1-2. (a) Njiili mibuzyo njitutasandule? (b) Niinzi chitondeezya kuti Jehova ulaachiyandisyo chipati chakutugwasya?

 JEHOVA ulakonzya kutugwasya kuti tulisimye kubuyumu-yumu mbutuswaana akutugwasya kuti tubotelwe chiindi nitumubelekela. Niinzi nzyachita Jehova kuti atugwasye? Alubo nga tulagwasigwa biyeni alugwasyo ndutujana kuzwa kuli Jehova? Mibuzyo eeyi ilasandulwa muchiiyo eechi. Pesi katutanasandula mibuzyo eeyi, atusandule mubuzyo wakuti: Jehova uli aachiyandisyo na chakuyanda kutugwasya?

² Bbala lyakabelesegwa aamwaapostoli Pawulu mulugwalo ndwaakalembela Mahebberu lilakonzya kutugwasya kuti tusandule mubuzyo ooyu. Pawulu wakalemba kuti: “Jehova nguwe uundigwasya, tandikooyoowa pe. Muntu kujana wandichitaanzi?” (Heb. 13:6) Limwi bbuku lipandulula Bbayibbili lyaamba kuti muvesi eeyi, bbala lyakuti “uundigwasya,” lyaamba muntu uuchijaana kuti akagwasye muntu uukwiilila kugwasigwa. Yezya kubona Jehova kalikuchijaana kuti akavune muntu wanjila mupenzi. Nichoonzyo kuti ulazumina kuti bupanduluzi oobu butondeezya kuti Jehova uli aachiyandisyo chipati loko chakutugwasya. Kwiinda mukugwasigwa aaJehova, tulakonzya kulisimya kumasunko ngituswaana katubotelwa.

3. Nziizili nzila zitatu Jehova nzyabelesya kutugwasya kuti tulisimye katubotelwa?

³ Niinzi nzyachita Jehova kuti atugwasye kuti tulisimye katubotelwa? Kuti tusandule mubuzyo ooyu, atubweede kubbuku lya-Isaya. Nkamboonzi? Bupolofita bwiingi mbwaakazulwidwa kulemba Isaya bulabeleka kubakombi baLeza mazubaano.  Alubo kwaziindi zyiingi, Isaya upandulula Jehova mumajwi mawuba ngitukonzya kumvwisisisya. Muchikozyano, muli Isaya chaandaano 30, wakabelesya zikozyano zibotu loko chiindi naakali kupandulula Jehova mbagwasya bakombi bakwe. Wakalemba kuti Jehova ulatugwasya kwiinda (1) mukutuswiilila amoyo woonse akusandula nkombyo zyesu, (2) mukutuzulwida (3) amukutupa zilongezyo lino amuchiindi chilikunembo. Lino atuzilange-lange nzila eezi zitatu Jehova nzyabelesya kutugwasya.

4. (a) Jehova wakatyeni atala amaJuda bamuchiindi cha-Isaya alubo niinzi nzyaakazumizya kuti zichitike? (b) Jehova wakapa kuti maJuda basyomeka babe aabulangilizi buli? (Isaya 30:18, 19)

⁴ Mumajwi aakusaanguna aali muli Isaya chaandaano 30, Jehova wakaamba maJuda kuti ‘mbana bazangi’ aabo ‘bayungizya cibi kucibi.’ Wakayinkilila kunembo kwaamba kuti: “Aaba bantu mbazangi, . . . ibatayandi kumvwa mulawo wa Jehova.” (Is. 30:1, 9) Akaambo kakuti bantu aaba bakakaka kuswiilila, Isaya wakaambilizya kuti Jehova wakali kuyoozumizya kuti bakaswaanane aamapenzi mayumu. (Is. 30:5, 17; Jer. 25:8-11) Alubo nzizyo biya zyakachitika chiindi bantu bakuBbabbiloni nibakabatola mubuzike. Pesi aakati kamaJuda, kwakali bamwi bakali kusyomeka alubo Isaya wakali aamulumbe wabo wakali kupa bulangilizi. Wakababuzya kuti limwi zuba Jehova wakali kuyoobabweedezya kulimbabo. (Bala Isaya 30:18, 19.) Nzizyo biya zyakachitika. Jehova wakabagwisya mubuzike. Pesi kunununwa kwabo teekwakali kuyoochitika mpawaawo pe. Majwi aakuti “Jehova ulalindila kakkazikide moyo kuti amufwide luzyalo” atondeezya kuti kwakali kuzooyinda chiindi kuti aabo basyomeka bazoonununwe. Ma-Israyeli bakali mubuzike kwaminyaka iili 70 mpawo bamwi bakazoobweeda kuJerusalemu. (Is. 10:21; Jer. 29:10) Nibakabweeda biyo kulimbabo, misozi njibakalaayo nibakali mubuzike yakamana akaambo kakubotelwa.

5. Lugwalo lwa Isaya 30:19 lutugwasya biyeni?

⁵ Mazubaano, tulakonzya kuumbulizigwa amajwi aaya aakuti: “Masimpe uyookufwida luzyalo mbwayakulimvwida buyo jwi lyako lyakulila kuti ugwasyigwe.” (Is. 30:19) Isaya utubuzya kuti Jehova ulatuswiilila chiindi nitulilila kuti atugwasye alubo ulafwambaana kusandula nkombyo zyesu zyakukombelezya. Isaya wakayungizya kuti: “Mbwayakulimvwida buyo uyookuvwiila.” Majwi aaya atuyeezya kuti Taateesu ulaachiyandisyo chakugwasya aabo balilila kugwasigwa aanguwe. Kuziba eezi kulatugwasya kuti tulisimye katubotelwa.

6. Majwi aa-Isaya atondeezya biyeni kuti Jehova uswiilila nkombyo yawumwi awumwi?

⁶ Niinzi zimwi nzitwiiya muvesi eeyi atala ankombyo zyesu? Jehova ulamuswiilila umwi awumwi chiindi nakomba kulinguwe. Nkamboonzi nitwaamba oobo? Muchipanzi chakusaanguna cha-Isaya chaandaano 30, mubelesedwe chikumbatizyosule “mu-” nkaambo Jehova wakali kwaambuula aabakombi bakwe kabali kabunga. Pesi muvesi 19, mubelesedwe chikumbatizyosule “u-” abbala lyakuti “yebo” nkaambo ulikwaambuula aamuntu umwi awumwi. Isaya wakalemba kuti: “Yebo tokalili pe”; “uyookufwida luzyalo”; “uyookuvwiila.” Mbuli mbali Taata siluyando, Jehova tabuzyi mwanaakwe mulombe naakuti musimbi uumanide manguzu kuti, “Sima mbuli mukulana wako naakuti muchizi wako.” Pesi ubona muntu umwi awumwi kumugama alubo uswiilila nkombyo yawumwi awumwi kumugama.—Int. 116:1; Is. 57:15.

7. Isaya aJesu bakatondeezya biyeni kuti tweelede kukkala katukomba kuli Jehova?

 ⁷ Chiindi nitubuzya Leza imwi nkani iilikutukataazya, Jehova ulakonzya kufwambaana kusandula kwiinda mukutupa manguzu aakuti tulisimye. Alubo kuti penzi eelyo teelyafwambaana kumana mbuli mbutwali kulangilila, atwiinkilile kunembo kukumbila Jehova kuti atupe manguzu, tukonzye kulisimya. Nzizyo nzyayanda kuti tuchite. Eezi tulazibona mumajwi ngaakaamba Isaya aakuti: “Mutamuleki pe [Jehova].” (Is. 62:7) Eezi zyaambaanzi? Tweelede kukkala katukomba kuli Jehova, kube mbuli kuti tatumupi mweenya wakuti alyookezye. Majwi aa-Isaya atuyeezya zikozyano zyaJesu zili atala ankombyo zili muli Lukka 11:8-10, 13. Mulugwalo oolu, Jesu utusungwaazya kuti ‘tumunangatile’ Jehova nitukomba akuti ‘twiinkilile kunembo kukumbila’ muuya uusalala. Tulakonzya kukumbila Jehova kuti atuzulwide kuchitila kuti tusale kabotu.

8. Majwi aali mulugwalo lwa Isaya 30:20, 21 akazuzikizigwa biyeni chiindi?

⁸ Bala Isaya 30:20, 21. Masooja aakuBbabbiloni naakazyunguluka Jerusalemu kwamunyaka ahafu, mapenzi ngibakaswaana bantu akaba mbuli chakulya amaanzi. Pesi kweendelana avesi 20 a21, Jehova wakasyomezya maJuda kuti, kuti basanduka akuchincha buntu bwabo, wakali kuyoobafutula. Isaya wakaamba kuti Jehova ‘Muyiisi Mupati’ alubo wakasyomezya maJuda kuti Jehova wakali kuyoobayiisya mbubakeelede kumukomba. Majwi aayo akazuzikizigwa chiindi maJuda nibakazwa mubuzike. Jehova wakatondeezya kuti Muyiisi Mupati kulimbabo alubo kabazulwidwa aanguwe, bakombi bakwe bakazwidilila mukubusilizya bukombi bwakasimpe. Tulabotelwa nkaambo Jehova Muyiisi wesu Mupati mazubaano.

9. Njiili nzila yakusaanguna Jehova njatuzulwidaayo mazubaano?

⁹ Isaya wakayinkilila kunembo kubelesya zikozyano, wakaamba kuti iswe tuli basikwiiya balikuyiisigwa aaJehova munzila zibili. Yakusaanguna, Isaya wakati: “Muyoomubona [Muyiisi] wanu Mupati ameso aanu.” Muchikozyano eechi, Isaya ulikwaamba kuti Muyiisi uliimvwi kunembo lyabasikwiiya bakwe. Tuli aachilongezyo chakuyiisigwa aaJehova mazubaano. Jehova utuyiisya biyeni? Ulatuyiisya kabelesya mbunga yakwe. Tulumba loko amalayilile alaantanganana ngitujana kuzwa kumbunga yakwe. Malayilile ngitujana kumiswaangano yambungano, kumiswaangano yabbooma,  mumabbuku eesu, muBroadcasting amuli zimwi nzila alatugwasya kuti tulisimye katubotelwa muziindi ziyumu.

10. Muunzilaanzi mutumvwa “jwi kusyule [lyesu]”?

¹⁰ Isaya wakazoowamba nzila yachibili Jehova njatuyiisyaayo, wakati: “Matwi aako ayoomvwa jwi kusyule lyako.” Mupolofita ooyu wakali kwaamba kuti Jehova uli mbuli muyiisi uulikweenda musule lyabasikwiiya bakwe, kalikutondeka kunembo lyabo alubo kalikubapa malayilile nibalikweenda. Mazubaano, jwi lyaLeza tulalimvwa musuleesu. Biyeni? Majwi aaLeza akalembwa chiindi loko muBbayibbili, nkinkaako chiindi nitubala Bbayibbili, ngakuli mbuli kuti tulikumvwa jwi lyaLeza kalili kuzwida musuleesu.—Is. 51:4.

11. Niinzi nzitweelede kuchita kuti tulisimye katubotelwa alubo nkamboonzi?

¹¹ Nga tulagwasigwa biyeni amalayilile ngatupa Jehova kabelesya mbunga yakwe aJwi lyakwe? Isaya wakaamba zintu zibili. Chakusaanguna wakati, “njeeyi nzila.” Chachibili wakati, “amweende mulinjiyo.” (Is. 30:21) Tatweelede kugolela aakuziba “nzila” luzutu. Pesi tweelede ‘kweendela mulinjiyo.’ Jwi lyaJehova azintu zipandululwa aambunga yakwe zitugwasya kuti tuzibe zintu nzyayanda Jehova kuti tuchite. Alubo tuyiisigwa mbutukonzya kubelesya zintu nzitwiiya. Tweelede kuchita zintu eezi zibili, kwiiya akubelesya nzitwiiya kuchitila kuti tukonzye kulisimya katubotelwa mumulimu waJehova. Kuti twachita oobo, tulaba aachoonzyo chakuti Jehova ulatulongezya.

12. Kweendelana alugwalo lwa Isaya 30:23-26, Jehova wakali kuyoobalongezya biyeni bakombi bakwe?

¹² Bala Isaya 30:23-26. Bupolofita oobu bwakazuzikizigwa biyeni kumaJuda bakabweeda kunyika yama-Israyeli nibakazwa mubuzike? Bakajana zilongezyo zyiingi zyakumubili azyamubukombi. Jehova wakabalongezya bakombi bakwe achakulya chiingi loko chakumubili. Kwiinda zyoonse, wakabalongezya aachakulya chamubukombi chiingi akubagwasya kuti babusilizye bukombi bwakasimpe. Zilongezyo zyamubukombi nzibakajana bakombi baLeza aachiindi eecho zyakali zyiingi loko kwiinda nzibakalaazyo kumasaangunino. Mbuli mbukutondeezedwe muvesi 26, Jehova wakabamunikila kuti bamvwisisisye Jwi lyakwe. (Is. 60:2) Zilongezyo nzibakajana kuzwa kuli Jehova zyakabagwasya kuti bayinkilile kunembo kumubelekela kababotelwa akulimvwa kabali aanguzu “akaambo kakukkomana kwamyoyo yabo.”—Is. 65:14.

13. Bupolofita buli atala akubusilizigwa kwabukombi bwakasimpe bulikuzuzikizigwa biyeni mazubaano?

 ¹³ Bupolofita buli atala akubusilizigwa kwabukombi bwakasimpe bulikuzuzikizigwa na mazubaano? Iiyi. Munzilaanzi? Kuzwa mu1919 C.E., mamiliyoni aabantu tabachili bazike baBbabbiloni Mupati pe, mbunga yabukombi bwakubeja. Bakazulwidwa kuti bayinke kunyika mbotu loko yiinda Nyika Yakasyomezedwe ma-Israyeli. Bakanjila muparadayizi yakumuuya. (Is. 51:3; 66:8) Paradayizi yakumuuya niinzi?

14. Paradayizi yakumuuya niinzi alubo mbaani bakkala muparadayizi eeyi mazubaano? (Langa Bupanduluzi Bwamabala.)

¹⁴ Kuzwa mu1919 C.E., bananikidwe balikubotelwa kupona muparadayizi yakumuuya. b Aabo bali aabulangilizi bwakupona aanyika nkukwaamba ‘bazimwi mbelele’ bakanjila muparadayizi eeyi yakumuuya alubo balikujana zilongezyo zyiingi kuzwa kuli Jehova.—Joh. 10:16; Is. 25:6; 65:13.

15. Paradayizi yakumuuya ili kuli?

¹⁵ Paradayizi yakumuuya ili kuli mazubaano? Bakombi baJehova balajanika munyika yoonse. Nkinkaako, paradayizi yakumuuya eeyo ilajanika munyika yoonse. Mazubaano, kufumbwa nkutukkala, tulakonzya kuba muparadayizi yakumuuya kuti katuchita zyoonse nzitukonzya kuti tusumpule bukombi bwakasimpe.

16. Niinzi nzitweelede kuchita kuti twiinkilile kunembo kubona bubotu bwaparadayizi yakumuuya?

¹⁶ Kuti tukkale katuli muparadayizi yakumuuya, zimwi nzitweelede kuchita nkukkala katwiibona kayiyandikana mbungano yachiKkristu iili munyika yoonse. Nga tulazichita biyeni eezi? Tweelede kubona bubotu bwabaabo bali muparadayizi eeyi kutali kulanga kutamaninina kwabo. (Joh. 17:20, 21) Nkamboonzi nikuyandikana kuchita oobo? Yeeya atala achikozyano chitobela. Nitubona minsamu iisiyene-siyene, nga tulanga bubotu bwayo. Munzila iikozyenie, muparadayizi yakumuuya muli bantu basiyene-siyene  bali mbuli minsamu. (Is. 44:4; 61:3) Tweelede kuba aachoonzyo chakuti tulikwiinkilila kunembo kulanga bubotu bwaminsamu yoonse naakuti mbungano yoonse kutali kulanga kutamaninina kwamuntu umwi awumwi uuli mumbungano. Tatweelede kuzumizya kutamaninina kwesu naakuti kwabamwi kuti kutukachizye kubona bubotu bwambungano yachiKkristu iijisini iili munyika yoonse.

17. Niinzi nzyayelede kuchita umwi awumwi kuti mbungano ikkale kayijisini?

¹⁷ Niinzi nzyayelede kuchita umwi awumwi kuti mbungano ikkale kayijisini? Tweelede kupa kuti kube luumuno. (Mt. 5:9; Rom. 12:18) Chiindi choonse nituchita zintu zipa kuti tube aaluumuno abamwi mumbungano, ngatuli kubotya paradayizi yakumuuya. Tutalubi kuti Jehova wakakwela umwi awumwi uuli muparadayizi yakumuuya kuti aze mubukombi bwakasimpe. (Joh. 6:44) Yeeyela kubotelwa nkwabaako Jehova chiindi natubona katuli kubeleka changuzu kuti kube luumuno akujatana aakati kabakombi bakwe aabo mbabona kuti balayandikana!—Is. 26:3; Hag. 2:7.

18. Niinzi nzitweelede kuyeeyesesya alubo nkamboonzi?

¹⁸ Nga tulagwasigwa biyeni azilongezyo nzitujana tubakombi baLeza? Tulakonzya kuyeeyesesya atala azintu nzitwiiya muJwi lyaLeza amumabbuku eesu. Kubala, kuyanduulisisya akuyeeyesesya kulatugwasya kuti tubelekele kuba aabuntu bwachiKkristu bupa kuti tutondeezye ‘luyando lwabuzyalwama’ akuti ‘tuyandane loko’ mumbungano. (Rom. 12:10) Chiindi nituyeeyesesya atala azilongezyo nzitulaazyo lino, ngatuli kusimya bweenzuma mbutulaabo aJehova. Alubo kuyeeyesesya atala azilongezyo nzyatubambilide Jehova, kupa kuti tukkale katumubelekela kukabe kutamani. Zyoonse eezi zipa kuti tubotelwe nitubelekela Jehova lino.

19. (a) Kweendelana alugwalo lwa Isaya 30:18, tulakonzya kuba aachoonzyo chanzi? (b) Niinzi chikonzya kutugwasya kuti tulisimye katubotelwa?

¹⁹ Jehova ‘uyoonyamuka’ kuti atuvune chiindi nayoonyonyoona nyika eeyi mbi. (Is. 30:18) Tulaachoonzyo chakuti Jehova, “Leza uubeteka kabotu” takalekeli nyika yaSaatani kuti ibewo kwachiindi chilamfu kwiinda chiindi nchiyelede kubawo. (Is. 25:9) Tulamulindila Jehova katuli aamoyo mulamfu kuti buzuba oobo bwakufutulwa kwesu buzoosike. Kwalino, atube aamakanze akwiinkilila kunembo kwiibona kayiyandikana nkombyo, kubala Jwi lyaLeza akubelesya nzitwiiya alubo tuyeeyesesye atala azilongezyo nzitujana. Kuti twachita oobo, Jehova ulatugwasya kuti tulisimye katubotelwa chiindi nitumukomba.