Ndakazyalwa mu1983. Ndakazyalwa kandili kabotu mbuli bamwi bana alubo ndakali kukomena kabotu. Pesi nindakasika minyaka iili 10 ndakasaanguna kumvwa kuchisa mubili wangu woonse. Nikwakayinda minyaka iibili, bumwi buzuba kuseeni ndakabuka kanditakonzyi pe kweenda. Ndakali kweezya kunyampula mawulu pesi ndakali kukachilwa kweenda. Kuzwa mubuzuba oobo takwe nindakazooyenda lubo pe. Alubo bulwazi oobu bwakapa kuti ndikachilwe kukomena zyakuti ambuli sunu ndichili mufwiifwi mbuli mwana.

Nikwakayinda myeezi miche kanditakonzyi pe kuzwa aang’anda akaambo kakuchiswa, twakaswayigwa aBakamboni baJehova babili. Ndakali kuyuba kuti kwasika beenzu pesi buzuba oobu teendakayuba pe. Nibakaambuula atala aparadayizi ndakayeeya kuti zintu eezi ndakali ndazimvwa nindakali aminyaka iili 5. Aachiindi eecho, kwakali umwi mumishinali uutegwa Jethro wakali kuzwa kuSuriname. Mumishinali ooyu wakali kuza kamwi amweezi kulindiswe kuzooyiya aandeende Bbayibbele. Jethro wakali kundijata kabotu. Eezi zyakapa kuti ndimuyande loko. Alubo ndakali kwiinkaamwi abanene asyaanene kumiswaangano yaBakamboni baJehova yakali kuchitilwa muchilawu chesu. Chiindi umwi wabanakazi bakatuswayide uutegwa Florence naakabuzya kuti ndakali kuyanda na kwiiya zyiingi, ndakazumina.

Florence wakazooboola amulumaakwe Justus alubo bakasaanguna kwiiya Bbayibbele andime. Bakandiyiisya kubala akaambo kakuti teendakali kukonzya pe kubala. Nikwakayinda chiindi ndakazookonzya kulibalila. Bumwi buzuba, Florence amulumaakwe bakandibuzya kuti bakali bakumbilwa kuti bakabelekele kuSuriname. Zyakandichisa nkaambo teekwakachilikwe Bakamboni pe bakali kukonzya kundiyiisya Bbayibbele kuOrealla. Pesi Jehova taakandiluba pe.

Kakutanayinda chiindi, kwakasika umwi payona uutegwa Floyd. Payona ooyu wakazoosika alindiswe chiindi naakali kukambawuka aang’anda aang’anda. Naakandibuzya kuti ulayanda na kwiiya Bbayibbele ndakamwemwetela mpawo wakati: “Ani umwemwetelaanzi?” Ndakamubuzya kuti ndakali ndamaninsya kabbuku kategwa Ncinzi Leza Ncayanda KuliNdiswe? Mpawo ndakali ndasaanguna bbuku litegwa Luzibo Lutola Kubuumi Butamani. * Ndakamubuzya chakapa kuti ndileke kwiiya. Twakazoomaninsya bbuku lyaLuzibo  aFloyd. Mpawo wakazookumbilwa kuti akabelekele kuli bumwi busena. Ndakachaala lubo kanditachikwe muntu undiyiisya pe.

Mu2004, kwakazoosika mapayona aayandikana, Granville aJoshua. Twakabonana amapayona aaya chiindi nibakali kukambawuka aang’anda aang’anda. Nibakandibuzya kuti ndilayanda na kwiiya ndakamwemwetela. Ndakababuzya kuti twiiye bbuku lyaLuzibo kuzwa kumasaangunino. Ndakali kuyanda kubona kuti balandiyiisya zifenene na anzindakali ndayiya musule. Granville wakanditamba kumiswaangano yakali kuchitilwa muchilawu chesu. Ndakazumina nikuba kuti ndakali ndaba aminyaka iisika ku10 kanditazwi aang’anda. Granville wakandibikka muwheelchair mpawo wakanditola kuNg’anda yaBwaami.

Mukuya kwachiindi, Granville wakandisungwaazya kuti ndilembesye muChikolo Chamulimu Cheendelezegwa aaLeza. Wakati: “Ulimulema pesi ulakonzya kwaambuula. Bumwi buzuba uzoopa nkani yabantu boonse. Eezi zizoochitika.” Majwi aakwe akapa kuti ndibe achibindi.

Ndakasaanguna kukambawuka aGranville, pesi nzila zyiingi zyakali amabbampa zyakuti wheelchair teeyakali kweenda kabotu pe. Ndakayeeya kuti Granville kanoonditonta abbara chiindi nituya mumulimu wakukambawuka. Eezi zyakagwasya. Ndakabbabbatizigwa muApril 2005. Kuzwa waawo bakwesu bakandiyiisya kulanga mabbuku aminchina kuNg’anda yaBwaami.

Zilawusisya kuti mu2007 ndeende wakawa mubboodi mpawo wakazoofwa. Eezi zyakatuchisa loko. Granville wakali kukomba andiswe alubo wakali kutubalila Magwalo aawumbulizya. Nikwakayinda minyaka iibili kwakazoochitika limbi penzi. Chiindi Granville naakali kweenda abboodi lyakwe lyakabbila mpawo wakafwa.

Mumbungano yesu teemwakachilikwe mwaalu pe pesi kwakali kwachaala mubelesi uubelekela luzutu. Kufwa kwaGranville kwakandichisa, nkaambo twakali kumvwanana. Wakali kundigwasya kuti ndibe aabweenzinyina buli kabotu aJehova alubo wakali kundigwasya muzintu zyakunyama. Mumviki yakatobela ndime ndakali kubala mafuka aachiiyo chaNgaziyakulinda. Nindakabala mafuka aabili luzutu ndakasaanguna kulila. Ndakakachilwa kulinyona zyakuti ndakazoozwa apulatifomu.

Ndakazoosaanguna kubotelwa lubo chiindi bakwesu bazwa kuliimwi mbungano nibakali kuza kuti bazootugwasye. Alubo mutabi wakatutumina payona uuyandikana uutegwa Kojo kuti azootugwasye. Ndakabotelwa loko kuti baama amwanikaangu bakazoosaanguna kwiiya Bbayibbele mpawo bakazoobbabbatizigwa. Alubo muMarch 2015 ndakasalwa kuti ndibe mubelesi uubelekela. Mpawo mukuya kwachiindi ndakazoopa nkani yangu yakusaanguna. Mubuzuba oobo ndakamwemwetela akulila chiindi nindakayeeya majwi ngindakabuzigwa aGranville aakuti: “Limwi zuba uzoopa nkani yabantu boonse. Eezi zizoochitika.”

Mumapulogilamu aaJW Broadcasting^® ndakabona bakwesu abachizi bali azyiimo zifanana achangu. Nikuba kuti balachiswa kuli zintu zyiingi nzibachita alubo balabotelwa. Eezi zyakapa kuti andime ndibone kuti kuli zintu nzindikonzya kuchita. Kuyanda kubelekela Jehova amanguzu angu woonse kwakapa kuti ndisale kuba payona wachiindi choonse. MuSeptember 2019, ndakabuzigwa makani mabotu aakuti ndakali ndasalwa kuba mwaalu mumbungano yesu ilaabasikupupulula basika ku40.

Ndilabalumba bakwesu abachizi bakayiya andime Bbayibbele alubo bakandigwasya kuti ndibelekele Jehova. Kwiinda zyoonse, ndilumba Jehova nkaambo taakandiluba pe.