1. Jehova utuzumizya kuti tuchiteenzi?

JEHOVA utuzumizya kuti tulisalile nzituyanda kuchita mubuumi. Utuyiisya mbutukonzya kusala kabotu alubo ulatugwasya kuti tuzwidilile kuti twasala kweendelana amakanze aakwe. (Int. 119:173) Chiindi nitubelesya busongo bujanika muJwi lyaLeza tuyoogwasigwa kuti tusale kabotu.​—Heb. 5:14.

2. Niinzi chikonzya kutuyumina kuti twasala nzituyanda kuchita?

² Chimwi chiindi nga twasala kabotu pesi kulakonzya kutuyumina kuzuzikizya nzitwasala. Atulange-lange zikozyano zitobela: Umwi mulombe wakasala kubala Bbayibbele kuti alimaninsye. Wakabeleka changuzu mumviki zyakusaanguna pesi mukuya kwachiindi wakazooleka. Muchizi wakasala kuba payona wachiindi choonse pesi wakali kuwaya-waya kusaanguna. Baalu bakasala kunooswaya bamumbungano kuti babasimye mubukombi pesi nikwakayinda myeezi myiingi bakabona kuti takwe ngubakaswaya nikuba uumwi. Nikuba kuti bantu baambwa atala aawa bakasala zintu zisiyene pesi boonse bakakachilwa kuzuzikizya nzibakasala. MaKristu bakuKkorinto ambabo bakakachilwa kumaninsya mulimu ngubakatalika. Chikozyano chabo chituyiisyaanzi?

3. MaKristu bakuKkorinto bakasala kuchitaanzi alubo niinzi chakachitika?

³ Kuma 55 C.E., maKristu bamumbungano yakuKkorinto bakasala kuchita chimwi chintu chiyandikana loko. Bakamvwa kuti zimwi mbungano zyakali kugwisya mali yakuti zigwasye bakombinyina muJerusalemu akuJudiya bakali kufwaba akuswaanana abuyumu-yumu. Bakatondeezya kuti balaaluzyalo  akuti balapa kwiinda mukusala kuti bagwasilizye mpawo bakabuzya Pawulu kuti abagwasye kutola zipo zyabo. Pawulu wakabapa malayilile alubo wakasala kuti bape Tito zipo eezyo. (1 Kor. 16:1; 2 Kor. 8:6) Nikwakayinda myeezi miche, Pawulu wakamvwa kuti bantu bamumbungano yakuKkorinto teebakali kugwisya pe mali mbuuli mbubakaambide. Eezi zyakapa kuti zipo zyabo zitajaniki chiindi zipo zyazimwi mbungano nizyakali kutolwa kuJerusalemu.​—2 Kor. 9:4, 5.

4. Mbuuli mbukwaambidwe muli 2 Bakorinto 8:7, 10, 11, Pawulu wakasungwaazya maKristu bakuKkorinto kuti bachiteenzi?

⁴ MaKristu bakuKkorinto bakasala kabotu loko nkinkaako Pawulu wakabalumbayizya akaambo kakutondeezya lusyomo lusimide akuti bakali kupa. Nikuba boobo wakabasungwaazya kuti bamaninsye mulimu ngubakatalika. (Bala 2 Bakorinto 8:7, 10, 11.) Chikozyano chabo chituyiisya kuti nikuba maKristu basyomeka balakonzya kuyuminwa kuzuzikizya zintu nzibakasala.

5. Njiili mibuzyo njitutasandule?

⁵ Andiswe kulakonzya kutuyumina kuzuzikizya nzitwakasala mbuuli mbubakachita maKristu bakuKkorinto. Nkamboonzi? Akaambo kakuti tulaachibi, tulakonzya kuwaya-waya kuzuzikizya nzitwakasala. Alubo zintu zitayeeyelwi zilakonzya kutuchitikila akupa kuti kutuyumine kuchita nzitwakasala. (Muk. 9:11; Rom. 7:18) Niinzi nzitweelede kuchita chiindi nituyanda kusala zyakuchita alubo nga tulalanga-langa biyeni kuti tulakonzya na kuzizuzikizya? Alubo niinzi chinga chilatugwasya kuti tuzuzikizye nzitwasala?

6. Nkamboonzi chimwi chiindi nikuyandikana kuti tuchinche nzitwakasala?

⁶ Zimwi zintu nzitusala tazichiti pe kuti tuzichinche. Muchikozyano, tweelede kubelekela Jehova kwabuumi bwesu boonse akusyomeka kumuntu ngutukwetenaawe. (Mt. 16:24; 19:6) Nikuba boobo, zimwi zintu nzitwakasala zilachita kuti tuzichinche. Nkamboonzi? Nkaambo zyiimo zilachincha. Niinzi chikonzya kutugwasya kuti tusale kabotu?

7. Tweelede kukombelaanzi alubo nkamboonzi?

⁷ Kombela kuba abusongo. Jakkobo wakazulwidwa amuuya uusalala kulemba kuti: “Ikuti muntu umwi akati kanu kabulizyide busongo, azumanane kumulomba Leza nkaambo boonse ulabapa cabuuya.” (Jak. 1:5) Tweelede kusyoma Jehova chiindi nituyanda kusala zyakachita achiindi nitubambulula nzitwakasala nkaambo alichimwi chiindi nga ‘twabula busongo.’ Kuti twasyoma Jehova, uyootugwasya kuti tusale munzila yabusongo.

8. Niinzi nzukonzya kubelesya chiindi nuuli kuyanduulisisya atala anzuyanda kusala?

⁸ Yanduulisisya. Chiindi nuyanduulisisya ulakonzya kubala Jwi lyaLeza amabbuku ambunga. Alubo ulakonzya kubuzya bantu mbuusyoma. (Tus. 20:18) Kuyanduulisisya kulayandikana kapati chiindi nuyanda kusala mulimu naakuti kulongela kuli bumwi busena. Alubo kulayandikana nuyanda kusala mulimu nguyanda kufundila utazookugwasye kuti uzumanane kubelekela Jehova.

9. Kulanga-langa makanze eesu kutugwasya biyeni?

⁹ Langa-langa makanze aako. Jehova ulaandaba amakanze eesu. (Tus. 16:2) Uyanda kuti katusyomeka muzintu zyoonse. Nkinkaako chiindi nituyanda kusala zyakuchita, tweelede kulanga-langa makanze eesu akubuzya bamwi simpe atala angawo. Kuti makanze eesu katali kabotu, kulakonzya kutuyumina kuti tuchite nzitwakasala. Muchikozyano, umwi mukwesu uuchikula ulakonzya kuba payona wachiindi choonse pesi mukuya kwachiindi ulakonzya kukachilwa kusisya ma-awa ayandikana mpawo nga tachinoneezegwi pe amulimu  ooyu. Mulombe ooyu ulakonzya kuyeeya kuti wakasala kupayona kuchitila kuti abotezye Jehova. Pesi kulakonzeka kuti wakali kuyanda kubotezya bazyali bakwe naakuti bamwi bantu.

10. Niinzi chiyandikana kuti katuyanda kuchincha?

¹⁰ Yeeya atala achikozyano chawumwi mwaalumi wakali kwiiya Bbayibbele wakasala kuleka kufwepa. Wakabeleka changuzu kwamviki naakuti zibili pesi wakazoofwepa lubo. Nikuba boobo, wakazoozwidilila kuleka kufwepa. Kuyanda Jehova akuyanda kumubotezya kwakapa kuti azwidilile kuleka kufwepa.​—Kol. 1:10; 3:23.

11. Kuziba mbutukonzya kuzuzikizya nzitwasala kutugwasya biyeni?

¹¹ Ziba kuti ulazizuzikizya biyeni nzuwakasala. Kuziba mbukonzya kuzuzikizya nzuwakasala kuyookugwasya kuti uzizuzikizye. Atuteedi uyanda kubala Bbayibbele buzuba abuzuba, kuyookuyumina kuchita oobo kuti kutakwe pulogilamu ikonzya kukugwasya. * Baalu balakonzya kusala kunooswaya bakwesu abachizi kuti babasimye mubukombi pesi mukuya kwachiindi nga bazoobona kuti teebakachita kweendelana akusala kwabo. Kuti bazwidilile, beelede kulibuzya mibuzyo iitobela: “Mbaani bakwesu abachizi mbitweelede kusimya mubukombi? Twakasala na chiindi nchitweelede kubaswaya kuti tubasimye?”

12. Niinzi nzitukonzya kuchita chimwi chiindi alubo nkamboonzi?

¹² Bona zintu munzila iilikabotu. Taakwe muntu ukonzya kuchita zintu zyoonse nzyayanda nkaambo ulakonzya kubula manguzu naakuti chiindi. Nkinkaako tweelede kubona zintu munzila iilikabotu alubo tube bantu banyoneka. Chimwi chiindi kulayandikana kuti tubambulule nzitwakasala kuti twabona kuti tatukonzyi pe kuzizuzikizya. (Muk. 3:6) Kuti twalanga-langa nzitwakasala mpawo twazibambulula, niinzi chikonzya kutugwasya kuti tuzizuzikizye? Atulange nzila zili 5 zikonzya kutugwasya kuti tumaninsye mulimu ngutwakatalika.

13. Niinzi chinga chilatugwasya kuti tujane manguzu aakuzuzikizya nzitwakasala?

¹³ Komba kuti ujane manguzu aakuchita nzuwakasala. Leza ulakonzya kukupa ‘nguzu zyakucita zintu’ nzuwakasala. (Flp. 2:13) Nkinkaako kumbila Jehova kuti akupe muuya uusalala. Zumanana kukomba nikuba kuti uyeeya kuti nkombyo zyako zyanonoka kusandulwa. Jesu wakatusungwaazya kuti: “Amuzumanane kulomba, eelyo muyoopegwa [muuya uusalala].”​—Lk. 11:9, 13.

14. Malayilile ajanika muli Tusimpi 21:5 atugwasya biyeni kuti tuzuzikizye nzitwakasala?

¹⁴ Pulana kabotu. (Bala Tusimpi 21:5.) Kuti ukonzye kumaninsya nzuwakasala weelede kupulana kabotu. Alubo weelede kuchita kweendelana anzuwakapulana. Chiindi nusala zyakuchita, lemba aansi zintu zitakugwasye kuti ukonzye kumaninsya mulimu ooyo. Kupambuula mulimu mupati akuubeleka katuli tumilimu tuniini kulakonzya kukugwasya kubona mbuulikuzwidilila mumulimu wako. Pawulu wakasungwaazya maKristu bakumbungano yakuKkorinto kuti babambe zipo “mubuzuba bwakusaanguna bwansondo imwi aimwi” kutali kuti balindile kuti asike. (1 Kor. 16:2) Kupambuula mulimu kulakonzya kutugwasya kuti tutalilyi moyo loko.

15. Niinzi nzukonzya kuchita kuti wamaninsya kupulana?

¹⁵ Kulemba zintu nzitwakapulana kutugwasya kuti tukonzye kuchita zintu nzitwakasala. (1 Kor. 14:40) Muchikozyano, kabunga kabaalu kasungwaazigwa kusala umwi mwaalu kuti  kanoolemba aansi zintu zyoonse nzibasala. Alubo mwaalu ooyo weelede kulemba bantu banga basalwa kuti bachite chimwi chintu akuti bayoochichita lili. Kuti baalu babelesya mabambe aaya balakonzya kuchita zintu nzibakasala. (1 Kor. 9:26) Anduwe ulakonzya kuchita eezi chiindi nusala zyakuchita mubuumi bwako. Muchikozyano, ulakonzya kulemba aansi zintu nzuyanda kuchita buzuba abuzuba alubo ulakonzya kuzilemba kweendelana ambuyanda kuzibeleka. Eezi zilakugwasya kuti umaninsye mulimu nguwatalika kubeleka akuti uchite zintu zyiingi muchiindi chiche.

16. Niinzi chiyandikana kuti tumaninsye mulimu ngutwakatalika alubo lugwalo lwa Baroma 12:11 lutugwasya biyeni atala ankani eeyi?

¹⁶ Beleka changuzu. Ziyanda kubeleka changuzu kuti tutobelezye nzitwakapulana akuti tumaninsye mulimu ngutwakatalika kuchita. (Bala Baroma 12:11.) Pawulu wakabuzya Timotewo kuti ‘azumanane kulitakata’ akuti ‘akakatile’ kukuba muyiisi ulaaluzibo. Malayilile aaya alabeleka kuti katuyanda kusala zyakuchita mubukombi.​—1 Tim. 4:13, 16.

17. Lugwalo lwa Baefeso 5:15, 16 lutugwasya biyeni kuti tuzuzikizye nzitwakasala?

¹⁷ Chibelesye kabotu chiindi chako. (Bala Baefeso 5:15, 16.) Sala chiindi chakuzuzikizya nzuwakapulana mpawo uchite kweendelana anzuwasala. Utalindili kuti zintu zikweendele kabotu kuti uchite nzuwakasala nkaambo nkuche kuti zintu zyeende kabotu. (Muk. 11:4) Chenjelela kuti tuntu tuniini tutakulidi chiindi amanguzu aakuti uchite zintu ziyandikana loko. (Flp. 1:10) Kuti kazikonzeka weelede kusala chiindi nikutakwe zintu zikunyongania kuti uzuzikizye nzuwakasala. Buzya bamwi chiindi nchuwakasala kuchita zintu nzuwakapulana kuchitila kuti batakunyonganyi. Weelede kuzima fooni alubo toyelede kusandula mameseji achiindi eecho. *

18-19. Niinzi chikonzya kutugwasya kuti tuzuzikizye nzitwakasala chiindi nikwatuyumina kuchita oobo?

¹⁸ Bikkila maanu kumpindu. Mpindu yazintu nzitusala ilikozyenie akusika nkuuya. Kuti kuyanda kusika nkuya, weelede kuyanduula nzila zyoonse zikonzya kukusisya. Munzila iikozyenie, kuti twabikkila maanu kumpindu ziyooba akaambo kakusala nkutuchita, tatukazumizyi zimwi zintu kuti zitukachizye kuzuzikizya nzitwakasala.​—Gal. 6:9.

¹⁹ Kusala kabotu akuzuzikizya nzitwasala kulakonzya kutuyumina. Pesi Jehova ulatugwasya kuti tube amanguzu alubo ulatupa busongo bukonzya kutugwasya kuti tumanisye mulimu ooyo ngutwakatalika.