1. Nkamboonzi nitweelede kukomba Jehova alikke?

TWEELEDE kukomba Jehova alikke nkaambo Mulengi wesu alubo nguSikutupa Buumi. (Ciy. 4:11) Pesi kulakonzya kutuyumina. Nikuba kuti Jehova tulamuyanda akumulemeka, tulakonzya kweenwa kuti tutakombi nguwe alikke. Tweelede kuziba zimwi zintu zikonzya kutweena. Pesi atusaangune kulanga-langa kuti kukomba Jehova alikke chaambaanzi.

2. Kweendelana amajwi aali muli Kulonga 34:14, niinzi nzituteelede kuchita kuti katukomba Jehova alikke?

² MuBbayibbele, kukomba Jehova alikke kwaamba kumuyanda amoyo woonse. Kuti katumuyanda amoyo woonse, tatukoozumizya muntu naakuti chimwi chintu kuti chitukachizye kukomba Jehova alikke.​—Bala Kulonga 34:14.

3. Niinzi chakapa kuti tusale kukomba Jehova alikke?

³ Niinzi chakapa kuti tusale kukomba Jehova alikke? Kuli twaambo twakapa kuti tuchite oobo. Twakasala kulipeda kuli nguwe akaambo kazintu zibotu nzitwakayiya atala anguwe. Twakayanda buntu bwakwe bubotu. Tulizizi zintu nzyayanda anzyatayandi. Tutondeezya kuti tulamuswiilila kwiinda mukuchita nzyayanda katubotelwa. Kutuzumizya kuti tukonzye kuba beenzinyina kutondeezya kuti Jehova ulatuyanda. (Int. 25:14) Zyoonse nzitwiiya atala aMulengi wesu zipa kuti tuswene aafwiifwi anguwe.​—Jak. 4:8.

4. (a) Dyabbulosi ubelesyaanzi kuti atukachizye kukomba Jehova alikke? (b) Tulalanga-langaanzi muchiyo eechi?

 ⁴ Dyabbulosi mweendelezi wanyika eeyi, nkinkaako ubelesya njiyo kuti tuyande zintu zitali kabotu ziyandwa amibili yesu. (Ef. 2:1-3; 1 Joh. 5:19) Makanze aakwe ngakuti tubikke zintu zili munyika mubusena bwakusaanguna kwiinda kukomba Jehova alikke. Atulange-lange zintu zibili nzyakonzya kubelesya. Chakusaanguna, uyanda kuti tuyandisye bunoti, chachibili utusungilizya kuti tusale zyakulikondelezya zitali kabotu.

5. Nkamboonzi nitweelede kuchenjelela muuya wakuyandisya mali?

⁵ Toonse tuyanda chakulya, zigogo abusena bulikabotu bwakukkala. Pesi tweelede kuchenjelela muuya wakuyandisya mali. Bantu biingi munyika yeendelezegwa aSaatani “bayandisya mali” abunoti. (2 Tim. 3:2) Jesu wakalizi kuti batobeli bakwe bakali kuzoosunkwa kuti bayandisye zintu eezi. Nkinkaako wakati: “Taakwe uukonzya kubelekela basimalelo bobilo; nkaambo uyoosula umwi akuyanda umbi, naa uyoosyomeka kuli umwi akusampula umbi. Tamukonzyi kubelekela Leza alimwi a Lubono.” (Mt. 6:24) Kuti muntu kakomba Jehova kumwi kabelesya chiindi chiingi amanguzu aakwe kuyanduula bunoti unooli uubelekela baami babili. Alubo nga tali kukomba Jehova alikke pe.

6. Twiiyaanzi kuzwa kumajwi Jesu ngaakabuzya mbungano yakuLawodikkeya?

⁶ Kumamanino aamwaanda wakusaanguna C.E., maKristu bamumbungano yakuLawodikkeya bakali kulisumpula kabaamba kuti: “Ndilivwubide alimwi ndalijanina lubono lunji alimwi kunyina cintu ncondibulide.” Pesi Jehova aJesu bakali kubabona ‘[kabali mumapenzi, kabafwisya nsoni], kabali bacete, kabali boofwu alimwi kabali mantanda.’  Jesu wakabalaya akaambo kakuti kuyandisya bunoti kwakali kunyongania bweenzinyina mbubakalaabo aJehova kutali akaambo kakuti bakali notede. (Ciy. 3:14-17) Kuti twabona kuti twaba amuuya wakuyandisya bunoti mumyoyo yesu, tweelede kufwambaana kugwisya muzeezo ooyo. (1 Tim. 6:7, 8) Kuti twawulekela muzeezo ooyu, tulatalisya kuyandisya zimwi zintu alubo Jehova nga tachibutambuli pe bukombi bwesu, nkaambo Leza “uuyanda kuti kakombwa buyo alikke.” (Dt. 4:24) Niinzi chikonzya kupa kuti tuyandisye mali?

7-9. Wayiyaanzi kuzintu zyakachitikila umwi mwaalu utegwa David?

⁷ Atulange-lange chikozyano chamwaalu ubeleka changuzu uutegwa David uukkala kuUnited States. David wakaamba kuti wakali kubeleka changuzu kumulimu wakwe. Nkinkaako wakapegwa chuuno kukkampani njaakali kubelekela alubo wakategwa nguumwi wabantu bakonzya kuchita mulimu ooyu muUnited States. Wakati: “Ndakali kuyeeya kuti kupolomotwa ooku kwakali kutondeezya kuti Jehova ulikundilongezya.” Pesi wakali kulongezegwa aJehova na?

⁸ David wakabona kuti bweenzinyina aJehova bwakali kuyabumana. Wakati: “Ndakali kuyeeya atala amapenzi aakali kuchitika kumulimu chiindi nindili mumulimu wakukambawuka achiindi nindili kumiswaangano.” Wakayungizya kuti: “Ndakali kujana mali nyingi, nikuba boobo ndakali kukataazikana mumizeezo alubo teetwakachili kumvwanana pe mulukwatano lwesu.”

⁹ David wakabona kuti wakeelede kulanga-langa zintu nzyaakali kubikka mubusena bwakusaanguna. Wakati: “Ndakayeeyesesya atala ambundakeelede kuchincha.” David wakali kuyanda kubeleka ma-awa mache, mpawo wakabuzya bbosi wakwe. Niinzi zyakachitika?  David wakamaninwa mulimu! Eezi zyakapa kuti achiteenzi? Wakaamba kuti: “Mubuzuba bwakatobela ndakasayina foomu lyakuba payona wakugwasilizya kwachiindi chilamfu.” Kuti bakonzye kujana ziyandikana, David amukayintu wakwe bakatalika kubeleka mulimu wakusalazya maanda. Mukuya kwachiindi, wakazooba payona wachiindi choonse alubo mukayintu wakwe alakwe wakazooba payona wachiindi choonse. Mpuli eeyi yakasala kubeleka mulimu ulangililwaansi abantu biingi nkaambo nchibayanda nkubelekela Jehova. Nikuba kuti balikujana mali nche kwiinda njibakali kujana chiindi pesi balikwiijana ikkwana kuti bawule zintu ziyandikana mweezi amweezi. Bayanda kubikka Jehova mubusena bwakusaanguna, alubo bakalibonena kuti Jehova ulabagwasya bantu babikka Bwaami bwakwe mubusena bwakusaanguna.​—Mt. 6:31-33.

10. Nga tulawukwabilila biyeni moyo wesu?

¹⁰ Weelede kukwabilila moyo wako kazitakwe ndaba kuti ulaazintu zyiingi naakuti ziche. Nga ulawukwabilila biyeni? Utabi amuuya wakuyandisya bunoti. Alubo utabikki mulimu mubusena bwakusaanguna kwiinda kubelekela Jehova. Nga ulabona biyeni kuti niinzi nchubikka mubusena bwakusaanguna? Weelede kulibuzya mibuzyo iitobela: ‘Ndikkala kandiyeeya atala amulimu wangu na nindili kumiswaangano anindili kukukambawuka? Ndikkala kandikataazikana na atala ambundikonzya kunoojana mali muchiindi chili kunembo? Mali naakuti zintu nzitulaazyo zipa kuti tutamvwanani na mumpuli yesu? Nga ndilazumina na kubeleka mulimu ulangililwaansi abantu biingi kuti kawundizumizya kubelekela Jehova?’ (1 Tim. 6:9-12) Chiindi nitulanga-langa mibuzyo eeyi, tweelede kuyeeya kuti Jehova ulatuyanda alubo usyomezya bantu bakomba nguwe alikke kuti: “Ziyume zitete, tandikakusiyi pe alimwi tandikakulekelezyi pe.” Eezi nzizyo zyakapa kuti mwaapostolo Pawulu alembe kuti: “Ibukkale bwanu butabi bwakuyandisya mali pe.”​—Heb. 13:5, 6.

11. Zyakulikondelezya zipa kuti bantu bachiteenzi?

¹¹ Jehova uyanda kuti katubotelwa mubuumi, alubo zyakulikondelezya zilakonzya kutugwasya kuti tubotelwe. Jwi lyaLeza lyaamba kuti “kumuntu kunyina cintu cibotu kwiinda kulya, kunywa alimwi akukkomana mumilimo njabeleka canguzu.” (Muk. 2:24) Pesi zyakulikondelezya zyiingi zili munyika tazili kabotu  pe. Zisumpula michito mibi alubo eezi zipa kuti bantu bachite zintu zitali kabotu zizondwa aLeza.

12. Kweendelana amajwi aali muli 1 Bakorinto 10:21, 22, nkamboonzi nitweelede kusala kabotu zyakulikondelezya?

¹² Tuyanda kukomba Jehova alikke, nkinkaako tatweelede kulya “atebulu lya Jehova alimwi aatebulu lyamadaimona.” (Bala 1 Bakorinto 10:21, 22.) Kulya awumwi muntu kutondeezya kuti mulamvwanana. Kuti twasala zyakulikondelezya zisumpula zyakulwana, zyamizimu, bwaamu azimwi zintu zitali kabotu tunooli tulikulya abasinkondonyina baLeza. Kuchita oobo kulatunyongania alubo kupa kuti bweenzuma mbutuli aabo aJehova bumane.

13-14. Kweendelana amajwi aali muli Jakobo 1:14, 15, nkamboonzi nitweelede kuchenjelela zyakulikondelezya nzitusala? Amba chikozyano.

¹³ Atulange-lange nzila zipa kuti zyakulikondelezya zikozyanie achakulya. Tulakonzya kulisalila nzituyanda kulya. Pesi kuti chakulya chaba mumubili tatukonzyi pe kulisalila kuti chiyoobeleka biyeni. Chakulya chili kabotu chiyaka mubili pesi chakulya chitali kabotu chipa kuti tuchiswe. Mpindu taziboneki pe buzuba mbutwachilya pesi nga zyazooboneka nikwayinda chiindi.

¹⁴ Munzila iikozyenie, tulakonzya kulisalila nzituyanda kulikondelezya aazyo. Pesi kuti zyanjila mumizeezo zilakonzya kuchincha mbutuyeeya. Zyakulikondelezya zilikabotu zipa kuti tuyeeye zilikabotu pesi zyakulikondelezya zitali kabotu zipa kuti tuyeeye zintu zibi. (Bala Jakobo 1:14, 15.) Mpindu ziba akaambo kakutasala kabotu taziboneki mpawaawo pesi nga zyazooboneka nikwayinda chiindi. Nkinkaako Bbayibbele lituchenjezya kuti: “Mutalyeeni pe: Leza takonzyi kufwubaazyigwa. Nkaambo kufwumbwa cintu muntu ncasyanga, ncencico eeco ncayootebula; nkaambo ooyo uusyanga kweelana azisusi zyamubili wakwe uyootebula kubola kuzwa kumubili wakwe.” (Gal. 6:7, 8) Tatweelede kulikondelezya azintu zizondwa aJehova!​—Int. 97:10.

15. Jehova utupede chipo chanzi?

¹⁵ Bakombi baJehova biingi balabotelwa kweebela mapulogilamu asiyene-siyene ajanika aJW Broadcasting^®. Umwi muchizi utegwa Marilyn wakati: “Mapulogilamu ajanika aaJW Broadcasting akandigwasya kuti ndibe amaboneno alikabotu alubo tandiyoowi pe kuti ndilakonzya kujana mavidiyo atali kabotu. Kuti ndaba abukata naakuti ndalendelelwa, nga ndayanduula nkani naakuti pulogilamu yaKukomba Kwakuseeni isungwaazya. Eezi zipa kuti ndiswene aafwiifwi aJehova ambunga yakwe. Mapulogilamu ajanika aaJW Broadcasting akandigwasya kuti ndichinche buumi bwangu.” Alikukugwasya na anduwe mapulogilamu aaya ngitupedwe aJehova? Kuyungizya aapulogilamu mpya izwa mweezi amweezi, aaJW Broadcasting kuli mavidiyo miingi, zyakuswiilizya zyakalekkoodwa anyimbo zinoneezya nzitukonzya kulizya kufumbwa chiindi.

16-17. Nkamboonzi nitweelede kuchenjelela chiindi nchitubelesya kuzintu zyakulikondelezya, alubo nga tulazichita biyeni?

¹⁶ Kuyungizya mukusala zyakulikondelezya zibotu, tweelede kuchenjelela chiindi nchitubelesya katulikondelezya. Kuti teetwachenjela, zyakulikondelezya zilakonzya kutumanina chiindi chakuchita zintu zyabukombi. Bantu biingi kulabayumina kuchibelesya kabotu chiindi muzintu zyakulikondelezya. Umwi muchizi uutegwa Abigail ulaaminyaka iili 18 wakati: “Kweebela TV kundigwasya kuti ndilyookezye nindikatede loko. Pesi chimwi chiindi  nga ndakkala chiindi chilamfu kandilikweebela TV.” Umwi mukwesu uuchikula uutegwa Samuel wakati: “Ndakabona kuti nga ndamaninsya chiindi chilamfu kandili kweebela tuvidiyo tujanika aIntaneti. Nga ndasaanguna kweebela kamwi kavidiyo pesi nga ndazoobona kandili ndaba ama-awa aatatu naakuti ali 4.”

¹⁷ Nga ulachita biyeni kuti utabelesyi chiindi chilamfu muzintu zyakulikondelezya? Nzila yakusaanguna, weelede kuziba chiindi nchubelesya muzintu zyakulikondelezya. Ulakonzya kulemba chiindi nchubelesya mumviki. Lemba akkalenda ma-awa ngubelesya kweebela TV, kulanga-langa zintu aIntaneti naakuti kusaana mageemu mufooni. Kuti wabona kuti ulikubelesya chiindi chilamfu, weelede kulemba aansi nzweelede kuchita. Saanguna kulemba zintu zyabukombi mpawo chiindi chitasyaale ulembe zintu zyakulikondelezya. Kuzwa waawo kumbila Jehova kuti akugwasye kukakatila kuzintu nzwaasala. Kuti wachita oobo, ulajana chiindi amanguzu aakuti ubale Bbayibbele awulikke, uchite kukomba kwampuli, uyinke kumiswaangano yambungano akwiinka kukukambawuka. Alubo tuzoolipi mulandu pe atala achiindi nchubelesya kukuchita zyakulikondelezya.

18-19. Nga tulatondeezya biyeni kuti tukomba Jehova alikke?

¹⁸ Naakamaninsya kulemba atala anyika mpya amamanino anyika yaSaatani, mwaapostolo Petro wakalemba kuti: “Nobayandwa, mbwaanga nywebo mulindila zintu eezyi, amusoleke kusikila mpomugolela kuti kumamanino akamujane kamutajisi kabala nokaba kampenda alimwi kamuli muluumuno.” (2 Pet. 3:14) Kuti twaswiilila malayilile aaya akuchita zyoonse nzitukonzya kuti tulijate kabotu akukomba Jehova munzila njayanda tunootondeezya kuti tukomba nguwe alikke.

¹⁹ Saatani anyika yakwe balazumanana kutusunka kuti tuchinche zintu nzitubikka mubusena bwakusaanguna. (Lk. 4:13) Nikuba kuti twaswaanana abuyumu-yumu, tatukazumizyi muntu naakuti chimwi chintu kuti chitukachizye kukomba Jehova. Tulilipedelede kukomba Jehova alikke nkaambo uleelela!