1. Jehova uchita biyeni kuti azuzikizye makanze aakwe?

JEHOVA ulakonzya kuba kufumbwa mbayanda kuti azuzikizye makanze aakwe. Muchikozyano, wakaba Muyiisi, Sikuumbulizya aMukambawusi. (Is. 48:17; 2 Kor. 7:6; Gal. 3:8) Nikuba boobo, ulakonzya kubelesya bantu kuti bazuzikizye makanze aakwe. (Mt. 24:14; 28:19, 20; 2 Kor. 1:3, 4) Alubo Jehova ulakonzya kutupa busongo aluzibo zikonzya kutugwasya kuti tuzuzikizye makanze aakwe. Eezi nziimwi nzilyaamba zina lyaJehova mbuuli mbubaamba basikulanga-langa Bbayibbele biingi.

2. (a) Nkamboonzi bamwi nibabonaanga tabakonzyi pe kuchita zyiingi mumulimu waJehova? (b) Tulalanga-langaanzi muchiiyo eechi?

² Toonse tulayanda kubelesegwa aJehova mumulimu wakwe pesi bamwi babonaanga tabakonzyi pe kuchita zyiingi. Nkamboonzi? Akaambo kazyiimo zyabo, minyaka njibalaayo azimwi. Alubo bamwi babonaanga nzibachita zili kabotu zyakuti babonaanga takuyandikani pe kuti bayungizye nzibachita mumulimu waJehova. Muchiiyo eechi tulalanga-langa Jehova mbatugwasya kuti tuzuzikizye makanze aakwe. Alubo tulalanga-langa zikozyano zili muBbayibbele zyabaalumi abanakazi bakagwasigwa aJehova kuti babe aachiyandisyo amanguzu aakuchita mulimu wakwe. Kumamanino, tulalanga-langa nzitweelede kuchita kuti Jehova akonzye kutubelesya.

3. Kweendelana alugwalo lwa Bafilipi 2:13, Jehova utugwasya biyeni kuti tube aachiyandisyo chakuchita nzyayanda?

³ Bala Bafilipi 2:13. * Jehova ulatugwasya kuti tube aachiyandisyo chakuchita mulimu wakwe. Uzichita biyeni eezi? Chimwi chiindi tulakonzya kumvwa kuti kuli umwi uyanda lugwasyo mumbungano yesu. Naakuti baalu balakonzya kubala lugwalo lwaamba kuti kuli bamwi bakombima bayanda lugwasyo muli aamwi masena. Eezi zilakonzya kupa kuti tulibuzye kuti, ‘Nga ndilagwasilizya biyeni?’ Kulakonzeka kuti wapegwa mulimu ngubonaanga tuukonzyi pe kuuchita. Alubo ulakonzya kubala imwi vesi mpawo walibuzya kuti, ‘Nga ndilazibelesya biyeni nzindabala kuti ndigwasye bamwi?’ Jehova tatumanikizyi pe kuti tuchite nzyayanda pesi kuti wabona chiyandisyo nchitulaacho ulakonzya kutugwasya kuti tuzuzikizye nzituyanda kuchita.

4. Jehova utugwasya biyeni kuti tube amanguzu aakuchita nzyayanda?

⁴ Jehova ulakonzya kutupa manguzu aakuti tuchite nzyayanda. (Is. 40:29) Jehova ulakonzya kutupa manguzu aakuti tuchite mulimu wakwe kabelesya muuya uusalala. (Kul. 35:30-35) Alubo Jehova ulatuyiisya mbutukonzya kuchita imwi milimu kabelesya mbunga yakwe. Kuti kuyanda lugwasyo lwakuchita umwi mulimu, kumbila bamwi balaaluzibo kuti bakugwasye. Alubo kumbila Taateesu uulikujulu kuti akupe “nguzu zigambya iziinda zyabantu.” (2 Kor. 4:7; Lk. 11:13) Bbayibbele lilaazikozyano zyabaalumi abanakazi bakagwasigwa aJehova kuti babe aachiyandisyo amanguzu aakuti bachite mulimu wakwe. Twanoolanga-langa zikozyano eezi baachoonzyo chakuti Jehova ulakonzya kukugwasya anduwe munzila iikozyenie.

5. Twiiyaanzi kunzila Jehova njakamubelesya aayo Mozesi akuti wakamubelesya kaali waba biyeni?

⁵ Jehova wakabelesya Mozesi kuti anunune maIsrayeli. Pesi wakamubelesya lili? Wakamubelesya chiindi ‘naakayiisyigwa busongo boonse bwabana Egepita’ na? (Mil. 7:22-25) Peepe, Jehova wakabelesya Mozesi chiindi naakazwa kumuyiisya kuti abe muntu uulibombya alubo uutafwambaani kunyema. (Mil. 7:30, 34-36) Jehova wakagwasya Mozesi kuti abe aachibindi chakwaambuula amwaami wakuEgepita wakali kuyoosya. (Kul. 9:13-19) Twiiyaanzi kunzila Jehova njakamubelesya aayo Mozesi akuti wakamubelesya kaali waba biyeni? Twiiya kuti Jehova ubelesya bantu bali abuntu mbwayanda abamusyoma kuti ulabagwasya.​—Flp. 4:13.

6. Twiiyaanzi kunzila Jehova njakamubelesya aayo Bbarizilayi kuti agwasye Davida?

⁶ Nikwakayinda chiindi, Jehova wakabelesya Bbarizilayi kuti agwasye Mwaami Davida. Davida abantu mbaakalaabo ‘bakabaanzala, bakakatala alimwi bakafwa nyota’ chiindi nibakali kuchija mwanaakwe Abbisalomu. Nikuba kuti wakali wachembaala aachiindi eecho, Bbarizilayi abamwi bantu bakabikka buumi bwabo mungozi kuti bagwasye Davida. Bbarizilayi taakayeeya kuti tachikonzyi pe kuchitila Jehova chimwi chintu akaambo kakuti wakali wachembaala. Pesi wakapa babelesi baJehova lugwasyo ndubakali kuyanda muchiindi eecho. (2 Sam. 17:27-29) Twiiyaanzi munkani eeyi? Twiiya kuti Jehova ulakonzya kutubelesya kuti tuzuzikizye makanze aakwe kwiinda mukugwasya bakombima mumbungano naakuti bali muli zimwi ndawu. (Tus. 3:27, 28; 19:17) Nikuba katulikule, tulakonzya kupa mali  mutubbokesi twakusanga kuti ikagwasilizye bakombima bayanda lugwasyo.​—2 Kor. 8:14, 15; 9:11.

7. Jehova wakamubelesya biyeni Simiyoni alubo kuziba eezi kutugwasya biyeni?

⁷ Jehova wakasyomezya mwaalumi usyomeka uutegwa Simiyoni wakali kukkala kuJerusalemu kuti taakali kuyoofwa pe katanabona Mesiya. Kweelede kuti chisyomezyo eechi chakamusimya Simiyoni nkaambo wakali kulangilila Mesiya kwaminyaka myiingi. Alubo wakalongezegwa akaambo kakuba alusyomo akulisimya. Limwi zuba “kasololelwa amuuya,” wakanjila mutempele. Wakabona Jesu kachili mwana alubo Jehova wakapa kuti Simiyoni aambilizye atala akuti Jesu nguwe wakali Kristu. (Lk. 2:25-35) Kulakonzeka kuti Simiyoni wakafwa Jesu katanachita milimu yakwe pesi wakabotelwa akaambo kachilongezyo nchakabaacho alubo uyoojana zilongezyo zyiingi kunembo. Munyika mpya Simiyoni uyoobona bweendelezi bwaJesu mbubuyooyeta zilongezyo kubantu boonse aanyika. (Matl. 22:18) Andiswe tulabotelwa akaambo kachilongezyo Jehova nchatupede chakubeleka mulimu wakwe.

8. Jehova nga ulatubelesya biyeni mbuuli mbaakabelesya Bbarnabba?

⁸ Mumwaanda wamunyaka wakusaanguna, Jehova wakabelesya mwaalumi wakali kutegwa Josefa nkaambo wakazumina kuti amubelesye. (Mil. 4:36, 37) Kweelede kuti Josefa wakali kubawumbulizya bamwi nkinkaako baapostolo bakamupa zina lyakuti Bbarnabba lyaamba kuti “Mwana Waluumbulizyo.” Muchikozyano, chiindi Pawulu nakaba sikwiiya, maKristu bakali kumuyoowa akaambo kakuti wakali kupenzya mbungano. Nikuba boobo, Bbarnabba wakagwasya Pawulu kuti atambulwe abamwi mbuuli sikwiiya waKristu alubo kweelede kuti Pawulu wakamulumba loko akaambo kalugwasyo ndwaakamupa. (Mil. 9:21, 26-28) Mukuya kwachiindi, baalu bamuJerusalemu nibakabona kuti bakombinyina bakuAntiyokkeya yakuSiriya bakali kuyanda kusungwaazigwa, bakatuma Bbarnabba kuti akabaswaye. Bakasala kabotu nkaambo Bbayibbele liti, Bbarnabba ‘wakabakulwaizya boonse kuti bazumanane kukakatila ku Mwami amoyo omwe.’ (Mil. 11:22-24) Andiswe mazubaano, Jehova ulakonzya kupa kuti tube ‘bana baluumbulizyo’ kubakombima. Muchikozyano, ulakonzya kutubelesya kuti tuumbulizye umwi mukombima kuti wafwidwa muntu ngwayanda. Alubo ulakonzya kupa kuti tuswaye naakuti kufoonena umwi mukombima ulikuchiswa naakuti ukataazikene. Uyoozumina na kuti Jehova akubelesye mbuuli Bbarnabba?​—1 Tes. 5:14.

9. Twiiyaanzi kunzila Jehova njakamugwasya aayo mukwesu uutegwa Vasily?

⁹ Umwi mukwesu uutegwa Vasily wakaba mwaalu kali aaminyaka iili 26 alubo wakali kuyoowa kuti uyookonzya na kuchita milimu yabukombi kapati kuumbulizya bantu bali mumapenzi. Jehova wakagwasya Vasily kuti abe mwaalu ulikabotu. Vasily wakajana lwiiyo lugwasya kubaalunyina basimide mubukombi akuChikolo Chamulimu waBwaami. Alubo Vasily wakabeleka changuzu kuti azwidilile. Muchikozyano, wakalemba aansi zintu ziniini nzyaakali kuyanda kuchita. Kuzuzikizya zintu eezyo kwakamugwasya kuti atayoowi pe kuba mwaalu. Vasily wakati: “Lino ndilikubotelwa kuba mwaalu nikuba kuti kumatalikilo ndakali kuyoowa. Kulandibotezya kubona Jehova kandigwasya kujana lugwalo ndundikonzya kubelesya kuti ndigwasye mukwesu naakuti muchizi mumbungano.” Nibakwesu, kuti mwazumina kuti Jehova amubelesye, uyoomupa manguzu aakuti muchite zyiingi mumulimu wakwe mbuuli mbaakachita kuli Vasily.

10. Abbigayeli wakachitaanzi alubo chikozyano chakwe chakuyiisyaanzi?

¹⁰ Chiindi Davida abantu mbaakali aabo nibakali kuchija Mwaami Sawulu bakali kuyanda lugwasyo. Baalumi bakali aDavida bakakumbila umwi mwaalumi wakanotede wakali kutegwa Nabbala kuti abagwasye achakulya. Bakali kubonaanga Nabbala uyoobagwasya nkaambo bakali kukwabilila butanga bwakwe musokwe. Pesi Nabbala wakakaka kubagwasya. Davida wakanyema alubo wakabamba nkamu yakwe kuti bakalobye Nabbala abaalumi boonse bamung’anda yakwe. (1 Sam. 25:3-13, 22) Nikuba boobo, Abbigayeli mukayintu waNabbala wakali musongo alubo wakali mubotu. Nkinkaako wakatondeezya chibindi kwiinda mukukumbila Davida kuti atamujayi pe Nabbala akaambo kakuti eezi zyakali kuyoopa kuti abe amulandu waganzi. Munzila yabuchenjezu Abbigayeli wakabuzya Davida kuti asiye nkani eeyi mumaboko aaJehova. Majwi aAbbigayeli akamuyasa aamoyo Davida. Eezi zyakapa kuti Davida aambe kuti Abbigayeli wakatumidwe aJehova. (1 Sam. 25:23-28, 32-34) Jehova wakabelesya Abbigayeli akaambo kakuti wakali abuntu bulikabotu. Nibachizi, andinywe kuti mwaba abusongo Jehova ulakonzya kumubelesya kuti muyake mpuli zyanu akuti muyake bamwi mumbungano mbuuli mbaakachita Abbigayeli.​—Tus. 24:3; Tit. 2:3-5.

11. Bana basimbi baSalumi bakachitaanzi, alubo mbaani batobelezya chikozyano chabo mazubaano?

¹¹ Nikwakayinda minyaka myiingi kuzwa muchiindi eecho, bana basimbi baSalumi bakagwasilizya mukuyakulula miduli yaJerusalemu. (Neh. 2:20; 3:12) Nikuba kuti wisi wakali mweendelezi, bana basimbi baSalumi bakalipeda kuchita mulimu ooyu wakali muyumu alubo wakalaangozi. (Neh. 4:15-18) Nzibakachita zilisiyene azyakachitwa abantu bakuTekkowa “bakakaka kubeleka” mumulimu ooyu. (Neh. 3:5) Kweelede kuti bana basimbi baSalumi bakabotelwa chiindi miduli yaJerusalemu niyakamana mumazuba aali 52 luzutu. (Neh. 6:15) Mazubaano bachizi balalipeda chakuliyandila kubeleka milimu myiingi mumbunga iiswaanizya kuyaka akubambulula masena aakukombela. Luzibo lwabo, kusungwaala akusyomeka kwabo zigwasya kuti milimu eeyi izwidilile.

12. Jehova nga ulatubelesya biyeni mbuuli mbaakabelesya Tabita?

¹² Jehova wakapa kuti Tabita achitile “bamwi milimo mibotu minji alimwi akupa zipego zyaluse” kapati bamukabafu. (Mil. 9:36) Tabita naakafwa, biingi bakalila akaambo kakuti wakali kubachitila zintu zibotu. Pesi bakabotelwa loko chiindi mwaapostolo Petro naakamubusya. (Mil. 9:39-41) Chikozyano chaTabita chituyiisyaanzi? Kufumbwa kuti tuli banakazi naakuti tuli baalumi, kazitakwe ndaba aminyaka njitulaayo, toonse tulakonzya kugwasya bakombima kwiinda mukubapa lugwasyo ndubayanda.​—Heb. 13:16.

13. Jehova wakamubelesya biyeni umwi muchizi wakali abweeme alubo wakazootyeni?

¹³ Umwi muchizi uutegwa Ruth wakali kuyanda kuba mumishinali pesi wakali abweeme naakuti nsoni. Naakachili muniini wakali kuyandisya kupa bantu tupepa twesu twakubala aang’anda ang’anda alubo kuchita oobu kwakali kumunoneezya. Pesi kwaambuula abantu atala aBwaami bwaLeza kung’anda ang’anda kwakali kumuyumina. Nikuba kuti wakali abweeme, Ruth wakasaanguna kupayona kali aminyaka iili 18. Mu1946 wakanjila chikolo chitegwa Watchtower Bible School of Gilead alubo wakakubelekela kuHawaii akuJapan. Jehova wakamubelesya loko Ruth  mukukambawuka makani mabotu mumasena aayo. Nikwakayinda minyaka iili 80 kali kuchita mulimu ooyu, Ruth wakati: “Jehova nguwe wakandipa manguzu. Wakandigwasya kuti ndizunde penzi lyangu lyakuba abweeme. Ndilaachoonzyo chakuti Jehova ulakonzya kutubelesya kuti twamusyoma aamoyo woonse.”

14. Kweendelana alugwalo lwa Bakolose 1:29, tweelede kuchitaanzi kuti Jehova atubelesye?

¹⁴ Twabona kuti kuzwa chiindi Jehova wakali kubelesya bakombi bakwe kuti bachite milimu iisiyene-siyene. Ani iwe Jehova uyookubelesya kuti uchiteenzi? Kuti akubelesye weelede kulipeda kubeleka changuzu. (Bala Bakolose 1:29.) Kuti wazumina kuti Jehova akubelesye, ulakonzya kupa kuti ube mukambawusi musungu, muyiisi uuzwidilila, sikuumbulizya mubotu, mubelesi ulaaluzibo, mweenzuma ulikabotu alubo ulakonzya kupa kuti ube mbuuli mbayanda kuti azuzikizye makanze aakwe.

15. Kweendelana alugwalo lwa 1 Timoteyo 4:12, 15, bakwesu bachikula beelede kukumbila Jehova kuti abagwasye kuchitaanzi?

¹⁵ Nibakwesu bachikula, kuli milimu myiingi mumbungano iiyanda bakwesu bali aanguzu kuti babeleke kabali babelesi babelekela. Mumbungano zyiingi baalu mbiingi kwiinda babelesi babelekela. Kujana mwakonzya na kuchita zyiingi mumbungano? Bamwi balakonzya kulibuzya kuti, “Ndilimvwa kandili kabotu kubeleka kandili sikupupulula luzutu.” Kuti kulimvwa oobu, kumbila Jehova kuti akugwasye kuba aachiyandisyo chakuba mubelesi uubelekela akuti akupe manguzu aakumubelekela. (Muk. 12:1) Tuyanda lugwasyo lwanu mumbungano!​—Bala 1 Timoteyo 4:12, 15.

16. Niinzi nzitweelede kukumbila kuli Jehova alubo nkamboonzi?

¹⁶ Jehova ulakonzya kupa kuti ube kufumbwa mbayanda kuti azuzikizye makanze aakwe. Nkinkaako mukumbile kuti akugwasye kuti ube aachiyandisyo chakuchita mulimu wakwe akuti akupe manguzu. Kufumbwa minyaka njulaayo, belesya chiindi chako, manguzu azintu nzulaazyo kuti ubelekele Jehova. (Muk. 9:10) Kuti wapegwa mweenya wakuyungizya mulimu wako mumbunga, utakaki pe akaambo kakuyoowa kuti tukookonzya pe kuuchita. Toonse tulaachilongezyo chakuchita zintu zipa kuti Taateesu uulikujulu alemekwe.