KULASUNGWAAZYA alubo kulawumbulizya kuti umwi muntu wakuchitila chimwi chintu munzila yaluzyalo. Tulabotelwa kuti twabona kuti umwi muntu ulatuyanda. Mbukunga toonse tulakuyanda kutondeezegwa luzyalo, kujana twachita biyeni kuti tutondeezye buntu oobu?

Luzyalo nkuba aandaba abamwi alubo mbuntu butondeezegwa mumajwi aasungwaazya amumichito. Mbukunga luzyalo lutondeezegwa aamichito, nkinkaako, tweelede kuchita zyiingi kuti tulutondeezye. Luzyalo lutondeezegwa kwiinda mukuba aaluyando luzwa aansi aamoyo akuba alweetelelo. Kuyungizya waawo, luzyalo luli boobo muchelo wamuuya uusalala uuzwa kuli Leza, maKristu ngubaambilwa kuti bawutondeezye. (Gal. 5:22, 23) Tweelede kubatondeezya luzyalo bamwi. Nkinkaako atulange-lange nzila Jehova aMwanaakwe mbubatondeezya buntu oobu ambutukonzya kutobelezya zikozyano zyabo.

Jehova ulaaluzyalo alubo ulabayanda bantu boonse kuswaanizya ‘batalumbi ababi.’ (Lk. 6:35) Muchikozyano, Jehova “ulapasuzya izuba lyakwe kubabi akubabotu, ulawisizya boonse imvula yakwe, baluleme abataluleme.” (Mt. 5:45) Nikuba bantu batasyomi kuti Jehova Mulengi wabo, balagwasikana kwiinda muluzyalo lwakwe lwakubapa buumi alubo chimwi chiindi balabotelwa.

Tujana chikozyano chibotu chaluzyalo kuzintu Jehova nzyaakachitila Adamu aEva. Adamu aEva nibakabisya, “bakatalika kusuma matu aamukuyu akulicitila zilivumbilizyo.” Nikuba boobo, Jehova wakalizi kuti bakali kuyandikana zigogo kuti bakonzye kukkala aanze aamuunda waEdeni, aawo nyika mpuyakali yasampawulwa akupa kuti izoomene “mamvwa amitubetube.” Nkinkaako, Jehova wakabafwida luzyalo kwiinda mukubapangila ‘zigogo zilamfu zyazikumba.’​—Matl. 3:7, 17, 18, 21.

Nikuba kuti Jehova ulaaluzyalo “kubabi akubabotu” pesi uyandisya kutondeezya luzyalo lwakwe kubakombi bakwe basyomeka. Muchikozyano, mumazuba aamusinsimi Zekkariya, mungelo wakanyema bantu nibakaleka kuyakulula tempele lyaJerusalemu. Jehova wakakuswiilila kukataazikana kwamungelo ooyo mpawo wakamusandula “amajwi aaluzyalo aakuumbulizya.” (Zek. 1:12, 13) Jehova wakachita mbuboobo akumusinsimi Eliya. Muli chimwi chiindi, Eliya wakakataazikana zyakuti wakakumbila kuti Jehova amujaye. Jehova wakakumvwisisisya mbaakali kulimvwa Eliya mpawo wakatuma mungelo kuti akamusimye. Kuyungizya waawo, Leza wakaambila musinsimi kuti taakali aalikke pe. Eliya naakamvwa majwi aaya aaluzyalo akujana lugwasyo ndwaakali kuyanda, wakazumanana amulimu wakwe. (1 Bam. 19:1-18) Mubakombi baLeza boonse, ngwani wakabutondeezya chakumaninina buntu bwaJehova bwakuba aaluzyalo?

Jesu naakali kuchita mulimu wakwe waanyika, bantu bakamuzi kuti ulaaluzyalo akuti ulaaluyando. Taakali kubakalalila pe nikuba kubasinikizya kuti bachite zimwi zintu. Munzila yakweetelela wakati: “Amuboole kulindime nyoonse nomukatede nomulemenwa, ndime enti kamulemunune. . . . Nkaambo ijokwe lyangu lilibulungusene.” (Mt. 11:28-30) Akaambo kaluzyalo Jesu ndwaakali aalo, bantu bakali kumutobela kufumbwa nkwaakali kuya. Jesu “wakabafwida luzyalo” bantu, wakabasanina, wakaponia bakali kuchiswa abakalemene alubo wakabayiisya “makani manji” atala aWisi.​—Mk. 6:34; Mt. 14:14; 15:32-38.

Jesu wakali kubatondeezya luzyalo lupati bantu nkaambo wakali kumvwisisisya alubo wakali kubajata kabotu. Nikuba kuti chimwi chiindi Jesu wakali kuyanda kulyookezya pesi “wakabatambula” kabotu bantu bakali kumuyanduula. (Lk. 9:10, 11) Muchikozyano, taakamwaambwiida pe mwanakazi wakayoowede alubo wakasofweede kweendelana amulawu, naakajata chigogo chakwe chaajulu kayanda kuponesegwa kubulwazi bwakwe bwakalobola. (Lev. 15:25-28) Jesu wakamufwida luzyalo mwanakazi ooyo wakali waba aaminyaka iili 12 kachiswa. Wakamubuzya kuti: “Mwanaangu, lusyomo lwako lwakufutula, koya, ube aluumuno akupona kubulwazi bwako.” (Mk. 5:25-34) Eechi nchikozyano chibotu loko chakutondeezya luzyalo.

Muzikozyano zilaajulu, twabona kuti luzyalo lwachoonzyo lutondeezegwa kwiinda mumichito. Jesu wakaamba nzikwaamba kutondeezya luzyalo kwiinda mumichito, muchikozyano chamuSamariya. Nikuba kuti maSamariya amaJuda bakali mwiingile amubwa pesi muSamariya wamuchikozyano wakamufwida luzyalo mwaalumi wakabbidwa, kuumwa akusiigwa kali waba aafwiifwi kufwa mumbali aanzila. Luzyalo lwakapa kuti muSamariya achite chimwi chintu. Wakasilika zilonda zyamwaalumi wakawumwa mpawo wakamutola kung’anda yabeenzu. MuSamariya wakabbadala mulangizi wang’anda yabeenzu nkwaakasiide mwaalumi ooyo alubo wakalilibambilide kubbadala mali yoonse yakali kuyandikana.​—Lk. 10:29-37.

Nikuba kuti luzyalo lutondeezegwa kwiinda mumichito pesi lulakonzya kutondeezegwa mumajwi aawumbulizya. Bbayibbele lyaamba kuti: “Buusu bwamumoyo wamuntu bulamulemezya pele ijwi ibbotu lilamusekelezya.” (Tus. 12:25) Kuti katubafwida luzyalo bamwi, tuyoobaambila majwi aabasungwaazya alubo kuchita oobo kuyoopa kuti babotelwe. * Majwi aaluzyalo ngitubaambila ayoopa kuti babone kuti tulabayanda. Kubasungwaazya nkutunooli twachita, kuyoobagwasya kuti bazunde buyumu-yumu mbubaswaana mubuumi.​—Tus. 16:24.

Bantu boonse balakonzya kutondeezya luzyalo nkaambo bakalengwa ‘muchikozyano chaLeza.’ (Matl. 1:27) Muchikozyano, chiindi mupati wabasilumamba muRoma uutegwa Juliyasi wakasindikila mwaapostolo Pawulu naakasungidwe kaya kuRoma. Juliyasi “wakamubamba kabotu Pawulu, wamuzumizya kuswaya beenzinyina kuti akatalukwe” bakali kukkala mumuunzi waSidoni. (Inc. 27:3) Nikwakayinda chiindi, bantu bakuMelita bakabatondeezya ‘luzyalo lwini-lwini’ bantu Pawulu mbaakali aabo mubwaato nibwakafwa. Bamukasuwa aaka, bakabakutwida mulilo wakuyota bantu bakazwa mubwaato. (Inc. 28:1, 2) Nzibakachita zyakali kabotu loko. Andiswe kuti tutondeezye luzyalo, tweelede kuchita zyiingi kutali kulutondeezya kamwi luzutu.

 Kuti tuchite zintu ziyandwa aaLeza, tweelede kuba aaluzyalo akulutondeezya mubuumi bwesu boonse. Jehova utubuzya kuti ‘tulisamike’ luzyalo. (Kol. 3:12) Nisimpe kuti nkuyumu kutondeezya buntu oobu buzwa kuli Leza mubuumi bwesu. Nkamboonzi? Tulakonzya kutabafwida luzyalo bamwi akaambo kakuba abweeme, kupenzegwa naakuti kuliyanda. Nikuba boobo, tulakonzya kubuzunda buyumu-yumu oobu kwiinda mukugwasigwa amuuya uusalala akutobelezya chikozyano chaJehova chakuba aaluzyalo.​—1 Kor. 2:12.

Muuzyiimo zili mutweelede kubelekela kuti tubafwide luzyalo bamwi? Tulakonzya kulibuzya kuti: ‘Ndilaswiilila na amoyo woonse? Ndili aandaba na anzibayanda kugwasigwa bamwi? Ndakachinka lili kumuchitila chaluzyalo muntu uutali wamumpuli yangu naakuti uutali mweenzuma?’ Kulibuzya mibuzyo eeyi, kuyootugwasya kuti tulibikkile zipeekezyo ziswaanizya kubaziba kabotu bantu mbitukkalaabo, kapati bamumbungano yachiKristu. Kuti twachita oobo, tuyooziba zyiimo nzibaswaana anzibayanda kugwasigwa. Alubo tweelede kubachitila chaluzyalo bamwi mbuuli mbutwali kunooyanda kuchitilwa kaansinga ndiswe tuli muchiimo chabo. (Mt. 7:12) Kuzwa waawo, Jehova uyootulongezya kuti tube aaluzyalo kuti twamukumbila kuti atugwasye.​—Lk. 11:13.

Mwaapostolo Pawulu naakali kupandulula zipa kuti asiyane abamwi mbuuli mubelesi waLeza, wakaswaanizya ‘aluzyalo.’ (2 Kor. 6:3-6) Bantu bakali kuyanda kukkala aPawulu nkaambo wakali aandaba ambabo alubo wakatondeezya luzyalo mumajwi amumichito. (Inc. 28:30, 31) Andiswe tulakonzya kukwela bantu kuti baze mukasimpe kwiinda mukubatondeezya luzyalo. Kuti twabatondeezya luzyalo bantu boonse kuswaanizya abatukazya, bayoochincha mizeezo yabo ambubatubona. (Rom. 12:20) Mukuya kwachiindi, bazooyanda kuswiilila mulumbe wamuBbayibbele.

Munyika yaParadayizi iili kunembo, bantu biingi batakabusigwe bayoobotelwa kuchitilwa chaluzyalo, amwi bamwi kanooli kakusaanguna. Akaambo kakuchitilwa oobo, ziyoopa kuti bakabachitile chaluzyalo bamwi. Muntu woonse uutakaleke kubachitila chaluzyalo bamwi takakkali kukabe kutamani muBwaami baLeza. Pesi bantu bayoosalwa aaLeza kuti bakapone kukabe kutamani banooli aaluyando akubachitila chaluzyalo bamwi. (Int. 37:9-11) Nisimpe nyika inookwabilidwe akuba aaluumuno lwiingi! Pesi kachitanasika chiindi eecho chibotu, kutugwasya biyeni lino kubachitila chaluzyalo bamwi?

Bbayibbele lyaamba kuti: “Muntu siluzyalo ulaligwasya mwini.” (Tus. 11:17) Bantu bayanda kumvwanana amuntu ulaaluzyalo alubo bamutondeezya luzyalo anguwe. Jesu wakati: “Ceelelo ncomweelela bamwi, anywebo muyooelelwa nciconya.” (Lk. 6:38) Nkinkaako muntu uulaaluzyalo ujana beenzinyina balikabotu alubo ukkala kabotu ambabo.

Mwaapostolo Pawulu wakaambila maKristu bakuEfeso kuti, “amufwidilane luzyalo, mube amoyo mutete walubomba, akulekelelana camoyo woonse.” (Ef. 4:32, NW) Mbungano ilagwasikana kuti kayizwide bantu batondeezya luzyalo alubo bayanda kugwasyania. Bantu bali boobo tabayeeyi kubelesya majwi mabi, tabakazyanyi alubo tabanindi bamwi. Muchiindi chakuti babejelezye bamwi, baleezya kubelesya lulimi lwabo munzila iigwasya bamwi. (Tus. 12:18) Kuchita oobo kupa kuti mbungano isime akuti bakombe Jehova kababotelwa.

Nisimpe luzyalo mbuntu butondeezegwa kwiinda mumajwi amumichito. Kuti twaba aaluzyalo tuyootondeezya buntu bubotu Jehova Leza wesu mbwali aabo. (Ef. 5:1) Kuyungizya waawo, kuchita oobo kupa kuti tusimye mbungano zyesu akukwela bamwi kuti baze mukasimpe. Atukanze kukkala katuzibwa kuti tuli bantu bali aaluzyalo!