1. Mwaapostoli Pawulu wakali kubabona biyeni babelesi bambungano?

 BABELESI bambungano bachita mulimu uuyandikana loko mumbungano. Mwaapostoli Pawulu wakali kubabona kabayandikana loko baalumi aaba basyomeka. Muchikozyano, naakali kulembela maKkristu bakuFilipi lugwalo, kalikujuzya baalu wakabajuzya ambabo babelesi bambungano.—Flp. 1:1.

2. Mukwesu uutegwa Luis ukubona biyeni kubeleka kali mubelesi wambungano?

² Nikuba kuti mbaniini naakuti mbapati, bakwesu biingi babbabbatizidwe balabotelwa kubeleka kabali babelesi bambungano. Muchikozyano, Devan wakaba mubelesi wambungano naakali aaminyaka iili 18. Pesi mukwesu uutegwa Luis wakaba mubelesi wambungano kali aaminyaka iili kuma 50. Wakaamba mbubalimvwa babelesi bambungano biingi, wakati: “Ndichibona kachili chilongezyo chipati kubeleka kandili mubelesi wambungano kapati kuti ndayeeya luyando ndubakanditondeezya bakwesu abachizi mumbungano.”

3. Njiili mibuzyo njitutalange-lange?

³ Kuti kuli mukwesu uubbabbatizidwe mpawo kutali mubelesi wambungano, tuyandi na kuba mubelesi wambungano? Niinzi chikonzya kukugwasya kuti uchite oobo? Alubo mbuubuli buntu bwamuMagwalo mbuyelede kuba aabo? Mibuzyo eeyi ilasandulwa muchiiyo eechi. Pesi atusaangune kulanga-langa kuti nguuli mulimu uuchitwa aamubelesi wambungano.

 NGUULI MULIMU UUCHITWA AAMUBELESI WAMBUNGANO?

4. Nguuli mulimu uuchitwa aababelesi bambungano? (Langa chifanikisyo.)

⁴ Mubelesi wambungano mukwesu uubbabbatizidwe usalwa aamuuya uusalala kuti agwasye baalu kuchita iimwi milimu iiyandikana mumbungano. Bamwi babelesi bambungano baba aachoonzyo chakuti basikupupulula bajana ndawu zyakukambawukila amabbuku aamumulimu wakukambawuka. Bamwi balagwasilizya mukusalazya akubambulula Ng’anda yaBwaami. Babelesi bambungano babeleka kabali balindi alubo mbabo batyankuula minchina kuti tweebele mavidiyo kumiswaangano yambungano. Eeyi njiimwi milimu iichitwa aababelesi bambungano. Chiyandikana loko nchakuti babelesi bambungano basime mubukombi, bayande Jehova akuti bapone kweendelana azyeelelo zyakwe ziluleme. Babelesi bambungano, babayanda loko bakwesu abachizi. (Mt. 22:​37-39) Niinzi nzyayelede kuchita mukwesu uubbabbatizidwe kuti ayelele kuba mubelesi wambungano?

5. Niinzi nzyayelede kuchita mukwesu kuti ayelele kuba mubelesi wambungano?

⁵ Bbayibbili lyaamba buntu mbubeelede kubaabo bakwesu bayanda kuba babelesi bambungano. (1 Tim. 3:​8-10, 12, 13) Kuti ujane chilongezyo eechi, weelede kubala atala abuntu oobu mpawo ubeleka changuzu kuti ube aabo. Pesi chakusaanguna, weelede kulibuzya kuti, ‘Nkamboonzi nindiyanda kuba mubelesi wambungano?’

NKAMBOONZI NUYANDA KUBA MUBELESI WAMBUNGANO?

6. Niinzi chikonzya kukugwasya kuti uchite kufumbwa mulimu nguwapegwa kuti ugwasye bakwesu abachizi? (Mateyo 20:​28, langa chifanikisyo chili aachivumbyo.)

⁶ Jesu Kkristu nchikozyano chilikabotu loko kulindiswe, akaambo kakuti wakali kumuyanda Wisi abantu. Luyando oolo lwakapa kuti abeleke changuzu alubo wakali kuchita nikuba milimu yakali kulangilwaansi. (Bala Mateyo 20:28; Joh. 13:​5, 14, 15) Kuti kuyanda Jehova abantu, Jehova uzookulongezya alubo uzookugwasya kuti weelele kuba mubelesi wambungano.—1 Kor. 16:14; 1 Pet. 5:5.

7. Nkamboonzi bakwesu nibateelede kulisumpula?

⁷ Bantu balisumpula balombozegwa loko munyika. Pesi teembukubede pe mumbunga yaJehova. Mukwesu uuyanda Jehova abantu mbuli Jesu, takulwanini biya pe kuba  aazyakuchita zyiingi mumbungano, kuzulwida bamwi naakuti kuba aampuwo. Kuti muntu uulisumpula wasalwa kuti abe mubelesi wambungano, ulakonzya kukaka kuchita iimwi milimu iilangilwaansi kuti agwasye mbelele zyaJehova. Ulakonzya kubonaanga kuchita milimu eeyo nkulidyaamizya. (Joh. 10:12) Jehova tazilongezyi pe zintu nzyachita muntu ooyo akaambo kakuti ulalisumpula.—1 Kor. 10:​24, 33; 13:​4, 5.

8. Nduululi lulayo Jesu ndwaakapa baapostoli bakwe?

⁸ Chimwi chiindi, nibaba beenzinyina baJesu bakayanda zimwi zilongezyo kabali aamakanze mabi. Atubone zyakachitwa aabaapostoli baJesu babili, Jakkobo aJohane. Bakakumbila Jesu kuti abape zyuuno zyaajulu muBwaami bwakwe. Nzibakachita Jesu taakaziyanda pe. Pesi wakabapandulwida baapostoli boonse bali 12, wakati: “Kufumbwa muntu uuyanda kuba mupati aakati kanu, weelede kuba mubelesi wanu, alubo kufumbwa muntu uuyanda kuba wakusaanguna aakati kanu, weelede kuba muzike waboonse.” (Mk. 10:​35-37, 43, 44) Bakwesu bayanda kuba babelesi bambungano kuti kabali aamakanze aalikabotu nchilongezyo kumbungano.—1 Tes. 2:8.

NZUKONZYA KUCHITA KUTI UBE AACHIYANDISYO CHAKUGWASYA BAKOMBINYOKWE

9. Niinzi chikonzya kukugwasya kuti ube aachiyandisyo chakuba mubelesi wambungano?

⁹ Zilaantanganana kuti ulamuyanda Jehova akuti uyanda kugwasya bamwi. Nikuba oobo, kulakonzeka kuti tukwe chiyandisyo pe chakuchita milimu iichitwa aababelesi bambungano. Niinzi chikonzya kukugwasya kuti ube aachiyandisyo chakuba mubelesi wambungano? Ulakonzya kuyeeyela kubotelwa nkukonzya kubaako kuti wagwasya bakombinyokwe. Jesu wakati: “Kupa, kupa kubotelwa loko kwiinda kutambula.” (Mil. 20:35) Jesu wakazichita nzyaakaamba. Jesu wakali kubotelwa akaambo kakuti wakali kugwasya bamwi anduwe ulakonzya kubotelwa.

10. Jesu wakatondeezya biyeni kuti wakali kubotelwa naakali kugwasya bamwi? (Makko 6:​31-34)

¹⁰ Atubone chikozyano chitondeezya kuti Jesu wakali kubotelwa naakali kugwasya bamwi. (Bala Makko 6:​31-34.) Aali chimwi chiindi, Jesu abaapostoli bakwe bakali bakatala. Bakali kuyanda kuya kundawu kwakatalikwe bantu kuti bakapumune. Pesi nkamu yabantu yakabasaangunina kusika kundawu eeyo kabalangilila kuyiisigwa aaJesu. Jesu wakali kukonzya kukaka kuti abayiisye. Akaambo kakuti Jesu abaapostoli bakwe “teebakachilikwe chiindi chakupumuna nichiba chakulya.” Wakali kukonzya kubayiisya zintu ziche mpawo kababuzya kuti babweede kumyuunzi yabo. Pesi akaambo kakuti wakali kubayanda bantu “wakasaanguna kubayiisya zintu zyiingi.” Alubo wakayinkilila kunembo kubayiisya kusikila “chiindi chayinka.” (Mk. 6:35) Wakabayiisya akaambo kakuti “wakabeetelela” kutali kuti nzizyo nzyaakeelede kuchita. Wakali kuyanda kubayiisya akaambo kakuti wakali kubayanda. Jesu wakali kubotelwa akaambo kakugwasya bamwi.

11. Jesu wakabagwasya biyeni bamwi? (Langa chifanikisyo.)

¹¹ Chiindi Jesu naakali kugwasya nkamu yabantu, taakali kugolela aakubayiisya kupela pe. Wakali kubapa nikuba nzibakali kuyandikana. Munzila yachigambyo, wakabapa chakulya mpawo wakabuzya basikwiiya bakwe kuti babaabanisye chakulya eecho. (Mk. 6:41) Nzyaakachita Jesu zyakayiisya basikwiiya bakwe mbubakeelede kugwasya bamwi. Alubo wakabatondeezya kuti kuchita milimu eeyi kulayandikana mbuli milimu iichitwa aababelesi bambungano. Yeeyela kubotelwa nkubakabaako baapostoli nibakabelekaamwi aJesu kuti  basanine bantu munzila yachigambyo mpawo bantu “boonse bakalya bakkuta.” (Mk. 6:42) Eechi nchiimwi chikozyano chitondeezya Jesu mbaakabikka ziyandwa aabamwi mubusena bwakusaanguna kwiinda nzyaakali kuyanda. Kwabuumi bwakwe boonse kali aanyika, wakali kugwasya bantu. (Mt. 4:23; 8:16) Jesu wakali kubotelwa akukkutisikana naakali kuyiisya bamwi akubapa nzibakali kuyandikana. Anduwe uzoobotelwa kuti wagwasya bamwi kuli mubelesi wambungano.

12. Nkamboonzi nituteelede kubonaanga taakwe nzitukonzya kuchita mumbungano?

¹² Kuti walimvwa kutayeleli kuba mubelesi wambungano, utamani manguzu pe. Buntu mbulaabo lino ulakonzya kububelesya kuti ugwasye bamwi mumbungano. Yeeya nzyaakaamba Pawulu muli 1 Bakkorinte 12:​12-30 mpawo ukumbile Jehova kuti akugwasye kubona mbaabeleka makani aayo kulinduwe. Majwi ngaakaamba Pawulu abikka aantanganana kuti ulayandikana mumbungano mbuli bamwi bakombi baJehova. Kuti kakulaamwi mpuyelede kubambulula kuti weelele kuti ube mubelesi wambungano, utateyi mulenga pe pesi beleka changuzu kuti uchite kufumbwa nzukonzya kuti ukombe Jehova akugwasya bakombinyokwe. Baachoonzyo chakuti baalu balichibwene chiyandisyo chako akuti balakupa milimu njukonzya.—Rom. 12:​4-8.

13. Nkamboonzi nikutali kuyumu kuti mukwesu abe mubelesi wambungano?

¹³ Bona kamwi kaambo katondeezya kuti nkamboonzi nweelede kubelekela kuti ube mubelesi wambungano. Buntu bwiingi mbuyelede kubaabo, mbubo bweelede kuba aamaKkristu boonse. MaKkristu boonse beelede kuswena aafwiifwi aJehova, babotelwe akupa bamwi alubo beelede kupona munzila iibotezya Leza. Niinzi nzyayelede kuchita mukwesu kuti ayelele kuba mubelesi wambungano?

NZWEELEDE KUCHITA KUTI UBE MUBELESI WAMBUNGANO

14. Majwi aakuti “batawubaansyi zintu” aambaanzi? (1 Timoti 3:​8-10, 12)

¹⁴ Lino atubone zimwi zyeelelo zilembedwe muli 1 Timoti 3:​8-10, 12. (Bala.) Babelesi bambungano beelede kuba bantu “batawubaansyi zintu.” Mabala aaya alakonzya kusandululwa kuti beelede kuba bantu “balemekeka.” Eezi tazyaambi kuti weelede kwaanga manganda naakuti kutaseka-seka. (Muk. 3:​1, 4) Pesi weelede kubeleka changuzu kuti uchite milimu yoonse njuwapegwa. Kuti kuli aampuwo yakuti  ulazichita zyoonse nzupegwa, kuzichita mbuli mbuzyeelede kuchitwa, bamwi mumbungano balakulemeka.

15. Majwi aakuti “kutali baambuula zintu zibili zisiyene” aatii, “kutali batangazu bayanda kujana zintu munzila yakutasyomeka” aambaanzi?

¹⁵ Majwi aakuti “kutali baambuula zintu zibili zisiyene” aamba kutachincha twaambo, kusyomeka akwaamba choonzyo. Uchita kweendelana anzwaawamba alubo tubeeni pe bamwi. (Tus. 3:32) Majwi aakuti “kutali batangazu bayanda kujana zintu munzila yakutasyomeka” aamba kusyomeka kunkani yabbizinesi akunzila njuyibelesyaayo mali. Tukoochita zintu munzila yabumpelenge pe kubakombinyokwe kuli aamakanze aakuti ujane mali.

16. (a) Majwi aakuti “kutali banywa wayini nyingi” aambaanzi? (b) Majwi aakuti kuba “amoyo uutabapi mulandu” aambaanzi?

¹⁶ Majwi aakuti “kutali banywa wayini nyingi” aamba kuti tabanywi bukande zyiindilide naakuti kuba aampuwo yabuchankolwa. Majwi aakuti kuba “amoyo uutabapi mulandu” aamba kuti bapona kweendelana azyeelelo zyaJehova. Nikuba kuti tabamaninide pe pesi bali aabweenzinyina bulikabotu aLeza alubo eezi zipa kuti babe aaluumuno lwamumizeezo.

17. Majwi aakuti “amubeezye saansi, mubone kuti baleelela na” aambaanzi? (1 Timoti 3:10; langa chifanikisyo.)

¹⁷ Majwi aakuti “amubeezye saansi” aamba kuti bakatondeezya kale kuti balakonzya kuchita milimu njibapegwa munzila iilikabotu alubo chakusyomeka. Nkinkaako, kuti baalu bakupa zyakuchita, atobelezye kabotu malayilile ngibakupa alubo tobelezya malayilile aazwa kumbunga. Baachoonzyo chakuti wazimvwisisisya zintu ziyandikana kumulimu ooyo nguwapegwa alubo umvwisisisye kuti weelede kuumaninsya lili. Nulikuuchita kabotu mulimu wako kuli aabusungu, bakwesu abachizi bali mumbungano balazibona kuti ulikukomena mubukombi. Nibaalu, amube aachoonzyo chakuti mulikubayiisya bakwesu babbabbatizidwe. (Bala 1 Timoti 3:10.) Mumbungano yanu, kuli bakwesu bachiniini na babbabbatizidwe? Nzikozyano zilikabotu na kunkani yakubala akuyanduulisisya kabali aabalikke? Bakkala kabasandula na kumiswaangano alubo balazwa na mukukambawuka? Kuti kakuli oobo, amubape zyakuchita zyeendelana aaminyaka njibalaayo azyiimo zyabo. Munzila eeyi, bakwesu bachiniini, nga ‘balikweezegwa kuti baleelela na’? Mpawo nibaya bukomena balakonzya kweelela kuba babelesi bambungano?

18. Majwi aakuti “taakwe nchibasolwaacho pe” aambaanzi?

 ¹⁸ Majwi aakuti “taakwe nchibasolwaacho pe” aamba kuti taakwe kaambo kapa kuti bajanike kabali aamulandu wakuchita chibi chipati. Nikuba oobo, maKkristu balakonzya kutamikizigwa. Jesu wakatamikizigwa alubo wakaamba kuti batobeli bakwe ambabo bazootamikizigwa. (Joh. 15:20) Nikuba oobo, kuti walijata kabotu mbuli mbaakachita Jesu, ulaba aampuwo mbotu mumbungano.—Mt. 11:19.

19. Kuba “mulumi uuli aamwanakazi uumwi” kuswaanizyaanzi?

¹⁹ “Mulumi uuli aamwanakazi uumwi.” Kuti kakwete, weelede kuba aamaboneno ngaakali aawo Jehova chiindi naakasaanguna mabambe aalukwatano, weelede kuba aamwanakazi uumwi. (Mt. 19:​3-9) Mwaalumi wachiKkristu teelede kuchita bwaamu pe. (Heb. 13:4) Pesi kuli zyiingi nzyayelede kuchita. Weelede kusyomeka kumwanakazi wakwe alubo teelede kumenena bamwi banakazi mate.—Job. 31:1.

20. Niinzi nzyakonzya kuchita mwaalumi kuti atondeezye kuti ‘ubeendelezya kabotu’ bamung’anda yakwe?

²⁰ “Uubeendelezya kabotu bana bakwe abamung’anda yakwe.” Kuti kuli mutwe wampuli, weelede kubeleka changuzu kuti uzuzikizye milimu yako yoonse. Kkala kuchitisya kukomba kwampuli. Kkala kuzwa mumulimu wakukambawuka ampuli yako. Alubo gwasya bana bako kuti babe aabweenzinyina busimide aJehova. (Ef. 6:4) Mwaalumi uuyilangania kabotu mpuli yakwe utondeezya kuti ulakonzya kwiilangania mbungano.—Yezyanisya aa 1 Timoti 3:5.

21. Kuti kutanaba mubelesi wambungano, niinzi nzukonzya kuchita?

²¹ Nibakwesu, kuti kamutanaba babelesi bambungano, amwiikombele nkani eeyi nimwanoobala chiiyo eechi. Amubale atala azyeelelo nzibeelede kubaazyo babelesi bambungano mpawo mubeleke changuzu kuti mube aazyeelelo eezyo. Amuyungizye mbumumuyanda Jehova abakwesu abachizi mpawo mube aachiyandisyo chakubabelekela. (1 Pet. 4:​8, 10) Amubelekele kuti mube babelesi bambungano alubo muzoobotelwa kwiinda mukugwasya bakombinyokwe mumbungano. Jehova ngalongezye kubeleka changuzu nkumulikuchita kuti mweelele kuba babelesi bambungano.—Flp. 2:13.