1. Kweendelana alugwalo lwa Matayo 7:13, 14, nkamboonzi nitukonzya kwaamba kuti tuli mulweendo?

TOONSE tuli mulweendo lwakuya kunyika mpya iyooyendelezegwa aLeza siluyando. Buzuba abuzuba, tuleezya kweendela munzila eeyo iitola kubuumi. Pesi Jesu wakati, nzila eeyi niniini alubo chimwi chiindi kulakataazya kweendela mulinjiyo. (Bala Matayo 7:13, 14.) Nkuuba kuti tuleye munzila eeyi nkaambo tulaachibi.—Gal. 6:1.

2. Tulalanga-langaanzi muchiiyo eechi? (Langa kabbokesi kati “ Kulibombya Kupa Kuti Tuzumine Kululamikwa.”)

² Kuti tuzumanane kweendela munzila eeyi iitola kubuumi, tweelede kuzumina kuchincha nzituyeeya, maboneno eesu anzituchita. Mwaapostolo Pawulu wakasungwaazya maKristu bakuKkorinto kuti bazumanane “kululamikwa.” (2 Kor. 13:11) Malayilile aaya alabeleka kulindiswe. Muchiiyo eechi, tulabona kuti Bbayibbele abeenzuma basimide mubukombi nga balatugwasya biyeni kuti tuchinche akuti tuzumanane kweendela munzila eeyi iitola kubuumi. Alubo tulalanga-langa kuti niinzi chikonzya kupa kuti kutuyumine kutobela malayilile ngitupegwa aambunga. Mpawo tulabona kuti kulibombya nga kulatugwasya biyeni kuti tuzumine kuchincha kumwi katubotelwa mukubelekela Jehova.

3. Jwi lyaLeza nga lilatugwasya biyeni?

³ Teekuba pe kuziba mbutuyeeya ambutulimvwa. Nkamboonzi? Nkaambo moyo uleena. Nkuyumu kuziba kuti nzuyanda zilikabotu na naakuti tazili kabotu pe. (Jer. 17:9) Tulakonzya kulyeena “akuyeeya zitaluzi.” (Jak. 1:22) Pesi Bbayibbele ndilyo likonzya kutugwasya kuti tulilange-lange. Jwi lyaLeza lilakonzya kutugwasya kuziba mbutubede mukati kamoyo “alimwi  lilakonzya kuzyiba mizeezo amakanze aamumoyo.” (Heb. 4:12, 13) Jwi lyaLeza lili mbuli munchina uutegwa X-ray uubelesegwa kulanga-langa mubili wamuntu muli mukati. Pesi tweelede kulibombya kuti tukonzye kutobelezya malayilile ngitujana muBbayibbele akubantu mbabelesya Jehova.

4. Niinzi chitondeezya kuti Mwaami Sawulu wakali watalika kulisumpula?

⁴ Chikozyano chaMwaami Sawulu chitondeezya zintu zikonzya kutuchitikila kuti twakachilwa kulibombya. Sawulu wakatalika kulisumpula zyakuti taakazumina pe naakabisya alubo taakali kuyanda pe kuchincha. (Int. 36:1, 2; Hab. 2:4) Sawulu wakatondeezya kuti ulalisumpula chiindi naakaleka kutobelezya malayilile aaJehova ngaakamubuzizye kuti achite naazwa kunyonyoona baAmalekki. Chiindi mupolofita Samuyeli naakamubuzya, taakazumina pe kuti wakabisya. Wakatamikizya bamwi alubo wakaamba kuti teewakali mulandu mupati pe ngwaakali wachita. (1 Sam. 15:13-24) Aaka teekakali kakusaanguna pe kutaswiilila Jehova. (1 Sam. 13:10-14) Zilawusisya kuti Sawulu wakali wasaanguna kulisumpula. Taakazumina pe kuchincha mizeezo yakwe mpawo Jehova wakamusola akumukaka.

5. Twiiyaanzi kuzwa kuchikozyano chaSawulu?

⁵ Kuti wiiye kuzwa kuchikozyano chaMwaami Sawulu, weelede kulibuzya kuti: ‘Ndilazumina na kuchincha kuti ndabona zimwi zintu nzinditachiti kabotu chiindi nindilikubala Bbayibbele? Nga ndalibuzya kuti teechibi chipati na? Nga ndatamikizya bamwi na?’ Kuti wasandula kuti iiyi kumibuzyo eeyi, weelede kuchincha maboneno aako ambuyeeya. Nkaambo kuti waleka kuchita oobo, ulatalika kulisumpula mpawo Jehova ulakukaka kuti ube mweenzinyina.—Jak. 4:6.

6. Mwaami Sawulu wakasiyene biyeni aMwaami Davida?

⁶ Atubone musiyano wakaliwo aakati kaMwaami Sawulu aMwaami Davida, mwaalumi wakali kuyanda “mulawo wa Jehova.” (Int. 1: 1-3) Davida wakalizi kuti Jehova uyanda bantu balichesya akuti ulabakazya balisumpula. (2 Sam. 22:28) Eezi zyakapa kuti Davida azumizye mulawu waJehova kuti uchinche mbaakali kuyeeya. Wakalemba kuti: “Ndilatembaula Jehova, iwandilaya. Nociba ciindi camasiku, imizeezo yangu iili ansi aamoyo ilandilulamika.”—Int. 16:7.

7. Tuyoochitaanzi kuti katulibombya?

⁷ Kuti katulibombya, tunoozumizya Jwi lyaLeza kuti lituchinche kuchitila kuti tutabisyi. Bbayibbele liyoobaanga ndijwi litubuzya kuti: “Njeeyi nzila. Amweende mulinjiyo.” Liyootuchenjezya kuti twayanda kuleya munzila iitola kubuumi. (Is. 30:21) Kuswiilila Jehova kugwasya ndiswe. (Is. 48:17) Muchikozyano, tuyoozumina kululamikwa aabamwi alubo tuyooswena afwiifwi aJehova nkaambo tuyoobona kuti utujata mbuli bana bakwe mbayanda.—Heb. 12:7.

8. Kweendelana alugwalo lwa Jakobo 1:22-25, Jwi lyaLeza lifanana biyeni agilazi?

⁸ Jwi lyaLeza lili mbuli gilazi. (Bala Jakobo 1:22-25.) Biingi besu tusaanguna kulilanga-langa mugilazi katutanazwa aang’anda kuchitila kuti tubone kuti kuli mputweelede kubambulula na mpawo tubambulule. Munzila iikozyenie, kuti katubala Bbayibbele buzuba abuzuba liyootugwasya kuti tubone mputweelede kubambulula. Biingi bakabona kuti kubala lugwalo lwabuzuba kuseeni kulagwasya nkaambo nga bayeeya kuti nga balazibelesya biyeni nzibabala mpawo baleezya kuzibelesya buzuba boonse. Kuyungizya waawo, tweelede kuba apulogilamu yakubala Bbayibbele akuyeeyesesya atala anzitwabala buzuba abuzuba. Eezi zilakonzya kubonekaanga nchintu chiniini, pesi chintu chiyandikana loko kuti tukonzye kweenda munzila iitola kubuumi butamani.

9. Ndiilili mweenzinyokwe nakonzya kukululamika?

⁹ Kuli nwaakali wachita chintu chakapa kuti ukachilwe kweendela munzila iitola kubuumi na? (Int. 73:2, 3) Kuti kakuli mweenzinyokwe uusimide mubukombi wakakululamika, wakamuswiilila na? Kuti wakamuswiilila, wakachita kabotu alubo tulisoli pe akaambo kakuti mweenzinyokwe wakakululamika.—Tus. 1:5.

10. Weelede kuchitaanzi kuti mweenzinyokwe wakululamika?

¹⁰ Jwi lyaLeza litubuzya kuti: “Zilonda zyakuumwa amweenzinyoko zilasyomeka.” (Tus. 27:6) Zyaambaanzi eezi? Atubone chikozyano. Atuteedi uyanda kuzubuka mugwagwa ulaamoota nyingi loko mpawo wanyonganisigwa aafooni zyakuti wanjila mumugwagwa kutalangide pe kuti kuli moota na. Mpawo mweenzinyokwe wakujata kuboko wakudonsela musule. Wakudonsa zyakuti kuboko kwatalisya kuchisa pesi nzyachita zyakugwasya kuti utawumwi aamoota. Nikuba kuti kuboko ooku kwachisa kwamazuba miingi, pesi tukoomusola pe mweenzinyokwe akaambo kakuti wakakuchisa. Ulabotelwa akaambo kakuti wakakugwasya. Kuti mweenzinyokwe wakululamika kuti nzuuli kuchita anzulikwaamba tazyeendelani akuyanda kwaJehova pe, zilakonzya kukuchisa. Pesi tuweelede kumunyemena pe akaambo kakuti wakululamika. Kumunyemena kutondeezya bufuba-fuba. (Muk. 7:9) Weelede kubotelwa akaambo kakuti mweenzinyokwe wakugwasya.

11. Niinzi chikonzya kupa kuti muntu akake kululamikwa amweenzinyina?

¹¹ Niinzi chikonzya kupa kuti muntu akake kululamikwa amweenzinyina? Nkulisumpula. Bantu balisumpula bayanda bantu ‘babatekunya kumatwi.’ Balakaka “kuswiilila kasimpe.” (2 Tim. 4:3, 4) Tabayandi pe kululamikwa nkaambo babonaanga balizizi zyoonse. Mwaapostolo Pawulu wakalemba kuti: “Ikuti naa umwi uyeeya kuti ulayandika kapati kakuli kunyina ambwabede, ulalyeena lwakwe mwini.” (Gal. 6:3) Mwaami Solomoni wakafwiinsya nkani eeyi amajwi aati: “Mwana mucete pele musongo, mubotu kwiinda mwami mudaala pele mufwubafwuba, ooyo uutacikwe maano aakuti amvwe kucenjezyegwa.”—Muk. 4:13.

12. Kweendelana alugwalo lwa Bagalatiya 2:11-14, twiyaanzi kuchikozyano chamwaapostolo Petro?

¹² Atubone zyakachitwa amwaapostolo Petro chiindi mwaapostolo Pawulu naakamululamika kunembo lyabantu. (Bala Bagalatiya 2:11-14.) Petro wakali kukonzya kumunyemena Pawulu akaambo kanzila njakaambuula aayo akuti wakamululamikila kunembo lyabantu. Pesi Petro wakatondeezya kuti musongo nkaambo wakazumina kululamikwa alubo taakamunyemena pe Pawulu. Alubo mukuya kwachiindi wakazoowamba Pawulu kuti “mukwesu uuyandwa.”—2 Pet. 3:15.

13. Niinzi nzitweelede kuyeeya chiindi nituyanda kululamika umwi?

¹³ Niinzi nzweelede kuyeeya kutana lulamika mweenzinyokwe? Kutanaambuula aawe, weelede kulibuzya kuti: ‘Ndilitondeezya kuti ndililuleme loko na?’ (Muk. 7:16) Muntu ulibona kaluleme loko taboni bamwi mbuli mbababona Jehova alubo tabafwidi luzyalo pe. Kuti wabona kuti kulayandikana kwaambuula aawe, mubuzye aali penzi mpawo mubuzye mibuzyo kuchitila kuti abone mpaapambanisya. Nzweelede kwaamba zyeelede kuzwa mumagwalo, alubo tuweelede kumubeteka pe pesi mugwasye kubona kuti Jehova ulimvwa biyeni atala anzyali kuchita. (Rom. 14:10) Chiindi nululamika mweenzinyokwe, weelede kubelesya Jwi lyaLeza akutobelezya chikozyano chaJesu chakuba aaluzyalo.  (Tus. 3:5; Mt. 12:20) Nkamboonzi? Nkaambo Jehova uyootujata mbuli mbutubajata bamwi.—Jak. 2:13.

14. Mbunga yaLeza itupaanzi?

¹⁴ Jehova utugwasya kuti tuzumanane kweenda munzila iitola kubuumi kabelesya mbunga yakwe iili anyika. Mbunga eeyo itupa mavidiyo, mabbuku amiswaangano iitugwasya kuti tubelesye malayilile aazwa muBbayibbele. Zintu eezi tulazisyoma nkaambo zilaamakani aazwa muBbayibbele. Bakwesu bali muKabunga Keendelezya bagwasigwa amuuya uusalala chiindi nibasala kuti nga tulawuchita biyeni mulimu wakukambawuka. Nikuba boobo, bamuKabunga Keendelezya bakkala kabalanga-langa atala anzibasala. Nkamboonzi? “Nkaambo izintu zicitika munyika eeyi ziyaabucinca” alubo mbunga yaLeza yeelede kuchita kweendelana akuchincha ooku.—1 Kor. 7:31.

15. Nkuchinchaanzi kwakachitika muli zimwi mbungano?

¹⁵ Nkuuba kuzumina akubelesya malayilile aazwa muBbayibbele ali atala ambutulijata anikwaba kuchincha atala ambutuyimvwisisisya imwi vesi yamuBbayibbele. Pesi uchita biyeni kuti mumbunga yaJehova kwaba kumwi kuchincha kukujatikizya. Muchikozyano, muminyaka miche yayinda, kwakabelesegwa mali nyingi loko kuyaka akubambulula maanda aakukombela. Eezi zyakapa kuti bamuKabunga Keendelezya basale kuti mbungano zyiingi zibelesye Ng’anda yaBwaami imwi. Mbungano zimwi zyakajatanizigwa alubo amwi Maanda aaBwaami akawuzigwa. Mali eeyo yakabelesegwa kuyaka maanda aBwaami kubusena nkwayandikana loko. Eezi zilakonzya kukuyumina kuzitambula kuti kukkala mundawu Maanda aaBwaami nkwali kuuzigwa ambungano nkuzili kujatanizigwa. Akaambo kakuchincha ooku, bamwi basikupupulula baabweenda misinzo milamfu kabaya kumiswaangano. Bantu bakabeleka mumulimu wakuyaka naakuti kubambulula kulakonzya kubayumina kuzitambula kuti nkamboonzi Ng’anda yaBwaami eeyo niili kuuzigwa. Bakakonzya kubonaanga bakabelekela mahhala. Nikuba kuti nga bayeeya oobo, pesi tulabalumba akaambo kakuti balaatobela malayilile aaya.

16. Kubelesya malayilile aali muli Bakolose 3:23, 24 kuyootugwasya biyeni kuti tukkale katubotelwa?

¹⁶ Kuziba kuti tubelekela Jehova akuti nguwe ulikuzulwida mbunga yakwe kuyoopa kuti  tukkale katubotelwa. (Bala Bakolose 3:23, 24.) Mwaami Davida wakaamba chiiyo chibotu chiindi naakagwisya mali yakuyaka tempele. Wakati: “Ino mebo ndime ni alimwi abantu bangu mbaani, kuti tukonzye kupa zyakusanga zyakuliyandila mbuli zyeezyi? Nkaambo zintu zyoonse zizwa kulinduwe, alimwi zintu nzitwakupa zizwa mujanza lyako.” (1 Mak. 29:14) Nitusanga mali, nga tulikupa Jehova zintu zyakazwa kulinguwe. Pesi Jehova ulabotelwa kuti twalipeda kubelesya mali zyesu, manguzu eesu achiindi chesu kuti tuchite mulimu wakwe.—2 Kor. 9:7.

17. Nkamboonzi nuteelede kumana manguzu kuti wabona kuli mpuweelede kuchincha?

¹⁷ Kuti tuzumanane kweendela munzila niini, tweelede kutobelezya chikozyano chaJesu. (1 Pet. 2:21) Utamani manguzu kuti wabona kuti kuli mpuweelede kubambulula. Kuzumina kuchincha kutondeezya kuti ulayanda kutobela malayilile aaJehova. Utalubi kuti Jehova ulizi kuti tulaachibi. Talangilili kuti tutobele chikozyano chaJesu munzila iimaninide.

18. Niinzi nitweelede kuchita kuti tukanjile munyika mpya?

¹⁸ Toonse atulange kunembo alubo tubeleke changuzu kuti tuchinche nzituyeeya, maboneno eesu anzituchita. (Tus. 4:25; Lk. 9:62) Atukkale katuli bantu balibombya, ‘tuzumanane kukondwa, akululamikwa.’ (2 Kor. 13:11) Kuti twachita oobo, “Leza siluyando alimwi siluumuno unooli [andiswe].” Alubo uyootugwasya kuti tubotelwe lino akuti tukajane buumi butamani munyika mpya.