1. Nchiichili chiiyo Jehova nchaakayiisya Abbrahamu chuumbulizya?

 MUMINYAKA myiingi yayinda, Leza wakabelesya ngilozi kuti ibuzye Abbrahamu kuti wakali kuyanda kunyonyoona muunzi waSodoma aGomora. Kwakali kumuyumina kuzimvwisisisya eezi Abbrahamu, nikuba kuti wakali aalusyomo lusimide loko muli Leza. Wakabuzya kuti: “Uzoobanyonyoonaamwi na baluleme abasizibi? . . . Mubetesi wanyika yoonse, takoochita chintu chiluleme na?” (Matl. 18:​23-33) Jehova wakatondeezya moyo mulamfu kwiinda mukugwasya mweenzinyina Abbrahamu, kuti ayiye chiiyo chiyandikana loko chakuti: Leza tabanyonyooni pe bantu baluleme. Chiiyo eechi chilatugwasya alubo chilatuumbulizya toonse mazubaano.

2. Niinzi chikonzya kupa kuti tube aachoonzyo chakuti chiindi Jehova nabeteka bantu, uchita zintu ziluleme akuti nga ulaaluzyalo?

² Niinzi chikonzya kupa kuti tube aachoonzyo chakuti chiindi Jehova nabeteka bantu, uchita zintu ziluleme akuti nga ulaaluzyalo? Tulizi kuti “Jehova ubona zili mumoyo.” (1 Sam. 16:7) Nichoonzyo, Jehova wiizi “kabotu myoyo yabantu yoonse.” (1 Bam. 8:39; 1 Mak. 28:9) Kasimpe aaka kalabotezya. Jehova musongo kwiinda ndiswe, nkinkaako, chimwi chiindi tatukonzyi pe kumvwisisisya kuti nkamboonzi naasala kuchita zimwi zintu. Mwaapostoli Pawulu wakazulwidwa kulemba kuti atala aJehova: “Imbeta zyakwe nziyumu kuzimvwisisisya.”—Rom. 11:33.

3-4. Njiili mibuzyo njitukonzya kubaayo alubo tulalanga-langaanzi muchiiyo eechi? (Johane 5:​28, 29)

³ Nikuba oobo, chimwi chiindi tulakonzya kuba aamibuzyo iili mbuli njaakalaayo Abbrahamu. Tulakonzya kulibuzya kuti: ‘Zilachita na kuti bantu Jehova mbaakanyonyoona bazoobusigwe, mbuli aabo mbaakanyonyoona mumuunzi waSodoma aGomora? Zilachita na kuti bamwi babo bazoobusigwe chiindi ‘nikwazoobusigwa bantu . . . bataluleme’?’—Mil. 24:15.

⁴ Atulange-lange nzila njituyimvwisisisyaayo nkani yakubusigwa  kwabantu bafwide. Muchiindi chifwiifwi chayinda, twakachincha nzila njitukumvwisisisyaayo ‘kubusigilwa kubuumi’ ‘akubusigilwa kukubetekwa.’ a (Bala Johane 5:​28, 29.) Kuchincha ooku kwakachitwa kwakapa kuti tuchinche zimwi nkani zyiingi nzitwakali kumvwisisisya chiindi. Tulalanga-langa atala ankani eezi muchiiyo eechi amuchiiyo chitobela. Munkani iili atala anzila yabululami Jehova njabetekaayo, tulasaanguna kubona zintu nzitutazi alubo tuzoobona zintu nzituzi.

ZINTU NZITUTAZI PE

5. Chiindi, twakali kutyeni atala abantu bakanyonyoonwa kuSodoma aGomora?

⁵ Chiindi, mumabbuku eesu kwakali kulangwa-langwa mubuzyo wakuti, niinzi zitazoochitike kubantu Jehova mbabeteka kuti tabaluleme pe. Twakali kwaamba kuti bantu bali mbuli aabo bakanyonyoonwa kuSodoma aGomora tabazoobusigwi pe. Pesi muzike uusyomeka alubo uchenjede naakayanduulisisya akukomba atala ankani eeyi, wakabona kuti taakwe twaambo pe tupa kuti tube aachoonzyo chakuti bantu aabo tabazoobusigwi pe. Nkamboonzi?

6. Nziizili zimwi zikozyano zitondeezya Jehova mbaakabeteka bantu bataluleme alubo niinzi nzitutazi atala abantu aabo?

⁶ MuBbayibbili muli zikozyano zyiingi zitondeezya Jehova mbakabeteka bantu bataluleme. Muchikozyano, Jehova wakanyonyoona bantu boonse aZambangulwe mpawo wakafutula Nowa ampuli yakwe kupela. Alubo wakabelesya ma-Israyeli kuti banyonyoone zisi zili 7 zyabantu bakali kukkala muNyika Yachisyomezyo. Alubo wakabelesya ngilozi iimwi kuti ijeye masooja aaku-Asiriya aali 185 000 mubusiku bumwi. (Matl. 7:23; Dt. 7:​1-3; Is. 37:​36, 37) Muzikozyano zyoonse eezi, Bbayibbili lilaamba na kuti Jehova wakasala kuti bantu boonse aaba bakafwidilaato, tabazoobusigwi pe? Peepe, taakwe mpulyaamba oobo pe. Nkamboonzi nitukonzya kwaamba oobo?

7. Niinzi nzitutazi atala abantu bakanyonyoonwa aaZambangulwe abaabo bakali kukkaka kuKkenani bakanyonyoonwa aama-Israyeli? (Langa chifanikisyo chili aachivumbyo.)

⁷ Muzikozyano zyaambwa mumafuka aayinda, tatuzi pe Jehova mbakabeteka muntu umwi awumwi. Alubo tatuzi pe kuti bantu aabo kabatanafwa, bakali aamweenya na wakuti bayiye atala aJehova akuti basanduke. Bbayibbili nilyaambuula atala achiindi chaZambangulwe, lyaamba kuti Nowa wakali “mukambawusi wabululami.” (2 Pet. 2:5) Pesi, talyaambi pe kuti chiindi Nowa naakali kuyaka bwaato, wakali kweezya kukambawukila muntu woonse na aanyika. Munzila iikozyenie, tatuzi pe kuti basizibi bakali munyika yaKkenani bakali bajana mweenya na wakwiiya atala aJehova akuti bachinche maponeno aabo.

8. Niinzi nzitutazi atala akunyonyoonwa kwabantu bakuSodoma aGomora?

⁸ Kutegwani abantu bakanyonyoonwa aaJehova naakanyonyoona muunzi waSodoma aGomora? Mwaalumi uululeme uutegwa Loti, wakali kukkala aabantu aabo muSodoma. Pesi tulizi na kuti Loti wakabakambawukila boonse? Peepe, tatuzi pe. Bakali basizibi bantu aabo, pesi bakali kukonzya na kusiyanisya chibotu achibi? Kubonekaanga teebakali kukonzya pe. Muchikozyano, yeeya nzilyaamba Bbayibbili atala ankamu yabaalumi bamumuunzi ooyu, bakali kuyanda koona aabeenzu baLoti. Bbayibbili lyaamba kuti nkamu yabantu aaba yakali “kuzwa kumulombe kusika kumudaala.” (Matl. 19:4; 2 Pet. 2:7) Zilachita na kuti twaambe kuti Jehova, Leza siluzyalo, wakasala kuti bantu boonse aaba batazoobusigwi pe? Peepe, tatukonzyi pe kwaamba oobo. Jehova wakabuzya Abbrahamu kuti, nibaba bantu baluleme bali 10 teebakali kujanika pe mumuunzi ooyu. (Matl. 18:32) Nkinkaako, bantu aaba teebakaluleme pe alubo kwakali kabotu kuti Jehova abanyonyoone akaambo kamichito yabo. Pesi zilachita na kuti twaambe kuti aakati kabantu aabo, taakwe pe utazoobusigwe ‘nikwazoobusigwa bantu bafwide . . . bataluleme’? Peepe, tatukonzyi pe kwaamba oobo.

9. Niinzi nzitutazi atala aSolomoni?

 ⁹ Kuli zimwi zikozyano zyamuBbayibbili zyaambuula atala abantu baluleme bakazoochita zintu zitaluleme. Mwaami Solomoni nguumwi wabo. Wakalizi kuti Jehova ulibiyeni alubo wakaliizi nzila njaakeelede kumukombaayo. Jehova wakamulongezya. Mukuya kwachiindi, Solomoni wakazooliswaanizya mukukomba baleza bakubeja, eezi zyakapa kuti Jehova anyeme alubo chisi chama-Israyeli chakanjila mumapenzi kwaminyaka myiingi akaambo kazibi zyaSolomoni. Bbayibbili lyaamba kuti chiindi Solomoni naakafwa, “wakazikkwa kubusena kwakazikkilwa bamausyi,” kuswaanizya abaalumi basyomeka mbuli Mwaami Davida. (1 Bam. 11:​5-9, 43; 2 Bam. 23:13) Nikuba kuti Bbayibbili lyakabelesya majwi aaya, zyaamba kuti majwi aaya nchidindo na chakuti Solomoni uzoobusigwa? Bbayibbili taakwe nzilyaamba pe atala ankani eeyi. Bamwi balakonzya kuyeeya kuti Solomoni uzoobusigwa nkaambo Bbayibbili lyaamba kuti, “ooyo wafwa, waangununwa kuchibi chakwe.” (Rom. 6:7) Nikuba oobo, eezi tazyaambi kuti bantu boonse bakafwa bazoobusigwa. Kuti muntu wafwa tazyaambi kuti oolo kube biyeni weelede kubusigwa. Kubusigwa kwabantu bafwide nchipo chizwa kuli Leza wesu siluyando. Nkinkaako, Jehova uzoopa aabo mbayanda chipo eechi kwiinda mukubabusya kuti bazoojane mweenya wakumubelekela kukabe kutamani. (Job. 14:​13, 14; Joh. 6:44) Solomoni uzoobusigwa na? Jehova nguwe ulaansandulo, iswe tatuzi pe. Pesi nzituzi nzyakuti, Jehova uzoochita zintu ziluleme.

ZINTU NZITUZI

10. Jehova ukubona biyeni kunyonyoona bantu? (Ezekieli 33:11) (Langa chifanikisyo.)

¹⁰ Bala Ezekieli 33:11. Jehova ulatubuzya mbalimvwa atala akubeteka bantu. Mwaapostoli Petro wakalemba majwi aakozyenie amajwi aakalembwa aamupolofita Ezekkiyele aakuti: “Jehova . . . taakwe ngwayanda kuti anyonyoonwe.” (2 Pet. 3:9) Majwi aaya alatuumbulizya. Tulizi kuti Jehova tanyonyooni bantu pe kakutakwe kaambo kalikabotu kapa kuti achite oobo. Ngusiluzyalo alubo utondeezya luzyalo kuti kwakweelela kuchita oobo.

11. Mbaani batazoobusigwi pe alubo tuzizi biyeni?

¹¹ Niinzi nzituzi atala abantu batazoobusigwi pe? Bbayibbili lyaambuula atala zikozyano zyabantu bache loko. b Jesu wakatondeezya kuti Judasi Iskkariyoti tazoobusigwi pe. c (Mk. 14:21) Judasi wakalizi kuti nzyaakali kuchita teezyakali kweendelana pe akuyanda kwaJehova aMwanaakwe. Pesi wakasala kuzichita achaali. d Munzila iikozyenie, Jesu wakaamba kuti bamwi bapati bazikombelo bakali kumukazya bakali kuzoofwa kabatakwe bulangilizi bwakuzoobusigwa. (Mt. 23:33) Alubo mwaapostoli Pawulu wakachenjezya basiluleyo bakatasanduka kuti teebakali kuzoobusigwa pe.—Heb. 6:​4-8; 10:29.

12. Niinzi nzituzi atala aluzyalo lwaJehova? Amba zikozyano.

¹² Nikuba oobo, niinzi nzituzi atala aluzyalo lwaJehova? Mbuli mbutwabona, Jehova uzwide luzyalo alubo “taakwe ngwayanda kuti anyonyoonwe pe.” Wakabatondeezya biyeni luzyalo bamwi bakachita zibi zipati? Mwaami Davida wakachita zibi zipati, wakachita bwaamu akujezya muntu. Pesi, Davida wakasanduka, nkinkaako, Jehova wakamutondeezya luzyalo kwiinda mukumulekelela. (2 Sam. 12:​1-13) Mwaami Manase wakachita zibi zyiingi loko mubuumi bwakwe. Jehova wakamutondeezya luzyalo alubo wakamulekelela akaambo kakuti wakasanduka kuzibi zyakwe. (2 Mak. 33:​9-16) Zikozyano eezi zitondeezya kuti Jehova utondeezya luzyalo kuti kakuli twaambo tupa kuti achite oobo. Uzoobabusya  bantu bali boobu nkaambo bakazibona kuti bakabisya mpawo bakasanduka.

13. (a) Nkamboonzi Jehova naakabafwida luzyalo bantu bakuNiniva? (b) Jesu wakazoowambaanzi atala abantu bakuNiniva?

¹³ Tulizi Jehova mbaakabatondeezya luzyalo bantu bakuNiniva. Leza wakabuzya Jona kuti: “Bubi bwabo ndabubona.” Pesi nibakasanduka kuzibi zyabo, Jehova wakabalekelela. Jehova wakabatondeezya luzyalo kwiinda mbaakachita Jona. Jona wakanyema alubo Leza wakamuyeezya kuti bantu bakuNiniva, ‘teebakazi nikuba kwiindanya cibi acibotu.’ (Jon. 1:​1, 2; 3:10; 4:​9-11) Mukuya kwachiindi, Jesu wakabelesya chikozyano chabo kuti ayiisye atala abululami aluzyalo ndwalaalo Jehova. Jesu wakaamba kuti: “Mubuzuba bwakubetekwa bantu bakuNiniva [aabo bakasanduka] bazoobusigwa.”—Mt. 12:41.

14. Kufutuka kwabantu bakuNiniva batazoobusigwe kuyeeme aali?

¹⁴ Pesi, zyambaanzi kuti, “Mubuzuba bwakubetekwa bantu bakuNiniva bazoobusigwa”? Jesu wakaamba kuti “bazoobusigilwa kukubetekwa” muchiindi chilikunembo. (Joh. 5:29) Wakali kwaamba zintu zyakali kuzoochitika muBweendelezi bwaMinyaka Iili 1 000 njatazooyendelezye aachiindi chakubusigwa kwabantu “baluleme abataluleme.” (Mil. 24:15) Bantu bataluleme “bazoobusigilwa kukubetekwa.” Eezi zyaamba kuti, nibazoobusigwa, Jehova aJesu bazoolanga kuti bantu aabo balaswiilila na akuti balazibelesya na zintu nzibayiya. Kuti muntu wakuNiniva wazoobusigwa mpawo wakaka kukomba Jehova, Jehova takamuzumizyi pe kuti ayinkilile kunembo kapona. (Is. 65:20) Pesi, kuti boonse bazoosala kukomba Jehova kabasyomeka, bayooba aabulangilizi bwakupona kukabe kutamani.—Dan. 12:2.

15. (a) Nkamboonzi nituteelede kwaamba kuti bantu bakanyonyoonwa kuSodoma aGomora tabazoobusigwi pe? (b) Kujana twaamvwisisisya biyeni majwi aali muli Juda 7? (Langa kabbokesi kati, “ Juda Wakali Kwaambaanzi?”)

¹⁵ Chiindi Jesu naakali kwaambuula atala abantu bakuSodoma aGomora wakaamba kuti, “Mubuzuba Bwakubetekwa,” kwakali kuzoobawubila kwiinda bantu bakamukaka akukaka njiisyo zyakwe. (Mt. 10:​14, 15; 11:​23, 24; Lk. 10:12) Jesu wakali kwaambaanzi? Wakabelesya kanonia mulaka na kayanda kutondeezya kuti bantu bakapona muchiindi nchaakapona bakali babi loko kwiinda bantu bakuSodoma aGomora? Tutalubi kuti Jesu naakaamba kuti, “mubuzuba bwakubetekwa bantu bakuNiniva bazoobusigwa,” taakachita maambila mbali pe, wakali kwaamba zintu zyakali kuzoochitika. Pesi, kubonekaanga  zintu nzyakaamba Jesu atala abantu bakuSodoma aGomora zyakali kuzoochitika choonzyo. Nkinkaako, ‘Buzuba Bwakubetekwa’ Jesu mbwakaamba atala abantu bakuSodoma aGomora bulikozyenie abuzuba mbwakaamba atala abantu bakuNiniva. Mbuli bantu bakuNiniva, bantu bakuSodoma aGomora bakali kuchita zintu zibi. Pesi, bantu bakuNiniva bakajana mweenya wakuti basanduke kuzibi zyabo. Mukuyungizya, tulakonzya kuyeeya nzyakaamba Jesu atala ‘akubusigilwa kukubetekwa.’ Wakaamba kuti kuzooswaanizya “aabo bakachita zintu zibi.” (Joh. 5:29) Nkinkaako, kubonekaanga kuli bulangilizi bwakuti bamwi bantu bakuSodoma aGomora bazoobusigwa alubo tulakozya kuzoojana mweenya wakuti tuzoobayiisye atala aJehova aJesu Kkristu.

16. Niinzi nzituzi atala anzila Jehova njatazoosalaayo kuti mbaani mbatabusye? (Jeremiya 17:10)

¹⁶ Bala Jeremiya 17:10. Muvesi eeyi, muli zintu nzituzi zili atala anzila njabetekaayo Jehova. Jehova ukkala ‘kalanga-langa moyo, ulalingula mizeezo yamukati mwini.’ Chiindi nasala kuti ngwani ngwatazoobusye, ‘uzoopa umwi aumwi kweelana anzila zyakwe.’ Kufumbwa nzyatazoosale, Jehova unooli aatwaambo tubotu tupa kuti achite oobo. Nkinkaako, tatweelede kujinsya aakwaamba kuti umwi muntu tazoobusigwi pe, kunze kwakuti katuzi kuti nzizyo nzilyaamba Bbayibbili.

“MUBETESI WANYIKA YOONSE” UZOOCHITA “CHINTU CHILULEME”

17. Niinzi zitazoochitike kubantu bafwide?

¹⁷ Kuzwa chiindi Adamu a-Eva nibakapapila Jehova Leza akuba kubbazu lyaSaatani, mabbiliyoni aabantu alikufwa. ‘Lufu ngusinkondoma’ mupati loko. (1 Kor. 15:26) Niinzi chizoochitika kubantu boonse bakafwa? Batobeli baKkristu bananikidwe bali 144 000 bazoobusigilwa kuti bakapone kujulu kukabe kutamani. (Chi. 14:1) Mpawo bakombi baJehova biingi bakafwa kabamuyanda ‘bazoobusigilwa kububuke . . . bwabaluleme,’ alubo bazoopona kukabe kutamani aanyika kuti bayinkilila kunembo kabaluleme muminyaka iili 1 000 yabweendelezi bwaKkristu amukusunkwa kwamamanino. (Dan. 12:13; Heb. 12:1) Alubo muminyaka iili 1 000, bantu ‘bataluleme’ kuswaanizya abaabo bakatali kukomba Jehova naakuti “bakachita zintu zibi,” bayoopegwa  mweenya wakuti bachinche nzila zyabo akuti babe bakombi baJehova basyomeka. (Lk. 23:​42, 43) Nikuba oobo, bamwi bantu bakali babi loko zyakuti bakali kukanza kupapila Jehova akukazyania aamakanze aakwe, nkinkaako, Jehova wakasala kuti bantu aabo batazoobusigwi pe.—Lk. 12:​4, 5.

18-19. (a) Nkamboonzi nituli aachoonzyo chakuti Jehova uzoobabeteka munzila iiluleme aabo bakafwa? (Isaya 55:​8, 9) (b) Tuzoolanga-langaanzi muchiiyo chitobela?

¹⁸ Kuli twaambo na tupa kuti tusyome kuti chiindi Jehova nabeteka bantu, ubabeteka munzila yabululami? Iiyi mputuli! Mbuli mbaakamvwisisisya Abbrahamu, Jehova ulimaninide, ulaabusongo, ulaaluzyalo alubo “Mubetesi wanyika yoonse.” Jehova wakayiisya Mwanaakwe alubo wakamupa mulimu wakuti abeteke bantu boonse. (Joh. 5:22) Jehova aJesu balizizi zili mumoyo wamuntu umwi awumwi ambalimvwa. (Mt. 9:4) Nkinkaako, chiindi nibabeteka umwi awumwi, bachita oobo munzila iiluleme.

¹⁹ Atukanze kuti tusyome Jehova azintu zyoonse nzyasala kuchita. Twabona kuti mulimu wakubeteka teewesu pe, pesi nguwakwe. (Bala Isaya 55:​8, 9.) Eezi nzizyo zipa kuti tusyome Jehova aMwanaakwe kuti mbabo bali aamulimu wakubeteka. Alubo tulizi kuti Mwaami wesu Jesu uzootobelezya bululami aluzyalo lwaWisi munzila iimaninide. (Is. 11:​3, 4) Pesi, nga tulatyeni atala anzila Jehova aJesu njibatazoobabetekaayo bantu muchiindi chamapenzi mapati? Niinzi nzitutazi? Alubo niinzi nzituzi? Mibuzyo eeyi izoosandulwa muchiiyo chitobela.