KULI bakwesu abachizi biingi bakazwide munyika zyabo kuti baye kunyika zizwidilide muli zyabunoti pesi bakabweeda lubo kunyika zyabo. Akaambo kakuyanda Jehova abamwi, bakasungwaazigwa kuti baye kumasena ayanda basikupupulula biingi. (Mt. 22:37-39) Bakatondeezya biyeni kuti balalipeda alubo nzilongezyoonzi nzibakajana? Kuti tujane nsandulo, atulange-lange zyakachitika kuCameroon ili muAfrica nkwiili kububbila.

Mu1998 umwi mukwesu utegwa Onésime uzwa kuCameroon wakalongela kuliimwi nyika. Wakakkala kunze aanyika kwaminyaka iili 14. Limwi zuba kali kumiswaangano wakamvwa chikozyano chili atala amulimu wakukambawuka. Sikwaambuula wakati: “Kuti bantu babili baya kukulabula mundawu zisiyene, kuti umwi kali kubacha pesi umwi katali kubacha pe ooyo utali kubacha talooyinka nkubalida na?”

Chikozyano eechi chakapa kuti Onésime ayeeye kubweeda kuCameroon kuli bantu biingi bali achiyandisyo kuchitila kuti akagwasyanie abasikupupulula bali nkuko. Pesi wakali kukataazikana. Wakali kuyookonzya na kuzibila maponeno akuli mbabo kakuli wakali wakkala kuli imwi nyika kwaminyaka myiingi? Kuti abone kuti wakali kuyookonzya na, Onésime wakavakacha kuCameroon kwamyeezi iili 6. Mpawo mu2012, wakazoobweedela limwi.

Onésime wakati: “Ndakeelede kuzibila maponeno akulindiswe akukkala kundawu zipya [zyuumpa]. KuNg’anda yaBwaami, ndakeelede kuzibila lubo kukkala aamabbenji.” Alubo kali kumwemwetela wakayungizya kuti: “Kubikkila maanu kuzintu zyakali kuyiigwa kwakali kupa kuti ndilube atala azyuuno zibotu zijanika kulaamwi Maanda aBwaami.”

Mu2013, Onésime wakakwata Géraldine wakali waboola kuCameroon kuzwa kuFrance nkwaakakkala kwaminyaka iili 9. Nzilongezyoonzi nzibakajana akaambo kakusala kubikka zintu zyabukombi mubusena bwakusaanguna? Onésime wakati: “Twakanjila Chikolo chaBakambawusi baBwaami alubo lino tuli kubeleka aaBbeteli. Mumunyaka wakayinda, kwakabbabbatizigwa bantu bali 20 mumbungano yesu. Lino ndilimvwa kuti ndili aandawu iili kabotu ‘yakuzubila.’” (Mk. 1:17, 18) Géraldine wakayungizya kuti: “Ndakajana zilongezyo zyiingi nzindakatali kuyeeyela pe.”

Judith wakali walongela kuUnited States pesi wakali kuyanda kuchita zyiingi mumulimu wakukambawuka. Wakati: “Kuti ndavakacha kuCameroon, ndakali kulila chiindi nindakali kuyanda kubweeda kuUnited States nkaambo ndakali kusiya zyiiyo zyangu zyiingi.” Pesi Judith wakali kuwaya-waya kubweeda kuCameroon. Wakali aamulimu wakali  kumufozya mali nyingi zyakuti wakali kukonzya kubbadalila wisi mali yakuti awule minsamu yabusilisi kuCameroon. Akaambo kakusyoma Jehova, Judith wakabweeda kuCameroon. Wakazumina kuti kuli zintu zibotu nzyanga wayeeya nzyaakasiya kunze aanyika. Wakakomba kuli Jehova kuti amugwasye kuzibila alubo wakasungwaazigwa amulangizi waBbazu amwanakazi wakwe.

Kali kwaamba zyakachitika, Judith wakati: “Muminyaka iili 3, ndakabotelwa kugwasya bantu bali 4 kuti babbabbatizigwe.” Mpawo Judith wakazoobeleka kali payona uuyandikana amulumi wakwe Sam-Castel. Lino, bali mumulimu wabbazu. Pesi niinzi chakachitika kuli wisi? Judith abamumpuli yakulimbabo bakazoojana chibbadela kunze aanyika chakabbadalila wisi kuti a-opaletwe. Zilabotezya kuti ku-opaletwa kwakazwidilila.

Umwi mukwesu uutegwa Victor wakalongela kuCanada. Naakabala Ngaziyakulinda yakali kwaambuula atala alwiiyo luli aajulu, wakayeeya atala anzyaakali kuchita. Wakaleka kwiiya kuyunivesiti mpawo wakasaanguna kwiiya mulimu wamaboko wakali kutola chiindi chifwiifwi. Wakati: “Eezi zyakandigwasya kuti ndifwambaane kujana mulimu akuti ndichite nzindakali kuyanda, kupayona.” Mukuya kwachiindi Victor wakazookwata Caroline, mpawo bakazoovakacha kuCameroon. Nibakaswayide mutabi wakuCameroon, bakasungwaazigwa kuti, kuti kazichita bazoobelekele kuCameroon. Victor wakati: “Twakabona kuti tatukwe kaambo kakonzya kutukachizya kulonga mbukunga twakali kupona buumi buuba kale, nkinkaako twakazumina.” Nikuba kuti Caroline wakali kuchiswa-chiswa, bakasala kulonga.

Victor aCaroline bakazoobeleka kabali mapayona aachiindi choonse kuchitila kuti bagwasye bantu biingi bali aachiyandisyo. Kumasaangunino, bakakonzya kubelesya mali njibakabambide. Mpawo bakazooyinka kuCanada kuyoobeleka kwamyeezi miche, eezi zyakabagwasya kuti babweede lubo kuCameroon kuti bakayinkilile kunembo kabapayona. Bakajana zilongezyoonzi? Bakanjila Chikolo chaBakambawusi baBwaami, bakabeleka kabali mapayona aayandikana alubo lino bali mumulimu wakuyaka. Victor wakati: “Kusiya buumi bubotu mbutwakali kupona kwakapa kuti tubone Jehova mbaakatugwasya.”

Mu2002, Alain wakali kwiiya kuyunivesiti iili kuGermany wakabala kapepa kakubala kati Nobakubusi—Ino Ncinzi Ncomuyoocita Mubuumi Bwanu? Nzyaakabala zyakapa kuti achinche makanze aakwe. Mu2006 wakanjila Cikolo Cakwiiya Mulimo mpawo wakakumbilwa kuti akabelekele kuCameroon kuli mbabo.

KuCameroon, Alain wakajana mulimu ngwaakali kubeleka amwi mazuba. Mukuya kwachiindi, wakazoojana mulimu wakali kumufozya mali nyingi pesi wakali kukataazikana kuti mulimu ooyu ulapa kuti atachiti zyiingi mumulimu wakukambawuka. Chiindi naakatambwa kuti abe payona uuyandikana taakawaya-waya pe kuzumina. Bbosi wakwe wakeezya kumuyungizizya mali pesi Alain wakakaka. Mukuya kwachiindi wakazookwata Stéphanie wakali wakkala kuFrance kwaminyaka. Mbuyumu-yumuunzi mbwakaswaana Stéphanie naakabweeda kuCameroon?

Stéphanie wakati: “Ndakatalika kuchiswa-chiswa akaambo kakuchincha kwabwiime bwakunze, chakulya amaponeno pesi ndakajana minsamu, lino ndakaba kabotu.” Alain aStéphanie bakajana zilongezyo akaambo kakulisimya kwabo. Alain wakati: “Chiindi nitwakaya kukukambawuka kubusena buli kule loko butegwa Katé, twakajana bantu biingi bakali kuyanda kwiiya Bbayibbele. Mukuya  kwachiindi twakazoosaanguna kwiiya Bbayibbele ambabo katubelesya mafooni. Bantu babili akati kabantu mbitwakali kwiiyaabo bakabbabbatizigwa mpawo kwakapangwa kabunga kabasikupupulula.” Stéphanie wakayungizya kuti: “Takwe chintu chindibotezya kwiinda kuyiisya bantu kusikila balipeda kuli Jehova. Akaambo kakubelekela ookuno tulookuchijana chilongezyo eechi.” Lino Alain aStéphanie bali mumulimu wabbazu.

Gisèle wakabbabbatizigwa kumwi kali kwiiya kuba dokotela kuItaly. Chikozyano chamapayona bakamuyiisya chakamusika amoyo nkaambo bakali kupona buumi buuba, mpawo wakayanda kuti achite zyiingi mumulimu wakukambawuka. Nkinkaako Gisèle wakaba payona wachiindi choonse kumwi kali kuchikolo.

Gisèle wakali aachiyandisyo chakubweeda kuCameroon kuti akachite zyiingi mumulimu waJehova, pesi kuli zyakali kumukataazya. Wakati: “Ndakeelede kulipeda kusweekelwa acheelelo changu chakukkala kuItaly zili aamulawu akusiya beenzuma abamumpuli kuItaly.” Nikuba boobo, muMay 2016, Gisèle wakabweeda kuCameroon.

Mukuya kwachiindi wakazookwatwa aLéonce, mpawo mutabi wakuCameroon wakabakumbila kuti bayinke kuAyos, dolopo lyakali kuyanda basikupupulula.

Bwakali biyeni buumi kuAyos? Gisèle wakati: “Kwakali kukkala kakutakwe magesi kwamviki zimwi alubo tetwakali kukonzya pe kuchajisya mafooni eesu. Eezi zyakali kupa kuti akkale kwachiindi kaatabeleki pe. Ndakayiya kujika kandibelesya nkuni mpawo twakali kwiinka kukuteka maanzi mansiku katubelesya mabbara amatochi nkaambo nga takukwe bantu pe kuchikala.” Niinzi chakabagwasya kuti balisimye? Gisèle wakati: “Twakagwasigwa aamuuya uusalala, kusungwaazyania amulumaangu alubo beenzuma abamumpuli bakali kutusungwaazya akutupa mali chimwi chiindi.”

Gisèle ulikubotelwa na akaambo kakubweeda kuli mbabo kuCameroon? Wakati: “Iiyi! Ndili kubotelwa loko.” Alubo wakayungizya kuti: “Kumasaangunino twakali kukataazikana akumana manguzu, pesi kuzwa nitwakazunda buyumu-yumu oobo ime amulumaangu twakabona kuti twakachita nzitwakeelede kuchita. Tulamusyoma Jehova alubo tulimvwa katuli afwiifwi loko anguwe.” Léonce aGisèle bakanjila Chikolo chaBakambawusi baBwaami alubo lino mapayona aayandikana aachiindi chifwiifwi.

Mbuli basikuzuba baswi balisimya nikuba kuti baswaanana abuyumu-yumu kuti bakonzye kujata baswi biingi, bantu banga babweeda kuli mbabo balalipeda kuti bakagwasye bantu bayanda kumvwa makani mabotu. Zili antanganana kuti Jehova taakabalubi pe basikupupulula aaba babeleka changuzu akaambo kaluyando ndubakatondeezya kuzina lyakwe. (Neh. 5:19; Heb. 6:10) Kuti kukkala kunze aanyika mpawo kulindinywe kakuyanda basikupupulula biingi, kujana wakonzya na kubweeda? Kuti wachita oobo, uyoojana zilongezyo.—Tus. 10:22.