KULAKUYUMINA na kubala Bbayibbili akuyanduulisisya mviki amviki? Chimwi chiindi kulakubbowa na kubala Bbayibbili? Mbubo mbutunga twalimvwa toonse chimwi chiindi. Pesi yeeya atala azimwi zintu nzitukkala katuchita mbuli kusamba. Kusamba kutola chiindi pesi nitwamana kusamba ngatwamvwa katuli twakatalukwa. Mbukubede akubala Bbayibbili akuyanduulisisya, kupa kuti tukatalusigwe. (Ef. 5:26) Bona tumwi twaambo tukonzya kukugwasya:

• Bikka kumbali chiindi chakubala akuyanduulisisya. Kubala Bbayibbili akuyanduulisisya, nchiimwi chazintu “ziyandikana loko” muKkristu nchayelede kuchita. (Flp. 1:10) Kuti utalubi chiindi nweelede kubala, lemba aansi buzuba achiindi nuyanda kuzoobala. Zintu eezi nzwaalemba zibikke aandawu mpukonzya kuzibona naakuti ulakonzya kuteya alamu mufooni yako kuti ikuyeezye chiindi nweelede kubala.

• Yeeya atala anzukonzya kuchita kuti ubikkile maanu kuzintu nzulikubala. Kulakuubila na kubikkila maanu kuti wabala kwachiindi chilamfu naakuti wabala kwachiindi chifwiifwi pesi kwaziindi zyiingi? Nduwe nuuzizi kabotu zyiimo zyako. Bikkila maanu kuzintu eezi nupulana mbuyanda kunoobala akuyanduulisisya. Niinzi nzukonzya kuchita kuti walimvwa kutayandi kubala kuti chiindi chako chakubala chakkwana? Ulakonzya kubala kwamaminiti aali 10. Ulakonzya kwiiya zintu zyiingi nikuba kuti wabala kwamaminiti aali 10, amwi nwaamana kubala kwamaminiti aali 10 unooli wanoneezegwa loko anzwaalikubala zyakuti ulayanda kwiinkilila kunembo.—Flp. 2:13.

• Sala nkani nzuyanda kubala kakuchili chiindi. Kuti wasaanguna kuyeeya zyakubala kakuli chiindi chako chakkwana kale, ulakonzya ‘kutachibelesya kabotu chiindi chako.’ (Ef. 5:16) Zilembe aansi zintu nzuyanda kubala. Kuti waba amubuzyo atala ayimwi nkani, ulembe aansi mubuzyo ooyo. Nwaamana kubala ulakonzya kulemba aansi twaambo ntuyanda kuzoobala muchiindi chitobela.

• Chincha kuti kakuyandikana kuti uchite oobo. Chiyandikana loko nchakuti, ubale akuyanduulisisya mviki amviki. Kuti kakuyandikana, chincha buzuba achiindi nweelede kubala, chincha chiindi nchumaninsya nubala naakuti chincha nkani nzweelede kubala.

Kuti twabala mviki amviki, tulagwasikana. Tulaba aabweenzuma busimide aJehova, tulayiya mbutukonzya kusala munzila iilikabotu alubo tulalimvwa katuli twakatalusigwa.—Jos. 1:8.