CHIIYO 47
Kutabi Chintu Chitwaanzaania Kuluyando lwaJehova
“Mebo ndisyoma nduwe, O Jehova.”—INT. 31:14.
LWIIMBO 122 Amukakatile, Mutazungaani Pe!
ZITAYIIGWE a
1. Tuzi biyeni kuti Jehova uyanda kuswena aafwiifwi andiswe?
JEHOVA ututamba kuti tuswene aafwiifwi anguwe. (Jak. 4:8) Uyanda kuti abe Leza wesu, Taateesu aMweenzuma. Ulazisandula nkombyo zyesu alubo ulatugwasya muziindi ziyumu. Alubo ubelesya mbunga yakwe kuti atuyiisye akutukwabilila. Pesi niinzi nzitweelede kuchita kuti tuswene aafwiifwi aJehova?
2. Niinzi nzitweelede kuchita kuti tuswene aafwiifwi aJehova?
2 Tulakonzya kuswena aafwiifwi aJehova kwiinda mukukomba kulinguwe, kubala Jwi lyakwe akuyeeyesesya. Kuti twachita zintu eezi, tulaswena aafwiifwi anguwe akumuyanda. Tulaachiyandisyo chakumuswiilila akumupa bulemu mbwayelede. (Chi. 4:11) Kuti twayungizya luzibo lwesu atala aJehova, kulatuubila kumusyoma kuswaanizya ambunga njabelesya kuti atugwasye.
3. Dyabbulosi weezya biyeni kutwaanzaania aaJehova, pesi niinzi zikonzya kutugwasya kuti tutasiyi Jehova ambunga yakwe? (Intembauzyo 31:13, 14)
3 Dyabbulosi ulikweezya kupa kuti twaanzaane aaJehova, kapati nituli mumapenzi. Uzichita biyeni? Uleezya kuti tuleke kusyoma Jehova ambunga yakwe mbichaani-mbichaani. Pesi tulakonzya kuzikazya nzila zyakwe. Kuti lusyomo lwesu kalusimide alubo katumusyoma Jehova amoyo wesu woonse, tatukamusiyi pe Leza ambunga yakwe.—Bala Intembauzyo 31:13, 14.
4. Tulalanga-langaanzi muchiiyo eechi?
4 Muchiiyo eechi, tulabona buyumu-yumu butatu buzwa aanze aambungano bukonzya kupa kuti tuleke kusyoma Jehova ambunga yakwe. Buyumu-yumu oobu kujana bwatwaanzaania biyeni aJehova? Niinzi nzitweelede kuchita kuti tulwane nzila zyaSaatani?
CHIINDI NITULI MUBUYUMU-YUMU
5. Muunzilaanzi buyumu-yumu mubukonzya kupa kuti tuleke kusyoma Jehova ambunga yakwe?
5 Chimwi chiindi nga twaswaana buyumu-yumu buli mbuli kukazigwa mumpuli naakuti kumaninwa mulimu. Buyumu-yumu buli boobu, kujana bwapa biyeni kuti tuleke kusyoma Jehova ambunga yakwe akuti twaanzaane anguwe? Kuti twaba mupenzi kwachiindi chilamfu, bulangilizi bwesu bulamana alubo tulakonzya kulimvwa katutagwasyi pe. Muziindi zili boobu, Saatani nga wajana mweenya kwiinda mukupa kuti tubonaanga Jehova takwe ndaba pe andiswe. Dyabbulosi uyanda kuti tubonaanga Jehova ambunga yakwe mbabo balikupa kuti buumi butuyumine. Zintu zili boobu, zyakachitika chiindi ma-Israyeli nibakali mubuzike ku-Ijipita. Kumatalikilo, ma-Israyeli bakali kusyoma kuti Jehova nguwe wakali wasala Mozesi a-Aroni kuti babaangunune kuzwa mubuzike. (Kul. 4:29-31) Pesi chiindi Faro naakapa kuti buumi bubayumine, bakasaanguna kusola Mozesi a-Aroni kabaamba kuti: “Mwapa kuti Farao ababelesi bakwe batusulaike alimwi mwabikka panga mujanza lyabo kuti batujaye.” (Kul. 5:19-21) Bakasola babelesi baLeza basyomeka. Eezi zilawusisya! Kuti kuli waba aachiindi chilamfu kuli mumapenzi, niinzi chikonzya kukugwasya kuti wiinkilile kunembo kusyoma Jehova ambunga yakwe?
6. Nzyaakachita Habbakkukku naakaswaana mapenzi zituyiisyaanzi? (Habakuku 3:17-19)
6 Buzya Jehova munkombyo mapenzi woonse aali mumoyo wako, ulindile nguwe kuti akugwasye. Mupolofita Habbakkukku wakaswaana mapenzi miingi loko. Aali chimwi chiindi, taakachilikwe choonzyo pe chakuti Jehova wakachili aandaba anguwe. Nkinkaako, wakakomba akubuzya Jehova zintu zyoonse zyakali kumukataazya. Wakaamba kuti: “O Jehova, ino ndilalilila lugwasyo kwaciindi cilamfwu buti yebo kotandimvwi? . . . Nkaambo nzi ncolekelela mapenzi kuti kaacitika?” (Hab. 1:2, 3) Jehova wakayisandula nkombyo eeyo yamubelesi wakwe uusyomeka. (Hab. 2:2, 3) Habbakkukku naakayeeyesesya atala amilimu yaJehova yalufutuko, wakasaanguna lubo kubotelwa. Wakaba aachoonzyo chakuti Jehova wakali aandaba anguwe akuti wakali kuzoomugwasya kuti alisimye mumapenzi. (Bala Habakuku 3:17-19.) Twiiyaanzi kunkani eeyi? Kuti twaswaana mapenzi, atukombe kuli Jehova tumubuzye mbutulimvwa, mpawo tulangile kulinguwe kuti atugwasye. Kuti twachita oobo, tulakonzya kuba aachoonzyo chakuti Jehova uyootupa manguzu aakuti tulisimye. Alubo kuti twabona mbatugwasya Jehova, lusyomo lwesu lulasima.
7. Umwi bbululu wamuchizi Shirley wakeezya kuchita biyeni, alubo niinzi chakamugwasya kuti ataleki pe kusyoma Jehova?
7 Kkala kuchita zintu zyabukombi. Kuba aapulogilamu yazintu zyabukombi kwakamugwasya loko muchizi Shirley uukkala Papua New Guinea, chiindi naakaswaana mapenzi. b Mpuli yakulimbabo yakali kufwaba loko alubo aali chimwi chiindi kwakali kubayumina kujana chakulya. Umwi bbululu wabo wakeezya kupa kuti aleke kusyoma Jehova. Bbululu ooyo wakamubuzya kuti: “Waamba kuti muuya waLeza ulikukugwasya, ani ulikukugwasya biyeni loko kulikufwaba? Ulikumana chiindi chako kulikukambawuka.” Muchizi Shirley wakaamba kuti: “Ndakalibuzya kuti: Leza ulaandaba na andiswe?’ Ndakakomba kuli Jehova mpawaawo alubo ndakamubuzya zintu zyoonse nzindakali kuyeeya. Ndakayinkilila kunembo kubala Bbayibbili amabbuku eesu, alubo teendakaleka pe kuya kukukambawuka akunjila miswaangano.” Muchiindi chifwiifwi biyo, muchizi Shirley wakasaanguna kubona nzila Jehova njaakali kulangania mpuli yabo. Mpuli yabo teeyakali koona aanzala pe, bakali kubotelwa. Muchizi Shirley wakaamba kuti: “Ndakabona Jehova mbaakasandula nkombyo zyangu.” (1 Tim. 6:6-8) Kuti wayinkilila kunembo apulogilamu yako yazintu zyabukombi, tukalekeli buyumu-yumu akuzumbuuzya kuti zikwaanzaanie aaJehova.
CHIINDI BAKWESU BAZULWIDA NIBAJATWA MUNZILA IITALI KABOTU
8. Niinzi zikonzya kuchitikila bakwesu bazulwida mumbunga yaJehova?
8 Basinkondoma balakonzya kubelesya nzila zibelesegwa mazubaano kupupulula makani kuti bamwaye makani aakubeja atala abakwesu bazulwida mumbunga yaJehova. (Int. 31:13) Bamwi bakwesu bazulwida bakasungwa akutamikizigwa milandu njibatazi. MaKkristu bamumwaanda wakusaanguna bakaswaana chiimo chikozyenie chiindi mwaapostoli Pawulu naakatamikizigwa makani aakubeja akusungwa. Bakombinyina bakachita biyeni?
9. Bamwi maKkristu bakachita biyeni chiindi Pawulu naakasungwa?
9 Bamwi maKkristu bamumwaanda wakusaanguna bakaleka kugwasya Pawulu chiindi naakasungwa kuRoma. (2 Tim. 1:8, 15) Nkamboonzi? Bakali aabweeme na akaambo kakuti luundu lwakali kubona Pawulu mbuli chigwebenga? (2 Tim. 2:8, 9) Bakali kuyoowa kuti ambabo balakonzya kupenzegwa na? Kufumbwa twaambo twakapede kuti baleke kumugwasya, mubonaanga Pawulu wakamvwa biyeni? Amuyeeye biyo, Pawulu wakali walisimya mumapenzi miingi alubo wakali wabikka buumi bwakwe mungozi akaambo kambabo. (Mil. 20:18-21; 2 Kor. 1:8) Tatuyandi kuba mbuli baabo bakamufutatila Pawulu chiindi naakali kuyanda kugwasigwa. Niinzi nzitweelede kuyeeya chiindi nibapenzegwa bakwesu bazulwida?
10. Niinzi nzitweelede kuyeeya chiindi bakwesu bazulwida nibapenzegwa alubo nkamboonzi?
10 Tweelede kuyeeya kuti nkamboonzi nitupenzegwa akuti ngwani uupa kuti tupenzegwe. Lugwalo lwa 2 Timoti 3:12 lwaamba kuti: “Aabo boonse bayanda kupona kweendelana akulipeda kwabo kuli Leza kabalaamwi aKkristu Jesu, ambabo bazoopenzegwa.” Tazyeelede kutugambya pe kuti Saatani uteyede bakwesu bazulwida. Nchayanda nkumaninsya lusyomo lwabakwesu aaba akupa kuti andiswe tuyoowe.—1 Pet. 5:8.
Nikuba kuti Pawulu wakalisungidwe, Onesiforo taakayoowa pe kumugwasya. Mazubaano, bakwesu abachizi bagwasya bakombinyina basungidwe, mbuli mbukutondeezedwe muchifanikisyo eechi (Langa fuka 11-12)
11. Twiiyaanzi kuzintu zyakachitwa aa-Onesiforo? (2 Timoti 1:16-18)
11 Atwiinkilile kunembo kugwasilizya bakwesu bazulwida alubo tusyomeke kulimbabo. (Bala 2 Timoti 1:16-18.) Mumwaanda wamunyaka wakusaanguna, umwi muKkristu uutegwa Onesiforo wakachita zisiyene azyakachitwa aabamwi maKkristu chiindi Pawulu naakasungwa. Onesiforo “taakaba aabweeme pe ancheni [zyaPawulu] zyamujele.” Pesi, wakayanduula Pawulu alubo naakamujana, wakayanduula zimwi nzila zyakuti amugwasye. Onesiforo wakabikka buumi bwakwe mungozi kuti achite zintu zyoonse eezi. Twiiyaanzi kunkani eeyi? Tatweelede kuyoowa naakuti kuleka kugwasya bakwesu bazulwida balikupenzegwa. Pesi atubayiminine tubagwasye. (Tus. 17:17) Tweelede kutondeezya kuti tulabayanda alubo tubagwasye.
12. Twiiyaanzi kuzintu zili kuchitwa aabakwesu abachizi bakuRussia?
12 Amuyeeye bakwesu abachizi bakuRussia mbubali kugwasya bakombinyina basungidwe. Kuti umwi watolwa kunkuta, bakwesu abachizi biingi nga biinka kunkuta kuti bakabasungwaazye. Eezi zituyiisyaanzi? Zituyiisya kuti tatweelede kuyoowa pe kuti bakwesu bazulwida batamikizigwa zintu zibi, basungwa naakuti bapenzegwa. Tweelede kubakombela, kulangania mpuli zyabo akuyanduula zimwi nzila zyakubagwasya.—Mil. 1:5; 2 Kor. 1:10, 11.
CHIINDI NITUFUBAAZIGWA
13. Nkamboonzi kufubaazigwa nikukonzya kupa kuti tuleke kusyoma Jehova ambunga yakwe?
13 Babbululu besu batakombi, bantu mbitubelekaabo naakuti basichikoloma balakonzya kutufubaazya akaambo kamulimu wesu wakukambawuka naakuti akaambo kakupona kweendelana azyeelelo zyaJehova zisumpukide. (1 Pet. 4:4) Balakonzya kwaamba kuti: “Ndilakuyanda, pesi cheechi yako nga yazoonyanya.” Bamwi balakonzya kutusola akaambo kanzila njitubajataayo bantu bakagwisigwa mumbungano. Balakonzya kwaamba kuti: “Kujana mwaamba kuti mulakomba kamuchita lunya luli boobu?” Majwi aali boobu alakonzya kupa kuti tubonaanga milawu yaJehova ili atala achibi achibotu iladyaaminina. Tulakonzya kusaanguna kulibuzya kuti: ‘Chimwi chiindi zintu nzyatubuzya kuti tuchite Jehova tatuzikonzyi pe. Kubaanga mbunga yakwe nga yatuyumisizya.’ Kuti kuli muchiimo chili boobu, niinzi zikonzya kukugwasya kuti uswene aafwiifwi aJehova ambunga yakwe?
Jobu taakazumina pe kweenwa abeenzinyina bakuupa-wupa bakali kumufubaazya. Pesi wakakanza kuzumanana kusyomeka kuli Jehova (Langa fuka 14)
14. Niinzi nzitweelede kuchita kuti bamwi batufubaazya akaambo kakupona kweendelana azyeelelo zyaJehova? (Intembauzyo 119:50-52)
14 Lipede kupona kweendelana azyeelelo zyaJehova zisumpukide. Jobu nguumwi wakakakatila kuzyeelelo zyaJehova nikuba kuti wakali kufubaazigwa. Umwi mweenzinyina waJobu wakuupa-wupa, wakeezya kupa kuti Jobu abonaanga Leza taakalikwe ndaba anzyaakali kuchita nikuba kuti zyakali zibotu naakuti zibi. (Job. 4:17, 18; 22:3) Pesi Jobu taakazumina pe kweenwa. Wakalizi kuti zyeelelo zyaJehova zili atala achibotu achibi zyakaliluleme alubo wakalilipedelede kupona kweendelana anzizyo. Taakaleka kusyomeka akaambo kazintu zyakali kwaambwa aabamwi. (Job. 27:5, 6) Wiiyaanzi? Kufubaazigwa kutapi kuti ubonaanga zyeelelo zyaJehova tazibeleki. Yeeya atala ambuzyakakugwasya mubuumi bwako. Teewakalibonena na awulikke kuti zyeelelo zyaJehova zililuleme akuti zilagwasya? Baamakanze aakuba mumbunga iipona kweendelana azyeelelo eezi zisumpukide. Kuti wachita oobo, tukaanzaanisigwi pe aJehova akaambo kakufubaazigwa.—Bala Intembauzyo 119:50-52.
15. Nkamboonzi muchizi Brizit naakafubaazigwa?
15 Amuyeeye zyakachitika kumuchizi Brizit, uukkala ku-India. Bamumpuli yakwe bakali kumufubaazya akaambo kalusyomo lwakwe. Nikwakayinda chiindi chifwiifwi kabbabbatizidwe mu1997, mulumaakwe wakatali Kamboni wakamaninwa mulimu. Nkinkaako, mulumaakwe wakasala kuti balonge bakaakukkale aabazyali bakwe bakali kukkala kulilimwi dolopo. Eezi zyakapa kuti muchizi Brizit aswaane buyumu-yumu. Mbukunga mulumaakwe taakachili kubeleka pe, muchizi Brizit wakeelede kubeleka chiindi choonse kuti asanine mpuli. Alubo mbungano yakali aafwiifwi yakali kule amakkilomita aasika ku350. Chuusisya nchakuti, babbululu bamulumi bakali kumukazya loko akaambo kazintu nzyasyoma. Chiimo eechi chakali chiyumu loko zyakuti bakasala kulonga lubo. Kuzwa waawo, mulumaakwe wakafwa katalangilili pe. Alubo muchiindi chifwiifwi biyo, umwi mwanaakwe musimbi anguwe wakafwa aakaambo kabulwazi bwakkensa kalaaminyaka iili 12 biyo. Chuusisya nchakuti babbululu bamuchizi Brizit bakali kusola nguwe akaambo kamapenzi aaya. Bakali kwaamba kuti, kaansinga taakaba umwi waBakamboni baJehova, nikuli mapenzi aaya taakachitika pe. Nikuba oobo, muchizi Brizit taakaleka pe kusyoma Jehova ambunga yakwe.
16. Nziizili zilongezyo nzyaakajana muchizi Brizit akaambo kakukakatila kuli Jehova akumbunga yakwe?
16 Mbukunga muchizi Brizit wakali kukkala kule akwakali mbungano, mulangizi wabbazu wakamusungwaazya kuti kanookambawuka kundawu nkwaakali kukkala akuti anjile miswaangano amuunzi wakwe. Kumatalikilo, muchizi ooyu wakali kubonaanga tazichiti pe. Pesi wakaaswiilila malayilile aaya. Wakasaanguna kwaambilizya makani mabotu, kuchitisya miswaangano aamuunzaakwe akuchita kukomba kwampuli abana bakwe basimbi. Niinzi zyakazoochitika? Muchizi Brizit wakazooba aazyiiyo zyaBbayibbili zyiingi, alubo bantu biingi mbaakali kuyiisya Bbayibbili bakazoobbabbatizigwa. Mu2005 wakabweza bupayona bwachiindi choonse. Kusyoma Jehova ambunga yakwe kwakapa kuti ajane zilongezyo. Bana bakwe basimbi balikukomba Jehova alubo kwakaba mbungano zibili kundawu eeyo. Muchizi Brizit wakabona kuti Jehova nguwe wakamupa manguzu aakuti alisimye kumapenzi ngaakaswaana amukufubaazigwa nkwaakachitwa abamumpuli yakwe.
KKALA KUSYOMEKA KULI JEHOVA AKUMBUNGA YAKWE
17. Niinzi nzitweelede kukanza kuchita?
17 Saatani uyanda kuti tubonaanga Jehova ulatulekelezya chiindi nituli mumapenzi akuti kuba mumbunga yakwe kulakonzya kupa kuti buumi butuyumine. Saatani uyanda kuti tuyoowe kuti bakwesu bazulwida batamikizigwa zintu zibi, bapenzegwa naakuti basungwa. Alubo ubelesya bantu kuti batufubaazye tubonaanga zyeelelo zyaJehova ambunga yakwe tazibeleki pe. Nikuba oobo, nzila zyakwe tulizizi, tatuzumini pe kweenwa aanguwe. (2 Kor. 2:11) Atukanze kukaka meeneno aaSaatani, tuzumanane kusyomeka kuli Jehova ambunga yakwe. Jehova takatusiyi pe. (Int. 28:7) Nkinkaako, kutabi chintu nichiba chimwi, chipa kuti waanzaane aaLeza.—Rom. 8:35-39.
18. Tuzoolanga-langaanzi muchiiyo chitobela?
18 Muchiiyo eechi, twabona buyumu-yumu mbutukonzya kuswaana, buzwa aanze aambungano. Pesi lusyomo lwesu kuli Jehova akumbunga yakwe, lulakonzya kusunkwa mumbungano. Kujana twabuzunda biyeni buyumu-yumu buli boobu? Chiiyo chitobela chizoosandula mubuzyo ooyu.
LWIIMBO 118 “Kotungizyila Lusyomo”
a Kuti tukonzye kulisimya chakusyomeka kumazuba aano aakumamanino, tweelede kusyoma Jehova ambunga yakwe chiindi choonse. Dyabbulosi ulikweezya kubelesya masunko kuti amaninsye lusyomo lwesu. Muchiiyo eechi, tulabona zintu zitatu nzyabelesya Dyabbulosi kuti amane lusyomo lwesu azintu nzitweelede kuchita kuti twiimikile nji mukumukazya.
b Amwi mazina akachinchwa.