1. Njiili nchenjezyo mwaapostolo Pawulu njaakalembela maKristunyina? (Langa chifanikisyo chili kumatalikilo achiiyo.)

MUMUNYAKA wa60 kusika ku61 C.E., mwaapostolo Pawulu wakalembela maKristu bakuKolose lugwalo. Wakababuzya kuti kwakali kuyandikana kuti bamvwisisisye “makani aamuuya.” (Kol. 1:9) Pawulu wakayungizya kuti: “Aya makani ngendaamba ngakuti kutabi muntu naba omwe uukonzya kumweena amajwi aakumuyunga. Amucenjele kuti kutabi muntu naba omwe uumuyunga kukusongwaalasongwaala akukwaamba makani aatawo aazwa kutunsiyansiya twabantu, aazwa kuzilenge zitaanzi zyaansi, aatazwi kuli-Kristo pe.” (Kol. 2:4, 8) Pawulu wakapandulula kuti nkamboonzi muuya ooyu nutali kabotu akuti nkamboonzi bantu biingi nibawutobelezya. Muuya ooyu ulakonzya kupa kuti muntu alisumpule akulibonaanga uli aluzibo kwiinda bamwi. Mulugwalo oolu, wakali kuyanda kugwasya maKristunyina kuti batantamuke muuya ooyu amichito mibi.—Kol. 2:16, 17, 23.

2. Nkamboonzi nituyoolanga-langa zintu zitondeezya muuya wanyika?

² Muuya wanyika ulakonzya kupa kuti tutatobelezyi  malayilile aaJehova akuti lusyomo lwesu lucheye. Muuya wanyika ulivulide mazubaano. Ulakonzya kujanika aaIntaneti, kumulimu naa kuchikolo. Muchiiyo eechi, tuyoolanga-langa zintu zikonzya kutugwasya kuti muuya ooyu utatunyongani. Alubo, tuyoolanga-langa zintu zili musanu zitondeezya muuya wanyika ambutukonzya kuzitantamuka.

3. Ngaali maboneno bamwi bantu ngibali aawo alimwi nkamboonzi?

³ “Ndilakonzya kupona buumi buli kabotu nikuba kanditasyomi kuti Leza mpali.” Muli zimwi nyika, bantu biingi tabasyomi pe kuti Leza mpali alubo tabamukombi pe. Bantu aabo baamba kuti Leza tawope, nkinkaako, bachita ziyandwa amyoyo yabo. (Bala Intembauzyo 10:4.) Bamwi bantu bazulwidwa amuuya wanyika baamba kuti: “Ndilakonzya kuchita zintu zili kabotu nikuba kanditasyomi kuti Leza mpali.”

4. Kujana twamugwasya biyeni muntu utasyomi kuti Mulengi mpali?

⁴ Nchamaanu na kusyoma kuti taakwe Mulengi? Basayensi tabakonzyi kuusandula kabotu mubuzyo ooyu. Pesi kasimpe kali antanganana. Ikuti ng’anda kayiyakwa awumwi muntu, zili antanganana kuti zintu zipona zyakalengwa! Maseelo aali muzintu zipona apa kuti zizyalane pesi ng’anda tayikonzyi pe kuchita oobo. Nkinkaako, maseelo alakonzya kubamba makani apa kuti kuzyalwe chimwi chintu chikozyenie aanchicho. Ngwani wakapanga maseelo aali muzintu zipona? Bbayibbele litii: “Maanda oonse alijisi bakaayaka, pele Leza walo ngowakayaka zintu zyoonse.”—Heb. 3:4.

5. Bantu balakonzya na kupona buumi buli kabotu nikuba kabatasyomi kuti Leza mpali?

⁵ Bantu balakonzya na kupona buumi buli kabotu nikuba kabatasyomi kuti Leza mpali? Bbayibbele lilazumina kuti bantu balakonzya kuchita zintu zili kabotu nikuba kabatasyomi kuti Leza mpali. (Rom. 2:14, 15) Muchikozyano, balakonzya kulemeka bazyali babo akubayanda. Nikuba boobo, bantu batasyomi kuti kuli Mulengi, tabakonzyi kwaatobelezya chakumaninina malayilile aakwe ali atala achibotu achibi. (Is. 33:22) Mazubaano, bantu biingi balakonzya kuzumina kuti kuvula kwabubi kutondeezya kuti bantu beelede kuzulwidwa aLeza. (Bala Jeremiya 10:23.) Nkinkaako, zili antanganana kuti bantu tabakonzyi kupona buumi buli kabotu kuti kabatasyomi kuti Leza mpali akuti kabatatobelezyi malayilile aakwe chakumaninina.—Int. 146:3.

6. Bantu biingi bakubona biyeni kukomba mazubaano?

⁶ “Ulakonzya kubotelwa nikuba kutakombi.” Bantu biingi balawuzumina muzeezo ooyu nkaambo babonaanga kukomba takugwasyi pe. Bamwi bakaleka kukomba Leza nkaambo zikombelo zyiingi ziyiisya kuti basizibi bayoopya mubbibi lyamulilo akuti bantu beelede kugwisya chakkumi alubo ziyiisya atala atwaambo twanyika. Eezi zipa kuti bantu biingi bayeeye kuti balakonzya kubotelwa nikuba kabatakombi. Bantu aaba balakonzya kwaamba kuti, “Ndilizi kuti Leza mpali pesi tandiyandi kuba achikombelo nchindinjila.”

7. Bukombi bwakasimpe bubagwasya biyeni bantu kuti babotelwe?

⁷ Nisimpe na kuti bantu batakombi balakonzya  kubotelwa? Nisimpe kuti muntu utaliswaanizyi achikombelo chakubeja ulakonzya kubotelwa pesi takonzyi kujana kubotelwa kwachoonzyo ikuti katali abweenzinyina buli kabotu aJehova nkaambo Bbayibbele liti ‘nguLeza uukkomene.’ (1 Tim. 1:11, NW) Zintu zichitwa aLeza zilatugwasya. Kugwasya bamwi kupa kubotelwa, nkinkaako chiindi bakombi baLeza nibagwasya bamwi, zibapa kuti babotelwe. (Inc. 20:35, NW) Muchikozyano, bukombi bwakasimpe bulakonzya kupa kuti mpuli zibotelwe. Tuyiisigwa kuti tweelede kulemeka muntu ngutukwetenaawe, kubona kuti lukwatano lulasalala, kutantamuka bwaamu, kuyiisya bana akuti tube aluyando. Eezi zipa kuti maKristu bakasimpe babotelwe mumbungano akuti babe abweenzinyina buli kabotu abazyalwanyina bali munyika yoonse.—Bala Isaya 65:13, 14.

8. Lugwalo lwaMatayo 5:3, lutondeezya kuti niinzi chikonzya kupa kuti bantu babotelwe?

⁸ Uli kabotu na muzeezo wakuti muntu ulakonzya kubotelwa nikuba katakombi Leza? Atulange-lange mubuzyo ooyu, Niinzi chinga chilapa kuti bantu babotelwe? Bamwi balabotelwa amilimu yabo, bamwi balazibotelelwa zisobano alubo bamwi balakubotelelwa kuchita zintu nzibayanda. Bamwi balabotelwa chiindi nibalangania mpuli zyabo naa beenzinyina. Nikuba kuti zintu eezi zilabotezya kuzichita pesi buumi bwesu buli amakanze mabotu kwiinda eezi. Kusiyana abanyama, twakalengwa katuli achiyandisyo chakuziba Mulengi wesu akumukomba. Kuziba Leza akuchita nzyayanda kulakonzya kupa kuti tubotelwe. (Bala Matayo 5:3, NW.) Muchikozyano, bakombi bakasimpe balabotelwa chiindi nibabungana antoomwe kuti bakombe Jehova. (Int. 133:1) Alubo babotelelwa buzyalwanyina bwamunyika yoonse, bapona buumi buli kabotu akuba abulangilizi buli kabotu.

9. (a) Bantu biingi batyeni atala amakani akoonana? (b) Nkamboonzi Bbayibbele nilyaamba kuti bantu batakwetene tabeelede koonana?

⁹ “Nkamboonzi bantu batakwetene nibateelede koonana?” Bantu balakonzya kutubuzya kuti: “Mweelede kubotelwa mubuumi. Nkamboonzi bantu batakwetene nibateelede koonana?” MaKristu tayelede kuchita bwaamu pe. Nkamboonzi? Nkaambo Jwi lyaLeza lyaamba kuti tweelede kutantamuka bwaamu. * (Bala 1 BaTesalonika 4:3-8.) Jehova uleelela kuti atupe milawu nkaambo nguwe wakatulenga. Leza wakabikka mabambe aakuti mwaalumi amwanakazi bakwetene zili mumulawu mbabo luzutu beelede koonana. Leza utupede milawu nkaambo ulatuyanda. Alubo milawu eeyi igwasya ndiswe. Ikuti bantu bakwetene batobelezya milawu eeyi balabotelwa, balalemekana alubo balakwabililwa. Leza tayandi pe kuti tutyole milawu yakwe achaali.—Heb. 13:4.

10. MaKristu beelede kuchitaanzi kuti batantamuke kuchita bwaamu?

¹⁰ Bbayibbele lituyiisya mbutukonzya kutantamuka bwaamu. Kuti tuchite oobo,  tweelede kubikkila maanu kuzintu nzitweebela. Jesu wakati: “Umwi aumwi uulangilila mwanakazi cakumusukama ulimucitide kale bumambi mumoyo wakwe. Nkabela kuti liso lyako lyalulyo lyakulebya, uligwisye, ulisowe.” (Mt. 5:28, 29) Eezi zyaamba kuti muKristu tayelede kweebela ponogilafu naa kuswiilila nyimbo zili amajwi akonzya kupa kuti ayeeye kuchita bwaamu. Mwaapostolo Pawulu wakalembela maKristunyina kuti: “Muleelede kufwidwa zizo zyanu zyaansi. Amuleke bwaamu.” (Kol. 3:5) Alubo, tweelede kubikkila maanu kuzintu nzituyeeya anzitwaambuula.—Ef. 5:3-5.

11. Nkamboonzi nikubonekaanga kuba amulimu uli ajulu kuli kabotu?

¹¹ “Kuba amulimu uli ajulu kupa kuti bantu babotelwe.” Bantu biingi balakonzya kutusungwaazya kuti tuyanduule mulimu uli ajulu. Mulimu ooyo ulakonzya kupa kuti tube ampuwo, bantu batulemeke akuti tube amali nyingi. Eezi zilakonzya kupa kuti maKristu babonaanga kuchita oobo kuli kabotu nkaambo bantu biingi mbubayeeya.

12. Kuba amulimu uli ajulu kupa kuti bantu babotelwe chachoonzyo na?

¹² Kuba amulimu uli ajulu kupa kuti bantu babotelwe chachoonzyo na? Peepe. Yeeya nzyaakachita Saatani. Wakaba achiyandisyo chakweendelezya bamwi akuyanda kuba ampuwo pesi ulinyemede alubo tabotelwi pe. (Mt. 4:8, 9; Ciy. 12:12) Mulimu uli ajulu tukonzyi kupa kuti tubotelwe chachoonzyo ikuti twakozyanisya akubotelwa nkutujana nitugwasya muntu kuti abe abusongo buzwa kuli Leza akuti akajane buumi butamani. Muuya wanyika usungwaazya kuzundaana akuchitilana bbivwe kumilimu. Pesi kuchita oobo takupi kuti bantu babotelwe. Eezi zileendelana azyaambwa aBbayibbele kuti zintu zichitwa abantu ‘tazikkutyi moyo pe.’—Muk. 4:4.

13. (a) Ngaali maboneno ngitweelede kubaawo atala amulimu? (b) Kweendelana alugwalo mwaapostolo Pawulu ndwakalembela maKristu bakuTesalonika, niinzi chakali kumupa kubotelwa kwachoonzyo?

¹³ Teekubi pe kubeleka mulimu ngutubotelelwa nkaambo kutugwasya kuti tujane ziyandikana mubuumi. Pesi tatweelede kubikka mulimu mubusena bwakusaanguna mubuumi bwesu. Jesu wakati: “Taakwe muntu uukonzya kumanina bami bobile  milimo, nkaambo ulasula umwi, ulayanda umwi, na ulakakatila umwi, ulasampaula umwi. Tamukonzyi kubelekela Leza antoomwe alubono.” (Mt. 6:24) Kubikka kukomba Leza mubusena bwakusaanguna mubuumi akuyiisya bamwi zili muBbayibbele kutupa kubotelwa. Mwaapostolo Pawulu wakali kubotelwa akaambo kakubelekela Jehova. Katanayiya kasimpe, wakali amulimu uli ajulu, pesi wakazoojana kubotelwa kwachoonzyo naakasaanguna kuyiisya bantu kasimpe anaakali kubona bantu kabachincha buumi bwabo akaambo kakugwasigwa aBbayibbele. (Bala 1 BaTesalonika 2:13, 19, 20.) Taakwe chimwi chintu chikonzya kutupa kubotelwa kuli boobu!

14. Niinzi chikonzya kupa kuti bantu babonaanga balakonzya kumaninsya mapenzi aali munyika?

¹⁴ “Bantu balakonzya kumaninsya mapenzi.” Bantu biingi mbubayeeya. Nkamboonzi? Nkaambo babonaanga balakonzya kuchita zintu nzibayanda kabatazulwidwi aLeza. Alubo, maboneno aaliboobo, alakonzya kubonekaanga ngachoonzyo nkaambo bamwi bantu baamba kuti nkondo, milandu, malwazi, akufwaba zili kucheya. Amwi makani akapupululwa ati: “Zintu zibi zili kucheya nkaambo bantu balikubeleka changuzu kuti bamaninsye mapenzi aali munyika.” Kweendelana amakani aaya, nichoonzyo na kuti bantu balakonzya kumaninsya  mapenzi aali munyika? Kuti tusandule mubuzyo ooyu, atulange-lange zintu zibi zili kuchitika munyika.

15. Niinzi chitondeezya kuti mapenzi alikuvula munyika?

¹⁵ Nkondo: Nkondo yaNyika Yakusaanguna aYabili, zyakapa kuti bantu bayinda ku60 miliyoni bafwe. Kuzwa niyakamana Nkondo yaNyika Yabili, bantu bakachilwa kumaninsya nkondo. Makani akapupululwa mu2015 akatondeezya kuti mweelwe wabantu bakabula aakukkala akaambo kankondo naa kupenzegwa wakasika kuma65 miliyoni. Alubo mumunyaka wa2015 luzutu, kuyeeyelwa kuti bantu basika ku12, 4 miliyoni bakasweekelwa myuunzi yabo. Milandu: Nikuba kuti kuli amwi masena milandu miche pesi milandu iichitwa abantu kababelesya makkompiyuta, kulwana mumpuli akulwana kuyoosya naa kujayana, zilikwiinkilila kunembo buzuba abuzuba. Kuyungizya waawo, bantu biingi mazubaano tabachisyomeki pe. Bantu bakachilwa kumaninsya milandu. Malwazi: Amwi malwazi alasilikika. Nikuba boobo, makani aakazwa mu2013 akatondeezya kuti bantu basika ku9 miliyoni balikufwa kabatanasisya minyaka iili 60, akaambo kakuchiswa bulwazi bwamoyo, mastrokku, kkensa, abulwazi bwachuka abwa-asima. Kufwaba: BaWorld Bank bakaamba kuti mweelwe wabantu bafwaba muAfrica wakatanta kuzwa ku280 miliyoni kusika ku330 miliyoni, kuzwa mu1990 kusika mu2012.

16. (a) Nkamboonzi Bwaami bwaLeza nibuli mbubo abulikke bukonzya kumaninsya mapenzi aali munyika? (b) Nziizili zisyomezyo zyaambwa mulugwalo lwaIsaya amuNtembawuzyo?

¹⁶ Bazyatwaambo twanyika abalangania zyamali beendelezegwa amuuya wakuliyanda. Eezi zitondeezya kuti tabakonzyi pe kumaninsya nkondo, milandu, malwazi akufwaba pesi Bwaami bwaLeza mbubo abulikke bukonzya kuzimaninsya. Atulange zintu Jehova nzyasyomezya bantu. Nkondo: Bwaami bwaLeza buyoogwisya zintu zipa kuti kube nkondo ziswaanizya kuliyanda, kutasyomeka, kusalulana, bukombi bwakubeja aSaatani. (Int. 46:8, 9) Milandu: Bwaami bwaLeza bulikuyiisya bantu kuti batondeezyanie luyando akuti basyomeke kuli umwi awumwi alubo taakwe mfulumende ilikukonzya kuzichita eezi. (Is. 11:9) Malwazi: Jehova uyoopa kuti bantu bakabe amibili iitakwe malwazi. (Is. 35:5, 6) Kufwaba: Jehova uyookumaninsya kwiinda mukupa bantu chakulya azintu nzibayandika mubukombi, chaamba buumi bulikabotu.—Int. 72:12, 13.

17. Kujana wachita biyeni kuti uzunde muuya wanyika?

¹⁷ Ikuti wabona kuti kuli chimwi chintu chisumpulwa amuuya wanyika chiyanda kunyongania lusyomo lwako, weelede kuyanduulisisya muJwi lyaLeza naa kubuzya umwi muntu uusimide muzintu zyabukombi. Weelede kulibuzya kuti: Nkamboonzi maboneno aaya nabonekaanga alikabotu? Nkamboonzi naatali kabotu? Alubo kujana ndaazunda biyeni? Toonse tulakonzya kugwasigwa amajwi Pawulu ngakalembela maKristu bakuKolose ati: “Amucenjele kuti ibe yabusongo inzila njimweenda abaabo batali basimbungano ba-Kristo, . . . kuti mube abusongo bwakutyaba kabotu kubantu boonse bamubuzya makani.”—Kol. 4:5, 6.