SIKULANGA-LANGA bwiime bwakunze naali kulanga-langa mbubuyooba bwiime bwakunze kabelesya tunchina twakwe, wabona kuti kuli guwo pati lili kuza aandawu iikkala bantu biingi. Akaambo kakuti ulabayanda bantu, ulabeleka changuzu kuti abachenjezye guwo kalitanasika.

Munzila iikozyenie, Jehova uchenjezya bantu atala ‘aguwo’ liyoosya kwiinda zintu nzibakonzya kumvwa mumalipoti aali atala abwiime bwakunze. Ulikuzichita biyeni eezi? Alubo nkamboonzi nitukonzya kuba achoonzyo chakuti Jehova upede bantu chiindi chiingi chakuti bachinche? Kuti tujane nsandulo zyamibuzyo eeyi, atusaangune kulanga-langa nchenjezyo nzyaakapa bantu bachiindi.

Chiindi, Jehova wakali kuchenjezya bantu atala ‘aguwo’ naakuti lubeta lwakwe ndwaakali kuyooyetela bantu bakatali kuswiilila milawu yakwe achaali. (Tus. 10:25; Jer. 30:23) Kufumbwa chiindi naakali kuyanda kunyonyoona bantu, wakali kusaanguna kubachenjezya kakuchili chiindi alubo wakali kubabuzya nzibakeelede kuchita kuti bachinche. (2 Bam. 17:12-15; Neh. 9:29, 30) Wakali kubelesya bakombi bakwe basyomeka kuti baambilizye atala alubeta lwakwe kuchitila kuti basungwaazye bantu kuti bachinche chakufwambaana.​—Am. 3:7.

Nowa ngumwi wabakombi baJehova bakali kusyomeka. Kwaminyaka myiingi, wakali kuchenjezya bantu bakali kuchita bwaamu akuyanda zyakulwana atala aZambangulwe lyakali kuyoochitika munyika yoonse. (Matl. 6:9-13, 17) Kuyungizya waawo, wakababuzya nzibakeelede kuchita kutegwa bafutuke. Akaambo kazeezi wakazootegwa ‘mukambausi wabululami.’​—2 Pet. 2:5.

Nikuba kuti Nowa wakali kubachenjezya bantu bakapona Zambangulwe kalitanasika, teebakawuswiilila pe mulumbe waLeza. Bakatondeezya kuti teebakali alusyomo pe. Nkinkaako, bakazoofwa chiindi Zambangulwe ‘nilyakaboola akubatola boonse.’ (Mt. 24:39; Heb. 11:7) Chiindi Zambangulwe nilyakasika, teebakamusola pe Leza kuti taakabachenjezya.

Chimwi chiindi Jehova wakali kuchenjezya bantu kakusyeede kayindi kaniini kuti ‘guwo’ lyalubeta lisaangune. Nikuba boobo, wakali kubapa chiindi chakuti bakonzye kuchincha. Muchikozyano, katanayeta Zipenzyo Zili 10 kubantu bakali kukkala muEgepita, wakali kusaanguna kubachenjezya kakuchisyeede chiindi. Jehova wakatuma Mozesi aAroni kuti bakachenjezye bantu atala achipenzyo chachi7, chachivulamabwe chakali kuyoonyonyoona zintu. Nikuba kuti chivulamabwe chakali kuyoosika buzuba bwakali kutobela, Jehova wakabapa na chiindi chakuti bakonzye kuyuba? Bbayibbele liti: “Muntu uuli woonse iwakayoowa jwi lya Jehova akati kababelesi ba Farao wakafwambaana kuyobolola babelesi bakwe azivwubwa zyakwe akuzinjizya mumaanda, pele muntu uuli woonse iwatakayoowa jwi lya Jehova wakalekela babelesi bakwe azivwubwa zyakwe musyokwe.” (Kul. 9:18-21) Zili aantanganana kuti Jehova wakabachenjezya kakuchili chiindi zyakuti bamwi bakalikwabilila kumapenzi akeetwa achivulamabwe.

Faro ababelesi bakwe bakachenjezegwa atala achipenzyo chachi10 pesi teebakaswiilila pe. Nkinkaako bana babo bakusaanguna bakafwa. Eezi zilachisa! (Kul. 11:4-10; 12:29) Bakachenjezegwa kakuchili chiindi na? Iiyi. Mozesi wakachenjezya maIsrayeli kuchipenzyo chachi10 alubo wakababuzya mbubakeelede kuchita kuti  balikwabilile kuchipenzyo eecho. (Kul. 12:21-28) Mbangane bantu bakaswiilila malayilile aaJehova? Kuyeeyelwa kuti mbantu bayinda mamiliyoni aatatu. Bantu aaba baswaanizya maIsrayeli, ‘ankamu yabantu batali bana Israyeli kubikkilizya abana Egepita’ bakaswiilila akuzwa muEgipita.​—Kul. 12:38; makani aamunsi.

Zikozyano eezi zitondeezya kuti Jehova wakali kuchenjezya bantu kakuchili chiindi. (Dt. 32:4) Nkamboonzi naakali kuchita oobo? Mwaapostolo Petro wakati Jehova “tayandi kuti muntu uuli woonse anyonyoonwe, pele uyanda kuti boonse bakonzye kweempwa.” (2 Pet. 3:9) Leza wakali kubachenjezya bantu nkaambo wakali kubayanda. Wakali kuyanda kuti bachinche akuti baswiilile nchenjezyo yakwe kataneeta lubeta lwakwe.​—Is. 48:17, 18; Rom. 2:4.

Mazubaano, bantu beelede kwiiswiilila chakufwambaana nchenjezyo iilikwaambilizigwa munyika yoonse. Naakali aanyika, Jesu wakaamba kuti bweende bwazintu oobu buyoomana muchiindi ‘chamapenzi mapati.’ (Mt. 24:21) Jesu wakabuzya batobeli bwakwe zintu zyakali kuyoochitika zyakali kuyootondeezya kuti lubeta lwaswena. Wakaamba zintu nzituli kubona mazubaano kazili kuchitika munyika yoonse.​—Mt. 24:3-12; Lk. 21:10-13.

Kweendelana azyakaambwa aJesu, Jehova uyanda kuti bantu basale kumubelekela akumuswiilila. Uyanda kuti bantu bamuswiilila bapone buumi bulikabotu lino akuti bazoojane zilongezyo munyika mpya. (2 Pet. 3:13) Kuti agwasye bantu kuti babe aalusyomo, Jehova wakatupa “makani mabotu aa Bwami” aapa kuti tufutulwe alubo Jesu wakati “ayookambaukwa munyika yoonse kuti bukabe bumboni kumasi oonse.” (Mt. 24:14) Jehova wakachita mabambe aakuti bakombi bakwe bakasimpe bape “bumboni” naakuti baambilizye mulumbe wakwe. Alubo eezi balikuzichita munyika zisika ku240. Jehova uyanda kuti bantu biingi loko bamvwe nchenjezyo eeyi akuti bakonzye kufutuka ‘kuguwo’ naakuti kulubeta lwakwe lululeme.​—Zef. 1:14, 15; 2:2, 3.

Twabona kuti Jehova upa nchenjezyo kakuchili chiindi kuchitila kuti bantu bachinche. Nzitwabona zitondeezya kuti tayeti lubeta kaatabachenjezede pe bantu. Pesi kuli mubuzyo uuyandikana usyaala wakuti: Bantu bayooswiilila nchenjezyo yaLeza kakuchili chiindi na? Mbutuli bakombi baJehova, atwiinkilile kunembo katugwasya bantu biingi kuti bakonzye kufutuka kulubeta lwaLeza.