1. Jehova uyanda kuti bakombi bakwe bachiteenzi? (Langa chifanikisyo.)

 NGWANI ngutukonzya kubuzya kuti twayanda kuumbulizigwa akuzulwidwa? Nsandulo yamubuzyo ooyu ilaantanganana. Tulakonzya kukomba kuli Jehova Leza. Jehova utubuzya kuti tuchite oobo. Uyanda kuti ‘tukombe chiindi choonse’ kulinguwe. (1 Tes. 5:17) Tulakonzya kukomba kuli Jehova katwaangunukide alubo katukumbila kuti atuzulwide mubuumi bwesu. (Tus. 3:5, 6) Akaambo kakuti Leza mwaabi, taakwe naakatupa mugaano pe wakuti tukombe kulinguwe.

2. Tulalanga-langaanzi muchiiyo eechi?

² Nkombyo twiibona kachili chipo chiyandikana loko. Nikuba oobo, kulakonzya kutuyumina kuti tujane chiindi chakukomba. Alubo tulakonzya kulimvwa kuti tweelede kusumpuka kunzila njitukombaayo. Chibotezya loko nchakuti Magwalo alakonzya kutusungwaazya akutuzulwida. Muchiiyo eechi tulabona nzitweelede kuchita kuti tujane chiindi chakukomba kwiinda mukulanga-langa chikozyano chaJesu. Alubo tulabona nzitweelede kuchita kuti tusumpuke kunzila njitukombaayo kwiinda mukulanga-langa zintu zili 5 ziyandikana loko.

3. Niinzi Jesu nzyaakazi atala ankombyo?

³ Jesu wakalizi kuti Jehova uyibona kayiyandikana loko nkombyo. Katanaza aanyika, Jesu wakali kubona Wisi mbaakali kusandula nkombyo zyabakombi bakwe basyomeka. Muchikozyano, Jesu wakalaamwi aWisi kujulu chiindi Wisi naakasandula  nkombyo zyaHana, Davida, Elija abamwi. (1 Sam. 1:10, 11, 20; 1 Bam. 19:4-6; Int. 32:5) Eezi nzizyo zyakapa kuti Jesu ayiisye basikwiiya bakwe kuti bakombe kwaziindi zyiingi kabali aachoonzyo chakuti Jehova ulabasandula.—Mt. 7:7-11.

4. Twiiyaanzi kunkombyo zyaJesu?

⁴ Jesu wakasiila basikwiiya bakwe chikozyano chakutobelezya kwiinda mukukomba kuli Jehova. Naakali kuchita mulimu wakwe aanyika, wakali kukomba kwaziindi zyiingi. Wakali kubikka chiindi aambali chakuti akombe akaambo kakuti wakali kukkala kajisikini alubo wakali kukkala kali aakati kabantu biingi loko. (Mk. 6:31, 45, 46) Wakali kufuma kuti ajane chiindi chakukomba kali aalikke. (Mk. 1:35) Chimwi chiindi, wakakomba busiku boonse naakali kuyanda kusala chintu chiyandikana loko. (Lk. 6:12, 13) Alubo Jesu wakakomba kwaziindi zyiingi mubusiku katanafwa kayanda kuti amaninsye mulimu wakwe kasyomeka wakali muyumu loko.—Mt. 26:39, 42, 44.

5. Kujana twachitobelezya biyeni chikozyano chaJesu chiindi nitukomba?

⁵ Chikozyano chaJesu chituyiisya kuti nikuba kuti tujisikini zili biyeni, pesi tweelede kujana chiindi chakukomba. Katutobelezya Jesu, andiswe tulakonzya kubikka aambali chiindi chakukomba, tulakonzya kufuma kuseeni naakuti kunonoka kulala kuchitila kuti tujane chiindi chakukomba. Kuti twachita oobo, nga tutondeezya kuti tulamulumba Jehova akaambo kakutupa chipo eechi chibotu loko. Umwi muchizi uutegwa Lynne wakaambuula atala ambaakalimvwa chiindi naakasaanguna kuziba kuti tuli aachipo chankombyo. Wakaamba kuti, “Nindakaziba kuti ndilakonzya kwaambuula aaJehova kufumbwa chiindi, zyakandipa kuti ndimubone mbuli Mweenzuma waafwiifwi alubo zyakandigwasya kuti ndisumpuke kunzila njindakali kukombaayo.” Zilaantanganana kuti toonse mbutulimvwa. Kwalino, atulange-lange zintu zili 5 nzitukonzya kuswaanizya munkombyo zyesu.

6. Kweendelana alugwalo lwa Chiyubunuzyo 4:10, 11, niinzi nzyayelede kuchitilwa Jehova?

⁶ Kutembawula Jehova. Muchilengaano chigambya nchaakabona mwaapostoli Johane,  wakabona baalu bali 24 kujulu bakali kukomba Jehova. Bakali kutembawula Leza kabalikwaamba kuti uleelela kutambula “bulemu alulemeko amanguzu.” (Bala Chiyubunuzyo 4:10, 11.) Ngilozi zisyomeka anzizyo zili aatwaambo twiingi tupa kuti zitembawule akulemeka Jehova. Zikkalaamwi kujulu alubo zimuzi kabotu loko Jehova. Alubo nga zibona buntu mbwalaabo Jehova muzintu nzyachita. Chiindi nizibona mbachita zintu zyakwe Jehova, ngazyapa kuti zimutembawule.—Job. 38:4-7.

7. Niinzi chipa kuti tutembawule Jehova?

⁷ Andiswe tweelede kutembawula Jehova munkombyo zyesu katulikwaamba zintu zipa kuti tumuyande akuti nkamboonzi nitulombozya zintu eezyo. Chiindi nubala Bbayibbili, yezya kubona buntu mbwalaabo Jehova ikapati mbuyanda loko. (Job. 37:23; Rom. 11:33) Kuzwa waawo, ubuzye Jehova mbulimvwa atala abuntu oobo. Alubo tulakonzya kutembawula Jehova akaambo kakutugwasya nkwachita lwesu kutugama ambatugwasya tubakombi bakwe boonse. Jehova ukkala katulangania akutukwabilila.—1 Sam. 1:27; 2:1, 2.

8. Nziizili zimwi zintu nzitukonzya kulumba Jehova? (1 Batesalonikka 5:18)

⁸ Lumba Jehova. Kuli twaambo twiingi loko tupa kuti tulumbe Jehova munkombyo. (Bala 1 Batesalonikka 5:18.) Tulakonzya kumulumba akaambo kazintu nzitulaazyo nkaambo zintu zyoonse zibotu nzitulaazyo zizwa kulinguwe. (Jak. 1:17) Muchikozyano, tulakonzya kumulumba akaambo kabubotu bwanyika azintu zyakalengwa. Alubo tulakonzya kumulumba akaambo kakutupa buumi, kutupa bamumpuli, beenzuma abulangilizi. Alubo tuyanda kulumba Jehova akaambo kakutuzumizya kuti tube beenzinyina.

9. Nkamboonzi nikuyandikana kuti tulumbe Jehova?

⁹ Kulayandikana kuti tuyeeyesesye atala azintu nzituyanda kulumba Leza kutugama. Tulikupona munyika muzwide bantu batalumbi. Bantu biingi babikkila maanu kuzintu nzibayanda kutali kuzintu nzibeelede kuchita kuti batondeezye kuti balalumba kuzintu nzibalaazyo. Kuti twaba aamuuya ooyo, nkombyo zyesu zilaba zyakukumbila luzutu. Kuti tutachegwi aamuuya ooyu, tweelede kukkala katuli bantu balumba Jehova akaambo kazintu zyoonse nzyatuchitila.—Lk. 6:45.

10. Kuba muntu uulumba kwakamugwasya biyeni umwi muchizi kuti alisimye? (Langa chifanikisyo.)

¹⁰ Kuba bantu balumba kulakonzya kutugwasya kuti tulisimye kubuyumu-yumu. Atulange-lange zyakachitikila Kyung-sook zilembedwe muNgaziyakulinda yamuJanuary 15 2015. Muchizi ooyu wakajatwa kkensa yamapunga. Wakaamba kuti: “Bulwazi oobu bwakandimana manguzu. Ndakamvwa mbuli kuti buumi bwangu bwagola, eezi zyakapa kuti ndiyoowe loko.” Niinzi chakagwasya muchizi ooyu kuti alisimye? Wakaamba kuti buzuba abuzuba mansiku katanaya kukulala, wakali kunjila mung’anda mpawo akusaanguna  kukomba kalikwaambwiida aajulu kalumba Jehova atala azintu zibotu zili 5 zyamubuzuba oobo. Eezi zyakali kupa kuti atakataazikani loko pe alubo zyakali kupa kuti amuyande loko Jehova. Muchizi ooyu wakabona Jehova mbalangania bakombi bakwe basyomeka chiindi nibali muzyiimo ziyumu. Alubo wakabona kuti masunko ngituswaana taakwe mbaabede pe kuti twaayezyanisya aazintu zyiingi loko zibotu nzitulaazyo. Mbuli muchizi Kyung-sook, andiswe tuli aatwaambo twiingi loko ntutukonzya kulumba Jehova nikuba katuli mubuyumu-yumu. Kulumba Jehova munkombyo zyesu kutugwasya kuti tulisimye akuti tukkale katuli aamaboneno aalikabotu.

11. Nkamboonzi basikwiiya baJesu nibakali kuyandikana kuti babe aachibindi Jesu naakabweeda kujulu?

¹¹ Kumbila Jehova kuti akupe chibindi mukukambawuka. Kali waba aafwiifwi kuti abweede kujulu, Jesu wakayeezya basikwiiya bakwe kuti bakeelede kupa bukamboni atala anguwe “muJerusalema, muJudiya yoonse amuSamariya, kusikila kundawu zili kule loko zyanyika.” (Mil. 1:8; Lk. 24:46-48) Muchiindi chifwiifwi chakatobela, beendelezi bachiJuda bakasunga mwaapostoli Petro aJohane mpawo bakabatola kuNkuta Mpati yamaJuda, bakabalayilila kuti baleke kukambawuka alubo bakali kubayoosezya. (Mil. 4:18, 21) Petro aJohane bakachitaanzi?

12. Kweendelana a Milimu 4:29, 31, niinzi nzibakachita baapostoli?

¹² Nibakali kusandula kuyoosezya kwabeendelezi bachikombelo chachiJuda, Petro aJohane bakaamba kuti: “Kuti kamubonaanga zilikabotu mumeso aaLeza kuswiilila ndinywe kwiinda kuti tuswiilile Leza, zyasyaalila kulindinywe. Pesi iswe tatukooleka pe kwaambuula atala azintu nzitwakabona anzitwakamvwa.” (Mil. 4:19, 20) Chiindi Petro aJohane nibakaangununwa, basikwiiya bakakomba kuli Jehova kabamubuzya kuti bayanda kuchita kuyanda kwakwe. Bakakomba kabati: “Gwasya babelesi bako kuti bayinkilile kunembo kwaamba jwi lyako kakutakwe nchibayoowa pe.” Jehova wakayisandula nkombyo eeyo.—Bala Milimu 4:29, 31.

13. Twiiyaanzi kuli Jin-hyuk?

¹³ Tweelede kutobelezya chikozyano chabasikwiiya kuti balupati-pati bamfulumende batukasya kuti tukambawuke. Atubone chikozyano chaJin-hyuk, mukwesu ooyu wakalisungidwe akaambo kakutatola lubazu muli zyanyika. Naakali mujele, mulimu wakwe wakali wakulangania bamwi basungwa bakali muzitookesi pesi taakali kuzumizigwa pe kuti aambuule aabo zintu ziteendelani aamulimu ngwaakapedwe kuswaanizya azyaBbayibbili. Mukwesu ooyu wakakombela kuti abe aachibindi akuti ayanduule mweenya wakubuzya bamwi kasimpe munzila yabupampu. (Mil. 5:29) Mukwesu ooyu wakati: “Jehova wakazisandula nkombyo zyangu kwiinda mukundipa chibindi abusongo bwakuti ndisaangune kuchitisya zyiiyo zyaBbayibbili zyiingi kwamamineti aali 5 kabali muzitookesi zyabo. Mansiku ndakalemba magwalo ngindakali kuyanda kupa bamwi mbindakasungidwaabo mubuzuba bwakatobela.” Andiswe tulakonzya kukombela kuti tube aachibindi abusongo katuli aachoonzyo chakuti Jehova ulatugwasya kuti tuzwidilile mumulimu wesu wakukambawuka mbuli mbaakachita Jin-hyuk.

14. Niinzi chikonzya kutugwasya kuti tulisimye kubuyumu-yumu mbutuswaana? (Intembauzyo 37:3, 5)

¹⁴ Kumbila Jehova kuti akugwasye kuti ulisimye kumapenzi. Biingi besu tulikuswaana buyumu-yumu, kufwidwa, kutamvwanana  mumpuli, kupenzegwa naakuti amwi mapenzi. Malwazi aali mbuli kkorona ankondo zilikupa kuti zintu zyiindilile kuyuma. Atumubuzye Jehova zyoonse zili aansi aamyoyo yesu. Mubuzye atala achiimo chako kukugama mbuli mbuwayinoobuzya mweenzinyokwe. Weelede kuba aachoonzyo chakuti Jehova “ulakugwasya.”—Bala Intembauzyo 37:3, 5.

15. Kukomba kutugwasya biyeni kuti ‘tulisimye mumapenzi’? Wamba chikozyano.

¹⁵ Kukakatila kukukomba kutugwasya kuti ‘tulisimye mumapenzi.’ (Rom. 12:12) Jehova ulizi kuti bakombi bakwe balikuswaana zyiimo ziyumu nkinkaako, “ulamvwa nobakwiilila lugwasyo.” (Int. 145:18, 19) Umwi muchizi payona uutegwa Kristie uuli aaminyaka iili 29 ulaasyoma majwi aaya. Mukulaba kwaliso, wakasaanguna kuchiswa bulwazi bubi loko. Eezi zyakapa kuti abe aapenzi lyakukataazikana mumizeezo. Mukuya kwachiindi, wakazoomvwa kuti banyina bakajatwa aabulwazi butasilikiki akuti bulwazi oobo bwakali kuyanda kubajaya. Kristie wakati: “Ndakakomba kuli Jehova kazizwa aansi aamoyo kandikumbila kuti andipe manguzu aakulisimya abuzuba. Ndakeezya kukkala kandichita zintu zyabukombi ziswaanizya kunjila miswaangano akubala Bbayibbili kandili aandilikke.” Wakayungizya kuti: “Kukomba kwakandigwasya kuti ndilisimye muchiindi eechi chiyumu. Ndakalizi kuti Jehova wakali aandime, kuziba makani aaya kwakali kunduumbulizya. Nikuba kuti bulwazi bwangu teebwakafwambaana pe kumana, pesi Jehova wakazisandula nkombyo zyangu kwiinda mukundipa luumuno lwamumizeezo akuti ndikkalikane mumoyo.” Tatweelede kuluba pe kuti Jehova “ulikuzi kubavuna kuzwa mumasunko bantu balipedelede kulinguwe.”—2 Pet. 2:9.

16. Nkamboonzi nikuyandikana kuti tugwasigwe aaJehova kuti tuzunde masunko?

¹⁶ Kumbila Jehova kuti akugwasye kuti uzunde  masunko. Mbukunga tatumaninide pe, chibi nchitulaacho chipa kuti tuyande kuchita zintu zitali kabotu. Saatani ulikubeleka changuzu kuti penzi eeli lituzunde. Imwi nzila njayezyaayo kuti atuche nkwiinda mukubelesya zyakulikondelezya zitali kabotu. Zyakulikondelezya eezi zilakonzya kupa kuti tube aamizeezo mibi. Alubo mizeezo eeyo mibi ipa kuti tube aabuntu bubi akupa kuti tuchite chibi chipati.—Mk. 7:21-23; Jak. 1:14, 15.

17. Kujana twatondeezya biyeni kuti tulikuchita kweendelana anzitwakombela kuti tutanjili musunko? (Langa chifanikisyo.)

¹⁷ Tweelede kugwasigwa aaJehova kuti tukonzye kuzunda penzi eeli lyakuyanda kuchita chibi. Jesu wakazyaamba eezi munkombyo yakwe yaMwaami, wakati: “Utatunjizyi mumasunko pe, pesi utuvune kumubi.” (Mt. 6:13) Jehova uyanda kutugwasya pesi tweelede kumukumbila kuti atugwasye. Alubo tweelede kuchita kweendelana ankombyo zyesu. Tweelede kubweza ntaamu kuti tutantamuke masena aapa kuti tube aamizeezo iitali kabotu azintu zibi zichitwa aabantu bachita zibi. (Int. 97:10) Tweelede kusanina mizeezo yesu azintu zilikabotu kwiinda mukubala Bbayibbili. Kunjila miswaangano akutola lubazu mukukambawuka kutugwasya kuti tukkale katuli aamizeezo iisalala. Alubo Jehova utusyomezya kuti takatulekeli pe kuti tusunkwe zyiinda manguzu eesu.—1 Kor. 10:12, 13.

18. Kunkani yankombyo, niinzi nzitweelede kuchita toonse?

¹⁸ Toonse tweelede kukkala katukombela kuti tukkale katusyomeka kuli Jehova muchiindi eechino chikataazya chakumamanino. Bikka aambali chiindi chakuti kukomba abuzuba. Jehova uyanda kuti ‘tumwaambile zyoonse zili mumyoyo’ yesu. (Int. 62:8) Lumbayizya Jehova alubo umulumbe akaambo kazintu nzyakuchitila. Mukumbile kuti akugwasye kuti ube aachibindi mumulimu wakukambawuka. Mukombelezye kuti akugwasye kuti ulisimye chiindi nwaaswaana aapenzi alubo uzunde chiindi nwaaswaanana aalimwi sunko. Utazumizyi chimwi chintu naakuti muntu kuti akukachizye kuti ukombe kuli Jehova. Pesi Jehova uzisandula biyeni nkombyo zyesu? Mubuzyo ooyu uuyandikana loko tuzoowusandula muchiiyo chitobela.