aabaapostolo “bali 12 ba Mwanaambelele.”  Nkamboonzi chilengaano eechi nichakamubotezya Johane? Nkaambo wakabona zina lyakwe kalilembedwe aali limwi lyamabwe aayo. Eechi chakali chilongezyo chipati loko.—Ciy. 21:10-14; Ef. 2:20.

¹⁵ Taakwe muunzi uukozyenie amuunzi ooyu wakukozyanisya. Muunzi ooyu ulaamugwagwa wangolida iisalala ing’ayimina, uli aamilyango iili 12 yangale. Miduli aantalisyo zyawo yakabotezedwe aamabwe aayandikana alubo munzi ooyo uli aamabazu aali 4 ayeelene. (Ciy. 21:15-21) Pesi kuli chimwi chintu Johane nchaatakabona mumuunzi ooyu. Niinzi eecho? Johane wakati: “Lino tiindakabona tempele mulinguwo, nkaambo Jehova Leza Singuzuzyoonse alimwi a Mwanaambelele ngotempele lyanguwo. Alimwi munzi ooyu tauyandiki kumunikilwa azuba naa mwezi pe, nkaambo bulemu bwa Leza bwakali kuumunikila, alimwi lambe lyanguwo lyakali Mwanaambelele.” (Ciy. 21:22, 23) Aabo bapanga Jerusalemu Mupya bayoobaamwi aJehova. (Heb. 7:27; Ciy. 22:3, 4) Jehova aJesu mbiimbabo tempele lyamuunzi ooyo.

16. Niinzi zitakachitike kubantu chiindi Bwaami bwaLeza nibutakeendelezye kwaminyaka iili 1 000?

¹⁶ MaKristu bananikidwe balabotelwa chiindi nibayeeya atala amuunzi ooyu. Alubo aabo balaabulangilizi bwakuzoopona aanyika ambabo bali aakaambo kapa kuti babotelwe. Chiindi Bwaami bwaLeza nibutazooyendelezye kwaminyaka iili 1 000, Jerusalemu Mupya uyooyeta zilongezyo zyiingi kubantu banooli aanyika. Johane wakabona zilongezyo eezyo kazili kukunka mbuli “mulonga wamaanzi aabuumi.” Kumabazu woonse aamulonga kwakali “zisamu zyabuumi” zyakali aamatu aakali ‘kuponia masi.’ (Ciy. 22:1, 2) Bantu baswiilila bayoojana zilongezyo eezi. Alubo banooya bumaninina mbichaani-mbichaani. Takuchinoolikwe kuchisa, kuchiswa akulila.—Ciy. 21:3-5.

17. Kweendelana alugwalo lwa Ciyubunuzyo 20:11-13, mbaani batazoojane zilongezyo Bwaami bwaLeza nibutazooyendelezye kwaminyaka iili 1 000?

¹⁷ Mbaani batakajane zilongezyo eezi? Chakusaanguna, mbankamu mpati batazoofutuke kunkondo yaArmagedoni kuswaanizya abana batazoozyalwe munyika mpya. Pesi lugwalo lwaCiyubunuzyo chaandaano 20 lusyomezya kuti bafwide bayoobusigwa. (Bala Ciyubunuzyo 20:11-13.) “Baluleme” bakafwa chiindi kuswaanizya “abataluleme” bakatajana mweenya wakwiiya atala aJehova bayoobusigwa  lubo kuti bakapone aanyika. (Mil. 24:15; Joh. 5:28, 29) Eezi zyaamba kuti bantu boonse bayoobusigwa na kuti bakapone aanyika muminyaka eeyi iili 1 000? Peepe. Aabo bakakaka kwiiya atala aJehova kabatanafwa tabazoobusigwi pe nkaambo bakalipedwe mweenya pesi maponeno aabo akatondeezya kuti tabeeleli pe kuzoopona muParadayizi aanyika.—Mt. 25:46; 2 Tes. 1:9; Ciy. 17:8; 20:15.

18. Kunooli biyeni aanyika kumamanino aaminyaka iili 1 000?

¹⁸ Niyazoomana minyaka iili 1 000, bantu boonse banooli aanyika banooli kabatachikwe chibi pe. Tabachinooswaanani aamapenzi aakeetwa aachibi chaAdamu. (Rom. 5:12) Chibi chakeetwa aaAdamu chinooli chagwisigwa chakumaninina. Eezi zyaamba kuti bantu boonse banooli aanyika bayooba “baumi” nkaambo banooli bamaninina kumamanino aaminyaka iili 1 000.—Ciy. 20:5.

19. Nkamboonzi kusunkwa kwamamanino nikweelela?

¹⁹ Jesu wakazumanana kusyomeka kuli Leza nikuba chiindi naakali kusunkwa aaSaatani. Pesi eezi zyaamba kuti bantu boonse bamaninide bayoozumanana na kusyomeka kuli Jehova chiindi Saatani nayoopegwa mweenya wakubasunka? Umwi awumwi uyoolisandwida mubuzyo ooyu chiindi Saatani nayoowangununwa kuzwa mumulindi niyazoomana minyaka iili 1 000. (Ciy. 20:7) Aabo bayoozumanana kusyomeka muchiindi chasunko lyamamanino bayoojana buumi butamani alubo bayoojana lwaangunuko lwachoonzyo. (Rom. 8:21) Pesi aabo bayoosala kupapila, bayoonyonyoonwa chakumaninina kuswaanizya aDyabbulosi amadimoni aakwe.—Ciy. 20:8-10.

20. Bupolofita buli mubbuku lyaCiyubunuzyo bwapa kuti umvwe biyeni?

²⁰ Ulikumvwa biyeni atala akulanga-langa bupolofita buli mubbuku lyaCiyubunuzyo nkutwachita? Tazipi kuti ulibone kuliwo na chiindi bupolofita oobu nibuyoozuzikizigwa? Tazili kupa kuti uyande kugwasya bamwi na kuti baze mubukombi bwakasimpe? (Ciy. 22:17) Kulanga-langa zintu ziyoochitika kunembo kwapa kuti tubotelwe loko zyakuti tuyanda kwaamba majwi aali mbuli aakaambwa aamwaapostolo Johane chiindi naakati: “Ameni! Koboola, O Mwami Jesu.”—Ciy. 22:20.