1. Mbuubuli buyumu-yumu mbubalikuswaana biingi?

 KULI zipeekezyo zyamubukombi na nzwaakasala zilikukuyumina kuzuzikizya? b Kuti kakuli boobo, tuli aawulikke pe. Muchikozyano, Philip wakali kuyanda kuti kakombela zintu ziyandikana akuti kakomba kwaziindi zyiingi pesi kwakali kumuyumina kujana chiindi chakukomba. Erika wakakanza kuti kafwambaana kusika kumiswaangano yamulimu wakukambawuka, pesi wakali kunonoka kumiswaangano yoonse. Tomáš wakeezya kuti abale Bbayibbili lyoonse. Wakaamba kuti: “Kubala Bbayibbili teekwakali kundinoneezya pe. Ndakeezya kwaziindi zitatu kuti ndilibale lyoonse pesi ndakali kujinkila mubbuku lyaLevitiko.”

2. Nkamboonzi nituteelede kumana manguzu kuti katuli aachipeekezyo nchitutanazuzikizya?

² Kuti kuli aachipeekezyo nchutanazuzikizya, utalengwaani pe. Nikuba kuzuzikizya zipeekezyo ziniini kuyanda chiindi akubeleka changuzu. Kubeleka changuzu kuti uzuzikizye chipeekezyo chako kutondeezya mbubusimide bweenzinyokwe aJehova akuti uyanda kuchita zintu zipa kuti abotelwe. Jehova ulabotelwa akubeleka changuzu nkuchita. Talangilili kuti uchite zintu nzutakonzyi kuchita pe. (Int. 103:14; Mik. 6:8) Nkinkaako, kanza kuchita zintu zyeendelana aachiimo chako. Kuti wasala chimwi chipeekezyo, niinzi nzukonzya kuchita kuti uchizuzikizye? Atubone zimwi zikonzya kutugwasya.

3. Nkamboonzi chiyandisyo nichiyandikana?

³ Kuba aachiyandisyo kulayandikana kuti uzuzikizye zipeekezyo zyamubukombi. Muntu uuli aachiyandisyo ubeleka changuzu kuti azuzikizye chipeekezyo chakwe. Chiyandisyo chilakonzya kukozyanisigwa aamoya uutonta bwaato kuti bukonzye kusika nkubuya. Kuti moya wayinkilila kunembo kawuliwo, sikweenzya bwaato ulakonzya kusika nkwaya. Kuti moya wayungizya kuba aanguzu, sikweenzya bwaato ulafwambaana kusika. Munzila iikozyenie, kuti twaba aachiyandisyo tulakonzya kuzuzikizya zipeekezyo zyesu. Umwi mukwesu waku-El Salvador uutegwa David wakaamba kuti: “Kuti waba aachiyandisyo ulabeleka changuzu. Alubo tuzumizyi chimwi chintu kuti chikukachizye kuzuzikizya chipeekezyo chako.” Niinzi nchukonzya kuchita kuti ube aachiyandisyo?

4. Niinzi nzitweelede kukombela? (Bafilipi 2:13) (Langa chifanikisyo.)

⁴ Kombela kuba aachiyandisyo. Jehova kabelesya muuya uusalala, ulakonzya kutugwasya kuti tube aachiyandisyo chakuzuzikizya chipeekezyo chesu. (Bala Bafilipi 2:13.) Chimwi chiindi nga twalibikkila chipeekezyo akaambo kakuti tweelede kuchita oobo, kuchita oobo kulikabotu. Pesi kulakonzeka kuti ngatatukwe chiyandisyo pe chakuzuzikizya chipeekezyo eecho. Eezi nzizyo zyakachitika kumuchizi waku-Uganda uutegwa Norina. Wakalibikkila chipeekezyo chakuchitisya chiiyo chaBbayibbili. Nikuba oobo, taakalikwe chiyandisyo pe nkaambo wakali kulimvwa kuti teemuyiisi uulikabotu pe. Niinzi chakamugwasya? Wakaamba kuti: “Buzuba abuzuba ndakali kukumbila Jehova kuti andigwasye kuti ndibe aachiyandisyo chakuchitisya chiiyo chaBbayibbili. Ndakachita kweendelana ankombyo zyangu, ndakabelekela kubambulula nzila njindakali kuyiisyaayo. Nikwakayinda myeezi miche, ndakasaanguna kuba aachiyandisyo. Mumunyaka nguwoyo, ndakaba aazyiiyo zyaBbayibbili zibili.”

5. Tweelede kuyeeyesesya atalaanzi kuti tube aachiyandisyo?

⁵ Yeeyesesya atala anzyaakakuchitila Jehova. (Int. 143:5) Mwaapostoli Pawulu wakayeeyesesya atala aluzyalo lupati ndwaakatondeezegwa aaJehova alubo zyakapa kuti abeleke changuzu mumulimu waJehova. (1 Kor. 1515:9, 10; 1 Tim. 1:12-14) Munzila iikozyenie, kuyeeyesesya atala aJehova nzyaakatuchitila kupa kuti tube aachiyandisyo chakuti tuzuzikizye chipeekezyo chesu. (Int. 116:12) Atumvwe zyakagwasya muchizi wakuHonduras kuti azuzikizye chipeekezyo chakwe chakuba payona wachiindi choonse. Wakaamba kuti: “Ndakayeeyesesya atala ambandiyanda Jehova. Wakandigwasya kuti ndibe aakati kabakombi bakwe. Ulandikwabilila alubo ulaandaba andime. Kuyeeyesesya atala azeezi kwakapa kuti ndimuyande loko akuti ndibe aachiyandisyo chakuzuzikizya chipeekezyo changu.”

6. Niinzi chimwi chikonzya kutugwasya kuti tube aachiyandisyo?

 ⁶ Yeeyesesya atala abubotu bwakuzuzikizya chipeekezyo chako. Atubone zyakagwasya Erika waambwa musule, wakalibikkilide chipeekezyo chakuti kajata chiindi. Muchizi Erika wakaamba kuti: “Ndakali kusweekelwa aazyiingi akaambo kakunonoka kumuswaangano wamulimu wakukambawuka. Pesi kuti ndajata chiindi, ngandajuzya bakwesu abachizi akujana chiindi chakubaamwi ambabo. Alubo kufwambaana kundigwasya kuti ndiswiilile nzibaamba bamwi nzindikonzya kubelesya mumulimu wakukambawuka. Eezi zindigwasya kuti ndibotelwe amulimu wakukambawuka akuti ndibambulule nzila njindiyiisyaayo.” Erika wakabikkila maanu kububotu bwakujata chiindi mpawo wakazoozuzikizya chipeekezyo chakwe. Mbuubuli bubotu mbukonzya kubikkila maanu? Kuti walibikkila chipeekezyo chakubala Bbayibbili naakuti chakukomba, yeeya mbuzikonzya kusimya bweenzinyokwe aJehova. (Int. 145:18, 19) Kuti walibikkila chipeekezyo chakubelekela bumwi buntu bwachiKkristu, bikkila maanu kunzila mbubukonzya kukugwasya kuti umvwanane aabamwi. (Kol. 3:14) Zilembe aansi zintu zyoonse zipa kuti uyande kuzuzikizya chipeekezyo chako. Mpawo chiindi achiindi, langa kuti kuli nchwaakazuzikizya na. Tomáš waambwa kumasaangunino wakati: “Kuti waba aatwaambo tupa kuti uyande kuzuzikizya chimwi chipeekezyo, tubweedi musule pe.”

7. Niinzi chakagwasya Julio amwanakazi wakwe kuti bazuzikizye chipeekezyo chabo?

⁷ Mvwanana aabantu bakusungwaazya kuti uzuzikizye chipeekezyo chako. (Tus. 13:20) Atubone zyakagwasya Julio amwanakazi wakwe kuti bazuzikizye chipeekezyo chabo chakuyungizya mulimu wabo wakukambawuka. Wakaamba kuti: “Twakasala beenzuma bakatugwasya kuti tuzuzikizye chipeekezyo chesu alubo twakali kwaambuuzyania atala achipeekezyo chesu. Biingi bakali bachizuzikizya kale chipeekezyo chikozyenie achesu nkinkaako bakatupa malayilile aagwasya loko. Beenzuma bakali kutubuzya kuti twabaali alubo bakali kutusungwaazya chiindi nitwakali kuyanda kusungwaazigwa.”

8. Niinzi zikonzya kuchitika kuti twabelekela kuzuzikizya chipeekezyo chiindi nituli aachiyandisyo luzutu? (Langa chifanikisyo.)

⁸ Chimwi chiindi ngatwalimvwa katutakwe chiyandisyo pe. Eezi zyaamba kuti nga tatuchikonzyi na kubelekela kuzuzikizya chipeekezyo chesu? Peepe. Muchikozyano, amwi mazuba mulwizi ngakuli moya uutonta bwaato kuti busike nkubuya, pesi amwi mazuba ngatamukwe biya pe. Eezi zyaamba kuti sikweenzya bwaato tachikonzyi na kweenda? Teembuzyaamba pe. Amwi maato abelesya njini alubo amwi abelesya nsoke. Nkinkaako, sikweenzya bwaato ulakonzya kubelesya zintu eezi kuti akasike nkwaya. Chiyandisyo chilakonzya kukozyanisigwa aamoya. Amwi mazuba ngatuli aachiyandisyo chakuzuzikizya chipeekezyo chesu. Pesi  amwi mazuba, tulakonzya kulimvwa katutakwe chiyandisyo chakuchita oobo. Kuti twayanda kuzuzikizya chipeekezyo chesu chiindi nituli aachiyandisyo luzutu, tulakonzya kukachilwa kuchizuzikizya. Pesi mbuli sikweenzya bwaato uyanduula imwi nzila yakuti akasike nkwaya, andiswe chiindi nitutakwe chiyandisyo tulakonzya kuyanduula imwi nzila yakuzuzikizya chipeekezyo chesu. Nikuba kuti kuchita oobo teekuuba pe pesi tulabotelwa kuti twazwidilila kuzuzikizya chipeekezyo chesu. Katutanalanga-langa nzitukonzya kuchita, atubone umwi mubuzyo uukonzya kuba.

9. Nkubisya na kubelekela kuzuzikizya chimwi chipeekezyo nikuba kutakwe chiyandisyo chakuchita oobo? Pandulula.

⁹ Jehova uyanda kuti tumubelekele katubotelwa alubo katuliyandila. (Int. 100:2; 2 Kor. 9:7) Zilachita na kuti tubelekele kuzuzikizya chimwi chipeekezyo chamubukombi chiindi nitutakwe chiyandisyo pe? Atubone chikozyano chamwaapostoli Pawulu. Wakaamba kuti: “Ndilawuwuma mubili wangu akuupa kuti ube muzike.” (1 Kor. 9:25-27) Nikuba kuti chimwi chiindi Pawulu wakali kulimvwa katayandi kuchita zintu zilikabotu pesi wakali kulyaangila biya kuti achite zintu zilikabotu. Jehova wakabotelwa na azintu nzyaakali kuchita Pawulu? Iiyi. Jehova wakamulongezya akaambo kakubeleka changuzu nkwaakali kuchita.—2 Tim. 4:7, 8.

10. Mbuubuli bubotu mbutujana kuti twabelekela kuzuzikizya chimwi chipeekezyo nikuba kuti twalimvwa katutakwe chiyandisyo chakuchichita?

¹⁰ Munzila iikozyenie, Jehova ulabotelwa natubona katubelekela kuzuzikizya chipeekezyo nikuba katutakwe chiyandisyo chakuchita oobo. Chipa kuti Jehova abotelwe nchakuti ngatwachita chintu eecho akaambo kakuti tulamuyanda. Mbukunga Jehova wakamulongezya Pawulu, andiswe ulatulongezya akaambo kakubeleka changuzu. (Int. 126:5) Kubona Jehova mbatugwasya kupa kuti tusaangune kuba aachiyandisyo. Umwi muchizi wakuPoland uutegwa Lucyna wakaamba kuti: “Chimwi chiindi ndilimvwa kanditayandi pe kwiinka mumulimu wakukambawuka ikapati nindikatede. Pesi kuti ndayinka kupela mumulimu wakukambawuka, ngandabotelwa.” Atubone nzitukonzya kuchita kuti twalimvwa katutakwe chiyandisyo.

11. Jehova utugwasya biyeni kuti tukonzye kulinyona?

¹¹ Kombela kuti ulinyone. Chiindi chiingi bbala eeli libelesegwa kaligwisya muzeezo wakuti tulilesye kukuchita zintu zibi. Nikuba boobo, kulinyona kulayandikana kuti katuyanda kuchita zintu zilikabotu ikapati kuti chintu nchituyanda kuchita kachili chiyumu naakuti katutakwe chiyandisyo chakuchichita. Utalubi kuti kulinyona nchipanzi chamuuya uusalala nkinkaako kumbila Jehova kuti akupe muuya uusalala kuti ukugwasye kubelekela buntu oobu buyandikana. (Lk. 11:13; Gal. 5:22, 23) David waambwa kumasaangunino wakapandulula kukomba mbukwakamugwasya. Wakali kuyanda kuti chiindi choonse akkale kachita chiiyo chakwe. Wakaamba kuti: “Ndakakumbila Jehova kuti andigwasye kuba muntu uulinyona. Kwiinda mukugwasigwa aaJehova, ndakasaanguna kuba aapulogilamu yakubala alubo ndakali kwiitobelezya chiindi choonse.”

12. Lugwalo lwa Mukambausi 11:4 lutugwasya biyeni kuti tuzuzikizye zipeekezyo zyesu zyamubukombi?

¹² Utalindili kuti zyiimo zibote. Taakwe pe zyiimo nizizoobota munyika eeyi yeendelezegwa aaSaatani. Kuti twalindila kuti zyiimo zibote, tulakonzya kuzookachilwa kuzuzikizya zipeekezyo zyesu. (Bala Mukambausi 11:4.) Umwi mukwesu uutegwa Daniel wakaamba kuti: “Taakwe zyiimo zilikabotu pe. Tatweelede kulindila kuti zyiimo zibote, pesi tweelede kusaanguna kuchita nzitukanza kuchita kufumbwa muzyiimo mutubede.” Umwi mukwesu waku-Uganda wakaamba kaambo kapa kuti tutabalili kuchita zintu. Wakati: “Chiindi  nitulipeda kuchita zintu nzitukanza nikuba zyiimo kazili ziyumu, Jehova ulatugwasya.”—Malk. 3:10.

13. Mbuubuli bubotu bwakusaanguna kuchita zintu ziniini?

¹³ Saanguna aazintu ziniini. Tulakonzya kubula chiyandisyo chakuzuzikizya chipeekezyo chesu akaambo kakuti ngachibonekaanga nchiyumu. Kuti kulimvwa munzila eeyi, ulakonzya kusaanguna kuchita zintu ziniini. Kuti kuyanda kubelekela kuba aabumwi buntu, ulakonzya kubutondeezya muzintu ziniini nzuchita. Kuti kuyanda kubala Bbayibbili lyoonse, ulakonzya kusaanguna kulibala kwachiindi chifwiifwi. Tomáš waambwa kumasaangunino aachiiyo, kwakali kumuyumina kumanisya Bbayibbili lyoonse mumunyaka. Wakaamba kuti: “Ndakabona kuti ndakali ndasala zintu nzinditakonzyi pe kuchita. Ndakasala kuti ndibale mavesi mache buzuba abuzuba akuyeeyesesya atala angawo. Ndakasaanguna kunoneezegwa aakubala.” Tomáš’ naakasaanguna kunoneezegwa kubala Bbayibbili, wakayungizya chiindi chakulibala. Wakazookonzya kulibala Bbayibbili lyoonse. c

14. Mbuubuli buyumu-yumu mbutukonzya kuswaana?

¹⁴ Nikuba kuti tuli aachiyandisyo alubo katukanzide kuzuzikizya zipeekezyo zyesu, pesi takubuliki zintu zitukachizya kuzizuzikizya. Muchikozyano, “zintu zitalangilwi” zilakonzya kutukachizya kuzuzikizya chipeekezyo chesu. (Muk. 9:11) Tulakonzya kuswaana buyumu-yumu bukonzya kutumana manguzu. (Tus. 24:10) Akaambo kakuti tatumaninide, tulakonzya kuchita zintu zipa kuti tukachilwe kuzuzikizya zipeekezyo zyesu. (Rom. 7:23) Chimwi chiindi ngatwalimvwa katukatede. (Mt. 26:43) Niinzi zikonzya kutugwasya kuti tuzuzikizye zipeekezyo zyesu nikuba kakuli buyumu-yumu butukachizya kuti tuzizuzikizye?

15. Kuti twaswaana chilebyo, zyaamba kuti tatuzoochizuzikizyi na chipeekezyo chesu? (Intembauzyo 145:14)

 ¹⁵ Kuti waswaana zilebyo tazyaambi kuti tuzookonzyi pe kuzuzikizya chipeekezyo chako. Bbayibbili lyaamba kuti tunookkala katuswaana buyumu-yumu. Alubo litondeezya kuti tulakonzya kuchizuzikizya lubo chipeekezyo chesu kuti twagwasigwa aaJehova. (Bala Intembauzyo 145:14.) Mukwesu Philip waambwa kumasaangunino wakaamba kuti: “Kuti ndikonzye kuzwidilila kuchita chimwi chintu, tandilangi kuti ndakachilwa tungane kuchichita. Pesi nga ndalanga kuti ntungane ntundakeezya kuchichita lubo chintu eecho.” David waambwa musule wakaamba kuti: “Zilebyo ndizibona kayili myeenya yakuti nditondeezye mbundimuyanda Jehova.” Kuti wayinkilila kunembo kubelekela kuti uzuzikizye chipeekezyo chako nikuba kakuli kuyumu, nga ulikutondeezya kuti uyanda kubotezya Jehova. Jehova ulabotelwa kuti wabeleka changuzu kuti uzuzikizye chipeekezyo chako.

16. Niinzi nzitukonzya kwiiya kuzwa kuzintu zitukachizya kuzuzikizya zipeekezyo zyesu?

¹⁶ Yiya kuzwa kuzintu zikukachizya kuti uzuzikizye chipeekezyo chako. Yeeya kuti niinzi chapa kuti uswaanane aazintu eezyo mpawo ulibuzye kuti, niinzi nzindeelede kuchita kuti nditazooswaanani aazyo lubo zintu eezyo? (Tus. 27:12) Chimwi chiindi zintu eezyo zikukachizya zitondeezya kuti wakakanza chintu nchutakonzyi pe kuzuzikizya. Kuti kuli muchiimo eecho, chilange-lange lubo chipeekezyo chako ubone kuti ulakonzya na kuchizuzikizya. d Jehova takusoli pe kuti wakachilwa kuzuzikizya chipeekezyo nchwatali kukonzya pe.—2 Kor. 8:12.

17. Nkamboonzi nitweelede kubikkila maanu kuzintu nzitwakazuzikizya kale?

¹⁷ Yeeyesesya atala azintu nzwaakazuzikizya kale. Bbayibbili lyaamba kuti “Leza, teeLeza uutaluleme pe, zyakuti nga ulaluba mulimu wanu.” (Heb. 6:10) Anduwe toyelede kuziluba pe zintu nzwaakachitila Jehova. Yeeyesesya atala azintu nzwaakazuzikizya kale mbuli kubelekela kuti ube aabweenzuma busimide aJehova, kubuzya bamwi atala anguwe akubbabbatizigwa. Mbuli mbwaakabeleka changuzu kuti uzuzikizye zipeekezyo zyako zyamubukombi chiindi, ulakonzya kubeleka changuzu lino kuti uzuzikizye zipeekezyo nzwaakakanza.—Flp. 3:16.

18. Niinzi nzitweelede kuyeeya chiindi nitubelekela kuzuzikizya zipeekezyo zyesu? (Langa chifanikisyo.)

¹⁸ Mbuli sikweenzya bwaato, ulabotelwa kuti wasika nkwaya, anduwe kuti wagwasigwa aJehova ulakonzya kuchizuzikizya chipeekezyo chako. Alubo tutalubi kuti basikweenzya bwaato biingi, balabotelwa nibali mulweendo lwabo. Munzila iikozyenie, chiindi choonse yezya kubona Jehova mbalikukugwasya alubo ulakugwasya kuti ubotelwe chiindi nulikubelekela kuti uzuzikizye chipeekezyo chako. (2 Kor. 4:7) Kuti teewabweeda musule, uzoojana zilongezyo zyiingi.—Gal. 6:9.