CHIIYO 21
Jehova Mbasandula Nkombyo Zyesu
“Tulizi kuti tuzoozijana zintu nzitukumbila, mbukunga twazikumbila kulinguwe.”—1 JOH. 5:15.
LWIIMBO 41 Komvwa Mupailo Wangu
ZITAYIIGWE a
1-2. Njiili mibuzyo njitukonzya kubaayo atala ankombyo zyesu?
KULI nwaakali walibuzya na kuti Jehova ulazisandula na nkombyo zyako? Kuti kakuli boobo, tuli aawulikke pe. Bakwesu abachizi biingi balibuzya mubuzyo ooyu chiindi nibaswaana buyumu-yumu. Andiswe kuti twanjila mumapenzi kulakonzya kutuyumina kubona Jehova mbasandula nkombyo zyesu.
2 Atulange-lange kuti nkamboonzi nitukonzya kubaachoonzyo chakuti Jehova ulazisandula nkombyo zyabakombi bakwe. (1 Joh. 5:15) Alubo tulalanga-langa mibuzyo iitobela: Nkamboonzi nikubonekaanga Jehova tazisanduli pe nkombyo zyesu? Njiili nzila Jehova njabelesya kuti asandule nkombyo zyesu mazubaano?
JEHOVA ULAKONZYA KUSANDULA NKOMBYO ZYESU MUNZILA NJITUTAYEEYELI PE
3. Nkamboonzi Jehova nayanda kuti tukombe kulinguwe?
3 Magwalo atondeezya kuti Jehova ulatuyanda akuti utubona katuyandikana. (Hag. 2:7; 1 Joh. 4:10) Nzizyo zipa kuti atubuzye kuti tukombe kulinguwe katukumbila kuti atugwasye. (1 Pet. 5:6, 7) Uyanda kuti tukkale katuli aabweenzuma busimide anguwe akuti tulisimye kubuyumu-yumu mbutuswaana.
Jehova wakasandula nkombyo zyakwe kwiinda mukumufutula kuzwa kuli basinkondonyina (Langa fuka 4)
4. Niinzi chipa kuti tube aachoonzyo chakuti Jehova ulazisandula nkombyo zyabakombi bakwe? (Langa chifanikisyo.)
4 MuBbayibbili, muli nkani zyiingi loko zitondeezya Jehova mbaakasandula nkombyo zyabakombi bakwe. Nchiichili chikozyano nchukonzya kuyeeya? Ulakonzya kuti wayeeya atala aDavida. Davida wakaswaanana aabasinkondonyina mubuumi bwakwe boonse alubo wakali kukkala kakomba kuli Jehova kuti amugwasye. Chimwi chiindi wakakomba kuli Jehova kalikumukombelezya kati: “O Jehova, komvwa mupailo wangu; koswiilila nendikukombelezya kuti undigwasye. Kondivwiila mukusyomeka kwako amubululami bwako.” (Int. 143:1) Jehova wakasandula nkombyo zyaDavida nkaambo wakamufutula. (1 Sam. 19:10, 18-20; 2 Sam. 5:17-25) Eezi zyakapa kuti Davida awambe majwi aaya aakuti: “Jehova ulaafwaafwi abaabo boonse bamwiita.” Andiswe tulakonzya kwaamba majwi aaya.—Int. 145:18.
Jehova wakasandula nkombyo zyaPawulu kwiinda mukumupa manguzu aakuti alisimye (Langa fuka 5)
5. Bakombi baJehova bachiindi bakali kusandulwa nkombyo zyabo munzila njibakali kulangilila na chiindi choonse? Wamba chikozyano. (Langa chifanikisyo.)
5 Jehova ulakonzya kutasandula nkombyo zyesu munzila njitulangilila. Nzizyo nzyaakachita kumwaapostoli Pawulu. Wakakumbila Leza kuti agwisye “muumvwa munyama” yakwe. Kwaziindi zitatu, Pawulu wakakomba kakumbila Jehova kuti amaninsye penzi ndyaakalaalyo. Jehova wakamusandula na Pawulu? Iiyi pesi munzila iisiyene anzyaakali kulangilila. Jehova taakaligwisya pe penzi lyaPawulu pesi wakamupa manguzu aakuti alisimye akuti azumanane kumubelekela chakusyomeka.—2 Kor. 12:7-10.
6. Nkamboonzi chimwi chiindi nikubonekaanga Jehova tazisanduli pe nkombyo zyesu?
6 Andiswe nkombyo zyesu zilakonzya kusandulwa munzila njitutayeeyeli. Tulakonzya kuba aachoonzyo chakuti Jehova uyizi kabotu nzila njatabelesye kuti atugwasye. Ulakonzya “kuchita zintu zyiingi loko kwiinda zintu zyoonse nzitukumbila naakuti nzituyeeyela.” (Ef. 3:20) Akaambo kazeezi, Jehova ulakonzya kusandula nkombyo zyesu aachiindi naakuti munzila njitutayeeyeli pe.
7. Nkamboonzi nikuyandikana kuti tuchinche zintu nzitukombela? Wamba chikozyano.
7 Tulakonzya kuchincha nkombyo zyesu kuti zyeendelane aakuyanda kwaJehova kuti twabona kuti nzitwali kukombela tazyeendelani pe akuyanda kwakwe. Atubone chikozyano chaMartin Poetzinger. Kachizwa aakuchada Mukwesu Poetzinger wakasungwa akubikkwa kukkeempu yaNazi. Kumasaangunino, mukwesu ooyu wakakumbila Jehova kuti azwe mukkeempu kuchitila kuti akalanganie mwanakazaakwe akuti akakambawuke lubo. Nikwakayinda mviki zibili, wakabona kuti taakwe pe Jehova naakamugwasya kuti azwe mukkeempu. Wakasaanguna kukomba kaamba kuti: “Jehova nditondeezye nzuyanda kuti ndichite.” Wakasaanguna kuyeeyesesya atala anzibakali kuswaana bamwi bakwesu mukkeempu. Bakwesu biingi bakalikataazikene atala akuti bakasiya banakazi babo abana babo. Mukwesu Poetzinger wakakomba kuli Jehova kati: “Jehova ndalumba akundipa mulimu ooyu mupya. Ndigwasye kuti ndisimye bakwesu akubasungwaazya.” Wakakkala mumakkeempu kwaminyaka iili 9 kalikusimya akusungwaazya bakombinyina.
8. Niinzi nzitweelede kubikkila maanu chiindi nitukomba?
8 Tweelede kukkala katuyeeya kuti Jehova kuli zintu nzyakanzide kuzoochita alubo uzoozichita aachiindi chakwe cheelede. Zintu eezyo nzyakanzide kuchita ziswaanizya kumaninsya mapenzi woonse ngituswaana aali mbuli mapenzi aalichitikila, kuchiswa alufu. Jehova uzoomaninsya mapenzi aaya kabelesya Bwaami bwakwe. (Dan. 2:44; Chi. 21:3, 4) Nichitanasika chiindi eecho chakuti azuzikizye nzyaakatusyomezya, Jehova uzumizizye Saatani kuti ayendelezye nyika eeyi. b (Joh. 12:31; Chi. 12:9) Kuti Jehova wamaninsya mapenzi lino kulabonekaanga bweendelezi bwaSaatani bwazwidilila mukupa kuti bantu bakkale kabotu. Nikuba kuti Jehova uchipede Saatani mweenya wakweendelezya eezi tazyaambi kuti watulekelezya pe. Atubone zimwi nzila zitondeezya Jehova mbatugwasya.
JEHOVA MBASANDULA NKOMBYO ZYESU MAZUBAANO
9. Jehova utugwasya biyeni chiindi nituyanda kusala chimwi chintu? Wamba chikozyano.
9 Utupa busongo. Jehova utusyomezya kutupa busongo chiindi nituyanda kusala zintu zilikabotu. Tuyanda busongo buzwa kuli Leza, kapati chiindi nituyanda kusala zintu zijatikizya buumi bwesu boonse, mbuli kusala kukwata naakuti kusala kutakwata. (Jak. 1:5) Atulange-lange zyakachitikila umwi muchizi uutakwetwe uutegwa Maria. c Wakali kubotelwa kabelekela Jehova kali payona wachiindi choonse chiindi naakaswaanana aawumwi mukwesu. Wakaamba kuti: “Twakali twamvwanana loko zyakuti twakajinka katuyanda kuti tuyandane. Ndakabona kuti ndakeelede kusala. Ndakakomba kwachiindi chilamfu kuli Jehova atala ankani eeyi. Ndakali kuyanda kuti Jehova andigwasye alubo ndakalizi kuti Jehova tandisalili zyakuchita pe.” Muchizi Maria wakabona Jehova mbaakasandula nkombyo zyakwe kwiinda mukumupa busongo. Wakazichita biyeni? Naakayanduulisisya mumabbuku eesu, wakajana zyiiyo zyakamugwasya munkani yakwe. Alubo wakaabikka mumoyo makani ngibakamubuzya banyina. Makani aayo akamugwasya Maria kuti ayeeyesesye atala ambaakali kulimvwa. Kumamanino, Maria wakazoosala munzila yabusongo.
Jehova utupa biyeni manguzu aakuti tulisimye? (Langa fuka 10)
10. Kweendelana alugwalo lwa Bafilipi 4:13, niinzi Jehova nzyachita kuti agwasye bakombi bakwe? Wamba chikozyano. (Langa chifanikisyo.)
10 Jehova utupa manguzu aakuti tulisimye. Mbuli mbaakagwasya mwaapostoli Pawulu, Jehova utupa manguzu aakuti tulisimye chiindi nituli mumapenzi. (Bala Bafilipi 4:13.) Atulange-lange Jehova mbaakagwasya umwi mukwesu uutegwa Benjamin kuti akonzye kulisimya muchiimo chiyumu. Kuzwa kachili muniini, Benjamin abamumpuli yakwe bakali kukkala kukkeempu yabantu bakachija kunyika zyabo mu-Africa. Benjamin wakaamba kuti: “Ndakali kukkala kandikomba kuli Jehova kandimukumbila kuti andipe manguzu aakuti ndichite zintu zimubotezya. Jehova wakasandula nkombyo zyangu kwiinda mukundipa luumuno lwamumizeezo achibindi chakuti ndiinkilile kunembo kandikambawuka. Alubo wakandipa mabbuku eesu aakandigwasya kuti ndikkale kandisimide mubukombi.” Wakayungizya kuti: “Kubala atala azyakachitikila bamwi Bakamboni akubona Jehova mbaakabagwasya kwakapa kuti ndilisimye akuti ndikanze kukkala kandisyomeka kuli Jehova.”
Kuli nwaakalibonena na awulikke Jehova kalikukugwasya kabelesya bakombima? (Langa fuka 11-12) d
11-12. Jehova ubabelesya biyeni bakombima kuti asandule nkombyo zyesu? (Langa chifanikisyo.)
11 Jehova ubelesya bakombima. Mubusiku Jesu katanafwa, wakakomba kazizwa aansi aamoyo. Wakakombelezya Jehova kuti bantu batamuboni mbuli kuti usampawula zina lyaJehova. Jehova wakatuma ngilozi yakwe kuti izoosimye Jesu. (Lk. 22:42, 43) Jehova ulakonzya kubelesya bakombima kuti batusungwaazye kwiinda mukutufoonena naakuti kutuswaya. Toonse tweelede kuyanduula mweenya wakuti twaambe “jwi libotu” kubakombima.—Tus. 12:25.
12 Atulange-lange chikozyano chawumwi muchizi uutegwa Miriam. Kakuli kwayinda mviki ziche mulumaakwe kali wafwa, wakali kulendelelwa aang’anda, wakali kumvwa kasweekede alubo kakataazikene. Wakali kulibbizya kalila luzutu alubo wakali kuyanda kubuzya umwi mbaakali kulimvwa. Wakaamba kuti: “Teendakalikwe manguzu pe aakufoonena muntu, nkinkaako, ndakali kukomba kuli Jehova. Nindakali kulila ooku kandili kukomba, fooni yangu yakaring’a. Muntu wakali kufoona wakali mwaalu.” Miriam wakawumbulizigwa aamwaalu ooyu amwanakazaakwe. Wakaba aachoonzyo chakuti Jehova nguwe wakapa kuti mwaalu ooyo amufoonene.
Jehova ubabelesya biyeni bantu kuti batugwasye? (Langa fuka 13-14)
13. Wamba chikozyano chitondeezya kuti Jehova ulakonzya kubelesya bantu batamukombi chiindi nasandula nkombyo zyesu.
13 Jehova ubelesya bantu batamukombi. (Tus. 21:1) Chimwi chiindi, Jehova usandula nkombyo zyabakombi bakwe kwiinda mukubelesya bantu batamukombi pe. Muchikozyano, wakabelesya Mwaami Aritasasita kuti azumizye Nehemiya kuti abweede kuJerusalemu kuti akayiyakulule. (Neh. 2:3-6) Nikuba mazubaano, Jehova ulakonzya kubelesya bantu batamukombi kuti batugwasye chiindi nituyanda kugwasigwa.
14. Zyakachitikila muchizi Soo Hing zitondeezyaanzi? (Langa chifanikisyo.)
14 Umwi muchizi uutegwa Soo Hing wakabona kuti Jehova wakamugwasya kabelesya dokotela wakwe. Mwana aamuchizi ooyo ulaapenzi lyakukataazikana mumizeezo. Chiindi naakabbewuka akulichisa loko, muchizi ooyu amulumaakwe bakasiya milimu yabo kuti balanganie mwanaabo. Eezi zyakapa kuti babe aapenzi lyamali. Soo Hing wakaamba kuti ndakalimvwa kandili ndagolelwa kanditachikonzyi kuchita chimwi chintu akulisimya. Wakakomba kuli Jehova kalikumubuzya zili aansi aamoyo wakwe, kalikukumbila kuti amugwasye. Dokotela wakwe wakayanduula nzila yakuti amugwasye muchizi ooyu ampuli yakwe. Eezi zyakapa kuti mfulumende injilile akubagwasya azimwi kuswaanizya andawu yakukkala. Muchizi Soo Hing, wakaamba kuti: “Twakabona Jehova mbaakatugwasya muchiindi eechi chiyumu. Jehova ‘nguSikumvwa mipailo yesu.’”—Int. 65:2.
ZIYANDA LUSYOMO KUTI TUZUMINE NZILA JEHOVA NJATUSANDULAAYO
15. Niinzi chakagwasya umwi muchizi kuti abone kuti Jehova wakali kuzisandula nkombyo zyakwe?
15 Chimwi chiindi, nkombyo zyesu zilakonzya kutasandulwa munzila njitulangilila. Pesi nsandulo nzitujana zitugwasya kuti tukkale katusyomeka kuli Taateesu wakujulu. Bona Jehova mbasandula nkombyo zyako. Muchizi uutegwa Yoko wakali kubonaanga Jehova taakali kuzisandula pe nkombyo zyakwe. Wakasaanguna kuzilembaansi zintu zyoonse nzyaakali wakumbila kuli Jehova. Chiindi achiindi, wakali kulanga zintu nzyaakali walembaansi kuti abone kuti nziizili zyakasandulwa, chiindi chiingi wakali kubona kuti Jehova wakali kuzisandula nkombyo zyakwe kuswaanizya anzyaakali waluba muchizi ooyu. Kulayandikana kuti andiswe tujane chiindi chakubona Jehova mbalikusandula nkombyo zyesu.—Int. 66:19, 20.
16. Kujana twalutondeezya biyeni lusyomo kunkani yankombyo? (Mahebberu 11:6)
16 Tutondeezya kuti tuli aalusyomo kwiinda mukukomba kuli Jehova akuzumina kuti ulazisandula nkombyo zyesu kazitakwe ndaba kuti watusandula munzila iili biyeni. (Bala Mahebberu 11:6.) Atubone chikozyano chamukwesu Mike amwanakazaakwe Chrissy. Bakali kuyanda kubelekela kuBbeteli. Mike wakaamba kuti: “Twaka-apulayila kwaminyaka myiingi katukomba kuli Jehova kwaziindi zyiingi atala ankani eeyi, pesi taakwe nitwakatambwa pe.” Mike aChrissy bakakkala kabali aachoonzyo chakuti Jehova wakalizi nkwaakali kuyanda kuzoobabelesya mumulimu wakwe. Bakayinkilila kunembo kuchita zyoonse nzibakali kukonzya. Bakabeleka kabali mapayona aachiindi choonse kubusena buyanda basikugwasilizya akugwasilizya mumulimu wamayake aambunga. Lino bali mumulimu wakweendeenda. Mike wakaamba kuti: “Jehova taakasandula nkombyo zyesu munzila njitwakali kuyeeyela pesi wakazisandula munzila mbotu loko njitwatakali kulangilila pe.”
17-18. Kweendelana a Intembauzyo 86:6, 7, tweelede kuba aachoonzyo chanzi?
17 Bala Intembauzyo 86:6, 7. Sintembawuzyo Davida wakali aachoonzyo chakuti Jehova ulazimvwa alubo ulazisandula nkombyo zyakwe. Anduwe ulakonzya kuba aachoonzyo chakuti ulakonzya kuzisandula ankombyo zyako. Zikozyano nzitwalanga-langa zitondeezya kuti Jehova utupa busongo amanguzu ngituyandikana kuti tulisimye. Ulakonzya kubelesya bakombima naakuti bantu batamukombi kuti batugwasye.
18 Nikuba kuti chimwi chiindi Jehova tasanduli nkombyo zyesu munzila njituyeeyela pesi tuli aachoonzyo chakuti ulazisandula. Ulatupa nzituyanda aachiindi cheelede. Nkinkaako, yinkilila kunembo kukomba kuli Jehova kuli aalusyomo lwakuti uyookulangania akuti uyookkutya “cilenge coonse cipona” munyika mpya.—Int. 145:16.
LWIIMBO 46 Twalumba Jehova
a Jehova utusyomezya kuti ulazisandula nkombyo zyesu kuti twachita kweendelana akuyanda kwakwe. Chiindi nituswaana masunko, utusyomezya kuti unootugwasya kuti tukkale katusyomeka. Kwalino, atubone kuti Jehova uzisandula biyeni nkombyo zyesu.
b Kuti ubone kuti nkamboonzi Jehova nazumizizye Saatani kuti ayendelezye nyika, langa chiiyo chitii, “Amubikkile Maano Kumakani Aayandika Kapati” chakapupululwa muNgazi Yamulindizi yamuJune 2017.
c Amwi mazina akachinchwa.
d BUPANDULUZI BWACHIFANIKISYO: Bayina amwanaabo musimbi basika kuchisi chipya kabali bachija kulimbabo. Bakombinyina babatambula alubo babapa nzibayandikana.
