1, 2. (a) Mbuubuli bulangilizi mbubali aabo bakombi baLeza? (b) Niinzi chikonzya kutugwasya kuti tukajane bulumbu? (Langa chifanikisyo chili kumatalikilo achiiyo.)

MAKRISTU bananikidwe amuuya uusalala bali abulangilizi bukozyenie abwamwaapostolo Pawulu, nkaambo bayoojana ‘bulumbu bwakujulu mbwabiitila Leza.’ (Flp. 3:14) Bali abulangilizi bwakuyooyendelezya aJesu Kristu muBwaami bwakwe bwakujulu akugwasilizya kuti bantu bakamaninine. (Ciy. 20:6) Nchilongezyo chitaliboteli nchibateelede kwiindwa! Bambelele zimwi bali abulangilizi busiyene abwamaKristu bananikidwe. Balangilila kuyoojana bulumbu bwakuyoopona kukabe kutamani munyika. Nchilongezyo chipati kuba abulangilizi buli boobu.—2 Pet. 3:13.

² Mwaapostolo Pawulu wakasungwaazya bananike kuti: “Amupangike myoyo yanu kuzintu zili kujulu,” kuchitila kuti bakkale kabasyomekede akuti bakajane bulumbu.  (Kol. 3:2) Teebakeelede kuluba mbubwakali kuyandikana bulangilizi bwabo bwakuyoopona kujulu. (Kol. 1:4, 5) Kufumbwa kuti tuli abulangilizi bwakuyoopona kujulu naa aanyika, toonse tulakonzya kuyoojana bulumbu kuti twayeeyesesya atala azisyomezyo Jehova nzyaakatusyomezya.—1 Kor. 9:24.

3. Mwaapostolo Pawulu wakabachenjezya atalaanzi maKristunyina?

³ Alubo mwaapostolo Pawulu wakachenjezya maKristunyina atala azintu zyakali kukonzya kubakachizya kuyoojana bulumbu. Muchikozyano, wakalembela bantu bakumbungano yakuKolose atala abantu bakali kulichitaanga maKristu achoonzyo, bakali kutobelezya Mulawu kutali kuba alusyomo muli Kristu. (Kol. 2:16-18) Zimwi zintu nzyakaamba mwaapostolo Pawulu zilakonzya kutukachizya kuyoojana bulumbu. Wakapandulula mbutukonzya kutantamuka zintu zikonzya kupa kuti tuchite bwaamu, mbutukonzya kubambulula kutamvwanana abakombima naa mumpuli. Lulayo ndwakaamba atala amakani aaya, lulakonzya kutugwasya. Atulange-lange nchenjezyo mwaapostolo Pawulu njaakalembela maKristu bakuKolose.

4. Nkamboonzi miyeeyo iitali kabotu niikonzya kutukachizya kujana bulumbu?

4 Naakazwa kwaambuula atala abulangilizi mbubakali aabo maKristu bakuKolose, mwaapostolo Pawulu wakabasungwaazya kuti: “Nkaambo kaako muleelede kufwidwa zizo zyanu zyaansi. Amuleke bwaamu abusofwaazi amujamuja azisusi zibi akulikumbuzya.” (Kol. 3:5) Miyeeyo mibi ilakonzya kutuzunda akupa kuti tutachiti kabotu mubukombi. Umwi mukwesu wakazundwa amiyeeyo mibi mpawo wakazoosinsimuka akubweeda kumbungano wakati, “Kakole aaka kakandijata changuzu kwachiindi chilamfu zyakuti kwakali kwaba afwiifwi kuti ndinikile.”

5. Kujana twachita biyeni kuti tutantamuke zintu zikonzya kutusunka?

⁵ Ikuti twalijana mubukkale bukonzya kutusunka kuti tusotoke zyeelelo zyaJehova, tweelede kwaanga zisime kuchitila kuti tutabisyi. Muchikozyano, bantu nibayandana beelede kuziba mpubagolela kumakani akujatana-jatana, kumyontana naa kuba aabusena busisikene kabali babili. (Tus. 22:3) MuKristu ulakonzya kusunkwa kuti achite bwaamu chiindi nabelekela kule ankwakkala naa kuti kabeleka amuntu ngwasiyene zizo. (Tus. 2:10-12, 16) Ikuti kuli muchiimo chili boobu, toyelede kulisisa kuti uliKamboni waJehova, tobelezya zyeelelo zyakulilemeka alubo utalubi kuti kuchitaanga ulamuyanda umwi muntu kweeta mapenzi. Eezi zilakonzya kuchitika kuti kakuli zintu zili kutunyongania naa chiindi nitulendeledwe. Chiindi nitulimvwa oobu, zilakonzya kupa kuti tuyande umwi muntu uutumbulizya. Alubo eezi zilakonzya kupa kuti tuzumine kuyandana amuntu ngututazi pe. Ikuti walimvwa munzila eeyo, weelede kukumbila lugwasyo kuli Jehova naa kubakombinyokwe kuchitila kuti ukajane bulumbu.—Bala Intembauzyo 34:18; Tusimpi 13:20.

6. Nkamboonzi nitweelede kubikkila maanu chiindi nitusala zyakulikondelezya?

 ⁶ Ikuti tutantamuke zintu zikonzya kupa kuti tuchite bwaamu, tweelede kukaka zyakulikondelezya zitali kabotu. Zyakulikondelezya ziliwo mazubaano zisungwaazya bube buli mbuli bwabantu bakuSodoma aGomora. (Jud. 7) Basikuuzya biingi babona bwaamu mbuli chintu chili kabotu chitakonzyi kweeta mapenzi. Nkinkaako tweelede kubikkila maanu nzila njitusalaayo zyakulikondelezya. Tweelede kusala zyakulikondelezya ziyoopa kuti tukajane bulumbu bwabuumi butamani.—Tus. 4:23.

7. Mbuubuli buyumu-yumu bukonzya kuba mumbungano yachiKristu?

⁷ Toonse tukubona kakuli chilongezyo kuba akati kambungano yachiKristu. Kubala Jwi lyaLeza akutondeezyania luyando aluzyalo nkutuchita kumiswaangano yachiKristu kutugwasya kuti tukajane bulumbu. Nikuba boobo, chimwi chiindi kulakonzya kuba akutamvwanana akati kambungano. Ikuti twaleka kubambulula kutamvwanana ooku kulakonzya kupa kuti tutalekelelani.—Bala 1 Petro 3:8, 9.

8, 9. (a) Mbuubuli bube bukonzya kutugwasya kuti tukajane bulumbu? (b) Niinzi chikonzya kutugwasya kuti tukkale katujisini kuti umwi muKristu watubisizya?

⁸ Nkamboonzi nituteelede kuzumizya kutalekelela bamwi kuti kutukachizye kuyoojana bulumbu? Pawulu wakasungwaazya maKristu bakuKolose kuti: “Mbuli mbumuli basale ba-Leza, basalala akuyandika, amulisamike moyo waluzyalo, buuya, lulifwiinsyo, lubombo, abusicamba. Amukazikilane myoyo yanu akulekelelana, na umwi ulijisi kaambo kumweenzinyina. Mbuli Mwami mbwaakamulekelela milandu yanu, anywebo amucite mbubonya obo. Nkabela kwiinda zyoonse amube aluyandano, ikuti luyandano ncecaanzyo cabuumi bulondokede.”—Kol. 3:12-14.

⁹ Kutondeezyania luyando aluzyalo kulakonzya kutugwasya kuti tulekelelane. Muchikozyano, ikuti umwi mukwesu naa muchizi watwaambila majwi aatali kabotu, tweelede kuyeeya kuti andiswe chimwi chiindi nga twachita zintu zinyemya bamwi naa kwaambuula majwi aatali kabotu. Tatubotelwi na kuti mukwesu naa muchizi watulekelela? (Bala Mukambausi 7:21, 22.) Alubo, tweelede kulumba luzyalo ndwatondeezya Kristu kwiinda mukugwasya bakombi bakasimpe kuti bakkale kabajisini. (Kol. 3:15) Leza ngutukomba ngumwi, tukambawuka mulumbe uumwi, alubo tuswaana buyumu-yumu bukozyenie. Kulekelela bamwi kutondeezya kuti tuyanda kuti mbungano yachiKristu ikkale kiijisini alubo kuyootugwasya kuti tukajane bulumbu.

10, 11. (a) Nkamboonzi nituteelede kuba abbivwe? (b) Tweelede kuchitaanzi kuti bbivwe litatukachizyi kuyoojana bulumbu?

¹⁰ Zikozyano zili muBbayibbele zitondeezya kuti kuba abbivwe kulakonzya kutukachizya kujana bulumbu. Muchikozyano, Kkayini wakajaya mwanikaakwe Abbelo akaambo kabbivwe. Kkora, Datani aAbbiramu bakapapila Musa nkaambo bakaba abbivwe. Alubo, Mwaami Sawulu naakabona kuzwidilila kwaDavida,  wakaba abbivwe, alubo wakali kuyanda kumujaya. Nkinkaako, Jwi lyaLeza litwaambila kuti: “Nkulibede ibbivwe alukazyanyo, nkukonya oko nkulujanwa lupyopyongano amilimo mibi yoonse.”—Jak. 3:16.

¹¹ Kuba aluyando aluzyalo kulakonzya kutugwasya kuti tutabi abbivwe. Jwi lyaLeza lyaamba kuti: “Luyandisyo lulakazika moyo akufwa luzyalo. Luyandisyo talukwe ibbivwe.” (1 Kor. 13:4) Kuti tutabi abbivwe, tweelede kubona bakwesu abachizi mbuli mbababona Leza, nkaambo ubabona mbuli mubili omwe. Eezi ziyoopa kuti tubayande bamwi mbuli mbulyaamba Bbayibbele kuti: “Kuti cizo cimwi calemekwa, zizonyina zyoonse zilakondwa aco.” (1 Kor. 12:16-18, 26) Tweelede kubotelwa kuti bamwi bajana zilongezyo mumbungano. Atulange-lange nzyaakachita Jonatani, mwana waMwaami Sawulu. Davida nakasalwa kuti abe Mwaami, Jonatani taakaba abbivwe pe. Nikuba boobo, wakamusungwaazya Davida. (1 Sam. 23:16-18) Tweelede kutondeezya bamwi luzyalo aluyando mbuli mbaakachita Jonatani.

12. Ngaali malayilile aazwa muBbayibbele akonzya kugwasya bamumpuli kuti bakajane bulumbu?

¹² Kubelesya malayilile aali muBbayibbele kulakonzya kupa kuti mumpuli mube luumuuno akubotelwa akuti boonse bamumpuli bakajane bulumbu. Mwaapostolo Pawulu wakalembela maKristu bakuKolose majwi agwasya mpuli. Wakati: “Nubanakazi, amulibombye kubalumi banu, mbubonya mbukweelede mu-Mwami. Anywebo nubalumi, amuyandisye banakazi banu, mutanoobagutaiki. Banike amuswiilile bazyali banu mumakani oonse,  nkaambo kucita oobo nkokubotezya Mwami. Anywebo numawisi, mutanoonyenukili bana banu, kuti batanoosululwi.” (Kol. 3:18-21) Nisimpe kuti kubelesya malayilile ngakaamba Pawulu kulakonzya kugwasya baalumi, bakayintu abana.

13. Niinzi nchayelede kuchita mukayintu uukwetwe amuntu uutakombi?

¹³ Niinzi nchayelede kuchita mukayintu uukwetwe amuntu uutakombi alubo utamujati kabotu? Kumubuzya nzyayelede kuchita kulakonzya kupa kuti mulumaakwe achinche na? Nikuba kuti wazichita zyoonse nzyayanda, pesi kujana zyapa kuti azooyiye kasimpe na? Tazikonzeki pe. Pesi kuti walibombya kubusilutwe bwamulumaakwe akubeleka changuzu kuti kube kumvwanana mumpuli, ziyoopa kuti Jehova alemekwe alubo ziyoopa kuti mulumaakwe ayande kukomba Jehova akuti boonse bakajane bulumbu.—Bala 1 Petro 3:1, 2.

14. Niinzi nchayelede kuchita mwaalumi uukwete mukayintu uutakombi alubo utamulemeki?

¹⁴ Niinzi nchayelede kuchita mwaalumi uukwete mukayintu uutakombi alubo utamulemeki? Kumukalalila kulakonzya na kupa kuti amulemeke? Peepe! Nkaambo Leza uyanda kuti mwaalumi abelesye busilutwe munzila iilikabotu, mbuli mbaakali kuchita Jesu. (Ef. 5:23) Jesu weendelezya mbungano chaluyando alubo ulaamoyo mulamfu. (Lk. 9:46-48) Ikuti mukwesu ukwete mukayintu uutakombi watobelezya chikozyano chaJesu, ulakonzya kugwasya mukayintu wakwe kuti akombe Jehova.

15. Kujana mwaalumi watondeezya biyeni kuti ulamuyanda mukayintu wakwe?

¹⁵ Bbayibbele lilayilila baalumi kuti:  “Amuyandisye banakazi banu, mutanoobagutaiki.” (Kol. 3:19) Mwaalumi uyanda mukayintu wakwe ulamuswiilila chiindi naamba nzyayeeya. (1 Pet. 3:7) Nikuba kuti chimwi chiindi tazibelesyi pe zyaambwa amukayintu wakwe pesi weelede kumvwa mbayeeya atala achintu nchayanda kuchita. (Tus. 15:22) Mwaalumi ulaaluyando tamusungilizyi biya pe mukayintu wakwe kuti amulemeke. Ikuti mwaalumi kali aluyando zilakonzya kupa kuti bakombe Jehova kabali mpuli akuti boonse bakajane bulumbu.

16, 17. Kujana wachita biyeni uuchikula kuti wabonaanga bazyali bakwe bamusungide amakole?

¹⁶ Niinzi nzyayelede kuchita uuchikula kuti wabonaanga bazyali bakwe bamusungide amakole? Eezi zilakonzya kupa kuti abonaanga kukomba Jehova takugwasyi pe. Ikuti uuchikula wazumizya muzeezo ooyu kuti ukomene, ziyoopa kuti aleke kukomba Jehova. Alubo bachikula tabeelede kuluba kuti munyika eeyi taakwe muntu ukonzya kubayanda mbuli bazyali babo abantu mbibakombaabo.

¹⁷ Zilachita na kuti muzyali uuyanda mwanaakwe aleke kumulaya? (Heb. 12:8) Amwi nzila bazyali njibalayaayo bana njiyo iinga yapa kuti banyeme. Kulaakuti uuchikula ayeeyesesye mbubamulaya, weelede kubona kuti nkamboonzi nibachita oobo. Utafwaambani kunyema, yezya kutambula lulayo. Jwi lyaLeza litii: “Uukasya majwi aakwe uli aluzibo, uutontozya moyo wakwe musongo.” (Tus. 17:27) Belekela kuba muKristu uusimide muzintu zyabukombi kwiinda mukutambula lulayo kutalangi nzila njilwapegwaayo. (Tus. 1:8) Nchilongezyo chipati kuba abazyali bakomba Jehova. Balakonzya kutugwasya kuti tukajane bulumbu.

18. Nkamboonzi nweelede kubeleka changuzu kuti ukajane bulumbu?

¹⁸ Tweelede kuyeeyesesya atala abulangilizi mbutulaabo, kufumbwa kuti tuli abulangilizi bwakuyoopona kujulu naa aanyika. Bulangilizi oobu buyoozuzikizigwa nkaambo Mulengi wesu nguwe wakatusyomezya. Leza utusyomezya kuti muParadayizi “nyika iyoozula luzibo lwa-Jehova.” (Is. 11:9) Bantu boonse banooli muParadayizi bayooyisigwa aLeza. Tweelede kubeleka changuzu kuti tukajane bulumbu oobu. Kufumbwa kuti tuli abulangilizi bwakuyoopona kujulu naa aanyika, toonse tulakonzya kuyoojana bulumbu kuti twayeeyesesya atala azisyomezyo Jehova nzyaakatusyomezya!