Paul: MuNovember 1985 twakabotelwa loko nkaambo twakali kuya kukusaanguna mulimu wesu wabumishinali kuLiberia, iili kuWest Africa. Ndeke njitwakagadide yakayimikila muSenegal. Anne wakaamba kuti: “Kwasyaala awa iimwi kuti tusike kuLiberia.” Kakutanayinda chiindi, kwakaambilizigwa kuti: “Bantu baya kuLiberia nga baseluke mundeke. Bamwi bantu bakuLiberia balikupapila mfulumende nkinkaako, tatuchisiki pe kuLiberia.” Kwamazuba aali 10 aakatobela, twakali kukkala aabamwi mamishinali bakuSenegal alubo twakali kumvwa nyuzi zyakali atala akujayigwa kwabantu alubo mfulumende teeyakali kuzumizya pe kuti bazwe mumaanda aabo. Kuti bantu bazwa mumaanda aabo, bakali kukonzya kujayigwa mpawaawo-mpawaawo.

Anne: Tuli bantu bayoowa. Kuzwa kandichili muniini ndakali muntu uuyoowa. Akaambo kakuyoowa bakandipa kazina. Ndilayoowa nikuba kutaaluka mugwagwa. Pesi twakali kuyanda kwiinka kupela kuLiberia nikuba kuti twakali kukonzya kunjila mumapenzi.

Paul: Ime a-Anne twakakomenena ku-England nkwiili kubuzwezuba. Bazyali bangu abayina aa-Anne, bakali kukkala kabatusungwaazya kuti tupayone. Twakasaanguna kupayona nitwakamaninsya sekkondali. Bakabotelwa loko kuti twakali kuyanda kubelekela Jehova mumulimu wachiindi choonse kwabuumi bwesu boonse. Nindakaba aaminyaka iili 19, ndakaba aachilongezyo chakubelekela kuBbeteli alubo nitwakachada mu1982, alakwe Anne wakazoobelekela kuBbeteli.

Anne: Twakali kukuyanda kubelekela kuBbeteli, pesi chintu nchitwakali kuyanda loko nkubelekela kunyika kuyandikana basikupupulula biingi. KuBbeteli twakali kubelekaamwi abakwesu abachizi bakali mamishinali. Alubo chikozyano chabo chibotu azintu zyakabachitikila mubuumi zyakapa kuti andiswe tuyande kuba mamishinali. Buzuba abuzuba goko kwaminyaka iitatu, twakali kukomba kuli Jehova atala achiyandisyo nchitwakalaacho chakubeleka katuli mamishinali. Twakabotelwa loko nitwakatambwa kuti tuzoonjile kkilasi yachi 79 yachikolo chakuGiliyadi mu 1985. Twakabuzigwa kuti tukabelekele kuLiberia iili kuWest Africa.

Paul: Twakagada ndeke yakasaanguna kuzumizigwa kuya kuLiberia. Bantu bakali kuyoowa alubo teebakalina zumizigwa pe kuti bazwe mumaanda aabo goko. Bantu bakali kuyoowa kuti moota yagwisya musindo wakudubuka niyobweenda. Eezi zyakali kupa kuti bakwiile akuchija. Kuti tukkale katubateme, twakali kubala bbuku lya Intembauzyo buzuba abuzuba mansiku. Nikuba kuti zyiimo zyakali ziyumu, pesi twakali kuuyanda mulimu wesu. Anne wakali kuya kukukambawuka buzuba abuzuba pesi mebo ndakali kubelekela aaBbeteli kandibeleka aaJohn Charuk. a Ndakayiya zyiingi loko kuli Charuk nkaambo wakakkala chiindi chilamfu muLiberia alubo wakalibuzi buyumu-yumu azyiimo nzibakali kuswaana bakwesu abachizi.

Anne: Niinzi chakapa kuti tufwambaane kuuyanda mulimu wesu wakuLiberia? Mbakwesu abachizi bamuLiberia nkaambo bakatutondeezya luyando alubo bakali kusyomeka. Twakamvwanana loko ambabo alubo bakaba mpuli yesu mpya. Majwi ngibakali kutubuzya akatusimya mubukombi. Kukambawuka kwakali kunoneezya loko. Bantu mbitwakali kwiiyaabo Bbayibbili bakali kuyanda kuti tukkale kwachiindi chilamfu pesi nitwakali kukkala kwachiindi chifwiifwi bakali kunyema. Bantu bakali kwaambuula atala amakani aamuBbayibbili kufumbwa nkumwayinka. Kwakali kuuba kuti tusaangune kwaambuuzyania aabo. Twakali aabantu biingi mbitwakali kwiiyaabo Bbayibbili zyakuti kwakali kutuyumina kuti twiiye aabo boonse. Ndawu eeyi yakali kunoneezya kukambawuka.

Paul: Kwaminyaka iili 4 kwakali luumuno munyika. Pesi mu1989 zintu zyoonse zyakachincha alubo kwakaba nkondo. Bantu bakali kupapila mfulumende bakasaanguna kweendelezya ndawu yakali aafwiifwi aBbeteli mu 2 July 1990. Kwamyeezi iitatu, teetwakachili kukonzya pe kwaambuula aabantu bakali aanze aanyika, nikuba bamumpuli zyesu abakumawofesi mapati. Bantu bakali kulwana, kwakali kwaba lupyopyongano ndawu yoonse, chakulya chakali chacheya alubo banakazi biingi bakali kujatwa changuzu mumakani aakoonana. Zintu eezi zyakayinkilila kunembo kazichitika kwaminyaka iili 14.

Anne: Imwi misyobo yabantu bakali kulwana akujayana. Masooja bakalizwide koonse-koonse. Bakali aazilwanisyo zyiingi, bakali kuzwaata munzila iiyoosya alubo bakali kunjila mumaanda aabantu kababweza kufumbwa nzibakali kuyanda. Bamwi bakali kujaya bantu mbuli kuti balikujaya nkuku. Masooja bakali kujala migwagwa kuchitila kuti bantu batayindi pe. Alubo chiindi chiingi bakali kubajaya bantu bakali kuyanda kubelesya migwagwa eeyo. Bantu bakali kujayigwa bakali kulundikwaamwi. Eezi zyakachitika nikuba aafwiifwi aBbeteli. Bakamboni basyomeka bakajayigwa kuswaanizya amamishinali babili. Bakombima bakabikka buumi bwabo mumapenzi kwiinda mukusisa bamwi bakombima bawumwi musyobo wakali kuyanduulwa kuti ujayigwe. Mamishinali abamumpuli yaBbeteli ambabo bakachita  oobo. Bamwi Bakamboni bakachijila kuBbeteli bakali kubelesya ng’anda yaansi alubo bamwi twakali kukkalaabo mumaanda eesu aakali mujulu. Twakali kukkala aabakombima bali 7 mung’anda yesu.

Paul: Buzuba abuzuba masooja bakali kuyanda kunjila muBbeteli kuti babone kuti kuli bantu na mbitwakasiside. Twakali aabantu bali 4 bakali kutuchenjezya. Babili bakali kulangila aawindo mpawo bambi babili bakali kwiinka kugeedi. Kuti babili bali kugeedi baapetela kunembo maboko, zyakali kwaamba kuti masooja tabayandi kunjila pe pesi kuti baapetela kusule zyakali kwaamba kuti masooja bayanda kunjila. Nkinkaako, aabo bakali kulangila aawindo bakali kuchijaana kuchitila kuti basise bakombima.

Anne: Bumwi buzuba, kamwi kabunga kamasooja kakanjila. Ime awumwi muchizi twakanjila muchimbuzi mpawo ndakakkiya mulyango alubo muchimbuzi eecho mwakali kandawu kaniini loko kakuyubila pesi muchizi ooyo wakayuba mukandawu nkakaako. Masooja bakali banditobela kabajisi ntobolo. Bakawuma aakkoma kabanyemede. Paul wakabakombelezya kuti batanjili. Mpawo wakati, “Mwanakazaangu ulikubelesya chimbuzi.” Nindakali kujala mpaakayubide muchizi ooyu, kwakachitika musindo mpawo ndakabikka zintu kuti zijale kubonekaanga zintu zyoonse mbuzyabede alubo zyakanditolela chiindi chilamfu kuzichita eezi. Ndakalizi kuti masooja bakali kuyeeyela kuti kuli nzindakali kuchita. Ndakayoowa loko zyakuti ndakasaanguna kukankama mubili woonse. Ndakalibuzya kuti, kuti ndajula mulyango masooja balazibona kuti ndiliyoowede alubo balasaanguna kuyeeyela kuti kuli nzindakali kuchita. Niinzi nzindakeelede kuchita? Ndakakombela mumoyo mpawo ndakakombelezya Jehova kuti andigwasye. Kuzwa waawo, ndakajula kkoma mpawo ndakabajuzya kandibeteme. Umwi musooja wakanditontela kumbali mpawo wakanjila mukati wasaanguna kulanga-langa zintu zyakali muchimbuzi nzindakali ndabamba-bamba. Musooja ooyo wakagamba kuti taakwe nchaakajana pe. Mpawo masooja boonse bakanjila mulaamwi maanda amulizimwi ndawu pesi taakwe nzibakajana pe.

Paul: Kwamyeezi, twakali twasyaalilwa chakulya chiche. Kwaziindi zyiingi, teetwakalikwe chakulya pe chakuseeni. Pesi kukomba kwakuseeni kuchitwa aaBbeteli kwakali mbuli chakulya chakuseeni. Toonse twakalizi kuti kubala Bbayibbili akuyanduulisisya kwakali kukonzya kutupa manguzu aakuti tulisimye buzuba abuzuba.

Twakalizi kuti, kuti twaya kukuyanduula chakulya naakuti maanzi, masooja bakali kukonzya kunjila akujaya bakombima mbitwakasiside. Chiindi chiingi Jehova wakali kutupa zintu nzitwakali kuyandikana aachiindi cheelede alubo munzila iigambya. Jehova wakatulangania alubo wakatugwasya kuti tukkale katubeteme.

Zyiimo munyika zyakayinkilila kunembo kaziyobubija, bantu biingi teebakachilikwe bulangilizi pe. Pesi swebo kasimpe kakatupa bulangilizi. Bakwesu abachizi biingi bakeelede kuchija kwaziindi zyiingi kuti batajayigwi pesi bakakkala kabali aalusyomo lusimide alubo bakali beteme nikuba kuti bakali kuswaana buyumu-yumu. Bamwi bakali kwaamba kuti nzibakali kuswaana zyakali kupa kuti balibambile “kuswaana mapenzi mapati.” Baalu abamwi bachikula bakachita zyoonse nzibakonzya kabali aachibindi kuti bagwasye bakwesu abachizi. Bakwesu abachizi bakachijila kulizimwi ndawu bakali kugwasyania. Alubo bakasaanguna kukambawuka mundawu eezyo. Bakali kubelesya kufumbwa nzibakali kujana musokwe kuti bayake Maanda  aaBwaami njibakali kukonzya kubelesya kwachiindi chifwiifwi kuti banjile miswaangano. Kunjila miswaangano akukambawuka kwakapa bakwesu abachizi bulangilizi alubo kwakabasungwaazya muziindi eezi ziyumu. Nitwakali kupa bakwesu abachizi chakulya, zigogo azimwi nzibakali kuyandikana, bakwesu biingi bakali kukumbila tukwama twakubelesya mumulimu wakukambawuka kutali zigogo. Eezi zyakatusungwaazya loko. Bantu biingi bakali babona akuchitikilwa zintu zyiingi ziyoosya muchiindi chankondo, bakali kuyanda kumvwa makani mabotu. Bakagamba nibakali kubona kubotelwa nkubakalaako Bakamboni. Bakwesu abachizi bakali mbuli mumuni mumudima. (Mateyo 5:​14-16) Akaambo kabusungu mbubakalaabo bakombima, bamwi masooja bakazooba bakwesu.

Paul: Chimwi chiindi twakeelede kulonga munyika eeyo kwaziindi zibili naakuti zitatu mumunyaka. Umwi muchizi mumishinali wakayifwiinsya munzila iilikabotu loko nzila njitwakali kulimvwaayo nitwakali kulonga. Wakati: “KuGiliyadi twakayiisigwa kuti tubikke moyo kumulimu wesu, alino nzizyo nzitwakachita. Nkinkaako, nitwakali kusiya bakwesu kabali muzyiimo zili oobu kwakali mbuli kuti twayaswa aamoyo.” Chibotezya nchakuti, twakachili kukonzya kugwasya bakwesu abachizi bakuLiberia mumulimu wakukambawuka katuli munyika zili aafwiifwi aLiberia.

Anne: Mu 1996, twakanjila mumoota yamutabi katuli 4 alubo twakali aamapepa aakali aamakani aakali kuyandikana loko aakali atala amulimu wakuLiberia. Twakali kuyanda kuya kuli limwi bbazu lyadolopo kukwabililidwe. Kuti tukasike kundawu eeyo, twakeelede kudilayiva kwamakkilomita aali 16. Katuchili munzila, masooja kabanyemede bakadubula ntobolo mujulu kabali kutwiimikizya. Iswe katuli batatu bakatugwisizya aanze. Mpawo bakayinka aaPaul, twakamaninwa. Kakutanayinda chiindi, twakabona Paul kazobuza kulindiswe mpawo wakali kuzwa ganzi mumutwe. Kumasaangunino twakabonaanga wadubulwa pesi twakazooyeeya kuti kaansinga wakadubulwa taakali kunookonzya pe kweenda. Umwi musooja wakamuchisa naakali kumutontela aanze aamoota. Chibotezya nchakuti teechakali chipati pe chilonda chakwe.

Kwakali moota yamasooja yakali aafwiifwi amputwakabede. Moota eeyo yakali aabantu bakayoowede alubo yakali yayanda kunyampuka. Twakasala kuti tunjile mumoota eeyo, mbukunga teekwakachilikwe ndawu pe mukati, twakajatilila. Moota eeyi teeyakali kujatililika kabotu pe. Dilayiva wakayichijaania loko moota zyakuti twakali twaamba kuwa. Twakoompolola kuti ayimikizye moota pesi taakayimikila pe nkaambo anguwe wakali wayoowa kwiiyimikizya moota. Teetwakazoowa pe mpawo moota yakayimikila niyakasika nkuyakali kuya. Twakali twakatala akaambo kakujatilila alubo twakasaanguna kukankama.

Paul: Kuzwa waawo twakalangana katuli muzigogo zidelukide alubo zilaadoti. Twakali kugamba kuti tuchipona. Aafwiifwi amputwakabede, kwakali ndeke yakali yawumwa aantyavu kwaziindi zyiingi alubo yakali kubonekaanga iyanda kuwa. Ndeke eeyo njiyo yakeelede kututola kuSierra Leone mubuzuba bwakali kutobela. Nkinkaako, twakalala mpawaawo. Nitwakasika kuSierra Leone, twakalumba kuti twakachili kupona, pesi twakali kukataazikana atala abakwesu abachizi bakuLiberia.

Anne: Twakasika kuBbeteli iili kuFreetown muSierra Leone alubo bakwesu bakatujata munzila iilikabotu loko. Pesi ndakasaanguna kuyeeya zintu zibi zyakatuchitikila kuLiberia. Buzuba abuzuba ndakali kukkala kandiyoowede kandibonaanga tulachitikilwa chimwi chintu chitali kabotu. Alubo teendakachili kuyeeya kabotu pe. Zintu zyoonse nzindakali kubona ndakali kubonaanga teezyachoonzyo pe. Mansiku ndakali kubuka kandiyoowede kandibonaanga tulachitikilwa chimwi chintu chitali kabotu pe. Ndakali kufundikila, Paul wakali kundikumbata mpawo wakali kukombaamwi andime. Twakali kwiimba miimbo aaBwaami kusikila ndaleka kuyoowa. Ndakali ndabaanga ndapenga alubo teendakachili kuyanda pe kubeleka kandili mumishinali.

Tandizoozilubi pe zyakazoochitika. Mumviki njiyeeyo, twakatambula mamagazini aabili. Imwi magazini yakali Amubuke! yamuJune 8, 1996. Yakali aachiiyo chakali aamutwe wakuti, “Nzukonzya Kuchita Kuti Wayoowa.” Aachiindi eecho, ndakali ndamvwisisisya kuti nkamboonzi nindakali kukataazikana. Imwi magazini yakali Ngaziyakulinda yamuMay 15, 1996, yakali aachiiyo chakali aamutwe utii, “Manguzu Baajana Kuli?” Ngaziyakulinda eeyo yakali aachifanikisyo chachamupapaligwa wakatyokede bbaba. Chiiyo eecho chakapandulula kuti mbukunga chamupapaligwa ooyu ulayinkilila kunembo kulisanina akuuluka nikuba kuti ulaabbaba lityokede, mbukubede akulindiswe kwiinda mukugwasigwa aamuuya uusalala tulakonzya kugwasya bamwi nikuba katukataazikene. Kwiinda muzyiiyo eezi, Jehova wakandipa zintu nzindakali kuyandikana aachiindi cheelede. (Mateyo 24:45) Ndakayanduula zyiiyo zyiingi zili mbuli zeezi mpawo ndakazibikka aafwiifwi. Zyiiyo eezi zyakandigwasya loko. Nikwakayinda chiindi, teendakachili kukataazikana loko pe mbuli mbundakali kuchita chiindi.

Paul: Chiindi achiindi nitwakali kubweeda kuLiberia, twakali kubotelwa loko. Kumamanino aamunyaka wa2004 twakali twaamba kusisya minyaka iili 20 katuli mumulimu wabumishinali. Nkondo yakali yamana. Alubo kwakali kwachitwa mabambe aakuti kuyakwe mutabi, pesi twakali twapegwa mulimu mupya.

Teekwakali kuuba pe kuti tuzitambule nkaambo twakali kubayanda loko bakwesu abachizi bakuLiberia, bakali baba mbuli mpuli kulindiswe. Alubo teetwakachili kuyanda pe kubasiya. Pesi twakali twabona Jehova mbaakatulongezya nitwakasiya mpuli zyesu akuya kuGiliyadi. Nkinkaako, twakawuzumina mulimu mupya. Twakalongela kuGhana alubo ilaafwiifwi aLiberia.

Anne: Twakalila loko nitwakazwa kuLiberia. Pesi umwi mukwesu ulaabusongo alubo wakali wachembaala uutegwa Frank wakatubuzya kuti: “Mweelede kutuluba.” Mpawo wakapandulula kuti: “Tulizi kuti tamukootuluba pe pesi mweelede kubikka moyo wanu kumulimu mupya nkaambo wakazwa kuli Jehova. Nkinkaako, amukabikkile maanu kubakwesu abachizi mbimutakajane ooko.” Nzyaakatubuzya mukwesu Frank zyakatugwasya kuti tulibambile kuyooba aabeenzuma bapya nkaambo kuGhana mbache loko bantu bakatuzi alubo zintu zyiingi zyakundawu eeyo zyakali zipya kulindiswe.

Paul: Nikuba oobo, muchiindi chifwiifwi bakwesu abachizi bakuGhana bakali baba mbuli mpuli yesu. Kwakali Bakamboni biingi loko kuGhana. Twakayiya zyiingi atala akusyomeka akuba aalusyomo lusimide kubeenzuma aaba bapya. Katuli twaba aaminyaka iili 13 katuli kuGhana, twakakumbilwa kuti tukabelekele kumutabi uuli ku-East Africa kuKenya. Nikuba kuti tulabayeeya bakwesu abachizi bali kuLiberia akuGhana, pesi twakaba aabeenzuma bapya kuKenya. Mbuli kuLiberia akuGhana, kuKenya kuli mulimu mwiingi loko ankuko wakukambawuka.

Anne: Muminyaka myiingi yayinda, twakaswaana zyiimo ziyumu alubo chimwi chiindi ndakali kuyoowa. Kuti katukkala mundawu ziyoosya zilakonzya kupa kuti tuchiswe akupa kuti tukkale katuyoowede. Tatulangilili kuti Jehova atukwabilile pe kuzintu eezi munzila yachigambyo. Lino kuti ndamvwa musindo wakudululwa kwantobolo, nga ndafweluka mwida alubo maboko ngaaba chitiliba. Nga ndabelesya nzila zyoonse Jehova nzyandipede kuti ndijane manguzu akugwasigwa aabakwesu abachizi. Kuti Twakkala katubala, katukomba, katunjila miswaangano akukambawuka, Jehova ulatugwasya kuti twiinkilile kunembo amulimu wesu.

Paul: Chimwi chiindi bantu nga batubuzya kuti, “Muluuyanda na mulimu wanu?” Nyika imwi ayimwi ilaabubotu bwayo pesi kulizimwi ziindi zintu mpuzikonzya kubija. Niinzi zitakonzyi kuchincha? Mbakwesu abachizi nkaambo nimpuli yesu. Nikuba kuti twakakomezegwa munzila zisiyene, pesi tuli aamuzeezo uumwi. Twakayeeya kuti twakatumwa kuti tuzoosungwaazye bakwesu pesi simpe ndyakuti, ndiswe twakasimisigwa.

Bakwesu bamunyika yoonse nchigambyo chizwa kuli Jehova. Tuli mpuli iimwi munyika yoonse nkaambo kakuti tuli mumbunga, tuli aampuli alubo tulimvwa katukwabililidwe. Tulaachoonzyo chakuti, kuti twayinkilila kunembo katusyoma Jehova, uzootupa manguzu ngituyandikana kuti tulisimye kufumbwa zyiimo nzitukonzya kuswaana.—Flp. 4:13.