ZYAKACHITIKA MUBUUMI
“Ndakali Kuyanda Kubelekela Jehova”
TWAKABBABBAYISYA kabunga kabantu nkitwakaswayide aafwiifwi amuunzi waGranbori uuli mulusaka lwaSuriname. Kuzwa waawo, twakeenda aabboodi muMulonga waTapanahoni. Nitwakasika mulonga mpuwakali kweendesya loko, propela yakawuminina aabbwe mpawo bboodi lyakasaanguna kunikila. Ndakakataazikana loko. Nikuba kuti ndakali ndaba aaminyaka myiingi kandeenda aabboodi nindakali mulangizi wabbazu, teendakali kukonzya pe kudubbwa.
Kanditanamubuzya zyakazoochitika, muleke ndimubuzye mbundakasaanguna mulimu wachiindi choonse.
Ndakazyalwa mu1942 kukasuwa kabotu loko kakuCaribbean kuCuraçao. Ndeende ngwakuSuriname, pesi wakalongela kukasuwa aaka aakaambo kamulimu. Kanditanazyalwa pe, ndeende nguwe wakaba Kamboni wakusaanguna muCuraçao. a Wakali kutuyiisya Bbayibbili mviki amviki nikuba kuti chimwi chiindi twakali kuchita zintu zyakali kupa kuti kumuyumine kuchita oobo. Nindakaba aaminyaka iili 14, ndeende wakasala kuti tubweede kuSuriname kuti akalanganie banene bakali bachembaala.
KUSALA BEENZUMA BALIKABOTU KWAKANDIGWASYA
KuSuriname ndakasaanguna kumvwanana aabachikula bamumbungano yesu bakali basungu mukubelekela Jehova. Bakali bapati mbichaani kulindime alubo bakali mapayona aachiindi choonse. Nibakali kwaambuula atala azintu nzibakali kujana mumulimu wakukambawuka, bakali kwaambuula kababoteledwe. Niyakali kumana miswaangano, ime abeenzuma twakali kwaambuula atala amakani aamuBbayibbili. Chimwi chiindi twakali kukkala aanze mansiku katulikulanga nyenyeezi. Beenzuma bakandigwasya kuti ndibone nzindakali kuyanda kuchita mubuumi, ndakali kuyanda kubelekela Jehova. Nkinkaako, ndakabbabbatizigwa kandili aaminyaka iili 16. Mpawo nindakaba aaminyaka iili 18, ndakaba payona wachiindi choonse.
NDAKAYIYA ZYIIYO ZYIINGI LOKO ZIYANDIKANA
Nindakali kupayona kuParamaribo
Ndakayiya zyiiyo zyiingi loko kandili payona alubo zyiiyo eezyo zyakandigwasya nindakazooba mumulimu wachiindi choonse. Muchikozyano, chiiyo chakusaanguna nchindakayiya nchakubona mbukuyandikana kuyiisya bamwi. Nindakasaanguna kupayona, umwi mumishinali uutegwa Willem van Seijl wakaba aachiyandisyo chakundigwasya. b Wakandiyiisya zyiingi loko atala ambiiyelede kuchitwa milimu yambunga. Aachiindi eecho, teendakazi pe kuti ndakali kuyanda kugwasigwa munzila eeyi. Mumunyaka wakatobela, ndakasalwa kuti ndibe payona uuyandikana, mpawo ndakasaanguna kuzulwida tubunga twakali kule loko azimwi mbungano zyamulusaka lwaSuriname. Ndibalumba loko bakwesu akaambo kakundiyiisya. Kuzwa kuchiindi eecho, ndilikweezya kutobelezya chikozyano chabakwesu aaba kwiinda mukujana chiindi chakuyiisya bamwi.
Chiiyo chachibili nchindakayiya nkupona buumi buuba pesi bubambikene. Kumasaangunino aamweezi umwi awumwi, ime angundakali kupayonaawe twakali kupulana zintu nzitwakali kuyanda kuula nzitwakali kuyoobelesya mumweezi ooyo. Kuzwa waawo, umwi wesu wakali kweenda musinzo mulamfu kuti aye kudolopo akakuule zintu eezyo. Twakali kukabelesya kabotu kamali nkitwakali kujana mweezi amweezi, mpawo twakali kubaachoonzyo chakuti zintu eezyo zimaninsye mweezi. Chiindi nitwakali kumaninwa chimwi chintu katuli kulusaka lwaSuriname, bamwi bakali kutugwasya. Ndakabona kuti kwiiya kupona buumi buuba kandichili muniini pesi kabubambikene kwakali kuzoondigwasya kuti ndibikkile maanu kukubelekela Jehova kwabuumi bwangu boonse.
Chiiyo chachitatu, nkubona mbukugwasya kuyiisya bantu mumulaka wabo. Ndakakomena kandaambuula chiDutch, Chikuwa, chiPapiamento achiSranantongo c chaambuulwa kuSuriname. Pesi kulusaka lwaSuriname ndakabona kuti bantu bakali kuswiilila makani mabotu kuti wabakambawukila mumulaka wabo. Pesi kwakali kundiyumina kwaambuula imwi milaka mbuli chiSaramaccan chiyanda kuti unantule lulimi akuluselusya. Nikuba oobo, kwiiya milaka mipya kwakandigwasya loko, nkaambo ndakakonzya kuyiisya bantu biingi kasimpe akaambo kakuti ndakali kubakambawukila mumulaka wabo.
Chimwi chiindi ndakali kuchita zintu zyakali kufwisya bweeme. Muchikozyano, aali chimwi chiindi, ndakali kuyanda kubuzya umwi ngundakali kwiiyaawe Bbayibbili waambuula chiSaramaccan kuti wakali kumvwa biyeni nkaambo wakali kuchiswa mwida. Kunze kwakuti ndibuzye kuti ulikumvwa biyeni, ndakabuzya kuti ulaada na? Zyakamubbowa loko nzindakabuzya. Nikuba kuti chimwi chiindi ndakali kwaamba zintu nzindakatali kuyanda kwaamba akaambo kakutaziba mulaka, pesi teendakaleka pe kubeleka changuzu kuti ndaambuule mulaka wakali kubelesegwa aabantu bamuchilawu eecho.
KUZUMINA IMWI MILIMU
Mu1970, ndakasalwa kuti ndibe mulangizi wabbazu. Mumunyaka ooyo ndakali kubatondeezya imwi pulogilamu bantu bakali mutubunga twakali kule loko mulusaka lwakuSuriname. Pulogilamu eeyi yakali aamutwe utii, “Visiting the World Headquarters of Jehovah’s Witnesses.” Kuti tukonzye kusika kutubunga ooto, ime abamwi bakwesu twakali kubelesya bboodi katwiinda mumilonga. Mubboodi oomo, twakali kubikka jenaleta, tanka lyapetulo, malambe amunchina wakuti bantu bakabone mapikicha aayo. Nitwakali kusika kubusena oobo, twakali kususa zintu akuzitola
nkutwakali kuyoochitila pulogilamu eeyo. Zintu nzinditalubi pe, ninzila bantu bakubusena oobu mbubakali kwaayanda mapulogilamu aaya. Ndakabotelwa loko kugwasya bantu kuti bayiye atala aJehova ambunga yakwe yaanyika. Kubeleka changuzu mumulimu waJehova kwakapa kuti ndijane zilongezyo zyiingi loko.NTAMBO YOOSEDWE AATUTAMBO TUTATU
Ime amwanakazaangu Ethel twakachada muSeptember 1971
Nikuba kuti ndakali kubona bubotu bwakubelekela Jehova kanditakwete, pesi ndakali kuyanda mweenzuma ngundakali kuzoobelekaawe kwabuumi bwangu boonse. Nkinkaako, ndakasaanguna kukomba kandibuzya Jehova atala amwanakazi ngundakali kuyanda wakali kukonzya kuzoolisimya kubuyumu-yumu mbundakali kuswaana kulusaka lwaSuriname. Nikwakayinda munyaka, ndakasaanguna kuyandana aa-Ethel wakali payona uuyandikana alubo wakali aamoyo wakulipeda. Kuzwa kachili muniini, Ethel wakali kulombozya chikozyano chamwaapostoli Pawulu alubo wakali kuyanda kubeleka changuzu mumulimu wakukambawuka katobelezya chikozyano chakwe. Twakachada muSeptember 1971 mpawo twakasaanguna kubelekaamwi mumulimu wabbazu.
Ethel wakakomenena mumpuli yakatalikwe zintu zyiingi zyakumubili, nkinkaako, kwakali kumuubila kuti achinche kweendelana azyiimo nitwakali mumulimu wakweendenda kulusaka lwaSuriname. Muchikozyano, chiindi nitwakali kulibambila kuyooswaya mbungano zyakubusena oobu, twakali kubweza zintu ziche. Twakali kwaachila mumilonga akusambila kumilonga. Twakali kulya kufumbwa chakulya nchibakali kutupa anzibakali kuvwima mulusaka naakuti kujata mumilonga. Nitwakali kubula ndido, twakali kulida mumatu aamabbanana alubo nitwakali kubula zipunu twakali kulya aamaboko. Kulisimya nkutwakachita ime amwanakazaangu mukubelekela Jehova, kwakapa kuti tujatane akuti tube mbuli ntambo yoosedwe aatutambo tutatu. (Muk. 4:12) Tuzibona kaziyandikana loko zintu nzitwakaswaana mukubelekela Jehova.
Nitwakali kuzwa kukabunga nkitwakaswayide nkindaamba kumasaangunino katuya kuli kamwi kabunga, kuli zyakachitika. Bboodi nilyakayinda mulonga mpuuyendesya loko, lyakanikila mpawo lyakafwambaana kwiibuka. Chibotezya nchakuti twakazweete malayifi jakketi teetwakanikila pe. Pesi bboodi lyakazula maanzi. Chakulya chakali muzilongo nzitwakalaazyo twakachisweela mumaanzi mpawo twakabelesya zilongo eezyo kukupa maanzi aakali anjila mubboodi.
Mbukunga chakulya choonse twakali twachisowela mumaanzi, twakasaanguna kulabula nitwakali kuyobweenda pesi taakwe nchitwakajata pe. Nkinkaako, twakakomba kuli Jehova katukumbila kuti atupe chakulya chabuzuba oobo. Nitwakazwa aakukomba, umwi mukwesu wakawaala kalobyo kakwe mpawo wakajata muswi mupati ngutwakalya twakkuta toonse katuli 5 mubusiku oobo.
MULUMI, WISI AMULANGIZI WABBAZU
Nikwakayinda minyaka iili 5 katuli mumulimu wabbazu, ime amwanakazaangu twakajana chimwi chilongezyo nchitwakatali kulangilila pe, chakuba bazyali. Ndakabotelwa nindakaziziba pesi teetwakazi pe kuti twakali kuyooyinkilila kunembo na amulimu wesu. Ime amwanakazaangu twakali aachiyandisyo chakukkala katuli mumulimu wachiindi choonse. Mu1976, Ethniël wakatumbukwa, mpawo nikwakayinda minyaka iibili ahafu twakazooba aamwana wachibili uutegwa Giovanni.
Kandilikulanga bantu bakali kubbbabbatizigwa muMulonga waTapanahoni aafwiifwi aGodo Holo kubuzwezuba kwaSuriname mu1983
Akaambo kakuti kwakali mulimu mwiingi kuSuriname aachiindi eecho, wofesi yamutabi yakachita mabambe aakuti ndizumanane kandili mulangizi wabbazu kumwi katulikukomezya bana. Bana besu nibakachili baniini, ndakakumbilwa kuti ndiswaye mabazu aakali aambungano ziche. Eezi zyakali kundipa mweenya wakuti mumweezi, kwamviki zibili ndibeleke kandili mulangizi wabbazu mpawo mviki zibili zyakumamanino ndibeleke kandili payona mumbungano yesu. Mwanakazaangu abana besu bakali kundisindikila nindakali kuswaya mbungano zyakali aafwiifwi ankundakali kukkala. Nikuba oobo, ndakali kweenda aandikke chiindi nindakali kuswaya mbungano akunjila miswaangano yabbazu kulusaka lwaSuriname.
Chiindi chiingi nindakali mumulimu wabbazu, ndakali kweenda aabboodi, nindakali kuswaya mbungano zyakali kule loko
Ndakeelede kubamba zintu munzila iilikabotu kuti ndikonzye kuchita milimu yangu yoonse. Ndakali aachoonzyo chakuti mviki amviki tuchite kukomba kwampuli. Nindakali kuswaya mbungano zyakali kule ankutwakali kukkala, mwanakazaangu nguwe wakali kuchitisya kukomba kwampuli. Kwaziindi zyiingi, twakali kuchita zintu katuli mpuli. Ime amwanakazaangu twakali kujana chiindi chakulikondelezyaamwi abana besu, Tusimpi 31:15, wakali kufuma kuti tubale lugwalo lwabuzuba akuti bana balye kabatanayinka kuchikolo. Ndimulumba loko mwanakazaangu akaambo kakubeleka changuzu nkwachita, nkaambo wakandigwasya kuti ndikonzye kuchita milimu yoonse yamubukombi.
twakali kuchita mageemu naakuti kuswaya aamwi masena. Ndakali kunonoka kulala nkaambo ndakali kunoonga ndilikulibambila nkani. Akaambo kakuti mwanakazaangu, mwanakazi uulomene waambidwe muliTwakabeleka changuzu kuti tugwasye bana besu kuti bayande Jehova amulimu wakukambawuka. Teetwakali kuyanda kuti pe bana besu banjile mumulimu wachiindi choonse akaambo kakuti ndiswe twabasalila, pesi twakali kuyanda kuti balisalile kuchita oobo abalikke. Twakali kubabuzya bubotu mbutwakajana mumulimu wachiindi choonse. Alubo twakali kubabuzya buyumu-yumu mbutwakali kuswaana, mbaakatugwasya Jehova ambaakatulongezya katuli mpuli. Alubo twakali kuba aachoonzyo chakuti bana besu baliswaanizye aabamwi bakombima bakali kubikka Jehova mubusena bwakusaanguna mubuumi bwabo.
Jehova wakali kutupa zintu nzitwakali kuyandikana kuti tusanine mpuli. Ndakali kweezya kusikila mpundigolela kuti ndisanine mpuli. Zintu nzindakayiya kandichili payona uuyandikana kulusaka lwakuSuriname kanditanachada, zyakandigwasya kuti ndipulane kakuchili chiindi mbundeelede kubelesya zintu. Pesi chimwi chiindi, zintu teezyakali kuswaanana pe. Muziindi eezyo, ndakali kusyoma kuti Jehova ulatugwasya. Muchikozyano, kumamanino aamunyaka wakuma1980 akumasaangunino aa1990, bantu bakali kulwana muSuriname. Muminyaka eeyi, kwakali kuyumu loko kuti muntu ajane zintu ziyandikana. Nikuba oobo, Jehova wakali kutupa zintu nzitwakali kuyandikana.—Mt. 6:32.
KUYEEYA ZYAKANDICHITIKILA
Kuzwa kuchimweensi kuya kuchilisyo: Ime amwanakazaangu, Ethel
Mwaneesu wakusaanguna Ethniël, amwanakazaakwe, Natalie
Mwaneesu wachibili Giovanni amwanakazaakwe, Christal
Kwabuumi bwangu boonse, Jehova wakali kukkala katupa zintu nzitwakali kuyandikana akutugwasya kuti tujane kubotelwa kwachoonzyo akukkutisikana. Bana besu bapa kuti tubotelwe. Alubo chakali chilongezyo chipati loko kubakomezya kuti bakombe Jehova. Tulabotelwa kuti bana besu ambabo bakasala kunjila mulimu wachiindi choonse. Ethniël aGiovanni bakanjila zikolo zyambunga alubo lino balikubelekela kuwofesi yamutabi wakuSuriname kabalaamwi abanakazi babo.
Ime amwanakazaangu twachembaala lino, pesi tuchibelekela Jehova katuli mapayona aayandikana. Tulijisikini zyakuti taakwe mpundakajana mweenya wakwiiya kudubbwa, pesi tandilisoli pe. Kuti ndalanga zyakachitika musule, nga ndalimvwa kuti ndakasala munzila iilikabotu loko kandichili muniini, kuti ndinjile mumulimu wachiindi choonse. Ndakali kuyanda kulipeda kubelekela Jehova.