Ulikuyubila Kuli Jehova Na?
“Jehova ulanununa buumi bwabalanda bakwe, boonse bayuba mulinguwe tabakooyoopegwa mulandu.”—INT. 34:22.
NYIMBO: 8, 54
1. Bakombi baJehova basyomeka balimvwa biyeni chiindi nibakachilwa kuchita zintu zibotezya Jehova?
MWAAPOSTOLO Pawulu wakalemba kuti: “Maawe! Ndi muntu uusampaukide ncobeni!” (Rom. 7:24) Mazubaano, bakombi baJehova basyomeka balimvwa mbuli mbaakali kulimvwa Pawulu. Nkamboonzi nibalimvwa oobo? Akaambo kakuti twakakona chibi, chimwi chiindi tulakachilwa kuchita zintu zibotezya Jehova. Nkinkaako, eezi zipa kuti tukataazikane. Bamwi maKristu bakachita zibi zipati babonaanga Jehova takonzyi kubalekelela.
2. (a) Kweendelana alugwalo lwaIntembauzyo 34:22, bakombi baJehova beelede kulimvwa biyeni kuti babisya? (b) Tulayiyaanzi muchiiyo eechi? (Langa kabbokesi katii “ Nzyiiyo Na, naa Kuti Nzikozyano?”)
2 Bbayibbele litondeezya kuti tatweelede kulimvwa katuli amulandu pe akaambo kakuti tuyubila kuli Jehova. (Bala Intembauzyo 34:22.) Kwambaanzi kuyubila kuli Jehova? Niinzi nzitweelede kuchita kuti Jehova atulekelele akutufwida luzyalo? Tulakonzya kujana nsandulo zyamibuzyo eeyi kwiinda mukulanga-langa mabambe aamyuunzi yakuyubila yamuchiindi chamaIsrayeli. Mabambe aaya akali kubeleka chiindi chachizuminano chaMulawu. Nikuba boobo chizuminano eechi chakaleka kubeleka mumunyaka wa33 C.E. Jehova nguwe wakapede maIsrayeli Mulawu ooyu. Kwiinda mukulanga-langa mabambe aamyuunzi yakuyubila, tulakonzya kubona nzila Jehova njabonaayo chibi, basizibi abasikubisya beempwa. Kwalino, atulange-lange kuti nkamboonzi maIsrayeli nibakali aamyuunzi yakuyubila ambuyakali kubeleka.
“AMUBIKE MINZI YAKUCIJILA”
3. Chiindi chamaIsrayeli, muntu wajaya umwi wakeelede kuchitwaanzi?
3 Jehova wakatondeezya kuti ulaandaba akufwa kwamuntu. Ikuti muIsrayeli wajaya muntu, “sikupilusya mulandu wabulowa” naa chibbululu chamuntu wajayigwa wakali kukonzya kumujaya sikujaya. (My. 35:19, NW) Eezi zyakali kwaamba kuti muntu wajaya umwi wakeelede kujayigwa alakwe. Ikuti sikujaya taajayigwa, Nyika yaChisyomezyo yakali kukonzya kusofwaazigwa. Jehova wakalayilila kuti: “Mutasofwaazyi nyika njemukede” kwiinda mukutila bulowa naa kujaya muntu.—My. 35:33, 34.
4. Niinzi chakali kuchitwa kuti muIsrayeli wajaya umwi katayeeyelede?
4 Pesi niinzi chakali kuchitwa kuti muIsrayeli wajaya umwi katayeeyelede? Nikuba kuti wajaya muntu katayeeyelede, pesi wakachili amulandu wakujaya. (Matl. 9:5) Muchiimo chili boobo, sikujaya wakeelede kuchijila kuli umwi wamyuunzi iili 6 yakuyubila. Wakali kukonzya kukwabililwa kuti wachijila kuli umwi wamyuunzi eeyo. Pesi wakeelede kukkala mumuunzi ooyo kusikila mupayizi mupati akafwe.—My. 35:15, 28.
5. Mabambe aamyuunzi yakuyubila atuyisyaanzi atala aJehova?
5 Jehova nguwe wakalayilila kuti kube mabambe aamyuunzi yakuyubila. Wakabuzya Joshuwa kuti: “Ambila bana ba-Israyeli kuti, Amubike minzi yakucijila.” Bbayibbele lyaamba kuti myuunzi eeyo ‘yakasalwa.’ Jehova nguwe wakasalide myuunzi eeyo. (Jos. 20:1, 2, 7, 8) Mabambe aaya, atugwasya biyeni kumvwisisisya kuti Jehova uli aluzyalo? Alubo atuyiisyaanzi atala ambutukonzya kuyubila kuli Jehova?
“AAMBE MAKANI AAKWE MUMATWI AABAPATI BAMUNZI”
6, 7. (a) Baalu bakali kuubeteka biyeni mulandu wamuntu wajaya umwi katayeeyelede? (Langa chifanikisyo chili kumatalikilo achiiyo.) (b) Nkamboonzi nikwakali kugwasya kuti sikubisya aye kubaalu?
6 Ikuti muIsrayeli wajaya muntu katayeeyelede, wakeelede kuchijila kumuunzi wakuyubila mpawo “aambe makani aakwe mumatwi aabapati bamunzi.” Bapati bamuunzi naa baalu bakeelede kumutambula. (Jos. 20:4) Nikwayinda chiindi, bakali kumubweedezya kulimbabo kuti mulandu wakwe ukalangwe-langwe abaalu bankuko. (Bala Myeelwe 35:24, 25.) Ikuti baalu bakulimbabo babona kuti wajaya muntu katayeeyelede, bakali kumubweedezya kumuunzi wakuyubila.
7 Nkamboonzi sikubisya naakeelede kubona baalu? Baalu bakali kugwasya mbungano kuti ikkale kiisalala akuti sikujaya umwi katayeeyelede afwidwe luzyalo aJehova. Umwi sikulanga-langa makani aamuBbayibbele wakati, sikujaya wakali kukonzya kujayigwa kuti taayinka kubaalu, nkaambo unooli waleka achaali kuswiilila mulawu waLeza. Muntu wajaya umwi katayeeyelede wakeelede kuswiilila mulawu ooyu kuchitila kuti azumanane kupona. Ikuti taachijila kumuunzi wakuyubila, wakali kukonzya kujayigwa achibbululu chamuntu ngwajaya.
8, 9. Nkamboonzi muKristu wachita chibi chipati nayelede kukumbila lugwasyo kubaalu?
8 Mazubaano, ikuti muKristu wachita chibi chipati, weelede kuya kubaalu kuchitila kuti bamugwasye kuti abambulule bweenzinyina aJehova. Nkamboonzi nikuyandikana kuchita oobo? Chakusaanguna, Jehova wakasala baalu kuti bagwasye bantu bachita zibi zipati. (Jak. 5:14-16) Chabili, baalu balakonzya kugwasya basikubisya beempwa kuti babweede lubo kuli Jehova akuti batazoyindululi kuchita chibi eecho. (Gal. 6:1; Heb. 12:11) Chatatu, baalu balayiisigwa mbubakonzya kugwasya sikubisya waleka michito mibi kuti alube chibi chakwe akuti atakkali kalipa mulandu. Jehova ubona baalu mbuli “ciyubilo cakucijila ciindi cakuwidwa imvula yamuyoba.” (Is. 32:1, 2) Mabambe aaya atondeezya kuti Leza uli aluzyalo.
9 Bamwi bakombi baLeza bakabona kuti kubuzya baalu akutambula lugwasyo lwabo kulagwasya. Muchikozyano, umwi mukwesu uutegwa Daniel wakachita chibi chipati pesi wakakkala kwachiindi chilamfu katabuzizye baalu. Wakaamba kuti: “Ndakali kubonaanga takuchigwasyi pe kubuzya baalu, nkaambo ndakakkala kwachiindi chilamfu kandisiside chibi changu.” Nikuba boobo, wakali kuyoowa kuti bamwi balakonzya kuziba atala achibi chakwe, eezi zyakali kumupa kuti chiindi choonse naakali kukomba kuli Jehova asaangune akukumbila kuti amulekelele. Pesi wakazookumbila lugwasyo kubaalu. Wakazoowamba kuti: “Ndakali kuyoowa kuti ndilatalikilaali. Pesi nibakandigwasya, ndakalimvwa mbuli kuti bandilemutuzya mukuli wakali kundilemena kwaminyaka myiingi.” Eezi zyakapa kuti Daniel abe abweenzinyina bulikabotu aJehova. Lino mubelesi uubelekela alubo manjezeezya aakwe tachimupi mulandu pe.
‘WEELEDE KUCHIJILA KULUUMWI WAMYUUNZI EEYI’
10. Niinzi chakeelede kuchitwa amuntu wajaya umwi katayeeyelede kuti alekelelwe?
10 Muntu wakajaya umwi katayeeyelede wakeelede kuchijila kuli umwi wamyuunzi yakuyubila chakufwambaana, kuchitila kuti alekelelwe chibi chakwe. (Bala Joshua 20:4.) Wakali kukonzya kukkala mumuunzi wakuyubila kusikila mupayizi mupati akafwe. Teekwakali kuuba pe kuchita oobo. Wakeelede kusiya milimu yakwe, muunzi wakwe nikuba kulichitila zintu nzyayanda. * (My. 35:25) Pesi kuchita oobo kwakali kugwasya sikubisya. Ikuti wazwa mumuunzi wakuyubila, wakali kukonzya kujayigwa nkaambo zinooli zyatondeezya kuti takwe ndaba achibi nchaakachita.
11. Nziizili zintu zyeelede kuchitwa amuKristu waleka kuchita michito mibi kuchitila kuti Leza amulekelele?
11 Nikuba mazubaano, sikubisya waleka kuchita michito mibi, weelede kuchita zimwi zintu kuti Leza amulekelele. Weelede kuleka michito yakwe. Eezi ziswaanizya kutantamuka kufumbwa chintu chikonzya kumupa kuti abisye. Mwaapostolo Pawulu wakapandulula zyakachitwa amaKristu bakuKorinto bakaleka kuchita zibi. Wakalemba kuti: ‘Buusu buzwa kuli Leza mbumwakafwisigwa. Nchobeni bwamuletela busungu, kulisalazya, kunyema, kuyoowa, kuyandisisya, kusungwaala, akululamika zintu zitali kabotu.’ (2 Kor. 7:10, 11) Kutantamuka michito iipa kuti tubisye, kutondeezya kuti tulalisola akaambo kachibi nchitwakachita akuti tatubisyi aachali katuzi kuti Jehova uzootulekelela.
12. Nziizili zintu nzyayelede kutantamuka muKristu waleka kuchita michito mibi kuchitila kuti Leza amufwide luzyalo?
12 Nziizili zintu nzyayelede kutantamuka muKristu waleka michito mibi kuchitila kuti Leza amufwide luzyalo? Weelede kutantamuka kufumbwa zintu zimupa kuti abe amiyeeyo mibi. (Mt. 18:8, 9) Niinzi nzuyelede kuchita kuti beenzinyokwe kabakusungilizya kuchita zintu zitabotezyi Jehova? Ikuti kutakonzyi kulinyona kunkani yakunywa bukande, ulakonzya na kulilesya kuya kumasena akonzya kukusunka kuti unywe zyiindilide? Ikuti kuliikulwana apenzi lyakuyeeya zyakoonana, ulalilesya na kweebela mamuuvi, kunjila mumawebbusayiti naa kuchita zimwi zintu zikonzya kupa kuti ube amiyeeyo iitali kabotu? Tutalubi kuti kuswiilila malayilile aaJehova kulatugwasya. Kulachisa kumvwa kuti Jehova tachituyandi pe. Alubo, taakwe chintu chibotu chiinda kubona ‘luzyalo lwaJehova lutamani.’—Is. 54:7, 8.
“IYOOMUBEDA CICIJILO”
13. Amba zintu zitondeezya kuti muntu wakajaya umwi katayeeyelede wakali kwabililidwe akuti wakalaangunikide chiindi naakali mumuunzi wakuyubila.
13 Muntu wajaya umwi katayeeyelede wakali kukonzya kukwabililwa kuti wiinka kumuunzi wakuyubila. Jehova wakaambide kuti myuunzi eeyo, “iyoomubeda cicijilo.” (Jos. 20:2, 3) Jehova taakali kuyanda kuti muntu ooyo abetekwe lubo akaambo kamulandu nguyooyo. Alubo, muntu wakali kuyanda kubweedezya taakali kuzumizigwa pe kunjila mumuunzi wakuyubila kuti ajaye sikubisya. Jehova wakali kumukwabilila sikubisya kuti wayinka kumuunzi wakuyubila. Taakali mbuli muntu uli muntolongo. Wakali kukonzya kuchita imwi milimu, kugwasya bamwi akukomba Jehova muluumuno. Wakali kupona buumi bulikabotu!
Ulakonzya kuba achoonzyo chakuti Jehova ulakulekelela (Langa fuka 14-16)
14. Niinzi nzyayelede kuyeeya muKristu wakeempwa?
14 Bamwi bakombi baJehova bakachita zibi zipati balipa mulandu nikuba kuti bakeempwa. Bamwi babonaanga Jehova tazoobalekeleli pe. Ikuti kulimvwa oobo, weelede kuyeeya kuti Jehova ulalekelela chakumaninina. Nkinkaako, toyelede kukkala kulipa mulandu. Eezi nzizyo zyakachitika kumukwesu uutegwa Daniel, waambwa mumafuka ayinda. Wakaangunuka chiindi baalu nibakamugwasya kuti abe abweenzinyina buli kabotu aJehova. Wakati: “Lino tandichilipi mulandu pe. Ikuti walekelelwa, unooli walekelelwa choonzyo. Jehova utwaambila kuti uzisowela kule loko zibi zyesu. Toyelede kuziyeeya lubo pe.” Chiindi sikubisya naakali mumuunzi wakuyubila, taakeelede kuyoowa kuti chibbululu chamuntu ngwakajaya chakali kukonzya kumujaya lubo. Alakwe Jehova mbachita, ikuti watulekelela tatweelede kuyeeya kuti limwi zuba uzootuyeezya lubo atala achibi eecho.—Bala Intembauzyo 103:8-12.
15, 16. Kuba alusyomo lwakuti Jesu wakatufwida akuti Mupayizi Mupati kukugwasya biyeni kusyoma kuti Jehova ulakonzya kukulekelela?
15 Mazubaano, kuli zintu zyiingi zitupa kusyoma kuti Jehova ulatulekelela. Pawulu naakazwa kwaamba kuti “ndi muntu uusampaukide” akaambo kakuti wakali kukachilwa kutobela milawu yaLeza chakumaninina, wakayungizya kuti: “Ndilamulumba [Leza] kuli-Jesu Kristo Mwami wesu!” (Rom. 7:25) Nikuba kuti mwaapostolo Pawulu wakachitide chibi chipati, pesi wakeempwa. Nkinkaako, wakali achoonzyo chakuti Jehova wakamulekelela kwiinda muchinunuzyo chaJesu. Andiswe tulakonzya kuba amanjezeezya asalala akuba aluumuno akaambo kachinunuzyo chaJesu. (Heb. 9:13, 14) Mbukunga Jesu Mupayizi wesu Mupati, “uli anguzu zitamani zyakubafutula abo abaswena kuli-Leza kujanza lyakwe, nkaambo lyoonse buyo mpali, ulabakombelezya.” (Heb. 7:24, 25) Mbukunga mupayizi mupati wakali kugwasya kuti maIsrayeli balekelelwe zibi zyabo aJehova, tuli achoonzyo chakuti tulakonzya ‘kutambula lweetelelo akujana luzyalo lutugwasya muchiindi nchotubula,’ nkaambo Jesu Mupayizi wesu Mupati.—Heb. 4:15, 16.
16 Nikuba boobo, kuti tuyubile muli Jehova, tweelede kuba alusyomo muchinunuzyo chaJesu. Utayeeyeli kuti chinunuzyo chigwasya bamwi bantu luzutu. Syoma kuti chilakonzya kukugwasya lwako. (Gal. 2:20, 21) Syoma kuti Jehova ulakonzya kukulekelela zibi zyako kwiinda muchinunuzyo. Syoma kuti chinunuzyo chilakonzya kukugwasya kuti ukajane buumi butamani. Chinunuzyo chaJesu nchipo nchakupede Jehova.
17. Nkamboonzi nitweelede kuyubila kuli Jehova?
17 Mabambe aamyuunzi yakuyubila atugwasya kumvwisisisya kuti Jehova ulalekelela. Mabambe aaya akazwa kuli Leza, atuyiisya kuti buumi bulayandikana. Alubo, atuyiisya nzila baalu mbubakonzya kutugwasya, muntu mbakonzya kutondeezya kuti waleka chachoonzyo kuchita chibi akuti tube achoonzyo chakuti Jehova ulalekelela. Ulikuyubila kuli Jehova na? Jehova ngimayubilo eesu! (Int. 91:1, 2) Muchiiyo chitobela, tuyooyiya myuunzi yakuyubila mbiikonzya kutugwasya kuti tube aluzyalo akuchita chabululami mbuuli mbachita Jehova.
^ par 10 Kweendelana abasikwiiya bachiJuda, zibbululu zyasikubisya zyakali kwiinkaawe kumuunzi wakuyubila kuyookkalaawe.
