1. Bbayibbili lilupandulula biyeni luyando lwachoonzyo?

 “MABANGABANGA [aaluyando] mabangabanga aamulilo uuvwilima, inzya mabangabanga aa Ja. Maanzi manji taakonzyi kuluzima luyando pe, noiba milonga taikonzyi kulutola.” b (Lwi. 8:6, 7) Majwi aaya apandulula luyando lwachoonzyo mbulubede. Alubo apa kuti bakwetene babe aachoonzyo chakuti balakonzya kutondeezyania luyando lwachoonzyo.

2. Niinzi nzibeelede kuchita bakwetene kuti luyando lwabo lutatontoli?

² Ziyanda kubeleka changuzu kuti bakwetene bakkale kabatondeezyania luyando lwachoonzyo kufumbwa kabachipona. Muchikozyano, kuti mulilo wiinkilile kunembo kuyaka uyanda kusoselwa. Kuti teewasoselwa, ulakonzya kuzima. Kuti mwaalumi amwanakazi bakkale kabatondeezyania luyando, beelede kumvwanana loko. Chimwi chiindi bakwetene balakonzya kulimvwa kuti luyando lwabo luyabutontola mbuli chiindi nibaba aapenzi lyakubula mali, kuchiswa amapenzi aajanika mukukomezya bana. Kuti kuli mulukwatano, niinzi nzukonzya kuchita kuti “mabangabanga aa Ja” akkale kaayaka mulukwatano lwanu? Muchiiyo eechi, tulalanga-langa nzila zitatu zikonzya kumugwasya kuti musimye lukwatano lwanu akuti mukkale kamubotelwa. c

3. Kuba aabweenzinyina busimide aJehova kubagwasya biyeni bali mulukwatano kuti luyando lwabo lusime? (Mukambausi 4:12) (Langa chifanikisyo.)

³ Kuti “mabangabanga aa Ja” ayinkilile kunembo kaayaka, mwaalumi amwanakazi bali mulukwatano beelede kusimya  bweenzinyina aJehova. Bagwasigwa biyeni kuti bachita oobo? Kuti bantu bakwetene basimya bweenzinyina aTaateesu wakujulu akubelesya malayilile aakwe, balakonzya kutantamuka akuzunda mapenzi aakonzya kupa kuti luyando lwabo lutontole. (Bala Mukambausi 4:12.) Aabo bali aabweenzinyina busimide aJehova, baleezya kumutobelezya alubo babeleka changuzu kuti batondeezye buntu mbwalaabo mbuli kuba aaluzyalo, moyo mulamfu akulekelela. (Ef. 4:32–5:1) Kuti mwaalumi amwanakazi bali mulukwatano batondeezya buntu oobu, nkuuba kuti luyando lwabo luyungizye kusima. Muchizi uutegwa Lena, waba aaminyaka yiinda ku25 kali mulukwatano wakaamba kuti: “Nkuuba kuyanda muntu uusimide mubukombi akumuleka.”

4. Nkamboonzi Jehova naakasala Josefa aMariya kuti bazoobe bazyali baMesiya?

⁴ Atulange chikozyano chamuBbayibbili. Jehova naakasala mwaalumi amwanakazi kuti bazoobe bazyali baMesiya, wakasala Josefa aMariya aakati kazyalani lyoonse lyaDavida. Nkamboonzi? Boonse kabali babili bakali aabweenzinyina busimide aJehova alubo Jehova wakalizi kuti Josefa aMariya bakali kuzoomubikka mubusena bwakusaanguna mubuumi bwabo. Nibakwetene, mwiiyaanzi kuchikozyano chaJosefa aMariya?

5. Niinzi nzibakonzya kwiiya baalumi kuzwa kuli Josefa?

⁵ Josefa wakabelesya malayilile aaJehova, eezi zyakapa kuti abe mutwe wampuli uulikabotu. Kwaziindi zitatu, Josefa wakatambula malayilile aakazwa kuli Leza aakali atala ampuli yakwe. Aazyiindi zyoonse eezi wakali kufwambaana kubelesya malayilile aayo nikuba kuti zimwi ziindi kwakali kumuyumina kuchita oobo. (Mt 1:20, 24; 2:13-15, 19-21) Kwiinda mukugwasigwa aaJehova, Josefa wakakwabilila Mariya akumulangania. Kweelede kuti nzyaakali kuchita Josefa zyakapa kuti Mariya amuyande loko mulumaakwe akuti amulemeke. Nibaalumi, mulakonzya kutobelezya Josefa kwiinda mukubelesya malayilile aali muBbayibbili aali atala ambumukonzya kulangania mpuli zyanu. d Kuti mwatobelezya malayilile aaya, ngamulikutondeezya kuti mulabayanda banakazi banu akuti muyanda kusimya lukwatano lwanu. Umwi muchizi wakuVanuatu uuli mulukwatano kwaminyaka yiinda ku20 wakaamba kuti: “Chiindi mulumaangu natobelezya akuswiilila malayilile aazwa kuli Jehova, ndimulemeka loko. Ndilimvwa kandikwabililidwe alubo ngandili aachoonzyo chakuti usala zintu zilikabotu.”

6. Niinzi banakazi nzibakonzya kwiiya kuzwa kuli Mariya?

⁶ Mariya wakali aabweenzinyina busimide aJehova alubo wakabeleka changuzu kuti akkale kasimya lusyomo lwakwe. Wakalaazi kabotu Magwalo. (Lk. 1:46) Alubo wakali  kuba aachoonzyo chakuti wajana chiindi chakuyeeyesesya. (Lk. 2:19, 51) Kusima mubukombi kwakapa kuti Mariya abe mwanakazi uulikabotu. Mazubaano, banakazi biingi balikutobelezya zyakachitwa aaMariya. Muchikozyano, umwi muchizi uutegwa Emiko wakaamba kuti: “Kanditanakwatwa, ndakali aazintu nzindakali kuchita zyamubukombi kandili aandikke. Chiindi nindakazookwatwa, ndakazoobona kuti mbukunga mulumaangu nguwe wakali kukomba akuzulwida mubukombi, lusyomo lwangu lwakayaama aalinguwe. Ndakazoobona kuti ndakeelede kusimya bweenzuma aJehova kutali kulindila kugwasigwa aamulumaangu. Lino ndakasala chiindi chakukomba, kubala Magwalo akuyeeyesesya kandili aandikke.” (Gal. 6:5) Nibanakazi, kuti mwayinkilila kunembo kusimya bweenzinyokwe aJehova, balumi banu banoomulumbayizya alubo banoomuyanda.—Tus. 31:30.     

7. Niinzi nzibakonzya kwiiya bakwetene kuzwa kuli Mariya aJosefa atala akuchita zintu zyabukombi kabalaamwi?

⁷ Josefa aMariya bakali kubelekelaamwi kuti basimye bweenzinyina aJehova. Bakali kukubona kakuyandikana kukomba Jehova kabali mpuli. (Lk. 2:22-24, 41; 4:16) Kulakonzeka kuti kwakali kubayumina kuchita oobo ikapati mpuli yabo niyakali kuya bukomena. Nikuba oobo, bakazwidilila. Eechi nchikozyano chibotu loko mazubaano. Mbuli Josefa aMariya, kuti kamuli aabana amwi nga kwamuyumina kunjila miswaangano akuchita kukomba kwampuli. Amwi kulamuyumina kujana chiindi chakuyanduulisisya muBbayibbili akukomba kamulaamwi. Pesi amuyeeye kuti kukomba Jehova kamulaamwi kupa kuti moonse muswene aafwiifwi anguwe alubo kupa kuti muyandane loko kamuli babili. Nkinkaako, kukomba Jehova amukubikke mubusena bwakusaanguna.

8. Niinzi nzibakonzya kuchita bakwetene bali aabuyumu-yumu mulukwatano lwabo kuti bagwasigwe aakukomba kwampuli?

⁸ Niinzi zikonzya kuchitika kuti mulukwatano lwanu kamuli buyumu-yumu? Kuchita kukomba kwampuli kamulaamwi kulakonzya kutamunoneezya. Kuti kakuli boobo, mulakonzya kusaanguna kwiiya nkani mfwiifwi iipa kuti mubotelwe moonse alubo njimuzuminana moonse. Kubweza ntaamu eeyi kulakonzya kusimya lukwatano lwanu alubo mulaba aachiyandisyo chakuchita zintu zyamubukombi kamulaamwi.

9. Nkamboonzi bakwetene nibeelede kujana chiindi chakubaamwi?

⁹ Nibakwetene, mulakonzya kusimya lukwatano lwanu kwiinda mukujana chiindi chakubaamwi. Kuchita oobo kumugwasya kuti mukkale kamuzi nzyayeeya ambalimvwa ngumukwetenaawe. (Matl. 2:24) Amumvwe nzyaakabona Lilia aRuslan nibakachizwa aakukwatana minyaka iili 15 yayinda. Lilia wakaamba kuti: “Twakabona kuti teetwakachilikwe chiindi chakubaamwi pe mbuli mbutwakali kuyeeyela. Chiindi chesu chakali kumanina kumilimu, kuchita milimu yaang’anda akulangania bana mbitwakazoobaabo. Twakabona kuti, kutajana chiindi chakubaamwi, kwakali kupa kuti tutayandani.”

10. Bakwetene kujana baabelesya biyeni malayilile aajanika muli Ba-efeso 5:15, 16?

¹⁰ Niinzi nzibeelede kuchita bakwetene kuti babe aachoonzyo chakuti bajana chiindi chakubaamwi? Mulakonzya kupulana chiindi chakuti mubaamwi. (Bala Ba-efeso 5:15, 16.) Umwi mukwesu wakuNigeria uutegwa Uzondu wakaamba kuti: “Chiindi nindipulana milimu yangu, ngandabikkilizya chiindi chakubaamwi amwanakazi wangu alubo ngandachibelesya chiindi eecho kweendelana ambundapulana.  Ndichibona kachiyandikana loko chiindi chakubaamwi amwanakazi wangu.” (Flp. 1:10) Atulange chikozyano chamwanakazi wamulangizi wabbazu wakuMoldova uutegwa Anastasia. Muchizi ooyu uchibelesya kabotu chiindi chakwe. Wakaamba kuti: “Ndileezya kubelesya chiindi changu kuchita zimwi mulumaangu najisikini amilimu yakwe. Kuchita oobo kupa kuti toonse tujane chiindi chakubaamwi nitwamana milimu yesu.” Pesi niinzi nzimukonzya kuchita kuti pulogilamu yanu kayitamuzumizyi kuti mujane chiindi chakubaamwi?

11. Njiili milimu njibakali kubeleka kabalaamwi Akkwila aPulisila?

¹¹ Bakwetene balakonzya kwiiya kuzwa kuchikozyano cha-Akkwila aPulisila. Akkwila aPulisila bakali chikozyano chibotu loko kumaKkristu biingi bakusaanguna. (Rom. 16:3, 4) Nikuba kuti Bbayibbili talyaambi zyiingi atala alukwatano lwabo pesi lyaamba kuti bakali kubelekaamwi, kukambawukaamwi akugwasya bamwi kabalaamwi. (Mil. 18:2, 3, 24-26) Chiindi Bbayibbili nilyaamba atala a-Akkwila aPulisila, libaamba kabalaamwi.

12. Njiili milimu njibakonzya kuchita bakwetene kuti bajane chiindi chakubaamwi? (Langa chifanikisyo.)

¹² Bakwetene ngabalachitobelezya biyeni chikozyano cha-Akkwila aPulisila? Mulakonzya kuyeeya zintu nzimukonzya kuchita kamuli babili. Mulakonzya na kuchita milimu eeyi kamulaamwi kutali kuzichita kuli awulikke? Muchikozyano, Akkwila aPulisila bakali kuchita mulimu wakukambawuka kabalaamwi. Mulazichita na eezi chiindi choonse? Akkwila aPulisila bakali kubelekaamwi. Kulakonzeka kuti mubeleka milimu iisiyene, pesi mulakonzya na kuchita milimu yaang’anda kamulaamwi? (Muk. 4:9) Chiindi nimugwasyania kuchita uumwi mulimu, nga mwalimvwa kuti mulikubeleka kamuli timu alubo nga mwajana chiindi chakwaambuuzyania. Robert aLinda bali mulukwatano kwaminyaka yiinda ku50. Robert wakaamba kuti: “Kwaamba choonzyo, tatukwe chiindi chakuchita milimu yakulikondelezya katulaamwi. Chiindi nindisanzya ndido naakuti ndisakwida aanze, mwanakazi wangu ulasika kuti andigwasye, ngandabotelwa loko. Kuchita milimu eeyi katulaamwi kupa kuti tumvwanane loko alubo luyando lwesu lulayungizya kusima.”

13. Niinzi nzyayelede kuchita mwaalumi amwanakazi bakwetene kuti bajatane chachoonzyo?

¹³ Mutalubi kuti kujana chiindi chakubaamwi kupela takwaambi kuti mwaalumi amwanakazi bakwetene nga balijisini. Umwi mwanakazi wakuBrazil wakaamba kuti: “Mazubaano, mbukunga kuli zintu zyiingi zituchelezya, tulakonzya kuba aamuzeezo wakuti kukkalaamwi amuntu ngutukwetenaawe nkujana chiindi chakubaamwi kale. Ndakayiya kuti tweelede kuchita zyiingi kutali kuba aachiindi chakubaamwi luzutu. Zimwi nzindakabona nzindeelede kuchita nkumupa chiindi chikkwene chakumuswiilizya  mulumaangu chiindi naambuula.” Amubone Bruno aTays mbubachita kuti bajane chiindi chakwaambuuzyania kabalaamwi. Bruno wakaamba kuti: “Chiindi nitulikulyookezya, ngatwaabikka kule mafooni eesu alubo nga twabotelwa kujana chiindi chakubaamwi.”

14. Niinzi nzibakonzya kuchita bantu bakwetene kuti kabatabotelwi chiindi nibalaamwi?

¹⁴ Niinzi nzukonzya kuchita kuti kutabotelwi chiindi nimulaamwi angukwetenaawe? Amwi muyanda zintu zisiyene naakuti kuli zintu nzyachita zikubbowa. Muzyiimo zili boobu, niinzi nzweelede kuchita? Yeeya chikozyano chamulilo nchitwayiya kumasaangunino aachiiyo. Nuuchisaanguna kuyaka mulilo, tusaanguni kawuli mupati pe. Pesi uyanda kusoselwa alubo nuuyabuyaka nga uyanda kubikkwa nkuni mpati. Munzila iikozyenie, mulakonzya kusaanguna kulibikkila chiindi chiche chakubaamwi buzuba abuzuba. Alubo amusaangune kuchita zintu nzimuyandisya moonse kutali kuchita zintu zipa kuti munyemezyanie. (Jak. 3:18) Kusaanguna kuchita zintu ziniini kulakonzya kupa kuti luyando lwanu lukomene.

15. Nkamboonzi kulemekana nikuyandikana kuti bakwetene bakkale kabayandana?

¹⁵ Kulemekana kulayandikana mulukwatano. Kuli mbuli moya ngutuyoya uutegwa oxygen uupa kuti mulilo uyake loko. Kuti kakutakwe moya ooyu, mulilo ulazima chakufwambaana. Munzila iikozyenie, kuti bantu bakwetene kabatalemekani, luyando lwabo lulakonzya kutontola chakufwambaana. Pesi kuti babeleka changuzu kuti balemekane, luyando lwabo lunoosimide. Mutalubi kuti, nkani iiliwo teeyakuti ubonaanga ulamuleka muntu ngukwetenaawe, pesi njakuti muntu ngukwetenaawe ulimvwa kuti ulamulemeka na. Penny a-Aret baba aaminyaka yiinda ku25 kabakwetene. Muchizi Penny wakaamba kuti: “Ime amulumaangu tulabotelwa alubo tulayandana akaambo kakuti tulalemekana. Toonse tulimvwa katwaangunukide kwaamba mbutulimvwa akaambo kakuti maboneno eesu toonse twaabona kaayandikana.” Niinzi nzukonzya kuchita kuti upe kuti muntu ngukwetenaawe abone kuti ulamulemeka? Atubone chikozyano cha-Abbrahamu aSara.

16. Baalumi bayiyaanzi kuzwa kuchikozyano cha-Abbrahamu? (1 Petro 3:7) (Langa chifanikisyo.)

¹⁶ Abbrahamu wakali kumulemeka Sara. Wakali kwaabona kaayandikana maboneno aaSara ambaakali kulimvwa. Aali chimwi chiindi, Sara wakalikataazikene, wakabuzya Abbrahamu kuti wakali munyemenede alubo wakamupa mulandu. Abbrahamu wakanyema na akumusandula aamajwi mabi? Peepe. Wakalizi kuti Sara wakali kulibikka aansi aakwe akuti wakali kumugwasilizya muzintu nzyaakali kusala. Abbrahamu wakamuswiilila Sara alubo wakeezya kubambulula nkani yakali kumukataazya. (Matl. 16:5, 6) Twiiyaanzi? Nibaalumi, mupedwe manguzu aakusala zyakuchita  mumpuli. (1 Kor. 11:3) Nikuba oobo, chintu chiyandikana nchimweelede kuchita nkutondeezya kuti mulaalemeka maboneno aabanakazi banu kamutanasala zyakuchita ikapati kuti nzimusala kazibajatikizya. (1 Kor. 13:4, 5) Aali chimwi chiindi banakazi banu balakonzya kulimvwa kabakataazikene alubo nga bayanda kumubuzya mbubalimvwa. Mulaalemeka na maboneno aabo kwiinda mukubaswiilila? (Bala 1 Petro 3:7.) Angela aDmitry baba aaminyaka iisika ku30 kabakwetene. Angela wakaamba mbalimvwa atala anzila njamulemekaayo mulumaakwe, wakati: “Chiindi choonse Dmitry ulandiswiilila, nindibboyikene anindilimvwa kandiyanda kwaambuula.” Unditondeezya moyo mulamfu nikuba aachiindi nindaambuula munzila iitali kabotu.”

17. Banakazi bayiyaanzi kuzwa kuchikozyano chaSara? (1 Petro 3:5, 6)

¹⁷ Sara wakali kumulemeka Abbrahamu kwiinda mukuzuminana aazintu nzyaakali kusala. (Matl. 12:5) Aali chimwi chiindi, Abbrahamu wakasala kutambula beenzu mbaakatali kulangilila pe. Wakakumbila Sara kuti asiye zintu nzyaakali kuchita mpawo apange zinkwa zyiingi. (Matl. 18:6) Sara wakachijaana-chijaana mpawo wakachita zintu nzyaakakumbilwa kuti achite amulumaakwe. Nibanakazi, mulakonzya kutobelezya Sara kwiinda mukuzuminana aazintu nzibasala balumi banu. Kuti mwachita oobo, nga mulikusimya lukwatano lwanu. (Bala 1 Petro 3:5, 6.) Dmitry waambwa mufuka lyayinda wakaamba nzyachita mwanakazi wakwe kuti abone kuti ulamulemeka. Wakati: “Ndizilumba loko zintu nzyachita Angela zitondeezya kuti uzuminana anzindisala nikuba chiindi maboneno eesu naatayendelani pe. Kuti zintu nzitwasala teezyazwidilila tandisoli pe.” Nkuuba kuyanda muntu uukulemeka.

18. Bantu bakwetene bagwasigwa biyeni kuti babeleka changuzu kuti luyando lwabo lukkale kalusimide?

¹⁸ Mazubaano, Saatani uyanda kumaninsya luyando luli aakati kabantu bakwetene bachiKkristu. Ulizi kuti, kuti luyando lwabo lwamana balakonzya kusaanguna kuleka kukomba Jehova. Nikuba boobo, luyando lwachoonzyo talumani pe. Nkinkaako, luyando lwanu alube mbuli oolo lwakaambwa muLwiimbo lwaSolomoni. Amukanze kubikka Jehova mubusena bwakusaanguna, mujane chiindi chakubaamwi alubo mulemeke muntu ngumukwetenaawe akubona maboneno aakwe kaayandikana loko. Chiindi nimuchita oobo, muyoopa kuti Kasensa kaluyando lwachoonzyo, Jehova, alemekwe alubo mbuli mulilo uukkala kawusoselwa, luyando lwanu lulayinkilila kunembo kusima kufumbwa kamuchipona.