1, 2. (a) Nchiichili chintu chiyandikana loko nchitulaacho? (b) Nkaakali kasimpe kayandikana loko kulindiswe alubo nkamboonzi? (Langa chifanikisyo chili kumatalikilo aachiiyo.)

NCHIICHILI chintu chiyandikana loko nchulaacho? Kujana wazumina na kuti uchichinchanisye aachimwi chintu chitagwasyi? Kubakombi baJehova, mibuzyo eeyi myuuba kwiisandula. Chintu chiyandikana loko nchitulaacho, mbweenzuma mbutuli aabo aJehova alubo tatweelede kubuchinchanisya aachimwi chintu pe. Alubo tukayandisya loko kasimpe kamuBbayibbele kapa kuti tukonzye kuba aabweenzuma buli boobu aTaateesu uuli kujulu.​—Kol. 1:9, 10.

² Yeeya atala azintu zyoonse Muyiisi wesu Mupati nzyatuyiisya zili muJwi lyakwe Bbayibbele! Utuyiisya kasimpe kali atala anzilyaamba zina lyakwe abuntu bwakwe bubotu. Utuyiisya atala aluyando ndwaakatutondeezya mukutupa Mwanaakwe Jesu kuti abe chinunuzyo. Kuyungizya waawo, Jehova utuyiisya atala aBwaami bwaMesiya alubo wakasala maKristu bananikidwe kuti babe aabulangilizi bwakuyoopona kujulu ‘abambelele zimwi’ kuti  bazoopone muParadayizi aanyika. (Joh. 10:16) Jehova utuyiisya mbutweelede kupona. Tulakayanda kasimpe nkaambo kapa kuti tuswene afwiifwi aMulengi wesu. Zintu zyoonse eezi, zipa kuti tube aamakanze mubuumi.

3. Kuula kasimpe takwaambiinzi?

³ Jehova nguLeza uupa. Taleki pe kubapa zintu zibotu bantu bayanduula kasimpe. Jehova wakatupa buumi bwaMwanaakwe ngwayandisya loko kakutakwe nchitwakabbadala. Leza tayandi kuti tubbadale mali kuti tujane kasimpe. Chimwi chiindi, umwi mwaalumi uutegwa Sayimoni, wakali kuyanda kupa mwaapostolo Petro mali nkaambo wakali kuyanda kupegwa muuya uusalala. Petro wakamukalalila akumwaambila kuti: “Mali aako afwidilile antoomwe ayebo, nkaambo wayeeya kuti cipego ca-Leza caulwa mali.” (Inc. 8:18-20) Tulakonzya kulibuzya kuti, malayilile aamuBbayibbele aakuti: ‘Kowula Kasimpe’ aambaanzi?

4. Muchiiyo eechi, niinzi nchitutayiye atala akasimpe?

⁴ Bala Tusimpi 23:23. Kasimpe kali muJwi lyaLeza, tatukajani mahhala pe. Tweelede kubeleka changuzu kuti tukajane. Kweendelana ambaakalemba mulembi waTusimpi musongo, kuti ‘twawula’ naakuti twalijanina ‘kasimpe,’ tweelede kuchenjelela kuti ‘tutakawuzyi’ naakuti ‘katasweeki.’ Atulange-lange kuti ‘kuula’ kasimpe chambaanzi azintu nzitweelede kuchita kuti tukawule. Kuchita oobo kupa kuti tuchite zyiingi, zitondeezya kuti tulakalumba kasimpe alubo kutugwasya kuti ‘tutakawuzyi.’ Mbuuli mbututayiye, kuula kasimpe kuyanda kubeleka changuzu.

5, 6. (a) Tukawula biyeni kasimpe katutabbadali mali? Amba chikozyano. (b) Kasimpe katugwasya biyeni?

⁵ Nikuba chintu chamahhala chilakonzya kubbadalwa. Bbala lyachiHebbrayo lyakasandululwa kuti ‘kuula’ muli Tusimpi 23:23, lilakonzya kwaamba ‘kujana.’ Mabala aaya oonse atondeezya kuti tweelede kubelekela naakuti kuchinchisya chimwi chintu kuti tujane chintu nchituyanda. Kuula kasimpe tulakonzya kukukozyanisya muchikozyano chitobela. Atuteedi kumusika kulembedwe kuti, “Mabbanana Aamahhala.” Kujana mabbanana aayo atuzida na kung’anda? Peepe. Tweelede kwiinka nkwaabede kuti tukaabweze. Mabbanana aaya ngamahhala na? Iiyi pesi tweelede kweenda akubelesya chiindi chesu kuti twiinke kumusika. Mbukubede akasimpe, tatukawuli aamali pe pesi tweelede kukabelekela kuti tukajane.

⁶ Bala Isaya 55:1-3. Majwi aaJehova aakalembwa aaIsaya, apandulula nzikwaamba kuula kasimpe. Mumakani aaya aamuBbayibbele, Jehova ukozyanisya majwi aakwe amaanzi, malili awayini. Majwi aaLeza apa kuti tulimvwe kabotu mbuuli kunywa maanzi aatontolela, aatakwe doti. Alubo mbuuli malili mbaatusimya akupa kuti bana bakomene, majwi aaLeza alatusimya akupa kuti tukomene mubukombi. Kuyungizya waawo, majwi aaJehova ali mbuuli wayini. Nkamboonzi? Muchiindi chaBbayibbele, wayini yakaliswaangene akubotelwa. (Int. 104:15) Kwiinda mukwaambila bakombi bakwe kuti “muule waini,” Jehova ututondeezya kuti kupona kweendelana anzyaayiminina majwi aakwe, kupa kuti tubotelwe. (Int. 19:8) Zikozyano eezi zitugwasya kubona zintu zibotu nzitujana akaambo kakwiiya majwi aaLeza aakasimpe akwaabelesya. Kubeleka changuzu nkutuchita, kulikozyenie akubbadala mali. Atulange-lange zintu zili 5 nzitukonzya kubelesya kuti tuule kasimpe.

7, 8. (a) Nkamboonzi nitweelede kubelesya chiindi kuti tuule kasimpe? (b) Umwi musimbi wakali kwiiya chikolo wakachitaanzi kuti awule kasimpe alubo nimpinduunzi zyakaba?

⁷ Chiindi. Toonse tubelesya chiindi kuti tuule kasimpe. Tweelede kujana chiindi chakuswiilila  mulumbe waBwaami, kubala Bbayibbele amabbuku aapandulula Bbayibbele. Alubo tubelesya chiindi nituchita chiiyo chaBbayibbele atulikke anitulibambila miswaangano yambungano. Tweelede ‘kuula’ chiindi naakuti kubelesya chimwi chiindi nchitubelesya kuzintu zitayandikani loko. (Bala BaEfeso 5:15, 16.) Tutola chiindi chilamfu biyeni kuti tujane luzibo lwakasimpe kanjiisyo zyamuBbayibbele? Zyeendelana azyiimo zyesu. Kwiiya atala abusongo bwaLeza, nzila zyakwe amilimu yakwe takugoli pe. (Rom. 11:33) Ngaziyakulinda yakusaanguna yaChikuwa yakati kasimpe kakozyenie “akaluba kamwi kabotu.” Alubo yakayungizya kuti: “Utabotelwi aaduba limwi luzutu lyakasimpe. Kaansinga duba limwi lyakasimpe lilikabotu nikuli Leza tatupede miingi pe. Nkinkaako chela miingi.” Tulakonzya kulibuzya kuti, ‘Ndizizi kusika aali njiisyo zyakasimpe?’ Nikuba twaakupona kukabe kutamani, tunooyiya zyiingi atala aJehova. Mazubaano, chintu chiyandikana loko, nkuchibelesya kabotu chiindi chesu kuti tuule kasimpe kweendelana azyiimo. Atulange-lange chikozyano chawumwi muntu wakali aanzala yakasimpe.

⁸ Umwi musimbi uutegwa Mariko * wakuJapan, wakaya kudolopo lyaNew York kuU.S.A., kuti akayiye chikolo. Muchiindi eecho, wakali mukabunga kachikombelo kakatalika kuma1950 kuJapan. Umwi payona muchizi naakali kukambawuka kung’anda ang’anda, wakajana Mariko. Mariko naakatalika kwiiya kasimpe kamuBbayibbele, wakabotelwa loko zyakuti wakabuzya muchizi ooyu wakali payona kuti kabanooyiya Bbayibbele tubili mumviki. Kuzwa waawo, Mariko wakatalika kunjila miswaangano yambungano nikuba kuti wakali aamulimu mwiingi wakuchikolo akuti wakali kubeleka amwi mazuba. Wakaleka zimwi zyakulikondelezya kuti ajane chiindi chakwiiya kasimpe. Kuchita oobo kwakamugwasya kuti afwambaane kukomena mubukombi. Kawutanamana munyaka, wakabbabbatizigwa. Nikwakiinda myeezi iili 6, mu2006, wakatalika kupayona alino uchipayona.

9, 10. (a) Kuula kasimpe kupa kuti tube aamaboneno aali biyeni atala azintu zyakumubili? (b) Umwi musimbi wakasiyaanzi alubo ulimvwa biyeni atala akusala nkwaakachita?

⁹ Zintu zyakumubili. Chimwi chiindi tweelede kuleka mulimu uuli aajulu kuti tuule kasimpe. Jesu naakatamba Petro aAndreya basikuzuba nswi kuti babe “basikuzuba bantu,” baalumi aaba, “bakasiya insabwe zyabo.” (Mt. 4:18-20) Nikuba boobo eezi tazyaambi kuti bantu bawula kasimpe beelede kuleka milimu yabo. Bbayibbele lisungwaazya kuti bantu beelede kusanina mpuli zyabo. (1 Tim. 5:8) Nikuba boobo, bantu bayiya kasimpe beelede kuchincha maboneno aabo atala azintu zyakumubili azintu nzibabikka mubusena bwakusaanguna. Jesu wakazibikka aantanganana eezi naakati: “Mutaliyobwedi lubono ansi ano . . . Amuliyobwede lubono kujulu.” (Mt. 6:19, 20) Atulange-lange chikozyano chawumwi musimbi.

¹⁰ Maria wakali kuyandisya kusaana golf nikuba katanatalika kwiiya chikolo. Naakaba kusekkondali, wakali wiikonzya loko golf zyakuti wakajana mutabi wakali kuyoomubbadalila kuyunivesiti. Golf wakali kwiiyandisya loko alubo wakali kuyanda kuti ajane mulimu uuli aajulu kwiinda mukuba muntu uuyikonzya loko golf. Maria wakatalika kwiiya Bbayibbele alubo wakakayandisya kasimpe nkaakali kwiiya. Wakali kubotelwa akuchincha nkwaakali kuchita mubuumi akaambo kakwiiya kasimpe. Maria wakati: “Nindakachincha maboneno amaponeno aangu kuti ayendelane  aazyeelelo zyamuBbayibbele, ndakatalika kubotelwa.” Alubo wakabona kuti nkuyumu kubelekela Leza kumwi kubelekela lubono. (Mt. 6:24) Wakabeleka changuzu kuti aleke chipeekezyo chakwe chakusaana golf munzila iisumpukide akuti ajane mali ampuwo. Kuula kasimpe kwakamugwasya kuti abe payona alubo upona buumi mbwaakaamba kuti “mbuumi bweeta kubotelwa alubo buli ampindu kwiinda zintu zyoonse.”

11. Niinzi chikonzya kuchitika kubeenzuma akuli bamumpuli kuti twawula kasimpe?

¹¹ Kumvwanana abamwi. Kuti twasala kupona kweendalana akasimpe kamuBbayibbele, kumvwanana kwesu abeenzuma abamumpuli kulakonzya kuchincha. Nkamboonzi? Jesu naakali kukombela batobeli bakwe, wakati: ‘Ubasalazye akasimpe, ijwi lyako nkasimpe.’ (Joh. 17:17) Bbala lyakuti “ubasalazye” lilakonzya kwaamba “kubasiyanisya.” Nitutambula kasimpe, ngatwalisiyanisya anyika nkaambo ngatatuchichiti zintu ziyandwa aanyika. Bantu ngabatubona katusiyene ambabo nkaambo ngatwapona munzila iisiyene ambabo. Tupona kweendelana azyeelelo zyakasimpe kamuBbayibbele. Nikuba kuti tatuyandi kulisiyanisya ambabo, bamwi beenzuma abamumpuli balakonzya kututantamuka naakuti kutukazya akaambo kazintu nzitusyoma. Eezi tazitugambyi pe. Jesu wakaamba kuti: “Nkabela basing’anda bamuntu mwini mbibazooba basinkondonyina.” (Mt. 10:36) Alubo wakasyomezya kuti tuyoojana zintu zyiingi kwiinda kubeleka changuzu nkutuchita kuti tuule kasimpe.​—Bala Marko 10:28-30.

12. Umwi muJuda wakakawula biyeni kasimpe?

¹² Kuzwa kachili muniini, umwi sibbizinesi muJuda uutegwa Aaron, wakayiisigwa kuti zina lyaLeza talyeelede kwaambwa pe. Nikuba boobo, Aaron wakali aanyota yakasimpe. Wakabotelwa umwi Kamboni naakamutondeezya kuti, kuti twaswaanizya mabbii aachiHebbrayo aali 4, zina lyaLeza lilakonzya kwaambwa kuti “Jehova.” Kaboteledwe, Aaron wakayinka kuchikombelo kuti akatondeezye bafundisi nzyaakayiya. Nzibakachita bafundisi aabo taakali kuziyeeyela pe Aaron. Muchiindi chakuti babotelwe atala akuziba zina lyaLeza, bakamuswida mate akumujata mbuuli muntu uutandidwe. Bamumpuli yakwe teebakachili kumuyanda pe. Pesi wakazumanana kuula kasimpe alubo wakaba Kamboni waJehova uutayoowi, mubuumi bwakwe boonse. Mbuuli Aaron, andiswe kuti tweende mukasimpe, tweelede kutambula kuchincha koonse kukonzya kuba muchilawu chesu naakuti kutamvwanana abamumpuli.

13, 14. Njiili mizeezo akulijata kutali kabotu nkutweelede kuchincha kuti tuule kasimpe? Amba chikozyano.

¹³ Kuyeeya zintu zibi akutalijata kabotu. Kuti tutambule kasimpe akupona kweendelana azyeelelo zyamuBbayibbele zyakulijata, tweelede kuchincha mbutuyeeya ambutulijata. Petro wakaamba atala akuchincha ooku naakati: “Amube mbuli bana baswiilila. Ziyanza zyanu zitabi mbuli zisusi zyanu zyakalekele zyakuciindi cakutaziba kwanu, pele . . . amusalale mukweenda kwanu koonse.” (1 Pet. 1:14, 15) Kuti bawule kasimpe, bantu bakali kukkala mumuunzi wakuKkorinto wakazwide michito iisesemya bakeelede kuchincha maponeno aabo. (1 Kor. 6:9-11) Nikuba mazubaano, kuti bantu bakonzye kuula kasimpe, beelede kusiya maponeno aabo aatali kabotu. Petro wakabayeezya lubo maKristu bamuchiindi chakwe naakati: “Nkaambo cakomena ciindi ncimwakasowa kale kukucita mbuli mbubacita bamasi. Mwakali kweenda mubumpuwe amuzisusi zibi, mukukolwa amunjalalando,  mukusenga bukoko amukukomba mizimo iitondwa.”​—1 Pet. 4:3.

¹⁴ Devynn aJasmine bakali basibukande kwaminyaka myiingi. Nikuba kuti Devynn wakawuzi kabotu mulimu wazyama-akkawunsi pesi kukolwa kwakali kumupa kuti kafwambaana kumaninwa mulimu. Jasmine wakali kuyandisya zyakulwana. Limwi zuba Jasmine naakali kuyabweenda munzila kakoledwe, wakaswaana Bakamboni babili bakali mamishinali. Mamishinali aabo bakachita mabambe aakuti bazooyiye Bbayibbele aJasmine. Pesi nibakasika nkwakkala mumviki yakatobela, bakajana Devynn aJasmine kabakoledwe. Teebakali kuyeeyela pe kuti mamishinali aaba balakonzya kubaswaya. Pesi nibakabaswaya kachibili bakajana balichinchide. Kuzwa nibakasaanguna kwiiya Bbayibbele, Jasmine aDevynn bakaba basikwiiya Bbayibbele basungu alubo bakasaanguna kubelesya nzibakali kwiiya. Mumyeezi iitatu bakali baleka kunywa bukande mpawo bakachada. Bantu bamuchilawu chabo bakakubona kuchincha nkubakachita mpawo bamwi bakayanda kwiiya Bbayibbele.

15. Nchiichili chintu chikonzya kupa kuti kutuyumine kuula kasimpe alubo nkamboonzi?

¹⁵ Ziyanza amichito iiteendelani amagwalo. Kuleka ziyanza amichito iiteendelani amagwalo kulakonzya kuba chintu chiyumu, chipa kuti kutuyumine kuula kasimpe. Nikuba kuti bamwi kulakonzya kubawubila kutobelezya malayilile aamuMagwalo atala akuleka michito eeyi pesi bamwi kulabayumina kwiileka akaambo kakukazigwa abamumpuli, mbibabelekaabo naakuti beenzinyina. Zyiimo zili boobu zilakonzya kupa kuti bakataazikane, kapati kuti ziyanza zyankubazwa kaziswaanizya kulemeka bantu bakafwa. (Dt. 14:1) Zikozyano zyabantu bakatondeezya kutayoowa zilakonzya kutugwasya kuti tuchinche. Atulange-lange nzibakachita bamwi bantu bakali kukkala muEfesu mumwaanda wamunyaka wakusaanguna.

16. Bamwi bantu bakuEfesu bakachitaanzi kuti bawule kasimpe?

¹⁶ Muunzi wakuEfesu wakazibidwe aazyamasalamusi. Bantu bamumuunzi ooyu bakali baba maKristu bakachitaanzi kuti baleke michito eeyo yakatali kweendelana aMagwalo akuti bawule kasimpe? Bbayibbele lyaamba kuti: “Bantu banji akati kabasimasalamuzi bakabungika mabbuku aabo akwaaumpa bantu boonse kabalangilila. Alimwi bakasanganya muulo woonse wamabbuku aayo, eelyo bakajana kuti akali kuulwa mali aansiliva aali 50,000. Aboobo ijwi lya Jehova lyakazumanana kuyaambele akuzunda canguzu kapati.” (Inc. 19:19, 20, NW) MaKristu aaba basyomeka bakasweekelwa zintu zidula kuti bawule kasimpe mpawo Jehova wakabalongezya.

17. (a) Nziizili zintu nzitukonzya kuchita kuti tuule kasimpe? (b) Njiili mibuzyo njituyoolanga-langa muchiiyo chitobela?

¹⁷ Wakachitaanzi kuti wuule kasimpe? Toonse tubelesya chiindi kuti tuchele maluba aakasimpe. Bamwi bawula kasimpe kwiinda mukuleka zintu zyakunyama bamwi bakachincha nzila njibakali kumvwananaayo abamwi. Bamwi beelede kuchincha mbubayeeya ambubalijata alubo bamwi beelede kuleka ziyanza amichito iiteendelani azyeelelo zyamumagwalo. Tuli aachoonzyo chakuti kasimpe kamuBbayibbele kayandikana loko kwiinda zintu zyoonse nzitwakaleka kuti tukonzye kukawula. Kuchita oobo kutugwasya kuti tujane chintu chiyandikana loko, bweenzuma mbutuli aabo aJehova. Kuyeeyesesya atala azilongezyo nzitujana akaambo kakasimpe, kupa kuti tugambe kuti umwi wakawuzya. Kujana eezyo zyachitika biyeni alubo kujana twachita biyeni kuti tutawuzyi kasimpe? Tuyoolanga-langa atala amibuzyo eeyi muchiiyo chitobela.