1-2. Niinzi zipa kuti tutondeezyanie luyando lutamani?

KULI twaambo tubotu tupa kuti tutondeezyanie luyando lutamani. Twaambo ooto tujanika mubbuku lyaTusimpi. Twaamba kuti: “Luyando lutamani alimwi akusyomeka zitakusiyi pe. . . . Aboobo ulakkomaninwa alimwi akuba abupampu bwini-bwini mumeso aa Leza alimwi aabantu.” “Muntu uulaaluyando lutamani ulaliletela mpindu.” “Kufwumbwa uusungweede kutobela bululami aluyando lutamani uyoojana buumi.”​—Tus. 3:3, 4; 11:17, makani aamunsi.; 21:21.

² Tusimpi ootu twaamba twaambo tutatu tutupa kuti tutondeezyanie luyando lutamani. Kaambo kakusaanguna, kuti twatondeezya bamwi luyando lutamani Leza ulatubona katuyandikana. Kachibili, kutondeezya luyando lutamani kugwasya ndiswe. Muchikozyano, tujana beenzuma bachoonzyo banooli aandiswe chiindi choonse. Alubo kachitatu, tuyoojana zilongezyo zibotu zili kunembo ziswaanizya buumi butamani. Nisimpe, kuli twaambo tubotu tupa kuti tuswiilile majwi aaJehova aakuti: “Amube aluyando lutamani alimwi aluse kuli umwi amweenzinyina.”​—Zek. 7:9.

3. Njiili mibuzyo njitutasandule muchiiyo eechi?

³ Muchiiyo eechi, tulasandula mibuzyo iili 4 yakuti: Mbaani mbitweelede kutondeezya luyando lutamani? Twiiyaanzi kuzwa mubbuku lyaRute atala akutondeezya luyando lutamani? Nga tulalutondeezya biyeni luyando lutamani mazubaano? Niinzi nzibajana bantu batondeezya luyando lutamani?

4. Nga tulachitobelezya biyeni chikozyano chaJehova chakutondeezya luyando lutamani? (Marko 10:29, 30)

⁴ Mbuli mbutwakayiya muchiiyo chayinda, Jehova utondeezya luyando lutamani kubantu bamuyanda abamukomba luzutu. (Dan. 9:4) Tuyanda ‘kwiiya Leza mbotuli bana bayandwa.’ (Ef. 5:1) Eezi zyaamba kuti tweelede kutondeezya luyando lutamani kubakwesu abachizi bamumbungano.—Bala Marko 10:29, 30.

5-6. Luyando lusiyene biyeni aluyando lutamani? Amba chikozyano.

⁵ Kuti twamvwisisisya kabotu kuti luyando lutamani niinzi, ziyootugwasya kuti tulutondeezye bakombima. Kwalino, atubone kuti luyando lutamani aluyando zisiyene biyeni.

 ⁶ Chimwi chikozyano chikonzya kutugwasya kubona kuti tulakonzya kutondeezya luyando kumuntu woonse, ncheecho chiswaanizya Pawulu ankamu yabantu bakachitikilwa ntenda yamulwizi. Mayuwe akabatontela kunkomwe yakasuwa kaMelita. Nikuba kuti bantu bakuMelita teebakalibambilide pe kubagwasya pesi bakabatambula alubo bakabatondeezya luyando. (Mil. 28:2, 7) Kubatambula nkubakachita, kwakali kutondeezya kuti bali aaluzyalo nikuba kuti teebakabazi pe bantu aaba. Nzibakachita bantu bakuMelita, kwakali kutondeezya luyando lutamani na? Peepe, bakatondeezya luyando luzutu.

7-8. (a) Niinzi chipa kuti muntu atondeezye luyando lutamani? (b) Nkamboonzi nituyanda kulanga amwi mavesi aajanika mubbuku lyaRute?

⁷  Mufuka 6 twabona kuti kuli musiyano aakati kaluyando aluyando lutamani. Musiyano uyeeme akaambo kapa kuti muntu atondeezye buntu oobu. Nkamboonzi bakombi baLeza bachiindi nibakali kutondeezya luyando lutamani? Nkaambo bakali kuyanda kuchita oobo kutali kuti bakeelede kuchita oobo. Muchikozyano, Davida wakali kuyanda amoyo wakwe woonse kutondeezya mweenzinyina Jonatani luyando lutamani nikuba kuti wisi waJonatani wakali kuyanda kumujaya. Kakuli kwayinda chiindi Jonatani kali wafwa, Davida wakazumanana kutondeezya luyando lutamani kumwana waJonatani, Mefibboseti.​—1 Sam. 20:9, 14, 15; 2 Sam. 4:4; 8:15; 9:1, 6, 7.

⁸ Tulakonzya kwiiya zyiingi atala aluyando lutamani kuti twalanga-langa amwi mavesi aajanika mubbuku lyaRute. Zikozyano zyabantu baambidwe mubbuku eeli zituyisyaanzi atala aluyando lutamani? Nga tulazibelesya biyeni zyiiyo nzitujana mumbungano yesu? *

9. Nkamboonzi Nawomi nakayeeya kuti Jehova nguwe wakali kumulwana?

⁹ Mubbuku lyaRute tubala atala alwaano lwaNawomi amukamwana wakwe Rute amwaalumi wakali kuyoowa Leza uutegwa Bbowazi. Bbowazi wakali bbululu wamulumi waNawomi. MuIsrayeli nimwakaba nzala, Nawomi, mulumaakwe abana babo balombe babili bakalongela kuMowabbu. Nibakali kuMowabbu, mulumi waNawomi wakafwa. Bana babo bakazookwata pesi chuusisya nchakuti ambabo bakazoofwa. (Rut. 1:3-5; 2:1) Zyakachitika eezi zyakamumana manguzu Nawomi. Nawomi wakakataazikana loko zyakuti wakasika mpayeeya kuti Jehova nguwe wakali kumulwana. Mvwa nzyakaamba zitondeezya mbaakali kulimvwa atala aLeza, wakati: “Janza lya Jehova lyandibukila.” “Singuzuzyoonse walekela kuti buumi bundiyumine kapati.” Alubo wakati: “Jehova wandilwana alimwi  Singuzuzyoonse nguwandiletela mapenzi.”​—Rut. 1:13, 20, 21.

10. Jehova wakamvwa biyeni atala amajwi aaNawomi alubo niinzi nzyaakachita?

¹⁰ Jehova wakamvwa biyeni atala amajwi ngakaamba Nawomi? Jehova taakaleka pe kumugwasya Nawomi alubo wakamufwida luzyalo. Jehova ulamvwisisisya kuti “mapenzi alakonzya kumusondosya musongo” naakuti alakonzya kupa kuti achiswe boongo. (Muk. 7:7) Nikuba boobo, Nawomi wakali kuyanda kugwasigwa kuti abone kuti Jehova wakali aanguwe. Leza wakamugwasya biyeni Nawomi? (1 Sam. 2:8) Wakapa kuti Rute amutondeezye luyando lutamani. Rute wakamutondeezya luyando Nawomi kwiinda mukumugwasya kuti atakataazikani loko akuti abe aachoonzyo chakuti Jehova wakali kumuyanda. Twiiyaanzi kuzwa kuchikozyano chaRute?

11. Nkamboonzi bakwesu abachizi biingi nibagwasya bakombinyina bali mumapenzi?

¹¹ Luyando lutamani lupa kuti tugwasye bali mumapenzi. Mbuli Rute mbaakagwasya Nawomi, ambabo bakwesu abachizi biingi mazubaano balikuzumanana kugwasya bakombinyina bali mumapenzi. Balabayanda bakombinyina alubo baleezya kuchita zyoonse nzibakonzya kuti babagwasye. (Tus. 12:25, makani aamunsi.; 24:10) Mwaapostolo Pawulu wakatusungwaazya kuti tuchite oobo chiindi naakaamba kuti: “Amubaumbulizye aabo ibatyompedwe mumoyo, amubagwasye aabo ibatajisi nguzu, akubakkazikila moyo bantu boonse.”—1 Tes. 5:14.

12. Niinzi zimwi nzitukonzya kuchita kuti tugwasye bakombima bali mumapenzi?

¹² Imwi nzila iibeleka loko iikonzya kutugwasya kuti tugwasye bakombima bali mumapenzi, nkubaswiilila akubatondeezya kuti tulabayanda. Jehova ulabotelwa azintu nzulikuchita kuti ugwasye bakombi bakwe bali mumapenzi. (Int. 41:1) Tusimpi 19:17 yaamba kuti: “Ooyo uufwida luzyalo muntu uupengede ukweletesya Jehova, eelyo walo uyoomupa bulumbu akaambo kazintu eezyo nzyacita.”

13. Rute aOlipa bakasala kuchitaanzi alubo Rute wakatondeezya biyeni kuti uli aaluyando lutamani? (Langa chifanikisyo chili achivumbyo.)

¹³ Kulanga-langa zyakachitikila Nawomi chiindi mulumaakwe abana bakwe babili nibakafwa kutugwasya kuti twiiye zyiingi atala aluyando lutamani. Nawomi naakaziba kuti “Jehova wakabayeeya bantu bakwe akubapa cakulya” wakasala kubweeda kuli mbabo. (Rut. 1:6) Nawomi abamukabana bakwe babili bakanjila mulweendo. Kabali munzila, Nawomi wakakombelezya bamukabana bakwe kwaziindi zitatu kuti babweede kuMowabbu. Niinzi zyakachitika? Bbayibbele lyaamba kuti: “Olipa wakamyonta banyinazyala akupiluka. Pele Rute wakakakatila kulimbabo.” (Rut. 1:7-14) Olipa wakachita mbuli mbaakabuzigwa aabayinazyala kuti abweede mpawo wakabweeda. Pesi Rute wakasala kwiinkaamwi abayinazyala. Rute wakali kukonzya  kubweeda kuli mbabo pesi akaambo kakuti wakali aaluyando lutamani, wakasala kuti ayinke aaNawomi kuti akamugwasye. (Rut. 1:16, 17) Nzyaakachita Rute zitondeezya kuti wakali kuyanda kuchita oobo kutali kuti wakeelede kuchita oobo. Alubo zitondeezya kuti wakali aaluyando lutamani. Twiiyaanzi kuzwa kulwaano oolu?

14. (a) Bakwesu abachizi biingi mazubaano bachitobelezya biyeni chikozyano chaRute? (b) Kweendelana alugwalo lwa Bahebrayo 13:16, ngatulamubotezya biyeni Leza?

¹⁴ Luyando lutamani lupa kuti tuchite zyiingi kuti tugwasye bakombima. Mbuli bakombi baJehova bachiindi, bakwesu abachizi biingi mazubaano bakasala kutondeezya bakombinyina luyando lutamani nikuba kuti bamwi teebakabazi pe. Muchikozyano, chiindi nibakaziba kuti kwakachitika mapenzi aalichitikila bakafwambaana kuyanduula makani aakuti nga balagwasilizya biyeni. Kuti umwi mumbungano wanjila mumapenzi, balafwambaana kuyanduula nzila zyakuti bamugwasye azintu nzyayanda. Mbuli maKristu bakuMakkedoniya, baleezya kuchita zyiingi kuti bagwasilizye. Balalipeda kubelesya chiindi chabo azintu zyabo kuti bagwasilizye bakombinyina bali mumapenzi. (2 Kor. 8:3) Jehova ubotelwa loko chiindi nabona bakombi bakwe kabatondeezyania luyando lutamani.​—Bala Bahebrayo 13:16.

15-16. Rute wakatondeezya biyeni kuti taakaleka pe kugwasya Nawomi?

¹⁵ Tulakonzya kujana zyiiyo zyiingi kuzwa kulwaano lwaRute aNawomi. Atubone zimwi zyiiyo.

¹⁶ Utaleki pe kugwasya bamwi. Chiindi Rute naakasala kuti ayinkaamwi aNawomi kuJuda, kumasaangunino Nawomi wakeezya kumukasya. Pesi Rute wakakakatila kwiinkaamwi aNawomi. Niinzi zyakazoochitika? “Naomi naakabona kuti Rute wazumanana kuti baunke limwi, wakaleka kumukombelezya kuti apiluke.”​—Rut. 1:15-18.

17. Niinzi chiyootugwasya kuti tuzumanane kugwasya bakombima?

¹⁷ Chiiyo: Tweelede kuba aamoyo mulamfu kuti tugwasye aabo bali mumapenzi, eezi zyaamba kuti tweelede kuzumanana kuyanduula nzila zyakuti tubagwasye. Muchikozyano, muchizi uuli mumapenzi kumasaangunino ulakonzya kukaka kuti tumugwasye. * Pesi luyando lutamani luyoopa kuti tweezye anzila zyoonse kuti tumugwasye. (Gal. 6:2) Alubo tunooli aachoonzyo chakuti limwi zuba, uyoozumina kugwasigwa aandiswe akuti tumuumbulizye.

18. Niinzi zyakali kukonzya kumunyemya Rute?

¹⁸ Utanyemi pe. Chiindi Nawomi aRute nibakasika kuBbetelehemu, Nawomi wakabonana aabasimayakilane bakwe bachiindi mpawo wakababuzya kuti: “Nindakaunka ndakalizwide, pele Jehova wandipilusya cinkwamaanza.” (Rut. 1:21) Yeeyela kuti Rute wakamvwa biyeni chiindi naakamvwa Nawomi kalikwaamba majwi aaya. Amuyeeye biyo, Rute wakachita zyoonse nzyakonzya kuti agwasye Nawomi, wakalilaamwi aNawomi, wakamuumbulizya alubo bakalaamwi mulweendo kwamazuba miingi. Nikuba kuti Rute wakachita zintu zyoonse eezi, Nawomi wakaamba kuti: “Jehova wandipilusya cinkwamaanza.” Majwi aaya atondeezya kuti Nawomi taakali kuzibona pe nzyaakali kuchita Rute kuti amugwasye. Kweelede kuti eezi zyakamuchisa Rute. Nikuba boobo, wakakakatila kuba aaNawomi.

19. Niinzi chiyootugwasya kuti tugwasye umwi muntu uuli mumapenzi?

 ¹⁹ Chiiyo: Muchizi uuli mumapenzi ulakonzya kwaamba zintu zituchisa nikuba kuti twabeleka changuzu biyeni kuti tumugwasye. Pesi tatweelede kunyema pe. Tuleezya kugwasya muchizi ooyo uuli mumapenzi akukumbila Jehova kuti atugwasye tuyanduule nzila zyakumuumbulizya.​—Tus. 17:17.

20. Niinzi chakapa kuti Rute azumanane kugwasya Nawomi?

²⁰ Sungwaazya muntu uuyanda kusungwaazigwa. Nikuba kuti Rute wakatondeezya Nawomi luyando lutamani pesi anguwe wakali kuyanda kusungwaazigwa. Jehova wakapa kuti Bbowazi amusungwaazye. Bbowazi wakabuzya Rute kuti: “Jehova akulongezye akaambo kamilimo yako, alimwi Jehova Leza wa Israyeli ooyo uuli amababa moojana mayubilo akupe bulumbu bukkwene.” Majwi aaya akamuumbulizya loko Rute. Rute wakasandula Bbowazi kati: “Wanduumbulizya akundiyumya-yumya ndemubelesi wako.” (Rut. 2:12, 13) Majwi ngakaamba Bbowazi akagwasya Rute kuti azumanane kugwasya Nawomi.

21. Kweendelana alugwalo lwa Isaya 32:1, 2, niinzi nzibakonzya kuchita baalu?

²¹ Chiiyo: Bantu batondeezya bamwi luyando lutamani chimwi chiindi ambabo nga bayanda kusungwaazigwa. Mbuli Bbowazi mbaakalumbayizya Rute akaambo kazintu zibotu nzyaakali kuchita kuti agwasye Nawomi, ambabo baalu balakonzya kulumbayizya bakwesu abachizi akaambo kazintu nzibachita kuti bagwasye bakombinyina. Majwi aabo alakonzya kubagwasya kuti bazumanane kugwasya bakombinyina.​—Bala Isaya 32:1, 2.

22-23. Maboneno aaNawomi akachincha biyeni alubo nkamboonzi? (Intembauzyo 136:23, 26)

²² Mukuya kwachiindi, Bbowazi wakazoopa Rute aNawomi zyakulya. (Rut. 2:14-18) Nawomi  wakachitaanzi chiindi Bbowazi naakabapa zyakulya? Nawomi wakati: “Muntu ooyo alongezyegwe a Jehova, walo iwatakakilwa kutondezya luzyalo lwakwe lutamani kubaumi akubafwu.” (Rut. 2:20a) Aawa Nawomi wakachincha maboneno aakwe. Kumasaangunino, wakali kulila kaamba kuti: “Jehova . . . wandilwana,” pesi aachiindi eechi kali kubotelwa wakaamba kuti: ‘Jehova . . . watondeezya luzyalo lwakwe lutamani.’ Niinzi chakapa kuti Nawomi achinche maboneno aakwe?

²³ Kumamanino, Nawomi wakazoosaanguna kubona kuti Jehova wakali aanguwe chiindi choonse. Jehova wakabelesya Rute kuti amugwasye nibakali mulweendo kuya kuJuda. (Rut. 1:16) Alubo Nawomi wakazooziba kuti Jehova wakabelesya Bbowazi kuti abagwasye aachakulya. (Rut. 2:19, 20b) Kweelede kuti Nawomi wakayeeya kuti, ‘Lino ndabona kuti Jehova taakwe naakandisiya pe. Walaandime chiindi choonse.’ (Bala Intembauzyo 136:23, 26.) Kweelede kuti Nawomi wakabotelwa loko nkaambo Rute aBbowazi bakazumanana kumugwasya. Boonse bakabotelwa nkaambo Nawomi wakali wasaanguna lubo kubelekela Jehova amoyo wakwe woonse.

24. Nkamboonzi nitweelede kuzumanana kutondeezya bakombima luyando lutamani?

²⁴ Twayiyaanzi atala aluyando lutamani kuzwa mubbuku lyaRute? Twayiya kuti luyando lutamani lupa kuti tuzumanane kugwasya bakwesu abachizi bali mumapenzi. Alubo lupa kuti tulipede kuchita zyoonse nzitukonzya kuti tubagwasye. Baalu beelede kusungwaazya aabo batondeezya bakombinyina luyando lutamani. Chiindi nitubona bantu bakataazikane kabasaanguna lubo kubelekela Leza kabali kubotelwa zipa kuti andiswe tubotelwe. (Mil. 20:35) Pesi nkaakali kaambo kapati kapa kuti tuzumanane kutondeezya bamwi luyando lutamani? Nkakuti tuyanda kutobelezya Jehova ooyo “uuzwide luyando lutamani” alubo tuyanda kuchita zintu zimubotezya.​—Kul. 34:6; Int. 33:22.